Numbers 24 - Ohiatonhseratokénti

¹ Kí ó꞉nen ne Balaam roteriéntare nètho Roiá꞉ner tsi tehothonwenhtsóni nashakohiatatériste nonhkweshón꞉ʼas NÍsraerʼró꞉nonhke, káti iáh tshiehawé꞉non naréshake ne iótkons, tsi nihoiéren ne tsiotierénton. Iahonwentsatʼthénhke nòkwah niahatiérate

² Tánon washakóken nonhkweshón꞉ʼas NÍsraerʼró꞉nonke sók sotitiokwát꞉tson tsi ní꞉ioht tsi ronatatohserótons. Né꞉ne rahonikónhra ne Rawenni꞉io tsiakoniaró꞉taron,

³ tánon waharóri kí꞉ken iekarihwáken: “Ne raoterihwanotátsheras ne Balaam né roʼní꞉ha ne Beor, Né꞉ne raowenhnahó꞉kons ne rónhkwe ne rakwénies nahatkhátho ne wé꞉ne,

⁴ Né rakwénies nahothóntene tsi nahoténsons ne Rawenni꞉io ratónhnions. Né tshiatewatkharotáhons atetʼtshenhserákon tsi wakatkátho Honhkatashatáhrase ne Roshatstenserowánen Rawenni꞉io.

⁵ Ne raonatóhseras NʼIsraerʼró꞉nons kwáh íken tsi waʼtosehríios,

⁶ Tsi ní꞉ioht ne tehiotinénhres ne ioneratésons khès ne kahétaien kaniatharákʼtha, Tsi ní꞉ioht ne ohonteʼsónhas ne Roiá꞉ner rohiéntʼthon Khès ne onenhtakwénhte ioʼnióte kaniatarákʼta.

⁷ Kwáh íken tsi iatenhiotiʼiérihse nokenhnorésera Tánon enhontheʼthonhniánion tsi nónhwe ne kwáh íken tsi kanekanónhten ne kahétakon. Ne ronhwanonhtí꞉io sénha enhasenhnowánenhke tsi ní꞉ioht ne Agag, Tánon tsi raʼkóra íken kwáh kíʼ ahinónh nióre ienhkénhake.

⁸ Rawenni꞉io tetheshaʼkohiatinekénhen ne Egypt nónhwe, Shakoteriʼióse tsi ní꞉ioht ne karhakhónha tehonákares. Shakowénhthos ne tehontáʼtshons, Tehanénstsiake ne rahotistsiensónhas, tenhahiákhon ne rahotiʼiénkwires.

⁹ Ne rahotiʼtiókwah kwáh né꞉ne rashátste kénreks; Né nónen rótas, iáh ónhka tháʼienre nahonwáiete. Ónhka akénhake nahonwatiʼhiatatériste Israerʼró꞉nons kwáh kíʼ entionhtatiatatéristhe, Tánon ónhka nenhonwatihiésate enhtionhtatiésate kíʼ.”

¹⁰ Ne Balak wahatsiʼkwakwenónhni ne ratshanáke tsi nahonákwen tánon wahawénhase ne Balaam, “Iekhonnónhkon naseréwate ne tehiakwahtáʼtshons, ók ónenh áhsen nihioríhwake kék wasehiatatéristhe.

¹¹ Ónen wáhs shasaténhti! Wakarahrátston tsi tenhkonhrihwaserákwahse, ók kíʼ ne Roiá꞉ner wahiahiótaʼtshe nashièhna ne shaʼkariátshera.”

¹² Ne Balaam waʼtharihwaseráko, “Kheró꞉ri ne ratirihwakaʼrénies né iesehiatórion tsitʼkíteron né

¹³ shé꞉kon nahontáskon akwékon ne kawistarákens ó꞉ni nowistanórons ne sanonhtiʼiotsherákon nónhwe nikáien, iáh kíʼ takʼkwéni nahiwenhnónhti tsi nihorihwatáton ne Roiá꞉ner nakonháhak khók iathahonkerihwaiéntase. Nék khók enhkíron tsi kíʼ nahó꞉ten ne Roiá꞉ner enhatróri nakíron.”

