Numbers 8 - Ohiatonhseratokénti

Waʼhatiʼkwatakwenháton Ne Kahaserasónhas

¹ Ne Roiá꞉ner wahawénhase ne Mahís,

² “Tsró꞉ri ne Aaron ne nó꞉nen enhahaseranihiontónhnion ne waʼthaseroharákwahke, thóh ní꞉ioht tsi ahakwahtáko ne kaháseras né ohénton nónhwe iatahióiake.”

³ Ne Aaron wahatewénhnarakwe tánon ohénton nónhwe nahaʼhaseraniʼionhtónhnion ne waʼthaserotahkwáhke

⁴ Ènéken tsothásaʼwe tsi nióre nehtáke né waʼthaseroharákwah owistanó꞉ron nahó꞉ten íken né꞉ne kaʼristónhni tsi ní꞉ioht tsi hionhniáton, né tahioianénhaʼwe tsi ní꞉ioht tsi tekenhnaʼríhton ne Roiá꞉ner ronatónhni ne Mahís.

Tsi Sahonthonʼnakanónh꞉ni Tánon Wahonwanathonhʼnahérase Ne Levites

⁵ Ne Roiá꞉ner wahawénhase ne Mahís,

⁶ “Tesheʼkháshion ne Levites tsi nòkwah nonhkweshón꞉ás NÍsraerʼró꞉nonke tánon kwáh sheʼiónhnien nahonsahonatʼkweʼnienstónhake.

⁷ Ken nenhiotónhake: né theshieʼhiastharó꞉kwat nonékanos ne tsionhthonnonnakanonhniaʼthákwah tánon shé꞉rori ratiʼhiatakwékon ronhtiató꞉hare tánon shé꞉rori nahatinó꞉hare ne rahonatʼtserónhnia. Ethòne káti kwáh enshonatʼkwenienstónhake.

⁸ Ethòne nithohiónha tèro iehonwahiaténhaf tánon tsi níkonh waterihwanónhtons nonátsia kaʼtheseronhniáton né꞉ne iakeniewátha kènhie tekaiéston; tánon shé꞉kon ó꞉ia té꞉ro hionsatʼtshiaténhaf né nènhne ne karihwáneren aorihwáke.

⁹ Ethòne ó꞉nen kanenhrakwékon NÍsraerʼró꞉nonke iená꞉kere sheʼhiataró꞉rok tánon shé꞉rori ne Levites ohénton ne tsi watohseróte tehatítan né꞉ne tsi nónhwe nikítheron.

¹⁰ Nonhkweshón꞉ʼas NÍsraerʼró꞉nonhke ratinonhtsíne ne Levites tenhonhnisnonhsáren,

¹¹ tánon ethòne ne Aaron akonháke enshaʼkohiatatériste ne Levites né꞉ne kaʼtokénston athatawítshera tsi enhthonwanát꞉kaʼwe NʼIsraerʼró꞉nons, ne káti nahónton nahotihióten natioténhsera.

¹² Ne Levites ethòne ónenh ninonʼtsíne ne tenihiáse tè꞉ro tenhonwanaʼnisnónhsaren; ne saiáta tsi ienhonwát꞉kaʼwe né꞉ne karihwáneren aorihwáke tánon nó꞉ia né nènhne nahonwateskónhten, né nahónton nahonterihwaténtiaʼte ne tsionthonʼnonhnakanonhnitákwah ne Levites rahotirihwáke.

¹³ “Sehiatatérist ne Levites tsi ní꞉ioht ne kaʼtokénston athatawísthshera nakonháke, tánon Aaron tánon ne sakohiohʼokónhas né sehrihónten nahonwanatenhnikónhraren.

¹⁴ Kèn ní꞉ioht tsi tesheʼkháshion ne Levites tsi nòkwah ne ronátsiaʼkes NʼIsraerʼró꞉nons, ne káti nahónton ne kwáh Í꞉i akonhkwetaʼshón꞉ʼas ahónton.

¹⁵ Né nó꞉nen sehsenikonhrasehrónh꞉ni tánon sehiatateríston ne Levites, kwáh kíʼ enhotirenhnahónhake nahotihióten natohsehrákon.

¹⁶ Kwáh roʼnónha khehiataráhkwen tsi ní꞉ioht ne thóh natierénhton ronahnakeráton ne Nisraerʼró꞉nons rahotiʼnekenhteronhtserasónhas, tánon kíʼ kwáh akonhá꞉a khók akonhkwetashón꞉ʼas íken.

¹⁷ Nónen ratikwékon shaʼkhenonhwariakónhnion ne Egypt nónhwe, waʼkhehiatatériste tsi ní꞉ioht ne kwáh Í꞉i riʼiénha akénhake ne thaʼkowánen ronakeráton ne satiwatsiráʼtshons NʼIsraerʼró꞉nons tánon ne thóh natierénhton ronanakeráton ne katshénens.

¹⁸ Ónenh kíʼ Levites shaʼkathonkwetaráko tsi ní꞉ioht ne thóh natierénhton ronanakeráton NʼIsraerʼró꞉nons,

¹⁹ tánon Aaron tánon ne sakohiohʼokónhas wakheʼrihónten nashaʼkonatenhnikonhráren ne Levites, né꞉ne NʼIsraerʼró꞉nons rahonathatawítsheras, né natohsehrákon ahotihióten né Israerʼró꞉nons rahotirihwáke tánon nahontahonwátiʼne NʼIsraerʼró꞉nons tsi nókwah ne kariwaiesátsheras nenhotíienthe tó꞉ka sóhtsi ákta nentʼthónne tsi nónhwe né kwáh Iotenatatokénti íken.”

²⁰ Káti ne Mahís, ó꞉ni ne Aaron, tánon ratikwékon NʼIsraerʼró꞉nons tsi wahonwatiʼhiatatériste ne Levites,

²¹ Ne Levites sahotinikonhríhione ne iatehatihiáti tánon sahatinóhare ne rahonaʼtsherónhnias, tánon ne Aaron washaʼkohiatatériste tsi ní꞉ioht ne katokénston atatawítshera rahó꞉henton ne Roiá꞉ner. Káti ó꞉ni kwáh ne wahaterihwaténtiaʼte ne orihwakaionhnéha tionʼthonhnakanonʼniatákwah ne rahotirihwàke.

²² Ne nonhkweshón꞉ʼas kwáh akwékon thóh nahatíiere tsi kíʼ nihoríhonte ne Roiá꞉ner ne Mahís tsi nòkwah ne Levites. Tánon káti ne Levites ónen iahatiʼhiataiérihne nahotihióten natosehrákon né꞉ne Aaron tánon sakohiohʼokónhas enthonwatiʼniarotárohke.

²³ Ne Roiá꞉ner wahawénhase ne Mahís,

²⁴ “Né꞉ne tewá꞉senh-wísk natenhoʼnosehrihiakónke entewatáshawen nahotihióten tsi nihonaterihwaiénhni natohsehrákon tsi nónhwe nikíteron,

²⁵ tánon nó꞉nen wísk-niwásenh natenhonosehrihiákon enhonhnosehraiérihte.

²⁶ Ethòne, enwáton nashakotiʼiénawase né꞉ne sahaʼtihiátha Levites tsi ahotiʼióten tsi nihonaterihwaiénhni ne rahotihioténhsera natohsehrákon, ók iáh kíʼ tehiówenk ne thènnen ahonterihwaténtsiaʼte ne iatehatiʼhiáti. Thóh kí꞉ken ní꞉ioht tsi ensehianerenhsehrónhnien tsi nihotiʼhiotenhsehró꞉tens ne Levites.”