Numbers 32 - Ohiatonhseratokénti

Né Tsi Rathiʼtsiókwaiens Ne Ná꞉kon Nokwáhti Ne Jordan

¹ Né rahotiʼtsiókwahs ne Reuben tánon ne Gad wèso ronhtiʼnaskwahiénthakwe. Nónen shahiatʼkátho tsi nenhiotihiaʼnerásten ne khontiʼtshénenhs ne tsi ionhontsáien ne Jazer tánon ne Gilead,

² tsítnes ne Mahís tánon ne Eleazar niahón꞉ne tánon ne ronátsiakes ne sakotiʼhenténhse ne ienákere tánon wahonníron,

^3-4 “Kí kénʼen iokwénhraʼre né tsi nishakosniénon ne Roiá꞉ner NʼIsraerʼró꞉nons nahontiénawasthe—né tsi kanátaiens ne Ataroth, Dibon, Jazer, Nimrah, Heshbon, Elealeh, Sibmah, Nebo, tánon ne Beon—tsi niʼiohontsí꞉io ne kontiʼtshénen aotiʼrihwáke, tánon tsi nihionatsiokowánen hionkwahnáskwahien.

⁵ Asatʼthontáʼtsheke káti ahontástsion kíʼ kénʼen ionhontsáien ne í꞉i ahionhkwahwenhkónhweke, tánon tó꞉sa thaʼkwahríhon ne iatahiakwahniatarí꞉hiaʼke ne Jordan né nónhwe iahiakwaná꞉kereke.”

⁶ Ne Mahís watharihwasehráko, “Tesehwatonhontsó꞉ni kén né kénʼen ahisehwenhterónhtake tsi nikaríhwes ne ronátsiakes NʼIsraerʼró꞉nons ronateriʼiósehron?

⁷ Ónh nisewahiátawenhs nahisehwateniénten ne taietsinikonhriákten nonhkweshón꞉ʼas NÍsraerʼró꞉nonke né tó꞉sa iathahatiʼiáhiake ne Jordan niaʼhonthonhontsórenhne tsi nikáien ne Roiá꞉ner tesakówi?

⁸ Né꞉ne kwáh et nihotiʼiéren ne ietsinihokonhkénʼens nónen ne Kadesh Barnea nónhwe thaʼkhehiaténiete nahonthonhontsatʼkénhsera.

⁹ Eshcol Ahonrakwáhkon khók nióre niahónhne, ók sonsahónhnewe, wathonhwatiʼnikonhriákten nonhkweshón꞉ʼas niahonthonhontsórenhne tsi nikáien ne Roiá꞉ner tesakówi.

¹⁰ Ne Roiá꞉ner wahonákwenh né shiʼwenhnisehrátekwe tánon waharáratste:

¹¹ ‘Waʼkaráratste né aoríhwa tsi iáh tiehothikonhtákwen tehotirihwatóken nakonháke, kwáh iáh ónhka ne tewá꞉sen natahahoserihiákon khès ne sénha ahonthahóhionke né Egypt natethawénon tsi iáh tsiá꞉re ne tsi tsohontsáien né khehiararatsʼténhni ne Abraham, Isaac, tánon ne Jacob.’

¹² Kí꞉ken onhkwetakwékon thóh hiehiátare, nek khók ne Caleb né roʼní꞉ha né꞉ne Jephunneh né꞉ne Kenizzite nahahiatóten tánon ne Joshua né꞉ne roʼní꞉ha ne Nun; iehotikonhtákwenh nènhne tsi rotirihwató꞉ken rahonháke ne Roiá꞉ner.

¹³ Ne Roiá꞉ner washakonákwahse nonhkweshón꞉ʼas tánon washakahónhnien wahotinatenhawíson ne karakonhkówa né꞉ne kaiéri niwásenh nihiosehráke nikaríhwes tsi nióre ne kwáh kanenhrakwékon ne ronwanikonhrakʼsháton ronenhéion.

¹⁴ Tánon kíʼ ó꞉nen í꞉se thonsaietshinaʼkthakwen ne ietsisotʼthonkonhkénʼen, otsiókwase ne rotirihwanerahákskon ronathateweienhnenhtáhon nahonthahonsnéntʼthakwe ne tehiotenonhianíton rahonakwáhtsera ne Roiá꞉ner roʼnonhàke NʼIsraerʼró꞉nons áre.

