Philippians 3 - Ohiatonhseratokénti

Tsi Naʼhontakariwaieri Ne rahohénton Rawenʼní꞉io

¹ Nonakènka iahonʼniatonhátie, tewathen rosónhas, sewatʼtsenonʼníhak níse tsi Roiá꞉ner rahonkwetaʼsónha. Iahʼhothènen tewatiótanis ne sékon kwá ehthoní꞉ioht tsi iahonsakwahiátonse tsi ní꞉ioht neh tiotierénton iekwahiatónʼni. Nése nekwa i꞉se ahisewaianerásten.

² Ietsihiathenʼnikonráren thíken tsi niháti ne ehnihathiweiennótens tsi ní꞉ioht ne érhar! Kwá rathiweienʼnákʼsen tánon kwá íshiʼnon tsi nihónnere tsi nahathiʼieránion iáh tokàken nek khók ne aiehtsiwarakwétaron.

³ Nók í꞉i nonkwatsiáke neh ne kwá oriwiʼiohónwe tsi ionkiwharakwétaron, tsioʼríwa tsi ne thewasenʼnaientákwa thóh raosatsténsera ne Rawenni꞉io Rahonikónra tánon tsitewakweniénstha ne Kerístos Ié꞉sos. Iáh ne theionkwatharakwenháties ónh naionkwatséren.

⁴ Tánon kíʼne ahónton neh nátiere. Ne roʼnatsiakhéson thokanónwa tahontaterénsaron, nók kisénha í꞉i wakeríwaien neh takathaterénsaron tsi ní꞉ioht nakorénson.

⁵ Satèkon satewakosheriʼiákon neh sahonkewahrakwétaron, ó꞉ni Israerʼró꞉non nakenekwensóhten ó꞉ni ne neh Benjamin niwakonhontióten. Kwa aʼóskon tsi Hebrew natiatóten. Tsikátiʼ nihiótha ne Pharisee, kwá thokénhen tsi íkʼsere ne Mahís rahoianerénsera.

⁶ Tánon kwá éhtho tsiniwakathátre kwá iehióhe wathekenikónraʼne ne tsiʼionterennaienthákwa. Oriwakwékon ehnátiere tsi nihiótsate ne kahianerénsera ne ahonthahonwanikonraiérite ne Rawenni꞉io.

⁷ Nónk kíh ne Kerístos rakenatónʼni tsi nahóten neh kèrakwe aʼiohrihóntake ne kíʼ nèn꞉ne ne kwá iáh othènen sathekenaʼtèken.

⁸ Iáh tekáien nó꞉ia ehnaʼiohriwanerakwáthon ne ahonwaientheríhake ne Kerístos Ié꞉sos natsiánere. Kwá oriwakwékon wakatiakwaríson nohiáson nakariʼoténsons ó꞉ni ehnithekétanon tsi ní꞉ioht ne atkarokwasónhas. Kwá Kerístos khók teʼhiʼ iatonwentsióni

⁹ ó꞉ni nahonkateriéntarake tsiʼiakenikwékon. Kwá iáh tahónton nakathatónʼnien ne Rawenni꞉io nahatiéna ne neh áksere ne Mahís rahohianerénsera. Kwá nek khók aʼoríwa ne Rawenni꞉io wahatiéna ne tsi thiʼiethákwen ne Kerístos.

¹⁰ Kwá nek khók tesewakatonwentióʼni nahonkateriéntaraʼne ne Kerístos tánon ne kasatsthénsera ne shokétskwen tsi shahonʼnhéton. Íʼkere ehthoʼníʼ ní꞉iott tsi akeronhiáken ó꞉ni akíheie tsi nihoiéren,

¹¹ nekáti ne knaʼiáwenʼne í꞉i ó꞉ni ahónton nahonshahiontʼkhétsʼko tanon ahonsakónʼnheke.

Kasterihénke Niahonʼnenonhátie Tsi Nónwe Iatehonóhʼnien

¹² Arèko tsewákoh tsi nónwe iatewakóien, tánon iáh ó꞉ni thetkonkwetaieri. Nók kíʼ Kerístos Ié꞉sos wahatiéna. Nek kihsáka ienkatasónteren tsi ó꞉ni tewatʼkniothátie nakatháwah ne kowánen ahtsenʼnonniátsera.

¹³ Tewatenrohsónhas, Iáh ehthotèiot tsi tekhatʼtókas ne ónenk tahonkathéntsion. Nók wakenikónrens neh tiotohesthánion, ó꞉ni tewakniotátie ne nahóten nohénton ièken.

¹⁴ Katháke tsi nónwe iatewakóien, nekáti nakʼkwéni takathéntsia natiokowátsera tsi niʼhionkeríhonthe ne karonhiáke. Nekíʼ ne tekariwaserákwen ne Rawenni꞉io sakówis neh tsi nihoiéren ne Kerístos Ié꞉sos.

¹⁵ Ákwe tsinítsion ne ónen hionkwatonkwethíson kwáʼ ehthoní꞉ioht tsi sakatʼaitewanontonniónheke. Nók tóhka hónka tsinítsion ohiaʼní꞉ioht tsi ranonthónnions, Rawenni꞉io nèn꞉ne wéhne enhiónʼnien.

¹⁶ Nók ónenk tsi kwá teiohtonwentióhon ietewakóntak tsi ní꞉ioht tsi ionkwathaítake tánon tsi nónwe watsiontioienhátie.

¹⁷ Tewathenrosónhas, Tewakatonwentió꞉ni naisewásere nakeweiénʼna tánon kwá ákta tsi sewatéweienst tsi ní꞉ioht tsi rathísere tsiʼní꞉ioht tsi kwaseronnién꞉ni.

¹⁸ Iotkáte kwaronkaténʼni neh ronatiokowánen ne rathinákere tsi rathíshons ne Kerístos rahohiása; ónen nónwa thiteʼkaseráhere, sékon sakwaronkáten.

¹⁹ Kwá onèson iahonahthakwariʼshatonʼhátie! Rathinekwentáke ne konwhasénnaiens tánon thonathaterénsaron tsi nihontiéra ne iohteriwhatehasónha. Ákwe nék khók rononthonʼnióntha ne tsi ionwentsiáte ahoriwhasónha.

²⁰ Nók karonhiáke nón thitewasénʼnare ó꞉ni ionkwáthatre ionkwárare ne Sonkwaiathákwen thononnatahóntare. Sonkwaiáner Ié꞉sos Kerístos.

²¹ Ákwe niesakosastenserakénʼnion, Tánon ó꞉ni éhtho ní꞉ioht tsi ensakwatáko kíʼ tewaiéronke ne neh tahonsakaieróntarake tsi niʼioriwanerákwat ne rahónha raierónke.