Numbers 33 - Ohiatonhseratokénti

Tsi Nontahónhne Ne Egypt Tsi Nióre Ne Moab

¹ Né kí꞉ken tsi nihotisenhnoténsons né waʼtenathaiéntons NʼIsraerʼró꞉nons tsi nonhwéson nihonathatosehró꞉takwe tsi nonhtahontʼthahíne ne Egypt shaʼthontahonténhti né rahotitiókwas né꞉ne Mahís tánon ne Aaron waʼshakotihéntenhse.

² Tsi nihorihwatáhton ne Roiá꞉ner, ne Mahís wahahiatónhnion tsi nihotisenhnoténhsons ne kanataiéntons nó꞉nen ienkáhewe nahonhná꞉taien.

³ Nonhkweshón꞉ʼas NʼIsraerʼró꞉nons shaʼthontahonténhti ne Egypt né꞉ne wísk-iawénhre shiskárakwe ne tsiotenhnithatierénhton nóhsehra, né꞉ne tsi sahiórenhne ne sonhtonhtiérenhte onhtóhetste ne é꞉neken watohetstáhkwa. Né꞉ne Roiá꞉ner rahononstenhsherákon tsi thontahonténhti ne kanatoʼwanénhke ne Rameses né kwáh tshiatehatikánere ne Egyptró꞉nons,

⁴ né tsi nisakotiʼhiathatáronskwe ne thonatierénhton roʼnahnakeráton nètho Roiá꞉ner sakononhwariakhónhnion. Tsi ehʼnaháiere kí꞉ken, ne Roiá꞉ner warénesthe tsi sénha rahónha roʼshatstenserowánen tsi ní꞉ioht ne Egypt ahoniʼiohokónhas.

⁵ Nonhkweshón꞉ʼas NʼIsraerʼró꞉nons éhren thonthahónhnete ne Rameses nónhwe tánon Sukkoth nónhwe nahontahtohsehróten.

⁶ Nóia hionsahonthatohseróten né꞉ne Etham nónhwe né꞉ne tsi iehiótʼthe ne iahonwenhtsaʼthènke.

⁷ Ethóne shaʼhónkete Pi Hahiroth hiahónʼne, né꞉ne nàkonh nòkwah ne Baal Zephon, tánon ákta ne Migdol iahonthatohsehróten.

⁸ Shaʼthonthahonhténti ne Pi Hahiroth tánon iathonʼnót꞉kaʼwe ne Red-Sea iahonwenhtsiatʼthènke né꞉ne Shur niahónhne, nónen áhsenh nónhta shiʼhonthahíne Marah nónhwe iahonthatohsehróten.

⁹ Thóh ionhsahontásawen Elim nionhsahónhne, thóh nónhwe ionhsahonthatohsehróten, tsioríhwa tsi tekeni-iawénhre nikanaweráke ne ionekotehónhwe nehʼnónhwe nihionaweróhtakwe tánon tsáta niwáhsen nikarónhtakes ioronhtótonhkwe ne ioneratésons nehʼnónhwe.

¹⁰ Éhren tonthahónhnete ne Elim tánon ákta ne tsi kanétsker ne Suez ionhsahonthatohsehróten.

¹¹ Tsi nónhwe nóia ionhsahontatohsehróten né꞉ne iahonwenhtsiatʼthènke ne Sin nónhwe.

¹² Ethòne Dophkah nónhwe ionsahonthatohsehróten,

¹³ tánon nó꞉ia né꞉ne Alush nónhwe.

¹⁴ Nó꞉ia né꞉ne Rephidim nónhwe, né thóh nónhwe kwáh iáh othènen tekanekaiénthaʼkwe nahatinekírahte.

^15-37 Thonhtahonténhti ne Rephidim tánon tsi tsioʼnónhte ne Hor ionsahonthatohsehróten tánon né kí꞉ken ne kenhiotiétons ne tsi kanataiéntons nónhwe nisohnathatosehrótonhkwe né꞉ne Sinai iahonwenhtsiatʼthènhke, Kibroth Hattaavah (khès ne “Iontsontonkwahnónwats”), Hazeroth, Rithmah, Rimmon Perez, Libnah, Rissah, Kehelathah, tsi Ionónhte Shepher, Haradah, Makheloth, Tahath, Terah, Mithkah, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, né꞉ne karhakonkówa ne Zin nónhwe (Né꞉ne Kadesh íken), tánon ne tsi Ionónhte Hor, né꞉ne tsi iehiothonhontsáte ne Edom.

