Philippians 1 - Ohiatonhseratokénti

¹ Ne thonathásawen ne Kór tánon ne Timothy, ronwahiotenséhakwe ne Kerístos Ié꞉sos— Kwáh tsi niháti ne Rawenni꞉io rahonkwetasónha ne tohonatiriwasontere ne Kerístos Ié꞉sos thóh nón ne Philippi, thóh ratiiá꞉tare ne ononsatokentí꞉ke nohén꞉ton iehonhnéton ó꞉ni ne rontsniénons:

² Aiá꞉wens ne Rawenni꞉io sonkwaní꞉ha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skén꞉nen.

Kór Sakoterennaién꞉nis Ne Ionterenaientákwa Thónon Ne Philippi

³ Kwá tsi niʼioriwáke níhse enkwanonthónnionwe, tenʼihnonweráton ne Rawenni꞉io.

⁴ Neh nòn꞉ne sáka nakwanáton nónen wakaterén꞉naien, kwáh wakatsennonʼniatén꞉nis.

⁵ Ne karihón꞉nis tsi takwaié꞉nawaʼse tsi teionkwateriwareniatonháties ne karihwí꞉ios ne kwáh sontontenniseratiérente wesewáronke.

⁶ Rawenni꞉io seh tehtsisewathasawén꞉ni kiʼ kaiohtenserí꞉ios, ó꞉ni kwáh orihwí꞉io wakón꞉ni tsi iáh tahátʼkawe nohénton ne iahontésha ne enwenniseráteke nó꞉nen ne Kerístos Ié꞉sos thètʼtre.

⁷ Sá꞉ien ne ionakʼtató꞉ken nakwerhiá꞉ne. Kwáh káti saohiérat tsi eh ní꞉ioht tsi katʼtókas. Kwáh káti sewakwé꞉kon sewastsnié꞉non tsi nikaiohtenseróten ne Rawenni꞉io thakáwi, tsi ní꞉iott tsi enkaterí꞉ioseh ne karihwí꞉ios tsi ne entʼthárakwe kén nónwe kíʼ ionthatenotónkwa.

⁸ Rawenni꞉io khók rotheriéntare tsi natewakathonwentióni nakwáken. Rotheriéntare tsi kwáh ehní꞉iott tsi tekwateriéntare tsi ní꞉ioht ne Kerístos Ié꞉sos.

⁹ Wahkaterénnaien ne sewanonronkwátshera ne iakakóntakwe ahʼhontehiáron ó꞉ni kwá ahontakaiérike tsi aisewateriéntharake ó꞉ni aihsewanikonraiéntane.

¹⁰ Nahontakariwaiérike tsi ní꞉ioht tsi tensewaiatohréhthake. Ne entionniʼiósthakwe ó꞉ni iáh othé꞉nen taihsewateriwaéhsten nó꞉nen thé꞉tre ne Kerístos. Ó꞉ni káti tsi nió꞉re ienwatenniseriéhwe

¹¹ Ié꞉sos Kerístos thenhiaweiennaráhte ne ensaióhten ne kaiohtenserí꞉ios ne iewathihénthos ne kahiatanerakwátshera ó꞉ni ne aʼhonwasén꞉naien ne Rawenni꞉io.

Tsi Nahóten Kéntons Tsi Nokwáh Ne Atónnhets Ne Rahonháke Ne Kór.

¹² Thekanóron onkwathorohsónha, Thewakatonwentióni naisewateriéntarane ne tsi nontiáthawen sénha wakahiáneraste tsi tahonthiriwaréhni ne kariwí꞉ios.

¹³ Ne Romeʼró꞉nons rathinònʼne ó꞉ni akwékon ne ronatsiakhésons ronahtheriéntare tsi kén kenóhton ne iorihón꞉ni tsi Kerístos riʼióhtense.

¹⁴ Nón꞉wa thówa ratikwénon tsi nihá꞉ti neh Kerístos ronwanonteráties wahothinikonrahtsianíʼthaʼne tánon kwá iáh othènen thesathitsánis nahontheriwhanóten.

¹⁵ Ótsiake rohnatheriwhanotáties tsi nòkwa ne Kerístos ne tsi nihathinósas tanon ionkhinósas. Rohnatsiakhéson ronatheriwhanotháties né꞉ne tsi rón꞉nere aonhsnié꞉non.

