Proverbs 12 - Ohiatonhseratokénti

¹ Nónhka ienorónhkhwa ne karihonnienníhtshera eniontshennón꞉ni nahshehró꞉ri nahò꞉ten iáh tethotirihwaierí꞉ton. Iáh kiʼ tewattokhahtsherí꞉io nónhka iéhswenhs naiontaterihwakwaríhshien.

² Roiá꞉ner rawerienʼtí꞉ios nón꞉kwe tiakorihwaié꞉ri, enhshakohré꞉wahte nónhka ionteʼnikonhrón꞉nis ne karihwáksen.

³ Karihwanerenʼáktsera iáh teiakó꞉wis skén꞉nen aionnonhtónnionhwe, nok ne thotirihwaié꞉ri énskaʼk ne tsi nihotirihwahní꞉ron.

⁴ Rón꞉kwe ronià꞉kon ne tiakorihwaié꞉ri né꞉ʼe raotonhnharáhtshera tánon raonaiéhsera; nok ne rón꞉kwe ronià꞉kon ne thonwá꞉wis atehénhsera kwáh ne shá꞉ka ne takwaʼáhsen raohstièn꞉takon aʼónʼtien.

⁵ Nón꞉kwe iakorihwakwaríhshion ioiánere tsi teniesarihwáhshnieʼse; nónhka iáh tetiakorihwaié꞉ri nek ne aiesaʼnikonhrhá꞉ten.

⁶ Raotiwén꞉na ne rotirihwanerenʼákskon iakohnonhwarhiakons, nok ne raotiwén꞉na ne thotirihwaié꞉ri eniakoʼniá꞉kenhte nónhka iontatteronhkwén꞉nis.

⁷ Rotirihwanerenʼákskon ne ienhotiià꞉tenhte tánon iáh oʼthé꞉nen thahonthwatsirón꞉ni, nok ne thotirihwaié꞉ri raotihwá꞉tsire enhonnónhnheke.

⁸ Tókaʼ tesaʼnikonhráthe, eniesahsennakará꞉tate; tókaʼ iáh tesateʼnikonhrattókha, nón꞉kwe ehtà꞉ke eniehsón꞉ni.

⁹ Ne sénha ioiánere shaʼtetisewátte skátne aiesewaióʼten naietsónhnheke tsi ní꞉ioht ne ahsatathará꞉tate nok ahsatonhkáriaʼke.

¹⁰ Tionkweʼtaié꞉ri tehshakotíhshnie raotitshenenʼó꞉kon, nok ne rotirihwanerenʼákskon shakotiiesáhtha nen né꞉ʼe.

¹¹ Raiénthohs ne rotsteʼniá꞉ron wé꞉so kiʼ enhoién꞉take nahò꞉ten à꞉rake nok ne tehotenonhwarorí꞉tonte ratenhniserakaiónhstha iáh oʼthé꞉nen tekariʼwáhsta tsi nihatiéhrha.

¹² Akwé꞉kon nón꞉kwe ne iáh tethotirihwaié꞉ri nek tehonatonhwentsó꞉ni ahatitshén꞉ri tsi nahò꞉ten karihwáksen kenʼniahatí꞉iere, nok ne tionkweʼtaié꞉ri tiótkon ne rotirihwahní꞉ron.

¹³ Ne iáh tethotirihwaié꞉ri ne ienhotiià꞉tenhte ne raotiwén꞉na, nok ne rotirihwakwaríhshion iáh nen né꞉ʼe thaʼtahonʼnikonhrhá꞉ren.

¹⁴ Ne tkaiatawenní꞉io tsi nahò꞉ten tensaterihwaʼserákwahse tsi nahò꞉ten enhsì꞉ron tánon tsi nenhsátiere, ne enhshié꞉na tsi kiʼ nahò꞉ten tesatèn꞉tshon.

¹⁵ Nón꞉kwe ne iáh thaʼtehotiʼnikonhráhthe tiótkon rón꞉nehre thatiié꞉rits tsi nihontiéhrha. Ne tehotiʼnikonhráthe enhontahónhsatate nahò꞉ten ahonwatiʼnikòn꞉ron.

¹⁶ Nó꞉nen tehotenonhwarorí꞉tonte enhoná꞉khwen, óksaʼk wé꞉ne enhrón꞉ni. Nón꞉kwe ne teiakoʼnikonhráthe iáh wé꞉ne thahonnón꞉ni nahonwatiʼnikonhrakaré꞉wahte.

¹⁷ Nó꞉nen tkaié꞉ri tsi nahò꞉ten entehsatá꞉ti, aterihwakwarihshiónhtshera kiʼ enwatkwé꞉ni nok ne onó꞉wen nek né꞉ʼe tkáhas ne iáh teioterihwakwaríhshion.

¹⁸ Iáh tewanonhtonnionhtsherí꞉io nowennaʼshón꞉ʼa tho ni tsi ensakaré꞉wahte tsi ní꞉ioht ne aʼshareʼkó꞉wa, sók ne tkawennaié꞉ris enwá꞉ton ensátsenʼte.

¹⁹ Onó꞉wen kenʼniionhnhésha, nok ne tkarihwaié꞉ri enionhnheʼón꞉we nen né꞉ʼe.

²⁰ Nónhka ronteʼnikonhrón꞉nis ne karihwahétken kwáh í꞉ken tsi enshontateriʼwáhtsten, nónhka iakoióʼte ne ioiánere enietshén꞉ri atonhnharáhtshera.

²¹ Iáh oʼthé꞉nen thaiakoiá꞉tawen ne wahétken ne tiakorihwaié꞉ri, nok ne iáh tetionkweʼtaié꞉ri nek ne enhatiié꞉na ne tahonʼnikonhrhá꞉ren.

²² Roiá꞉ner shakotahkwáhswenhs ne iakonó꞉wen, nok rawerienʼtí꞉ios nónhka tho nenié꞉iere tsi nahò꞉ten iakorihwíson.

²³ Nón꞉kwe ne teiakoʼnikonhráthe thaʼteniontó꞉tate tsi nahò꞉ten iakoterién꞉tare, nok ne iáh thaʼtehotiʼnikonhráthe enhatirihó꞉wanahte tsi iáh tekarihonnién꞉ni.

²⁴ Ioioʼtenhserahní꞉ron entí꞉son kaʼshatsténhsera; awentoráhsera entkáhawe naiesatenaskonhniate

²⁵ Kaʼnikonhrharáhtshera ensanénhsko ne atonhnharáhtshera, nok ne kawenní꞉ioʼs ensaʼnikonhrakétsko.

²⁶ Nónhka thorihwaié꞉ri enhoianènhawe ne ronatén꞉ro, nok né꞉ne ronathahitáhkhe iáh tethotirihwaié꞉ri enhontiaʼtáhton.

²⁷ Tókaʼ sentóhrha, iáh nonwén꞉ton tshiashié꞉na nahò꞉ten sesakonhátie, tókaʼ saioʼtén꞉tskon enhshié꞉na kiʼ ne ahtshoʼkowáhtshera.

²⁸ Aterihwakwarihshiónhtshera thoʼniiothahí꞉non ne ionhnheʼón꞉we; ók ne karihwanéren tho ne nieʼiothahí꞉non ne kenhé꞉ion.