Proverbs 19 - Ohiatonhseratokénti

¹ Ne sénha ioiánere naiesenténhton tánon aontesarihwaié꞉rike tsi ní꞉ioht naiesanonhwaró꞉rike tánon naiesanowénhake.

² Tókaʼ serihwakaʼrí꞉tats nahò꞉ten iáh tshiekaié꞉ri tesaterién꞉tare iáh kiʼ teioiánere; tókaʼ iáh tesaʼnikonhrí꞉io tenhsaʼnikonhrhá꞉ren kiʼ.

³ Ótiaʼke nón꞉kwe eniontatkarón꞉ni tókaʼ ohnonhwarorí꞉ta tsi ní꞉ioht tsi iontonhianorónkwahs tánon enthonwàrahse Roiá꞉ner.

⁴ Rotikwahtshénion watié꞉sen nahontenroʼseratshén꞉ri nok ne rotitenhténion iáh nen né꞉ʼe tho tewatié꞉sen nahonatenroʼséntake.

⁵ Tókaʼ enhsanó꞉wenhte tsi ieiaʼtorehtáhkhwa, eniesahré꞉wahte—iáh thahseʼniá꞉kenʼne.

⁶ Akwé꞉kon ionteʼniéntha ne è꞉neken thonátte aontón꞉sheke ahshakotirí꞉wawaʼse; akwé꞉kon ionhská꞉neks naiakotenroʼseraièn꞉take nónhka tehshakoná꞉wis ne kaiaʼtakehnháhtshera.

⁷ Ók ó꞉ni ne ró꞉ten raohwá꞉tsire ronwakenhrón꞉ni; iáh ki teionehráhkwa tsi iáh tehotenroʼserá꞉ien. Iáh theʼtewatsteríhstha tho ni꞉iot tsi ahateʼnién꞉ten iáh kiʼ thahatkwé꞉ni nahateroʼserón꞉ni.

⁸ Thaʼsatateweientón꞉hahs satéweienhst tsi ní꞉kon enhskwé꞉ni; sehià꞉rak nahò꞉ten wahseweientéhtaʼne sók ensakwáhtsheʼne.

⁹ Iáh ónhka ne ionnowenhtánions tsi ieiaʼtorehtáhkhwa thaieʼniá꞉kenʼne naiontré꞉wahte; rothrewáhton.

¹⁰ Nónhka tehonatenonhwahrorí꞉tonte iáh thaʼtehonatèn꞉tson kakwahtshehserá꞉kon ahatiʼteròn꞉take, tánon ratihnhá꞉tshera tóhsa ne è꞉neken ahonterihwá꞉rahkwe ohén꞉ton ne ratihsennowá꞉nenʼs.

¹¹ Tókaʼ sattokhahtsherí꞉io enhskwé꞉ni ki aontahseniaro꞉taroʼke ne sanaʼkhwénhsera. Nó꞉nen ónhka eniesaʼnikonhráksaʼte, ne iorihowá꞉nen tókaʼ enhskwé꞉ni tóhsa tahserihwáhshnieʼne.

¹² Ronontí꞉io raonaʼkhwènhsera ne shá꞉ka ne kèn꞉reʼks tsi ratonriá꞉iens, nok ne tókaʼ enhtshateweientón꞉hahse ne táhseren tsi ni iotshennónnia nó꞉nen eniokén꞉nore.

¹³ Ne iáh thaʼtehotiʼnikonhráthe ratiksaʼokón꞉ʼa, niaʼté꞉kon entkáhawe nahotikarón꞉ni ne ronwatiién꞉ʼa. Ne iáh thaʼtehotiʼnikonhráthe shakotiienʼokón꞉ʼa entkáhawe niaʼté꞉kon ahontkarón꞉ni. Rón꞉kwe ronià꞉kon ne tió꞉konteʼ iakorihwakatèn꞉ʼen ne shá꞉ka ne tió꞉konteʼ ohné꞉kanos iotshánhon.

