Proverbs 25 - Ohiatonhseratokénti

Shé꞉kon Ne Solomon Raottokáhtshera

¹ Shé꞉kon á꞉re ne Solomon raottokháhtshera tehotihnaʼnetáhkwen ne ratihiá꞉tonhskwe tsi nón꞉we thén꞉teron Ronontí꞉io Hezekiah ne Judah.

² Ehtshitewarihwakweniénhstha ne Rawenni꞉io tsi nahò꞉ten shonkwarihwahsehtén꞉ni; ietirihwakweniénhsthat ne rotinontiió꞉shon tsi nahò꞉ten tehatirihwathé꞉tha.

³ Iáh nonwén꞉ton tesaterién꞉tare nahò꞉ten ranonhtónnions ne ronontí꞉io iáh oniʼ tshiaietewáhewe nahò꞉ten ranonhtónnions, ne taié꞉ren tsi nitiótte ne karonhià꞉ke tánon tsi niiohnó꞉teʼs ne kaniataraʼkehkó꞉wa.

⁴ É꞉ren shá꞉wit nahò꞉ten iáh aóskon té꞉ken ne kahwistarà꞉ken, sók ne rahwistón꞉ni ióhskats nahò꞉ten enháhsa.

⁵ É꞉ren sheiaʼtenhá꞉wiht ne iáh tethotirihwaié꞉ri ne ronontí꞉io ronwaʼnikonhrá꞉wis; sók ne raokoráhtshera enweʼnéhake tsi ioterihwakwaríhshion.

⁶ Nó꞉nen raohén꞉ton tènhstaʼne ne ronontí꞉io, tóhsa sateʼnién꞉ten è꞉neken ahsatatón꞉ni tánon ahséhrheke kenʼ tshennowá꞉nen.

⁷ Ne sénha ioiánere naesariʼwanón꞉tonhse sénha è꞉neken ahsaterihón꞉ten tsi ní꞉ioht ne aiesahró꞉ri akó꞉ren aontahshé꞉ion ne sanaktà꞉ke ne sénha è꞉neken tiakótte.

⁸ Tóhsa só꞉tsi tesasteríhen kaianerenhserà꞉ke niáhse tsi nahò꞉ten wahsatkáhtho. Oh nénhshiere tókaʼ akó꞉ren enierihwahní꞉rate tsi nahò꞉ten í꞉sen iáh tó꞉kenhske té꞉ken?

⁹ Tókaʼ í꞉se tánon tetsanonhsané꞉ken tentsatirihwatíha senirihwahserón꞉ni tsi naʼtetsátere tánon tóhsa oʼthé꞉nen senotáhsi nahò꞉ten kariʼwahséhton.

¹⁰ Ne ká꞉ti tiorí꞉wa akwé꞉kon eniakotó꞉kenʼse tsi iáh thahskwé꞉ni nahseriʼwáhsehte, tánon iáh nonwén꞉ton tshiaonteríhsi ne satehénhsera.

¹¹ Aionteʼnikonhrísa ne kwáh ieká꞉ien ne shá꞉ka ne thé꞉nen ohwistanó꞉ron tánon kahwistarà꞉ken ionniá꞉ton.

¹² Nónhka aiesahronká꞉ten ne orihwí꞉io tsi iakoterién꞉tare tánon nónhka iakotateweienentá꞉ʼon aiontahónhsatate, ne sénha shaʼtékena tsi ní꞉ioht ne ohwistanó꞉ron anisnónhsawi tánon ne kwáh tiohskatsténion ohwistanoronʼshón꞉ʼa.

¹³ Nónhka tsheniahé꞉sen ne rarihwakarénieʼs wé꞉so shaʼtékena, rawerienʼtí꞉ios ne iehotenniéhton, ne taié꞉ren tsi ní꞉ioht ne kwáh iohné꞉kano nó꞉nen kwáh tioʼtarí꞉hen tsi nikahá꞉wi ieienthókwas.

¹⁴ Nón꞉kwe ne oʼthé꞉nen enhatihrhá꞉ratste tánon iáh tho tehatiiéhrha, ne shá꞉ka ne iohtshatarónnion tánon ówera ne iáh tetkáhas naiokén꞉nore.

