Numbers 6 - Ohiatonhseratokénti

Tsi Nihotiʼianerenhseró꞉ten Ne Nazirites

¹ Ne Roiá꞉ner wahorihónhten ne Mahís

² nahonthaʼshakáwen ne karihonhniennítsheras nonhkweshón꞉ʼas NÍsraerʼró꞉nonhke. Ónhka tsi nítsion, roskenrakète khès ne tsakothonwísen, né kwáh íken tsi wahonráratsʼte nazirite ahiónhton tánon ák꞉te nahontaʼtónhni roʼnonhá꞉ahk khók akénhake rahoʼhénton ne Roiá꞉ner,

³ kwáh kíʼ enhòntkaʼwe iáh thahatiʼnekiráʼsehke ne onenharataʼsehontserákeri tánon nonentá꞉keri. Kwáh tó꞉sa othènen sewaneʼkíra ne tsit nakanekoténhake né onénhare kanekonhniáton khès ne ahisewáhiake ne tsík nikanenharó꞉tens khès ne ionaharáʼthens.

⁴ Kwáh tsi nikaríwes nazirite nisewahiaʼtóten, kwáh tó꞉sa othènen í꞉sewak ne watenenhaʼrísehres nónhwe nitsiawénon, iáh shé꞉kon ne ká꞉nen khès ne tsi ioʼrawístare ne onénhare.

⁵ Kwáh kíʼ tsi nikaríhwes tsi nisewararátston tsi nòkwah ne nazirite, iáh kíʼ tehiówenk nahisewataʼtenónhkare kʼhès nahisewatʼkonstónhriake. Né kíʼ ensewatienawastónhake tsi kwáh tsiókonhte enkénhake tsi nisewataʼterihwiʼiosténhni rahonháke ne Roiá꞉ner, tánon kíʼ ensewatenonhkwíseresʼte.

^6-7 Shaʼnónkwis sèh nónhwe niwenéstha tsi tshiaʼtonhnaránis ne Rawenni꞉io, tánon né kíʼ aoríhwa iáh tehiówenk ne thashaʼtatiatáʼtshonhste ne ákta niá꞉se ne awenʼhieiónta, iekaníhare né ianíha akénhake khès ne shaʼnisténha, tsaʼtatekénha, tsiatenosénha.

⁸ Kwáh kíʼ tsi nikaríhwes tsi nazirite naʼshiaʼtóten, satokénti kíʼ rahohénton ne Roiá꞉ner.

⁹ Tó꞉ka ne iotokénti shaʼnónkhwis waʼtiotsionhtaʼne né wakarihónhni tsi ákta í꞉seskwe nónhkak tonhtaʼiawénstsi wahaʼéhʼheie, ónenk tsi tsáta nónhta enshaʼterárate nohénton onaʼóhnstha asónhni ne senonhtsí꞉ne; tánon kíʼ kwáh shiʼhiorihwatóken entsiʼsatʼkweniensthónhake.

¹⁰ Ne shaʼtekonháton nenhwenhniserakéhaton ónenk tsi tenihiáse oríte entesheʼhiaténhawe ne tsi iehionhtaʼwehiatákwah natohsehrákon né꞉ne tsi nónhwe nihénteron ne Roiá꞉ner.

¹¹ Ne ratsihénsthatsi saiáta ienhótʼkawe né꞉ne karihwáneren aorihwáke tánon nó꞉ia né nènhne ne ahonwateskónhten, né enhaterihwaténtsiaʼte norihwakáhion tionhtonhnakanonhniʼtákwah né sarihwáke né tsi iahshiéna noierónhta. Né꞉ne shaʼhenhnísera ónenk tsi ensheʼserihwatoʼkéntiste ne sanónhkwis

¹² tánon ensheʼsehrihwí꞉iosthe rahohénton ne Roiá꞉ner tsi nikaríhwes èhren sehtónhne tsi nazirite nashiaʼtótenhne. Nohénton tsi nitiawénhʼen iáh nènhne thénen tekénhtons, tsioríhwa ne iotokéntiʼkwe ne sanónhkwis tsi watiotsónhtaʼne. Tsi enseskáʼriakʼthe ne ientsiátʼkawe nènska tehahosehrihiákon teiotinakaronhtónʼa owíra.

