Proverbs 17 - Ohiatonhseratokénti

¹ Ne sénha ioiánere ionaʼwatsistahní꞉ron kaná꞉taro áhseke tánon skén꞉nen ahsanonhtonniónhake tsi ní꞉ioht ne akakhwá꞉rake tánon tetkáhere kaʼnikonhrharáhtshera kanónhskon.

² Kí꞉ken rahnhá꞉tshera rattokhahtsherí꞉io ne è꞉neken enhshotohetstáhkwen ne raiaʼtakweʼní꞉io roién꞉ʼa ne tsi tehotenonhwarorí꞉tonte tánon ne rahnhá꞉tshera knahò꞉tenʼk enhaié꞉na ne kakwahtshéhtshera.

³ Ohwistanó꞉ron tánon kahwistarà꞉ken tsi iotékha teionatohétston, nok nón꞉kwe akawé꞉ri Roiá꞉ner ne nen né꞉ʼe tenhaiaʼtó꞉rehte.

⁴ Nón꞉kwe ne iáh tetiakorihwaié꞉ri ne iontahónhsatats nahò꞉ten karihwáksenʼs, tánon ne rotinó꞉wenʼs onó꞉wen ne rontahónhsatats.

⁵ Tókaʼ thenhsheié꞉ron iakotenhténion, entsheʼnikonhrakaré꞉wahte Rawenni꞉io aseʼkénh ne shakoiaʼtíson. Ensatré꞉wahte tókaʼ enhsatshennón꞉ni nónhka iakoteraʼswaksén꞉ʼen.

⁶ Kahsótshera ratiná꞉ie tsi nonkwá ne shakonatereʼokón꞉ʼa, ne shá꞉ka ne eksaʼokón꞉ʼa ratiná꞉ie tsi rotiʼnisténhsen tánon rotiʼníhsen.

⁷ Nón꞉kwe iakotonkweʼtatkwénienhs iáh teiakonó꞉wen, nón꞉kwe ne teiakotenonhwarorí꞉tonte iáh shaʼtékena té꞉ken nahò꞉ten enhonní꞉ron.

⁸ Ótiaʼke nón꞉kwe í꞉ienhreʼk tókaʼ entehswistakeʼtó꞉ten ne eniakohskátsten; tsi ni꞉iot tsi thonehtáhkwen akwé꞉kon ne enkakwatá꞉ko.

⁹ Tókaʼ íhsehre nón꞉kwe aiesanón꞉weʼne, sasheʼnikónhrhens nó꞉nen eniesakarón꞉ni. Tókaʼ enhsehiá꞉rake nahò꞉ten ioʼtáksenʼs tenhtsatenroʼseráksenʼne kiʼ.

¹⁰ Nón꞉kwe ne teiakoʼnikonhráthe sénha wé꞉so enieweientéhtaʼne ne énska khók aiontattéhten tsi ní꞉ioht tehotenonhwarorí꞉tonte ók ó꞉ni énska tewenʼniáwe ahonwanonhwáreʼke iáh ki thahaweientéhtaʼne.

¹¹ Kenhé꞉ion éntewe tsi ní꞉ioht iáh tehotennitenrá꞉tskon rarihwakarénieʼs tsi nonkwá ne iáh tetionkweʼtaié꞉ri ne tsi tiótkon kaʼnikonhrharáhtshera tehonawénrie.

¹² Ne sénha ioiánere taietsàteraʼne ne konwaʼnisténha ohkwá꞉ri konwawiranénhskwen tsi ní꞉ioht ne taietsàteraʼne rononhwaró꞉ri iáh orí꞉wa té꞉ken tsi nihatiéhrha.

¹³ Tókaʼ ne enseskáriaʼkte ne wahétken ne aonaktà꞉ke ne ioiánere, iáh ki nonwén꞉ton é꞉ren thá꞉wehte ne ioʼtáksen ne sanónhskon.

