Philippians 4 - Ohiatonhseratokénti

¹ Tekanóron tewathenrosónhas, Kwanorónkwa tánon wahónʼnise tkwakènʼne. Aisewathontátseke niaisehwatasónteren naisewariwatokénhake tsi nòkwa ne Roiá꞉ner. I꞉seʼnakerensaróntsera ó꞉ni natsennonʼniátsera.

Kór Wasakonikonráreke Neh Roiá꞉ner Ronwhanonteráties

² Euodia tánon ne Syntyche, í꞉se ne Roiá꞉ner rahonkwéta, neh káti kenihnekénʼni ne aitsátʼkawe tsi teseniriwhathíronte.

³ Tánon, neh kwá tehionkwariwaʼienawákon, kwá ne kénnis ne aietsiʼiénawhase. Nètho tionatʼthonwísens skátne ionkwahioténhen tánon ne Clement ó꞉ni neh ronatiakhésons ne wathonteriwaréniaʼte ne kariwí꞉ios. Thónon ónen nihathisénnare ne kahiatonserákon ne hionʼnehónwe.

⁴ Aiáwens tiótkonhte ahisewathonnárake ne tsi Roiá꞉ner tesewahtheriwahsóntere. Shé꞉kon ne enskhíron: sewatonnárak.

⁵ Sewénests ne tkariwaiéri tsi natesewáhthere. Kwáh iostóreh ne Roiá꞉ner énsrawe.

⁶ Tó꞉sa thènen tesewathatenikonráren, ók oriwakwékon sewaterennahienthatsherákon tsi sewariwahnónhtons ne Rawenni꞉io tsi nahó꞉ten tesehwathonwenhtió꞉ni. Nónenh thènen iensewaterénnahien ne rahonháke, kwáh oriwí꞉io kénhak sewéneste tsi tentsisewahnonhweráhton.

⁷ Ténon tsi nithewehtha ne skénnon ne Rawenniʼióke, né iothohetsʼthénhnis akwékon ne kanikonhraienthá꞉tsheras, né enkanónhstate ne sewéris ó꞉ni ne sehwanikónhras rahonháke ne Ié꞉sos Kerístos.

⁸ Nonahkènkha, tewatenrosónhas, ne sewanáhnonk ne sewanikónhras tsi nahoténsons ne tkariwaiéris, tánon né tehiothonwenhtióhon ne tahiontenonhweráhton: nahoténsons ne oirihwí꞉io íken, iotkwéniens, tkariwaiéhri, aóskon, ioráh꞉se, tánon tekarénsaron.

⁹ Tioténst tsi nahó꞉ten wasehweientéthaʼne tánon tsi sahienáhon ne tkhonhiáwi, skátʼke nakewenhnahókonhs ó꞉ni tsi niwahtieráhnion. Tánon ne Rawenni꞉io ne tesonhkwáhwis ne skénnon kwáh ensehnikwekonhatiésehke.

¹⁰ Ne Roiá꞉ner wahakónʼnien nekwatóken ahonkenrienthíʼione tsi sékon énskat ionsakáiente saskwehiárane. Nekiʼnèkwa aiohtokénhen, kwáseʼ tiókonte tsi thakwanontónʼnions, nók iáh kihtesewatesenʼnaiénthakwe naisewéneste.

¹¹ Iáhthen tewakeriwhakaténhen tsi kenkʼnikónhaʼ wátsien, iatewakerennáston ne neh ahonkhatsennonʼníhake nahoténson akénhake ne aonhtsiéntake.

¹² Wahkateriéntare tsi nahóten ne nahiakoténthon khés ne aiakokwatséhake, ó꞉ni watsenteráhon kwá tsikní꞉ioht tsi akathathonnakénah. Wakateriéntare nahóten kéntons nahiakothonʼhónhake késne aionthonkariáseke, ne wésoh akénhake késne kenkʼnikónha.

¹³ Kwá tsík nakahiotenseróten enkʼkwéni nahontióten tioríwa tsi Kerístos rahkesastenseráwis.

¹⁴ Kwá thesewariwhaʼiérithe tsi waskwasniénon ne shiwakathesennáksen.

¹⁵ Tewatenrohsónhas thonònʼne Philippi, sewehiáre tsi niʼiohthónʼne ne sonthakatásawen sakateriwhanóten ne kariwí꞉ios thónon ne Macedonia. Ne aherensathontákethe neh nón, nék khók ne tsi sewaterennaienthákwa waskwatsiátarase tsi thesewátkaʼwe ne kaienawasétsera tánon nek khók sesewahiatatéristhe.

¹⁶ Sekonnònʼne ne Thessalonica, sitkéskwe, iáh énskat khók tseʼiohterásthon tsi takwaiénawase.

¹⁷ Iáh neh thèkere thóka kén knahótenk kwanekénnis, nók neh tewakatonwentió꞉ni naisewaiéna ne kahiataterítsera tsi nihtkáhas nahiontáthon.

¹⁸ Kwá akwékon sewakatkarhiákʼse, ó꞉ni tsiníkon ioteiarónhon. Kwá íken tsi wakerientí꞉ios tsi nahoténsons waskwawíhon neh Epaphroditus thakawitén꞉ni. Neh teskaieróntare ne kwá teiohtsikhétare tsiniwenserákon ionthatáwis tóhka ó꞉ni ne kwá tkariwhaiéri ne hiontsenkwaronniathákwa ne rawehrienthiʼióstha ne Rawenni꞉io.

¹⁹ Nakatherénnaient neh Rawenni꞉io ahontháhion akwékon tsi natesathonwentió꞉ni neh akenikwékon ne kahiatanerakwátshera ne Kerístos Ié꞉sos tatʼkáwas.

²⁰ Nenahónton ne Rawenni꞉io ne Sonkwaníha nahonwhasennaiénseke tsi nienhénwe tánon tsinénwe. Ethonaiawenhne.

Ne Kíʼ Nonakènka Ne Kanonweraʼthóntsera.

²¹ Kwá onkwetakwékon tsiʼtahietsíʼion nakenonwerathóntsera tsi niháti neh Rawenni꞉io rahonkwetasón꞉a; íken ne neh Kerístos Ié꞉sos rahorihón꞉niat. Ne Roiá꞉ner ronwhanonteráties nekenʼskátne iákwes hiaʼitsiʼiatheniéten neh rahothinonwerathóntshera.

²² Kwáh onkweʼtakwé꞉kon ne Rawenni꞉io rahotiókwa iaʼitsiʼiatheniéten ne rahothinonwerhaʼthóntshera, sénha tsi niháti neh Rakóra ronwhaiótense.

²³ Nakatherénnaient neh Sonkwaiáner Ié꞉sos Kerístos nahontahoriwhaiérike ne tsiʼnatesewáthere tánon ahahiathatériste tsiʼtiónʼnhe!