Philippians 2 - Ohiatonhseratokénti

Tekeníhaton Teioteriwasonterákwen

¹ Kerístos ianikonketskwas, tánon ne raononronkwatsera sanikonraiewenhthota. Rawenni꞉io Rahosatsʼténsera sahwenón꞉ni, nók níse akorénson iathesehianonthón꞉nions.

² Onènki kwá ieiohkontakwénhak tsi takatʼtsenonhniaten! Sakʼthikénhak ne awenéhake tsi thesewathatenorónkwa. Sakanikónrat ó꞉ni kénhak tsi ní꞉ioht tsi sewanonthón꞉nions, thóh niʼiohthónhak tsi síken ní꞉ioht ne tsionkwétak khók akénhake.

³ Tóhsa shenosásek tóhka ó꞉ni asatatonníheke, nók kíʼ tasariwaiérik tanon iaseieʼhiáran notsiakéson tsi sénhase roʼnónha rathiriwhásta tsi níʼioht neh sewátsiake.

⁴ Ietsiʼiénawas sathahióton tsi níse nathesewathatiénawaʼse.

⁵ Tánon nesáka tsi sewanonthónʼnionf tsi ní꞉ioht ne Kerístos Ié꞉sos tsi rononthonniónʼhon:

⁶ Kerístos kwá oriwí꞉io tsi Rawenni꞉io kènʼne. Nók iáh tehotheniénten ne sathatahonátʼteke ne Ní꞉io.

⁷ Khekek, kwáh rahónha hiatoriwaientase akwékon rohtsakwarísion tánon wahonwatenaskónʼniate, Thoʼ nahahiatotenhne tsi niiot nónkwe, tanon sahatotashi onkwe teshiatseren.

⁸ Ehtáke rohtatónni tánon thóh nón nahaténti tsi iohatátie naʼtewennarahkwátshera kwá tsi nióre hiarénheie— kaiasáke nón nihawenhéion.

⁹ Ethòne ne Rawenni꞉io taháwen ne Kerístos ne kwá éneken tiotenákthate tánon sénha wahosennakaráthate tsi ní꞉ioht nakorénson.

¹⁰ Neh káti aoríwa nenhonwasennáronke ne Ié꞉sos kwá kíʼ onhkwetaʼkwékon tsi teniontentióten, neh karonhiáke, ó꞉ni nonwentsiáke, tánon neh nonwentiokónson.

¹¹ Tánon kwáh tsi niaʼtewenhnáhsake tsi enkariwahniráton nètho Ié꞉sos Kerístos tsi raʼónha ne Roiá꞉ner, tóh nètho raohiatanerakwatsherákon ne Ní꞉io Kaníhsera.

Tsi Theioswhatʼthénion Nonkwene

¹² Tekanórons tewathoronsónhas, tiotkonhónwe takwawennarákwakwe sesʼnónen skátne ítewes. Nonkʼkinónwa onensewakaténtion, ónen kisènha teiohthonwentióhon naisewatewénnarakwe. Katerontserákon tsi ní꞉ioht tsi sewahióten tánon aisewahiathisónkwaʼke tsi aisewátʼthoke tsi nikéntons nahonsaieniákenʼne.

¹³ Tionhakéson shènon nihoiohtáties ne Rawenní꞉io natsitsiónʼnien, tánon ó꞉ni natsisewawénnarakwe.

¹⁴ Tiotkonhónwe neh sewaióhten ne tóhsa aisewariwhakátate tóhsa ó꞉ni ne taisewariwhakèna.

¹⁵ Neh enkarihón꞉ni ensewariwathokénhake tánon ne ensewatenaʼthónkwen iáh othènen tehothinhíkon ne Rawenni꞉io sakoienʼokónha, Neh skátne sewanákere ne tehonatsiákʼton tánon rathiweniennákʼsens, nók tóhsa khiʼthènen neh saióhten onh nahiawénʼne ne ahathikweni nahonníron thesaterientawénries. Sateniénten éhʼtho ní꞉ioht tsi tesaswhátʼtek nonkwéne tsi ní꞉ioht ne kén ronʼnonwentsiakerónon,

¹⁶ tsi eniohníronke tsi ní꞉ioht tsi ensatienawastónhake nateriwhanothátsera neʼiakahónʼnhets. Nètho enwenʼniseráte nónen thètre ne Kerístos, kwá íken tsi tenkwarensáronke. Nekáti enkakwéni enwakateriéntharake natioténsera ó꞉ni nakeronhiakénsera iáh ohthènen tehioiesáhon.