¹⁴ Nentewatáhsawen tahsatewennotón꞉ko ne shá꞉ka aontontié꞉renhte ne taká꞉rihte ohné꞉ka tsi ieió꞉re tewahsónhtote; téstahst ohén꞉ton tsi niió꞉re isiʼnón nienhén꞉we.

¹⁵ Tahsheiaʼtó꞉rehte ne iáh teiakohnhí꞉kon tókaʼ ó꞉ni aonsahsheiáhtkaʼwe ne iakorihwanéren—tetsá꞉ron ráhswens Roiá꞉ner.

¹⁶ Iáh thetekáhsta ahshatwistakarón꞉ni ahtsheweientéhten ne rononhwaró꞉ri aseʼkénh iáh tehoʼnikonhraientá꞉tskon.

¹⁷ Atenró꞉sera tiótkon wé꞉ne ronnón꞉nis ne raotinoronhkhwáhtshera. Kahwá꞉tsire ionkwahrhá꞉re naontaionkhíhnhe, nó꞉nen tentewaʼnikonhrhá꞉ren.

¹⁸ Nek ne ónhka iáh teiakoʼnikòn꞉ra aiehrhá꞉ratste ne aierihwanón꞉weʼne nakó꞉ren iakotká꞉rote.

¹⁹ Ahsenonhwé꞉sheke karihwanéren ne shá꞉ka senón꞉weʼs ne tahshaʼnikohnhrá꞉ren. Tókaʼ tió꞉konteʼ tesataterénhsarons, seriʼwanóntha ki ne kaʼnikonhrharáhtshera.

²⁰ Nónhka ionnonhtónnions tánon tiontá꞉tis ne wahétken iakohrhá꞉reʼk kiʼ ne iáh oʼthé꞉nen nahò꞉ten ioiánere aietshén꞉ri—nek kakaronniáhtshera.

²¹ Iáh oʼthé꞉nen teká꞉ien nek ne aontaiakoʼnikòn꞉renʼne tánon aiakoʼnikonhráksen nonkwá iakowí꞉raien ne teiotenonhwarorí꞉tonte tsi nihontiéhrha.

²² Satonhnhá꞉rak ne entkáhawe ensataʼkarí꞉teke. Tókaʼ tió꞉konteʼ saʼnikonhrèn꞉ton skenén꞉ʼa tsi enhsíheie.

²³ Ratirihwènhtha ne iáh tethotirihwaié꞉ri ratiié꞉nas ioterihwahséhton nahonatkáriaʼkse sók iáh tetkariwaié꞉ri tsi enhatirí꞉wenhte.

²⁴ Nónhka teiakoʼnikonhráthe iaʼteieká꞉nere ne tkarihwaié꞉ri tsi naióntiere, nok ne teiakotenonhwarorí꞉tonte iáh nen né꞉ʼe thahanonhtonnión꞉ko tsi nón꞉we wahawenonhátie.

²⁵ Ratiksaʼokón꞉ʼa ne tehonatenonhwarorí꞉tonte shakotiʼnikonhraksá꞉tha raotiʼníhsera tánon ne raotiʼnisténhsera iotskà꞉ra tsi ianonhtónnion.

²⁶ Iáh tetkariwa ié꞉ri nahsheiónnien naiekáriaʼke ne iáh oʼthé꞉nen thaʼteiakoʼniohskèn꞉ʼen; kaianerénhsera ne kaʼnikonhrhá꞉ton iáh teioiánere ne tionkweʼtaié꞉ri aionthré꞉wahte.

²⁷ Nónhka ronaterién꞉tare tsi nihontiéhrha iáh tió꞉konteʼ tehotíhthare. Nón꞉kwe ne thaʼtehonató꞉te ratikaʼenionhtsherí꞉io.

²⁸ Tókaʼ ó꞉ni énhsehreʼk ne rotinonhwaró꞉ri tehotiʼnikonhráthe tánon ronttókha tókaʼ thaʼtehonató꞉te tánon ronatskwé꞉kon.