^38-39 Tsi nishakonáhon ne Roiá꞉ner, ne Aaron ne ratsihénstatsi íken iahanonhtárane tsi Ionónhte ne Hor. Né꞉ne 123 satehahoserihiákon thóh nónhwe narénheie né꞉ne tsiotenhniseratierénhton ne wísk-kháton shiʼwenhnítare né kaiéri-niwáhsen shiʼhioserakéhaton né nónen NʼIsraerʼró꞉nons shaʼtethoʼnahténhtsion ne Egypt.

⁴⁰ Né ronhnonhtí꞉io ne Arad né꞉ne entié꞉ne nòkwahti ne Canaan wahariwáronhke né Israerʼró꞉nons tsi tahotinenhríhne.

^41-49 Tsi Tsioʼnón꞉te ne Hor tahonhténhti tsi kahentakérons ne Moab niahónhne né Israerʼró꞉nons tsi kanatakérons wahonhthatohsehrotónhnion tsi niahoneʼnonhátie: né꞉ne Zalmonah, Punon, Oboth, né tekanatharíhton Abarim né꞉ne Moab nónhwe ahothonhontsáke, Dibon Gad, Almon Diblathaim, né꞉ne tsi iononhtarónhnions ne Abarim ákta ne tsi Ionónhte ne Nebo, tánon ne iohenthaʼkwénhrares ne Moab né꞉ne í꞉se nakaniataráti ne Jordan né tsi nitsiawénhnon ne Jericho, tsi natetiátere ne Beth Jeshimoth tánon ne Acacia Ahonrakwáhkon.

Wahonwatiʼhahónhnien Nohénton Tahatihiáʼiake Ne Jordan

⁵⁰ Èthoh ne tsi iohenthaʼkwénhrane ne Moab né ní꞉se nòkwahti ne Jordan né꞉ne tsi nitsiawénon ne Jericho ne Roiá꞉ner taháwenh ne Mahís

⁵¹ ne tehioterihwasónhteres karihonhnienhnítseras ne Israerʼró꞉nons rahotirihwáke: “Né nó꞉nen iatesewahiá꞉iake ne Jordan niaʼhisewathonhontsiórenhne ne Canaan,

⁵² ó꞉nenk tsi ratikwékon enietʼtsihiatínekenhwe né thóh nónhwe iohontsáien nihatinákere. Sewarihwáhtont akwékon nonénhas ó꞉ni ne karístatsis rahotihiatonhniserahsónhas tánon akwékon ne tsi nónhwe nihiokwénhrares nihonterenhnaientáhkwa.

⁵³ Sewatiénawast nonhóntsa tánon thóh nónhwe nasewatenatónhni, tsioríhwa tsi í꞉se tkwawíre.

⁵⁴ Tesewahiakhónhnion nonhóntsa ne tsi niatehotitsiókwahkes ó꞉ni tsi nihotitarótens sehwawastóhʼtshi tsi ehʼnenhsewáiere, kowaʼnénhak taietʼtsíhion ne kaientátshera ne roʼnatsiokowánen tánon kènk nihiohóntsa taietʼtsíhion ne ken nihotitsiokwá꞉a.

⁵⁵ Ók tó꞉ka iáh taietʼtsihiatínekenhwe né thóh ratinákere, né iatehonataténhron thóh nenhonatakónhthake tsi ní꞉ioht né ashá꞉thara sakaríhsen tánon ohíkta tesawehesthánions ne tsatákta, tánon kwáh ensewaterí꞉io.

⁵⁶ Tó꞉ka iáh thaʼietʼtshihiatínekenhwe, kwáh kíʼ enkwáhthonhte, tsi né ní꞉ioht tsi wakerihwisonʼónhne tsi enkhehiátonhte ne roʼnónha.”