Proverbs 23 - Ohiatonhseratokénti

-6-

¹ Nó꞉nen enhsátien tenhsatská꞉hon taietsatón꞉te nónhka rahsennowá꞉nen, sehià꞉rak tsi è꞉neken thótte.

² Tókaʼ sekʼhowá꞉nen satatié꞉na tóhsa wé꞉so í꞉sek.

³ Tóhsa kwéskwes satatón꞉ni, kakhwí꞉io nahò꞉ten enhià꞉nonte, tókaʼ nón꞉wa nek ne iateʼnienténhse.

-7-

⁴ Kwáh iatekaièn꞉tak tsi tesaʼnikonhrátheʼk ne tóhsa tahsatatwishenhé꞉iaʼte tsi sateʼniéntha naesakwáhtsheʼne.

⁵ Sahwísta iohsnó꞉re ienwáhtshaʼahte tsi shí꞉ken taonttsiraríkhon tánon waʼtkanerahontshón꞉taʼne tsi ní꞉ioht ne á꞉kweʼks waʼtká꞉ten.

-8-

⁶ Tóhsa tesatská꞉hon raotekhwahraʼtsherákta ne roní꞉ʼon, tóhsa ó꞉ni kwéskwes satatón꞉ni ne kakhwí꞉io enhiá꞉tatshe.

⁷ Wahèn꞉ron, “Háʼo shé꞉kon sasatatéhrhahs,” iáh kiʼ tho tehorihò꞉ten, aseʼkénh tsi nahò꞉ten ranonhtónnion tho kiʼ ó꞉ni nihaiaʼtò꞉ten.

⁸ Entehsátstike tsi nahò꞉ten wáhseke, tánon tsi nahò꞉ten waʼtehtsherènhsaron enkaiésha.

-9-

⁹ Tóhsa sateʼnién꞉ten taiesenihthá꞉ren ne nahò꞉ten orí꞉wa ne tehotenonhwarorí꞉tonte; aseʼkénh iáh tehó꞉ien nahawerienʼtí꞉io.

-10-

¹⁰ Tóhsa nonwén꞉ton iahá꞉srek tsi karistí꞉seron nonhwéntsa tánon tóhsa nonwén꞉ton shéhkhwa raononhwéntsa ne ratiksaʼokón꞉ʼa tehonatonhnhakarí꞉ʼon.

¹¹ Roiá꞉ner ne roʼshatstenhserowá꞉nen tehshakóhnhes tánon tenhariʼwakéhnha ne raotirhwà꞉ke.

-11-

¹² Satahónhsatat nónhka iesarihonnién꞉ni tsi ní꞉kon enhskwé꞉ni nahseweientéhtaʼne.

-12-

¹³ Tóhsa tesanonhià꞉nik nahshehré꞉wahte sheienʼokón꞉ʼa. Iáh thahotíriohte ne tahshehnà꞉tsheke.

¹⁴ Tókaʼ nón꞉wa ne enkarihón꞉ni enhotiʼniá꞉kenhte.

-13-

¹⁵ Konién꞉ʼa, tókaʼ tensaʼnikonhrátheʼne, wé꞉so tsi enkatshennón꞉ni.

¹⁶ Enkená꞉ieʼne nó꞉nen enwakathón꞉teʼne tsi sáhthare nattokháhtshera owennaʼshón꞉ʼa.

-14-

¹⁷ Tóhsa sheiahská꞉nek ne rotirihwanerenʼákskon; nek etskweniènhsthak ne Roiá꞉ner nek tetská꞉nerak ní꞉se tsi sónhnhe.

¹⁸ Tóka tho ní꞉ioht tiótkon tsi nén꞉we kiʼ tsi tensaswátheʼke.

-15-

¹⁹ Satahónhsatat, konién꞉ʼa, sattokhahtsheriióhak tánon kwáh tokén꞉ʼen sanonhtonnión꞉ko tsi ní꞉ioht tsi sonhnhétie.

²⁰ Tóhsa skátne sewé꞉shek nón꞉kwe só꞉tsi wé꞉so otsí꞉tsa ratihnekíhrha, tókaʼ oniʼ ne kákhwa roʼnohetstáhkhwa tsi rón꞉neks.

