Proverbs 16 - Ohiatonhseratokénti

¹ Enwá꞉ton aietewatenʼnikonhrísa nok Rawenni꞉io kiʼ nohná꞉ken tenthatà꞉ti.

² Íhsehre tsi sanonhtónnions akwé꞉kon tkariwaié꞉ri tsi nihsatiéhrha nok ki Roiá꞉ner tenhiaiaʼtó꞉rehte tsi nahò꞉ten satenʼnikonhríson.

³ Ehtsheʼné꞉ken Roiá꞉ner ahaiaʼtaté꞉rihste tsi nahò꞉ten wahsateʼnikonhrísa eʼthó꞉ne ensaterihwahténtiaʼse.

⁴ Akwé꞉kon ne Roiá꞉ner tsi nahò꞉ten róhson nieionateríhonte; tsi niahonenonhátie ne rotirihwaneraʼákskon enhatiiaʼtáhton.

⁵ Roiá꞉ner ráhswens nónhka iakotkenhronniá꞉tskon; iáh nonwén꞉ton thahatiʼniá꞉kenʼne tsi ahshakohré꞉wahte.

⁶ Sarihwatokénhak tánon sanitenrahtskónhak, Rawenni꞉io enshiaʼnikónhrhenʼseʼ tsi sarihwanéren. Tshewèn꞉narahkhwak ne Roiá꞉ner tánon iáh oʼthé꞉nen ne karihwáksen thaiesà꞉raʼne.

⁷ Nó꞉nen entsheʼnikonhraié꞉rite Roiá꞉ner, enhskwé꞉ni ne iesáhswenhs ahsheiatenroʼserónnion.

⁸ Ne sénha ioiánere ne ostón꞉ha tahsatèn꞉tsha tókaʼ tkarihwaié꞉ri, tsi niʼiot ne wé꞉so tahsatèn꞉tsha tánon iáh tetkariwaié꞉ri tsi ní꞉ioht tsi wesaién꞉taʼne.

⁹ Enwá꞉ton í꞉se enhsateʼnikonhrísa, nok Rawenni꞉io kiʼ enhiaianénhawe tsi nenhsátiere.

¹⁰ Ronontí꞉io tsi thatá꞉tis Ronhnheʼón꞉we thó꞉wis ne kaʼshatsténhsera; tsi nahò꞉ten enharihwísa tiótkon tkariwaié꞉ri.

¹¹ Roiá꞉ner tehotonhwentsó꞉ni tsi kakontsheríhare tánon ne ateʼnienténhtshera aontakariwaié꞉rike nahò꞉ten watenhní꞉non ne kwáh aontakarihwaié꞉rike.

¹² Rotinontí꞉ios iáh thahatiié꞉na ne karihwanéren, aseʼkénh aterihwakwarihshiónhtshera tkáhas ne kakoráhsera akaʼshátsteke.

¹³ Ronontí꞉io tehotonhwentsó꞉ni ahothón꞉teke ne orihwí꞉io tánon enhshakorihwakwénienhste nónhka iáh teiakonó꞉wen.

¹⁴ Nónhka ionttokhahtsherí꞉io enionteʼnién꞉ten nahotonhnhá꞉rake ne ronontí꞉io. Tókaʼ enhoná꞉khwen ne ronontí꞉io, tókaʼ nón꞉wa ónhkaʼk eniaíeheie.

¹⁵ Kaswathetserákon ne Ronontí꞉io rakonsónthe éʼtho káien natónhnets, tánon ne raoriwanirátʼtsera ne shá꞉ka ne ioronhiarátieʼs ne tkáhas naiokén꞉nore kenkiténe.

¹⁶ Kwáh sénha ísiʼ non tsi ioiánere nashiena nattokhahtsherí꞉io tsi ní꞉ioht noʼ ohwistanó꞉ron. Nashena kanikonraienthatshera tsi aiesaiatarakwen tsi niiot ne kawistaráken.

¹⁷ Nónhka tionkweʼtaié꞉ri tho nón꞉we enionthahaté꞉ko tsi iohatátie ne karihwanéren; satenʼnikón꞉raren ká꞉ti tsi nón꞉we wesenonhátie—tókaʼ ne ensaʼniá꞉kenhte.