¹⁵ Tókaʼ saʼnikonhkátste nahò꞉ten ahsheʼnikón꞉ron ne ierihwaʼshátste, enwá꞉ton tenhsheʼnikonhraté꞉ni ók ó꞉ni ne ratikorahserowá꞉nenʼs.

¹⁶ Tóhsa ísiʼ non nènhseke ne otsiʼnahkontahkwá꞉ne ótsikheta naʼteiotonwentsó꞉hon; tókaʼ só꞉tsi wé꞉so énhseke entehsátstike.

¹⁷ Tóhsa só꞉tsi iotká꞉te shenatahré꞉nahs ne tesewanonhsané꞉ken; tókaʼ nón꞉wa eniesaterihonkó꞉ten tánon tho néntewe eniesáhswen.

¹⁸ Tóka iáh tetkariwaié꞉ri nahò꞉ten aiesarihwáhrho, ne shá꞉ka ne aʼshareʼkó꞉wa, kanà꞉kare, tókaʼ ó꞉ni kaièn꞉kwire ne kwáh tiohioʼthí꞉ie áhonste aiesàriohte.

¹⁹ Nónhka ahshehrhá꞉reke ne iáh teiakorihwató꞉ken nó꞉nen oʼthé꞉nen tenwatierónnion ne shá꞉ka ne ahsateʼnién꞉ten tahsatská꞉hon tókaʼ ioʼnhétska ne sanawì꞉ra, tókaʼ ó꞉ni ahsahtentión꞉ko tóka tesarahsiʼtià꞉kon.

²⁰ Ahsheiaterennóthahse nónhka iakoʼnikonhrèn꞉ton ne táhseren ahseríhsi akotsherónnia nó꞉nen iawenhniserá꞉no tókaʼ ó꞉ni tiohió꞉tsis ahseránie tsi nón꞉we iáh tetsóhnare.

²¹ Tókaʼ ne iesáhswenhs rontonhkáriaʼks, shé꞉nonht; tókaʼ rotiniaʼtáthenhs, shehné꞉kanonʼt.

²² Enhsheiatéhaʼte tánon Roiá꞉ner tenhiarihwaʼserákwaʼse.

²³ Taierihwenhá꞉wihte nek tkáhas kanaʼkhwénhsera ne taié꞉ren tsi oʼthorè꞉ke ówera tewatenniéhtha naiokén꞉nore.

²⁴ Ne sénha ioiánere tsi karonhkweʼnáhere ahsiʼteròn꞉take tsi ní꞉ioht ne skátne aieseniʼteròn꞉take ne seniniá꞉kon ne iakotewennaientón꞉tskon.

²⁵ Kháre ó꞉nen wahserihwá꞉ronke karihwí꞉ioʼs í꞉non tionhwentsà꞉te nontá꞉we ne shá꞉ka nahshnekí꞉ra iohné꞉kano nó꞉nen kwáh saniaʼtáthenhs.

²⁶ Tókaʼ ne tiakorihwaié꞉ri iaiontateʼnikonhrénhawe ne ionkweʼtahétken ne sehiahrahkwén꞉nis tsi kahnekáksen tsi nón꞉we tiohné꞉kote tókaʼ ó꞉ni kahnekaksá꞉ton.

²⁷ Só꞉tsi wé꞉so ne otsiʼnahkontahkwá꞉ne oʼtsikheta iáh teioiánere ne sarihwà꞉ke. Ók ó꞉ni tókaʼ ahsateʼnién꞉ten ne wé꞉so taiesarénhsaron, iáh teioiánere.

²⁸ Tókaʼ iáh thahskwé꞉ni ne sanaʼkhwénhsera naontahsanón꞉tonʼse, iáh ká꞉ti tesahshatstenhserá꞉ien, ne shá꞉ka tókaʼ tsi tkaná꞉taien ne iáh thatetkentstén꞉rote tekahnhohóntion watié꞉sen ne ahatinataká꞉ri.