²¹ Ne ratihnekaká꞉stha tánon ronnitshéhohs ne entkáhawe tsi enhotiténhton. Tókaʼ nek sarí꞉waien tahsahtská꞉hon tánon aiesén꞉taʼwe iohsnó꞉re otkaróhkwa enwá꞉ton ne satsherónnia.

-16-

²² Etshatahónhsatat ne iaʼníha; tókaʼ iáh ráonha thaʼkénhake iáh kiʼ kén꞉ʼen thashéhseke. Nó꞉nen saʼnisténha entiakó꞉ionʼne shenaʼtón꞉hahs tsi sherihwakweniénhstha.

²³ Ne orihwí꞉io, attokháhtshera, karihonnienníhtshera tánon wanonhtonnionhtsherí꞉io ne kí꞉ken akwé꞉kon shaʼtékena nahskáriaʼke, nok só꞉tsi wé꞉so shaʼtékena nahsatenhní꞉non.

²⁴ Tókaʼ tehsonkweʼtaié꞉ri, rotí꞉ien kiʼ né꞉ʼe iesaién꞉ʼa nahonatonhnhá꞉rake. Tánon enwá꞉ton nahshená꞉ieʼne tókaʼ sawí꞉raien ne rattokhahtsherí꞉io.

²⁵ Tashé꞉ion iaʼníha tánon saʼnisténha nahniná꞉ieʼne ní꞉se sarihwà꞉ke; tahshé꞉ion saʼnisténha naiakotonhnhá꞉rake.

-17-

²⁶ Satahonhsí꞉iohst, konién꞉ʼa, tánon tsi kónhnhe satenonwará꞉ko.

²⁷ Waʼthonwisenʼtsheráksen tánon konnón꞉kwe ne iáh tetiotirihwaié꞉ri eʼthó nikontiiaʼtó꞉ten tsi ní꞉ioht ne iakoʼwènthohs waterístaien.

²⁸ Tiesahrhá꞉re tsi ní꞉iot ne ratinénhskwas, tánon onónha aotirí꞉wa ne ronnón꞉kwe nahontenahkwaié꞉sahteʼ.

-18-

^29-30 Takenaʼtón꞉hahs nón꞉kwe só꞉tsi wé꞉so ratihnekíhrha, tánon wé꞉so niaʼtekahné꞉kake enhóntkenʼse, tánon enkonnaʼtón꞉hahse nón꞉kwe ne iáh tehonatonhnháhere tánon rontatí꞉tenhre, tiótkon nek ne tahshakonaʼnikonhrhá꞉ren tánon rotirihwakaʼtén꞉ʼen. Tiotenekwà꞉ra ne ratikahrà꞉ke, tánon ronatkarewahtánion, aiotón꞉ʼon tóhsa eʼthó naiawén꞉ʼen.

³¹ Tóhsa otsí꞉tsa ohné꞉ka tesarenʼkén꞉ni, aronhátien tsi kanekwenhtarí꞉io tánon wathnekatákwas tánon watié꞉sen tsi ienhsahnéhkwane.

³² Tsi enióhrhenʼne íhsehreʼk tsi ní꞉ioht ne tókaʼ iothniarátteron sakárien.

³³ Niaʼté꞉kon teiotierónnion enhsatkahthóhseron, iáh thahskwé꞉ni nahsanonhtonnión꞉ko tánon orí꞉wa tsi ní꞉ioht tsi ahsatà꞉ti.

³⁴ Tho oni tsi íhsehre tsi shí꞉ken kaniataraʼkehkó꞉wa iéhseʼs, tisanewaraʼtén꞉ni tsi shí꞉ken sathonwíhare tsi kanáhstote kahonweiaʼkowàhne.

³⁵ “Kwáh í꞉kehre oʼthé꞉nen ónhte tewakkwáhton,” enhsì꞉ron; “Í꞉kehre ónhkaʼk ionkerióhshion, iáh kiʼ teké꞉iahre. Oh nekén꞉ʼen nontié꞉ren tsi iáh tétieʼs? Teiotonhwentsóhon shé꞉kon naonsahknekí꞉ra.”