¹⁸ Kanaiéhtshera eniakohshá꞉rine tsi nonkwá ne karihwaiesáhtshera, tánon atkenronniáhtshera ehtà꞉ke ieniakoiaʼténhas.

¹⁹ Ne sénha ioiánere nahsaní꞉tenhte tánon aiesenténhton tsi ní꞉ioht ne ahsheiatiaʼtáhrhahse ne ronatkenhronniá꞉tskon tánon ahshié꞉na tsi nahò꞉ten rotinénhskwen.

²⁰ Satahonhsí꞉iohst tsi nahò꞉ten eniesarihónnien, ne ensakwáhtsheʼne; ehtsheniáhes Roiá꞉ner tánon ensatonhnhá꞉rake.

²¹ Nónhka tehoʼnikonhráthe tánon rotonkweʼtíson ronwaienté꞉ri tsi roʼnikonhraientá꞉tskon. Sénha ronʼwé꞉sen tsi enthatà꞉ti sénha kiʼ enthonwéhtahkweʼ.

²² Attokháhtshera tiohné꞉kote ne iónhnhe nónhka teiakoʼnikonhráthe nok ahsateʼnién꞉ten ahsherihónnien ne iáh thaʼteiakoʼnikonhráthe iáh shaʼtékena té꞉ken.

²³ Nón꞉kwe rotiʼnikonhrattókha enhonnonhtonnión꞉ko ohén꞉ton enthontá꞉ti; tsi ká꞉ti nahò꞉ten enhonní꞉ron sénha ki enhonwanatahónhsatate.

²⁴ Kawenní꞉ioʼs ne shá꞉ka ne otsiʼnahkontahkwá꞉ne ne ótsikheta—teiotsikhè꞉tare nahsátkenʼse tánon iakaohnhiióhstha.

²⁵ Tsi nahò꞉ten íhsehre tkariwaié꞉ri tsi niiohahó꞉ten sathahitáhkhe tókaʼ eʼthó꞉non niensaiaʼténhawe tsi nón꞉we kenhé꞉ion.

²⁶ Rón꞉kwe ne roióʼte rotonhkariá꞉kskon sénha enhahkwísron enhoióʼten ne tsi enhawerienʼtí꞉io nó꞉nen tenhsatská꞉hon.

²⁷ Nón꞉kwe ne iáh tethotirihwaié꞉ri ronné꞉saks ne ahshakotikarón꞉ni nakotiaʼkéhshon; ók ó꞉ni wátshaʼahs tsi thatiwennínekenʼs.

²⁸ Nón꞉kwe ne iáh tetionkweʼtaié꞉ri teierihwenhawíhtha; ó꞉ni tahshakonaʼnikonhrhá꞉ren tánon tahshakotikháhsi natenroʼseraʼshón꞉ʼa.

²⁹ Nón꞉kwe ne ratiʼnikonhrahétkenʼs shakonanowenhtén꞉nis ne rontenroʼshón꞉ʼa tánon nek enhshakonahshá꞉rine nahshakotikarón꞉ni.

³⁰ Seʼnikón꞉rarak nón꞉kwe rotikonhsaiéhshon tánon rontkahrokeríkhons tsi teiesaká꞉nere; karihwáksen tsi nahò꞉ten ronnonhtonniónkwas.

³¹ Ne tiakorihwaié꞉ri teniakoterihwaʼserákwahse eniakonhnhé꞉son; ataʼkenhróhkhwa niiakononhkwiseró꞉ten ne shá꞉ka tsi ní꞉ioht kakwenienhstáhtshera teiakoterón꞉ronh te.

³² Ne sénha ioiánere ne iakoʼnikonhrí꞉io tsi ní꞉ioht ne aiakoʼshatstenhserowanénhake. Ne sénha ioiánere aontahsanónhton tsi sónhnhe tsi ní꞉ioht ne aontasahnónhton tsi kanataién꞉ton.

³³ Nón꞉kwe tehatí꞉iens tsi ní꞉ioht tsi nahatiweientéhtaʼne Rawenni꞉io raononhtonniónhtshera, nok ki Rawenni꞉io raonhá꞉ʼa thanónhtons tsi nieniá꞉wenʼne.