Proverbs 20 - Ohiatonhseratokénti

¹ Só꞉tsi wé꞉so enhsnekí꞉ra tesaterienʼtakáriatonke tánon ensanonhwaró꞉rike. Teiotenonhwarorí꞉tonte naiakohné꞉kataʼne.

² Etshetshahní꞉shek ne ronontí꞉io nó꞉nen ronaʼkhwén꞉ʼen tsi ní꞉ioht tsi nihawennò꞉ten ne kèn꞉reʼks; enhtshenaʼkón꞉ni ne shaʼté꞉ioht ne ahsatatáhtenonwarhiakon.

³ Thiʼkawenní꞉io ónhka tehotenonhwarorí꞉tonte aontahatáhsawen ne tahaterihwakén꞉ni; ne ioiánere é꞉ren satatiatenhá꞉wiht.

⁴ Ne raiénthos só꞉tsi rentóhrha nahenʼtarakahrhátho ne rothéhtaien tsi nikahá꞉wi teiotonhwentsóhon, iáh oʼthé꞉nen kiʼ thahaienthó꞉ko.

⁵ Nón꞉kwe akononhtonniónhtshera ne shá꞉ka ne tokʼniiohnó꞉teske ohnawerá꞉kon, nónhka iakoʼnikonhraientáhtskon ienieièn꞉tereʼne tsi nahò꞉ten ionnonhtónnions.

⁶ Akwé꞉kon rón꞉ton rorihwató꞉ken tánon tharihwaié꞉rits, nek sateʼnién꞉ten ki ahtshiaʼtatshénriaʼse nónhka tho nihaiaʼtò꞉ten!

⁷ Ronatáhska ratiksaʼokón꞉ʼa tókaʼ rotiʼní꞉sen ne rorihwakwaríhshion tánon tho nihaiéhrha tsi nahò꞉ten tkariwaié꞉ri.

⁸ Ronontí꞉io tehshakoiaʼtoréhtha tánon roterién꞉tare nó꞉nen enhatkáhtho iáh tetkariwaié꞉ri.

⁹ Ónhka kenh enhakwé꞉ni nahén꞉ron akwé꞉kon ioiánere tsi ranonhtónnionhs; é꞉ren rohawíhton tsi rorihwanéren?

¹⁰ Roiá꞉ner shakotahkwáhswenhs nón꞉kwe ieʼnikonhrhá꞉tha ne tehshakonatoʼktahkwén꞉nis tsi iekonʼtsheriháhrha tánon iontenienténhsthakwa.

¹¹ Ók ó꞉ni ratiksaʼokón꞉ʼa wé꞉ne tsi nikaksaʼtò꞉ten tsi nihontiéhrha; enhsáttoke tókaʼ rotirihwakwaríhshion tánon ratiksaʼtí꞉io.

¹² Roiá꞉ner tehsonkwá꞉wi okà꞉ra naietewatkáhtho tánon ohónhta ne aionkwaʼthón꞉teʼne.

¹³ Tókaʼ tió꞉konteʼ sèn꞉taʼs, ensenténhtaʼne kiʼ. Tesatateweienhá꞉rat tánon wé꞉so ensaièn꞉take náhseke.

¹⁴ Rón꞉kwe nahò꞉ten rahní꞉nons tiótkon rorihwakaʼtén꞉ʼen só꞉tsi kanó꞉ron, sók tenhataterénhsaron tsi tahatihserón꞉nente tsi nahakáriaʼke.

¹⁵ Tókaʼ saterién꞉tare nahò꞉ten sahtharáhkwen, ne ki sénha kanó꞉ron sá꞉ien tsi ní꞉ioht ne ohwistanoronʼshón꞉ʼa.

¹⁶ Nónhka tehotenonhwarorí꞉tonte ne ahahrhá꞉ratste aonsahakáriaʼke tsi rotká꞉rote ne iáh tehoienté꞉ri, nek tsi raonhwentsá꞉ien iaʼténkene tsi enhshakáriaʼke.

¹⁷ Nahò꞉ten ensaièn꞉taʼne ne kaʼnikonhrhá꞉ton tho ni꞉iot tsi ensé꞉ke tsi ní꞉iot ne kwáh kakhwí꞉io, nek tsi iohsnó꞉re tsi ní꞉ioht ne oʼnehsarónhkwa thentká꞉raʼne tshà꞉kon.

¹⁸ Kaʼnikonhrí꞉io séhsak tánon ensaterihwahténtiaʼse; tóhsa iaʼhase tsi nón꞉we tewaterí꞉io tókaʼ iáh tesateʼnikonhrón꞉ni.

¹⁹ Ne tekarihwenʼahwí꞉ton iáh nonwén꞉ton thaʼonteriʼwáhsehte. É꞉ren í꞉seht nón꞉kwe ne iakoterihwatié꞉ni.

²⁰ Tókaʼ enhshekenhrenʼsenón꞉ni iesaién꞉ʼa, tsi sónhnhe enwató꞉kten tsi ní꞉ioht ne oháhsera aón꞉swa nó꞉nen tetió꞉karas.

²¹ Sénha watié꞉sen tsi aiesakwáhtsheʼne, ká꞉ron ki nenhsatshennónniaʼte.

²² Tóhsa ní꞉se saskáriaʼkt nahò꞉ten wahétken. Tsheniáhes Roiá꞉ner ne enharihwakwatá꞉ko.

²³ Roiá꞉ner shakóhswenhs nón꞉kwe ieʼnikonhrhá꞉tha tehshakonatoʼktahkwén꞉ni tsi enhatikhonʼtsherihá꞉ren.

²⁴ Roiá꞉ner roteʼnikonhríson tsi niionkwahahó꞉ten; ónhka ká꞉ti eniakoʼnikonhraién꞉taʼne ne ráonha tsi nihohahò꞉ten?

²⁵ Seʼnikón꞉rarak tsi nahò꞉ten enhsanonhtónnionhwe ohén꞉ton nenhtshaʼrharátsten naontahtsion ne Rawenni꞉io. Tókaʼ nón꞉wa ensehsatateriʼwáhsten ohnaʼkèn꞉kha.

²⁶ Ronontí꞉io ne raʼnikonhraweiénhon enharihwatshén꞉ri nónhka karihwahétken tsi nihatiéhrha, iáh thahó꞉tenhre tsi ni꞉iot tsi enhohré꞉wahte.

²⁷ Roiá꞉ner tehsonkwá꞉wi noʼnikòn꞉ra naionkwaterién꞉tarake nahò꞉ten ne tkariwaié꞉ri nahò꞉ten ó꞉ni ne wahétken; iáh thaʼón꞉ton naetewáhsehte tsi nitewatiéhrha.

²⁸ Ronontí꞉io enhoʼshatstenhseraièn꞉take tsi nikarí꞉wes rorihwakwaríhshion tánon thorihwaié꞉ri.

²⁹ Watkahthohtsherí꞉io raotiʼshatsténhsera ne kenʼnithotiién꞉sa nok ne rotikstenʼokón꞉ʼa ó꞉nen rotiʼnonhkwareʼtarà꞉ken aó꞉wenk naiethikwénienhsteʼ.

³⁰ Sewatié꞉renʼs iohkará꞉renht tsi nahò꞉ten teionkwatohetstánion ne ki entkáhawe taonsetewatonhnhaté꞉ni.