¹⁵ Tó꞉ka í꞉se ne tsónkwes ne Reuben tánon ne Gad iáh tésehwere naʼtsisewanonteratiéson, shé꞉kon kíʼ enhsehsakotewénhtethe onhkwetakwékon ne kénʼen karakonkówa íken, tánon í꞉se kíʼ ensehwatʼkhéthate ne rahonatkaronhniátshera.”

¹⁶ Tístres ne Mahís niahón꞉ne tánon wahonníron, “Nenhtewatiérenhte, thakwahríhon ne onénhia ahiakihiaʼtenhenrónhnien ne teiotinakaronhtónʼas ne kénʼen nónhwe tánon onénhia ahiakwahtenhenrón꞉niaʼthe ne tahiakwahnatáhʼnake né enhiakwahniaʼhesénhake.

¹⁷ Ethòne kíʼ enhionkwathaʼteweienhnenhtahónhake ne skát꞉ke nahiá꞉kwe ne ronátsiakes NʼIsraerʼró꞉nons nahiaʼkwateriʼiósehra tánon enhiakwénhente niaʼiakhiʼiatiatónhti tsi nióre ne ienhiakwahnákerate ne tsonhontsáien nahionhkwawenhkhónhweke. Né ná꞉he, ne iakhiʼniahésen enwáton ne kénʼen enhatinákereke ne tsi tekanathanák꞉ton nosténhra watenhénraien, iáh thatahonwatinikonhráren nonhkweshón꞉ʼas ne kénʼen ionhontsáien.

¹⁸ Iáh thaʼhonsahiakwahténhti ne tsi tsionkwahnonhsóhtons niahonsáhiakwe tsi nióre ratikwékon ne ronátsiakes NʼIsraerʼró꞉nons enhonatienawastónhake nonhóntsa ne ronhwanáwi.

¹⁹ Iáh kíʼ tahiakwatiathakweʼní꞉ioste ne thènen kaienhtátshera tsi natehónteres ne í꞉se nokwáhti ne Jordan, tsioríhwa tsi waʼhakwaiéna ní꞉i onhkwáhkwenk kénʼen ne tsitʼkharakwínekens nokwáhti ne Jordan.”

²⁰ Ne Mahís watharihwasehráko, “Tó꞉ka tókenske thóh ní꞉ioht tsi niʼsehwáton, kén kíʼ rahohénton ne Roiá꞉ner sewathateweienénhtha nahisewateriʼiósera.

²¹ Ratikwékon ne tsonhkwetaʼshónhas ne ronhterí꞉ios tenhatihiáʼhiake ne Jordan tánon rahónha ne Roiá꞉ner enteshaʼkoniarotaróhke tsi ienshaʼkonatsatónti ne hionkhíshons tsi nióre ne Roiá꞉ner enshakosénhni

²² tánon enhontsatakwení꞉ioste nonhóntsa. Ethòne kíʼ, enwáhton nahonsehsewaténhti, tsioríhwa tsi wesehwarihwaiérihte tsi nisehwaterihwaienʼníhakwe rahohénton ne Roiá꞉ner tánon ne ronátsiakes NʼIsraerʼró꞉nons. Ethòne kíʼ ne Roiá꞉ner enharihwanírate kí꞉ken ionhontsáien ne tsitʼkarakwínekens nokwáhti tsi í꞉se tsonhóntsa íken.

²³ Ók kíʼ tó꞉ka iáh thaʼhisewatiénawasthe tsi nisehwararátston, Waʼkwahronhkáten kíʼ tsi ensewarihwánerake tsi nòkwah ne Roiá꞉ner. Kwáh tó꞉sa ó꞉ia ní꞉ioht tsi sewanontónhnionf; ensehwatréwate ne sewarihwaneraháktshera.

²⁴ Káti sehwatenatonhníhon tánon ientsihiatenhenrónhnien ne sewatʼtshenenhókons teiotinakaronhtónʼa, ók tó꞉ki nasehwáier tsi nisehwararátston!”

²⁵ Ne ronhnónhkwe ne Gad tánon ne Reuben wahonhníron, “Shénshion, thóh kíʼ nenhiakwáhiere tsi kíʼ nishaʼrihwíson.

²⁶ Né hionkwaniákʼkhons ó꞉ni ne ratikʼshahokónhas ó꞉ni nonhkwahtshenenhókons tsionónskwahrons ó꞉ni ne teiotinakaronhtónʼas kénʼen nènhne enhatiʼterónhthake ne tsi kanatowanénhke ne Gilead.