Ne Balaam Noʼnakènhkha Hionsaharíhwaken

¹⁴ Ne Balaam wahawénhase ne Balak, “Ónenh kíʼ thóh iénske tsi thatíteron nakonhkwetashón꞉ʼas, ók nohénton enskaténhti, enhkontohkáten tsi nahó꞉ten NʼIsraerʼró꞉nons tsi nenhonwatiʼiérase ne sonhkwetashón꞉has tsi niahawenonhátie.”

¹⁵ Ethòne wahatróriathe kí꞉ken iekarihwáken: “Ne raoterihwanotátshera ne Balaam né roʼní꞉ha né꞉ne Beor, Né꞉ne rahowenhnahókons ne rónhkwe ne rakwénhnies nahatkátho ne wé꞉ne íken

¹⁶ Ónhka aiekwéni nahiakothóntene tsi nahó꞉ten rathónhnions ne Rawenni꞉io Tánon nahieiéna natohkhátshera tsi nitewé꞉tha ne kwáh éhneken nónhwe. Tiatewaʼtkarotáhon atetʼtshenhserákon Thiʼhiothasátare tsi ríhkens ne Roshatstenserowánen Rawenni꞉io.

¹⁷ Katkáthos tsi niahawenonhátie, Tánon khékens ne rahotitiókwa ne Israerʼró꞉nons. Ne ronhnonhtíio, kwáh tsi ní꞉ioht ne tehiotsistokwaswát꞉the, tsi entewatkétsko nètho kentiókwahien. Kwáh tsi ní꞉ioht ne katsisthokowánen Israerʼró꞉nonke nénhtewe. Enshakóienhte ne sakotihenténhse ne Moab Tánon enshakononhwenhserário ratikwékon nonhkweshón꞉ʼas ne Seth nónhwe.

¹⁸ Kwáh enshakosénhni ne ronhwáhsons né Edom nónhwe Tánon ne enhrónhniate ne rahononhóntsa ne rahón꞉a rahoientátshera enwáton, Tsi ná꞉he NʼIsraerʼró꞉nons ienhotikonhtáhkwen ronatʼkwenionhátie.

¹⁹ Nonhkweshón꞉ʼas NʼIsraerʼronónke kwáh tenhshaʼkonaskwáhseron Tánon ienhatíshaʼhate nonakènhka ne niatehonathaténhron.”

²⁰ Ethòne rahotetshenhserákon ne Balaam waʼshakóken ne Amalekró꞉nons tánon wahatróriate kíʼ kén iekarihwáken: “Ne Amalek né tshiahonháʼa thatishátstekwe ne tsi ionhontsáte, Ók kíʼ tsi hieiótokʼte kwáh kíʼ enhatirihwahiatáton tsi nénhwe enkénhake.”

²¹ Né rahotetʼtshenhserákon waʼshakóken ne Keniteʼró꞉nons, tánon wahatróriate kí꞉ken iekarihwáken: “Ne watenátaien tsi nónhwe nisewanákere kwáh íken tsi iorihwaníron íken, Kanonstáton tsi ní꞉ioht ne otsiná꞉kwah íken ne kwáh é꞉neken iekàhere nostenhràke,

²² Ók kíʼ níse Keniteʼró꞉nons kwáh kíʼ enietʼtsihiátonhte Nónen ne Assyria ieietʼtsihiaténhawe naietʼtsinóton.”

²³ Ne Balaam wahatróriate kí꞉ken iekarihwáken: “Ónhka kí꞉ken onhkweshón꞉ʼas ronatiataroronhátie nothorekéson?

²⁴ Ne rathinenhrénhtha entʼthontsiró꞉ten Cyprus nenhthónhne: Kwáh enshaʼkotisénhni ne Assyriaró꞉nons ó꞉ni ne Eberʼrónons, Ók kíʼ, ronhnónha ó꞉ni kwáh kíʼ tsi nènhwe tsi enhatihiatáton.”

²⁵ Ethóne ne Balaam wahatateweienénhthane tánon shaʼhaténhti, tánon ne Balak hionhsahaʼthahíta nènhneʼe.