¹⁶ Ronwanorónkwa ne Kerístos tánon rohnatheriéntare ne aoríhwa kén íkes ne neh ahontákene ne kariwí꞉ios tánon ne rahónha.

¹⁷ Nók tsi niháti neh ionkhinósas iáh thotiriwatóken. Kwá nek khók rónnereh naionkentorásten tsi nikaríwes enkenóthonke.

¹⁸ Nók iáh khinethénen tehiotiéren. Neh kwá kariwakwení꞉io nonkwesónha tsi Kerístos ronwhatharákwen. Tohkàken ahontaonéthakwe khés ne iáh. Ne kíʼ kakwénies nakatsenʼnón꞉ni. Tióhkonte tsi enwakatʼtsenʼnonʼníhake.

¹⁹ Ne aoríhwa tsi wakatheriéntare neh sewatherenʼnaienthátsera tanon tsi nitkáhas ne kaienawaséhtsera tsi nòkwa neh rahonikónraʼtokentithera ne Kerístos Ié꞉sos neh enwatsiathanónstate.

²⁰ Kwá éhtho ní꞉ioht tsi kanontónʼnions ó꞉ni kaskáneks tóhsa nonwénton neh thènen nakátiere nahonkatéhate. Neh thokàken akónnheke khés nakíheie, Netewakathonwentióni tiókonte ehnahonkenikonrhatsaníton tsi nónwa ní꞉ioht tánon Kerístos nokwáh niáwe ne kakweniensthátsera.

²¹ Ne tóhka enkónʼnheke, Kerístos kirahoriwáke enkénhake, nók tóhka enkíheie, sénhaʼki isiʼnónwe nenwatsiánerase.

²² Iáh tewakatheriéntare nahóten ahkataterákwase. Iakathasónteren tsi akónnheke tánon ne ahontióten knahótenk ne neh kariwhástha.

²³ Kwá íken tsi iohníron tsi enkathaterákwase. Tewakathonwentióni nakiheie tanon Kerístos iahiakinikwékhaʼne, Asèken iawehthatsiáni ne iohiánere.

²⁴ Nók kíʼ wakateriéntare sékon sewatiokowánen theskwatonwentióni. Neh kihʼaoríwa ienkatasónteren nakwasniénon naisewatehiarónhase tánon aisewhatsennonʼníhake tsi thisewethákwen.

²⁵ Kwá kíʼ oriwí꞉io wakónni, tánon kíʼ ó꞉ni wakateriéntare tsi kén꞉en enkéseke. Tánon sewakwékon entewakwekónhake, atiéste tsi nisewahiotén꞉en tánon natsennonniátsera ne tewetákwen.

²⁶ Ethòne á꞉re nónen ienskwanatarénase, kwá iohiánere tsi ensewanontonniónʼehke tsi nikowánen tenskwarénsaron ne neh Kerístos Ié꞉sos rahorihón꞉niat.

²⁷ Neh kwá éhnehken iohthohétsthákwen, ónenk tsi ehthoní꞉ioht tsi ensónʼnheke naiotʼtkweʼnienstónhake ne kariwí꞉ios tsi nòkwa ne Kerístos. Ethòne iahonsakwanatarénase khés ne iáh, Thóh kiʼní꞉ioht tsi enkáronke tsi akwékon neh shesewanikónra íken. Ethoʼní꞉ioht tsi enwakateriéntarake tsi skátne sewaióhte tánon kwá íken tsi tesewaʼniotátie nakorénson nahontahonnéthaʼkwe ne kariwí꞉ios.

²⁸ Sewanikonranirónhak nónen tensewathátken ne ietsísons; ne enhonahteriwaniratʼtse tsi enhonnáhti, nók ne níse tsi ensewatkweni, tioriwa tsi Rawenni꞉io rahónha tetsisewawis natesenhnietshera.

²⁹ Tánon ehtsisewahiatateríston. Iáh nék khók tohkàken tsi Kerístos thetsisewetákwen, nók sewaronhiakénhen ne rahónha raoriwáke.

³⁰ Thakwáken tsi wakeronhiakénhen, tánon sékon sewariwharónkas tsi niwentoratse nakeriwake. Éhthoh káti nón níse ní꞉ioht tsi aisewaronhiáken.