²⁷ Ók kíʼ hiakwahkwékon hionkwataʼteweienhnenhtáhon nahiakwahteriʼiósera né kíʼ ne Roiá꞉ner entesonhkwahniarotároʼke. Iatenhiakwahiáiake ne Jordan tánon enhiakwahterí꞉io, kwáh kíʼ tsi nísen.”

²⁸ Káti ne Mahís thashakáwen kí꞉ken karihwatáʼtsheras ne Eleazar, Joshua, tánon ne ronátsiakes ne sakotiʼhenténhse ne Israerʼronónke:

²⁹ “Tó꞉ka ne ronhnónhkwe ne Gad tánon ne Reuben tenhatihiáiake ne Jordan roʼnathateweienhnenhtáhon nahonterí꞉io tsi kíʼ nenhthatáti ne Roiá꞉ner tánon tó꞉ka né tsi enhieʼtshiʼsniénon ensehwakwénhni nahisewatiénawasthe nonhóntsa, ethòne kíʼ thaʼietʼtsíhion kí꞉ken ohóntsa ne Gilead tsi enhonawenhkhónhweke.

³⁰ Ók tó꞉ka iáh tshiatahaʼtihiáiake ne Jordan tánon ne skát꞉ke tsi ahisewaterí꞉io, né kíʼ enhatiʼiéna ne kaientátshera né Canaan nónhwe nihionhontsáien, tsi kíʼ ní꞉se ní꞉ioht.”

³¹ Ne ronhnónhkwe ne Gad tánon ne Reuben nónhwe waʼthatirihwasehráko, “Sénshion, thóh kíʼ nenhiakwáhiere tsi kíʼ nihorihwatáton ne Roiá꞉ner.

³² Tsi rahónha thoniarótharon kwáh tsi ienhiakwahthonhontsórenhne ne Canaan tánon ateriioseráke nienhiákwe, né káti nahónton nahionhkwatienawasthónhake nonhkwahientátsheras ne kénʼen nónhwe ne tsitʼkarakwínekens nokwáhti ne Jordan.”

³³ Káti ne Mahís thaʼshakáwenh ne raotiʼtiókwa ne Gad tánon ne Reuben tánon asénhnon ne raotiʼtiókwa ne Manasseh kanakerasehrakwékon ne Ronhnonhtí꞉io Sihon rahonakerásehra né꞉ne Amorʼró꞉nons tánon ne Ronhnonhtí꞉io Og né꞉ne Bashan nónhwe, ehʼhí꞉kare ne kanataiéntons ó꞉ni naktóntsies kanakerasehráiens.

³⁴ Ne rahotitsiókwas ne Gad sahatiʼkwahthakwenháton ne tekanathanáʼtons osténhra né Dibon, Ataroth, Aroer,

³⁵ Atroth Shophan, Jazer, Jogbehah,

³⁶ Beth Nimrah, tánon ne Beth Haran.

³⁷ Ne rahotitsiókwahs ne Reuben sahatinathonhniánion ne Heshbon, Elealeh, Kiriathaim,

³⁸ Nebo, Baal Meon (kí꞉ken kasénhna teskathénion), tánon ne Sibmah. Á꞉se sakonhwathisenhnawíhon ne sahontenathonhniánion.

³⁹ Ne rahotára ne Machir né roʼní꞉ha né꞉ne Manasseh wahanénhrenhthe ne tsi ionhontsáien ne Gilead, et wahonhtatíteron, tánon washakotirékwahthe ne Amorʼró꞉nons né ratinákerekwe.

⁴⁰ Káti ne Gilead né Mahís né thaʼshakáwen tsi ratitáraien ne Machir, tánon thóh nónhwe nihatinákerekwe.

⁴¹ Ne Jair, né꞉ne rahothitsiókwah ne Manasseh, iashaʼkonatsiatónhti tánon wahontiénawasthe tohʼkaʼníkon ne kenhnikanatá꞉ʼas tánon waʼkonhwatisenhnawíhon “Né Kanátakon ne Jair.”

⁴² Ne Nobah iahonwanatsiatónhti tánon wahatiʼiéna ne Kenath tánon ne ahonatasónhas, tánon ó꞉ia sahaʼsénhnon né꞉ne Nobah, né ronhwáiats ne rahónha.