¹³ Nó꞉nen iensheʼsehrihwaiérihte tsi nishaʼrarátston tsi nazirite nashiaʼtóten, né kíʼ enshaʼterihwaténtiaʼte kí꞉ken orihwakáion. Ónenk tsi iehionhtawehiatákwah natohserákon nienhénse

¹⁴ tánon Roiá꞉ner entétsion áhsen niháti kaʼtshénens né꞉ne kwáh iáh othenènen tehotiʼtsiʼióthare: ne nènska tehahosehrihiákon teiotinakaronhtónʼa né nahonwateskónhten, énska tehiahosehriʼhiákon teiotinakaronhtónʼa né꞉ne kariwáneren aorihwáke, tánon ne teiotinakaronhtónʼa rátsinn.

¹⁵ Káti ó꞉ni ónenk tsi iensátkaʼwe sehwathéra kanátaro né꞉ne iáh othènen thatekaiéston ne waʼthenhkwáhtha: kanatharátens né nothésehra tekaiéston ne iakenʼiewátha kènhie tánon ne kakaʼretsheʼrátens né káronh ne iakenieʼwátha kènhie, tánon ne iehiowènhte ne tsi niwaterihwanónhtons nonátsias tánon ne onenharataʼsehontserákeri.

¹⁶ Ne ratsihénstatsi akwékon kí꞉ken ienhátate rahohénton ne Roiá꞉ner tánon né ienhát꞉kawe ne karihwáneren aorihwáke tánon nahonteskónhtake aorihwáke.

¹⁷ Ónenk tsi enhoteskónhten ne teiotinakaronhtónʼa rahohénton ne Roiá꞉ner né꞉ne skaríhwa aorihwáke, tánon né skát꞉ke tsi ienhátʼkawe ne kanátaro tánon ne átheʼre; ónenk ó꞉ni tsi ienhát꞉kaʼwe ne onátsias tánon ne onenharataʼsehontserákeri.

¹⁸ Ne tsi iehiontawehiatákwah natohsehrákon níse naziritʼró꞉nons ónenk tsi onahónstha entiónhni tsi ensehwathatenonhkare ne sehwanonhtsínes tánon otsiràke iasehwáti tsi nónhwe ne skaʼríhwa íken tsi waʼtshaʼáhton.

¹⁹ Ethòne, nónen ne raʼnenhsáke ne teiotinakaronhtónha rátsinn ne tehionekonhtiéʼon, ne ratsihénstatsi thénhrakwe tánon skát꞉ke enhá꞉ren, ne kátens kanátaro tánon ne kátens ká꞉ret enhaʼtáhko natheʼrákon, thóh ronhtsanáke ne nazirite enhá꞉ren.

²⁰ Nó꞉ia, ne ratsihénstatsi ienhatʼkawánion né꞉ne katokénston atatawítsheras enhá꞉wenh ne Roiá꞉ner; né꞉ne iotokéntis ronhwaná꞉wis ne ratiʼtsihénstatsis, né iehioʼwénhtes né ronhskwená꞉kes ó꞉ni ne ratishiʼnákes ne teiotinakaronhtónʼa rátsinn tsi nikaianerenhseró꞉ten ratiʼtsihénstatsi né rahonáwenk. Ethòne, ne nazirite enwáton nahaʼtinekíra nonenharataʼsehontsheʼrákeri.

²¹ Né kí꞉ken ne kaianerénseras ne sewarihwákes nazirite; ók tó꞉ka ensehwaráratsʼte ishiʼnónhwe tsi nikarihwanónhtons tsi nisehwararáts꞉ton, kwáh kíʼ ónenk tsi enkanaʼnónhake kwáh tsi nisewararáts꞉ton.

Ne Ratiʼtsihensthatsihʼó꞉kons Rahotiʼhiatateríhtsheras

²² Ne Roiá꞉ner wahorihónten ne Mahís

²³ nahoró꞉ri ne Aaron tánon ne sakohiohʼokónhas né áhonsthe ne ken hiotiéhtons owenhnasónhas tsi enshaʼkotihiatatériste nonhkweshón꞉ʼas ne Israerʼronónke:

²⁴ Aiáwens ne Roiá꞉ner atsiʼsehwahiatatériste tánon natsiʼsehwanónsthate;

²⁵ Aiáwens ne Roiá꞉ner ahontaʼhorihwaiérike tánon ahtsiʼsehwénhtenhre;

²⁶ Aiáwens ne Roiá꞉ner ahiaʼnatónhase tsi nithoʼrihwaiéri tánon nahontáhion ne skénnon.

²⁷ Tánon ne Roiá꞉ner wahénron, “Tó꞉ka né enhaʼtinátonkwe naksénhna tsi kahiataʼteríhtshera íken tsi nó꞉kwah ne onhkweshón꞉ʼas NÍsraerʼró꞉nonhke, kwáh kíʼ enkhehiataʼtéristhe.”