Proverbs 18 - Ohiatonhseratokénti

¹ Nón꞉kwe ne iáh tehontén꞉ros nakohrèn꞉shon rononhá꞉ʼa khók rontaté꞉iahre; akwé꞉kon ratirihwáiaʼks tsi nahò꞉ten akohrèn꞉shon ronaterién꞉tare nahò꞉ten tkariwaié꞉ri.

² Nónhka tehotenonhwarorí꞉tonte iáh oʼthé꞉nen tehatsteríhstha tókaʼ kenh roʼnikonhraién꞉taʼs tókaʼ oni iáh; nek khók tehotonhwentsó꞉ni nahshakonaʼtón꞉hahse tsi niió꞉re tsi í꞉rehre tehoʼnikonhráthe.

³ Karihwaksenʼó꞉kon tánon atehénhsera ne íkene. Nok tókaʼ ensá꞉ti ne atatkwenienhstáhtshera, ne iaʼtensewatté꞉ni thenʼiesaié꞉ron.

⁴ Nón꞉kwe nakowennaʼshón꞉ʼa enwá꞉ton ne entkáhawe attokháhtshera, ne taié꞉ren tsi niiohnó꞉teʼs kaniataraʼkehkó꞉wa, tánon tsi nikahnekí꞉io tsi kahionhatátie.

⁵ Iáh tetkariwaié꞉ri naontahshéhnhe nón꞉kwe iakohnhí꞉kon tánon naontahsheiatoktákwen ne aterihwakwarihshiónhtshera nónhka iáh oʼthé꞉nen teiakohnhí꞉kon.

⁶ Nó꞉nen onka ne teotenonhwaro꞉ritonhte enthatasawen ne tahariʼwakéhnha rariʼwanóntha nahonwanonhwenhserário.

⁷ Nó꞉nen rononhwaró꞉ri enthatà꞉ti ehtà꞉ke nienhatáthawe; tsi waterístaien enhoié꞉na tsi ní꞉ioht tsi róhthare.

⁸ Taierihwenhá꞉wihte tsi iawékon tewanón꞉weʼs iaietewahnéhkwane!

⁹ Ón꞉kwe ne iakentóhrha shaʼtewahétken tsi ní꞉ioht ne ónhka ionteronʼónhtha.

¹⁰ Roiá꞉ner ne táhtsheren ne kwáh tioʼnikahtaʼní꞉ron, tsi nón꞉we enwá꞉ton niá꞉ien ne tionkweʼtaié꞉ri ne skén꞉nen aionnonhtonniónhake.

¹¹ Sók ne rotikwáhtshe rón꞉nehreʼk raotikwahtshéhsera enhotinónhstate tsi shí꞉ken ní꞉ioht ne kwáh iorihwahní꞉ron è꞉neken tiótte tewahsónhtote teiohkwatasé꞉ton tsi kaná꞉taien.

¹² Iáh ónhka thatskwénienhste tsik roniténhton; nón꞉kwe iontatón꞉ni tho néntewe tsi eniontatkarón꞉ni.

¹³ Satahónhsatat ohén꞉ton ne tenhserihwaʼserá꞉ko. Tókaʼ iáh tho tháhshiere iáh ki thaʼtesaʼnikonhráthe tánon enhsheʼnikonhrakaré꞉wahte.

¹⁴ Tsi sanonhtónnions sahská꞉neks nahshónhnheke ne ensáhawe nó꞉nen sanonhwáktani, tókaʼ ensá꞉ti, enwatóhetste ne sahrharáhtshera.

¹⁵ Nón꞉kwe né teiakoʼnikonhráthe tiótkon iakotateweienentá꞉ʼon nahò꞉ten aieweientéhtaʼne.

¹⁶ Tesatonwenhtsó꞉ni kenh taietsatátken nónhka iehsennowá꞉nen? Ne sénha watié꞉sen iáhshawe tsi okʼnahò꞉tenk ahshé꞉ion.

¹⁷ Ónhka enthatié꞉renhte enhatá꞉ti tsi teieiaʼtorehtáhkhwa tsi ní꞉ioht ne tkariwaié꞉ri, tsik tenhiatewennotón꞉ko ne ohén꞉ton thotá꞉tihon tánon enhoriʼwanontonniónhahse.

¹⁸ Tókaʼ tetsà꞉ron nirihwaʼshátste tehorihwakéhnhen tsi teieiaʼtorehtáhkhwa, nó꞉nen enkaʼwahstótion tsi iatenkarihwaién꞉taʼne enkarí꞉wenʼne kiʼ.

¹⁹ Sheiaʼtakéhnha ne sewatátenonhkwe tánon ronónha ó꞉ni eniesaiaʼtanónhstate tsi ní꞉ioht ne kanatowá꞉nen tewahsónhtote otstèn꞉ra. Tókaʼ tensewaterihwakén꞉ni enthatihnhó꞉ton tsi ronatehnhonhká꞉ronte ne sarihwà꞉ke.

²⁰ Enhshá꞉wake tiótkon tsi neniá꞉wenʼne nahò꞉ten entehsatá꞉ti.

²¹ Tsi nahò꞉ten enhsì꞉ron enkakwé꞉ni nakanónhstate natónhnhets, tókaʼ ó꞉ni akarihwáhtonʼte; ó꞉nenk ká꞉ti tsi enhshié꞉na tsi neniá꞉wenʼne nahò꞉ten entehsewennínekenʼne.

²² Tókaʼ enhsetshén꞉ri naesániake enhsetshén꞉ri ne ioiánere, wé꞉ne Roiá꞉ner tenhiarihwáhshnieʼse.

²³ Nó꞉nen nonkwehshón꞉ʼa ne rotí꞉ten enthontá꞉ti, ó꞉nenk tsi ronaniténhton, nok ne rotikwáhtshe ronatewennátkon nó꞉nen tenhatirihwaʼserá꞉ko.

²⁴ Ótiaʼke natenró꞉sera iáh shaʼtékena té꞉ken, ótiaʼke natenró꞉sera ísiʼ nón꞉we tsi rotirihwató꞉ken tsi ní꞉ioht ne rontateʼkenʼokón꞉ʼa.