¹⁷ Tsi thisetákwen tsi nòkwa ne Roiá꞉ner tanon tsi ní꞉ioht tsi teseriwhaʼiérits ne teskaieróntare tsi ní꞉ioht nasatsienkwarónniate ne rahohénton. Tánon nakenekwénsa tòka nónwa ónen tsi neskátne entewahʼwéronke ne iontsienkwaronʼniathákwa. Tóhka káthiʼki ehʼneniáwen꞉ne, Enkatsennónʼni ó꞉ni skátne entewathonʼnáren.

¹⁸ Thóh kathiʼnonʼníse nahʼióton sewhatsenʼnonʼníhak tánon skátne tewatonnáren.

Timothy Tánon Ne Epaphroditus

¹⁹ Tewakatonʼwentióni nahonkenikonráreke tsi nahóten ahkeriwháronke ne tionháke. Ne kíʼ nakaskanéktshera ne Roiá꞉ner Ié꞉sos kwá iosthóre ahakeríhon ne Timothy iahonsahiʼiathóri ne tionháke.

²⁰ Iáh nʼóiah tewakonkwétaien nehʼnióre tsi tatsisewariwásniese tsi níʼioht ne Timothy.

²¹ Ne ronatsakhéson nek khók nènʼne ronʼnontónʼnions nahóten ne ahontatrákwase nók iáh nènʼne tsi nahóten roskènen ne Ié꞉sos Kerístos.

²² Nók sewatheriéntareʼne tsi nihronkwethóten ne Timothy. Ehníʼioht tsi skátne ionkiniʼioténhen tsi síken ní꞉ioht ne riʼiénha akénhake tsi teiontsateriwaʼrieniatonhátie ne kariwí꞉ios.

²³ Kaskáneks ne isèke iahonsaihiathéniete kwá tsi niʼiosthóre enwakaterientaránen ónh ní꞉i nenwatsiátawen.

²⁴ Ó꞉ni kwá ehthoní꞉ioht tsi katʼthókas ne Roiá꞉ner tsi kwá iosthóre tsi enhakeríhon ne éhtho iahonsáke.

²⁵ Kanonthónʼnions ne ónh tsiaténro Epaphroditus isèke iahonsaihiathéniete. Nenònʼne ne róhseres ó꞉ni rohiotháties tánon kwá íken tsirashotharí꞉io tsi nòkwa ne Roiá꞉ner, tsi ní꞉i ní꞉ioht. Theʼtsisewathórion nahakatenʼnikonránen,

²⁶ nók kinónwa kwá íken tsitehosteríhens nahonshatsiʼsewáken. Tehothatenikónrare, neh tsi wesewariwháronke rohnonwatʼthaníhakwe.

²⁷ Tósʼke khinènʼne kwá íken tsi rohnonwatʼtaníhakwe tánon serèka ahawehéion. Nók kíʼ ne Rawenni꞉io kwá íken tsi waótenre, tánon ní꞉i ehthotsiá꞉tare, ó꞉ni tahákene ne tóhsa neh ahonstéten ne kanikonrasʼséntshera.

²⁸ Ónen kíʼ sénha thewasteríhens ne Epaphroditus iahonsaihiaténiete. Ensewatʼtsenónʼni nahonshatsisewáken, tánon káti iáh isiʼnónwe tathahonsakatatenikonrá꞉ren.

²⁹ Kwá ahtsennonʼniatserákon kénhak tsi tenthetsisewaróton, kwá tsi natheiakoténtion nónka ne Roiá꞉ner ronwaióhtense.

³⁰ Serèka ahawehéion tsi Kerístos rohiótense, tánon ehʼronnárakwe tsi nahatsniénon neh tsi nahóten ne iáh tesewakwénion nahontaskwawike.