¹⁴ Rón꞉kwe enwá꞉ton nahonwahiatonhserónnien kanónhsa tánon ohwísta, nek tsi Roiá꞉ner khók enhakwé꞉ni naontahonwatenniéhten ne tiakorihwaié꞉ri nahóniake.

¹⁵ Waʼs ká꞉ti, sentóhrhak, sèn꞉taf, nok ki enhsatonhkáriaʼke.

¹⁶ Shá꞉wak Rawenni꞉io raoianerénhsera tánon karí꞉wes enhshónhnheke; tókaʼ iáh thaʼshié꞉na, enhsíheie kiʼ.

¹⁷ Nó꞉nen enshé꞉ion ne iakó꞉ten, ne shá꞉oriwa ne ahtshé꞉ni ne Roiá꞉ner tánon Roiá꞉ner enhshiakáriaʼkse.

¹⁸ Sheriwakwaríhshien sheienʼokón꞉ʼa tsi nikarí꞉wes kenʼnihonná꞉sa nahatiweientéhtaʼne tsi nahò꞉ten ne tkariwaié꞉ri. Tókaʼ iáh tho tháhshiere sheienawá꞉se nahontatáhtonʼte.

¹⁹ Tókaʼ ónhka ranaʼkhwahseró꞉hen, ráonha kiʼ ratkéhtat tsi neniá꞉wenʼne. Tókaʼ ká꞉ti énska ienká꞉ienhte nahtsheʼniá꞉kenhte, ó꞉nenk kiʼ tsi shé꞉kon ensehtsheʼniá꞉kenhte.

²⁰ Tókaʼ enhsatahónhsatate ne kaʼnikonhrí꞉io tánon thoʼnisaʼnikonhró꞉ten nahseweientéhtaʼne, entewenhnisera꞉teke tensaʼnikonhrátheʼne.

²¹ Nón꞉kwe niaʼté꞉kon tsi ni tsi ahonteʼnikonhrísa, nok ki Roiá꞉ner tsi nihoʼnikonhró꞉ten eʼthó ki neniá꞉wenʼne.

²² Ioterihwatéha ne iakotétshen; rotí꞉ten ne sénha ioiánere tsi ronnónhnhe tsi ní꞉ioht ne rotinó꞉wenʼs.

²³ Tshewènienstat ne Roiá꞉ner tánon karí꞉wes enhshónhnheke, skén꞉nen enhsanonhtonniónhake tánon ensaiaʼtanónhstate nahò꞉ten ahsatkarón꞉ni.

²⁴ Ótiaʼke nón꞉kwe só꞉tsi iakentóhrha natenná꞉tshera tsi iehshaká꞉ronte iaiakéta.

²⁵ Atkanronniáhtshera teiotonhwentsóhon akahrewáhton, ó꞉nen ki nen né꞉ʼe nón꞉kwe ne iáh tshiekaié꞉ri teiakoterién꞉tare enwá꞉ton naieweientéhtaʼne. Tókaʼ ká꞉ti tesaʼnikonhráthe, enhseweientéhtaʼne nónhka aiesarihwakwaríhshien.

²⁶ Nek ne kwáh iotonkwetatéha tánon rotatshennaksá꞉ton rón꞉kwe tenhoteriahtíkhon roʼníha tókaʼ ó꞉ni roʼnisténha aontahshakoiaʼtínekenhwe ne raonónhskon.

²⁷ Konién꞉ʼa, nó꞉nen enhsatoríhshen tsi sateweiénhstha iohsnó꞉re entsisaʼnikónhrhen nahò꞉ten saweientehtá꞉ʼon.

²⁸ Iáh theteká꞉ien naterihwakwarihshiónhtshera ne iakoteʼnikonhríson naierihwahní꞉rate nónhka aiontatkarón꞉ni. Nón꞉kwe iáh tetiakorihwaié꞉ri ienorónhkhwa tsi nahò꞉ten ne karihwáksen.

²⁹ Nónhka rontatkweniénhstha tánon rotinonhwaró꞉ri kwáh orihwí꞉io tsi ronnéhsaks nónhka ahonwanonwenhserário.