Numbers 15 - Ohiatonhseratokénti

Tsi Niʼkaianerenhseró꞉tens Ne Karihwiʼiosehʼokónhas

¹ Ne Roiá꞉ner taʼháwenh ne Mahís

² Ne naioriwatokénhake ne kaianerénhseras raotiriwake nonhkweshón꞉as NIsraerʼronónke nahatirihwanorónhkwahke ne tsi nónhwe nihiohontsáien ne thesakahontsawíre.

³ Né꞉ne teró, teiotinakaronhtónʼa rátsinn, teiotinakaronhtónʼa, khès ne kaiatákeras enwá꞉ton nahónhion ne Roiá꞉ner nahonwanateskónhten khès né꞉ne karihwiʼiosehokónhas ahorihwáke tsi akanánonhke ne wararáts꞉ton khès né꞉ne tsi kwáh ehʼnihiakonikonhró꞉ten tsi iahóntkaʼwe khès né꞉ne ahontakaiéstonhke ne iorihwató꞉ken karihwiʼiostónhtshera tsi nisehwakhwahéra; ne ahonséhra kí꞉ken káhkhwas né rawenhrenhtiʼióstha ne Roiá꞉ner.

^4-5 Ónhka ne teiotinakaronhtónh꞉ʼa khès ne kaiatákeras iahonwanát꞉kaʼwe nahonwanaʼteskónhten né꞉ne Roiá꞉ner rahorihwáke né saiáta katshénen né enkenikwehonhátie ne tekakhontsheráke othésehra né꞉ne tekhatshétake iakeniewátha kènhie tenhkaiésthonke né꞉ne onátsia aorihwáke tsi ienwatʼkáwenhke, skát꞉ke ne tekatshétake ne onenharatasehontserákeri.

⁶ Nó꞉nen né teiotinakaronhtónha rátsinn ienhonwátʼkaʼwe, kaiéri-nikakonhtsheráke othéhsera né꞉ne áhsen niʼkatshétake iakeniewátha kènhie tenkaiésthonke né ienwatʼkáwenhke né nonátsia aorihwáke,

⁷ skát꞉ke ne áhsen nikatshétake ne onenharatasehontsherákeri. Né tewenhserateníhons né rawerientiʼióstha ne Roiá꞉ner.

⁸ Nó꞉nen ne teró ienhonwát꞉kaʼwe nahonwateskónhten ne Roiá꞉ner rahorihwáke khès ne karihwiʼiosehokónhas né nakananónhke ne wararátston khès ne skaʼríhwa ahorihwáke tsi iewatkáwen,

⁹ Ne onátsia iahiontkaʼwénhke ia-iak nikakonhtsheráke othéhsera né꞉ne kaiéri nikatshétake tenkaiésthonke ne iakeniewátha kènhie,

¹⁰ skát꞉ke ne kaiéri nikatshétake onenharatasehontsherákeri. Né tewenhserateníhons kí꞉ken né rawenhrientiʼióstha ne Roiá꞉ner.

¹¹ Thóh kíʼ ní꞉ioht tsi ienwatkáwenhke né satiʼhiatáʼtshons ne teró, teiotinakaronhtónhʼa rátsinn, teiotinakaronhtónʼa, khès ne kaiatákeras.

¹² Nó꞉nen nishí꞉non ne saiáta katshénen ienwatkáwenhke, nenhkenikweʼkonhátie ienʼhióreke kíʼ ne sathakónhake.

¹³ Ratiʼkwékon ne ratinakerehʼónwe NʼIsraerʼró꞉nons tsi thóh kí꞉ken nenhatí꞉iere nónen ne ká꞉khwa ienhóntkaʼwe, ne tenhwenhserateníhon ne rawerientiʼióstha ne Roiá꞉ner.

¹⁴ Tánon tó꞉ka né kwáh tsitʼnikaháwi ne tehononhontsátes ne skátke sewaná꞉kere, né꞉ne kènk nikaríhwes khès ne iehiotkonhtá꞉kwen íken tsi thóh ratinákere, ká꞉khwa iasehwát꞉kaf, né nahónsehra né rawerienhtiʼióstha ne Roiá꞉ner, roʼnónha ó꞉ni thóh ní꞉ioht tsi enhatirihwakwéhnienste ne kaianerénhseras.

¹⁵ Asèken tsi nénhwe, ehʼnenhiotónhake tsi sewatwehnónhni níse tánon ne tehononhontsátes. Níse tánon ne ronhnónha kwáh ne sáka ne Roiá꞉ner tsi tetshiʼsewakánere;

¹⁶ ne sakaianerénhseras tánon tsi nikaianerenhseró꞉tens sewaró꞉ron níse tánon ne roʼnónha.

¹⁷ Ne Roiá꞉ner tahá꞉wen ne Mahís

¹⁸ ne naioriwatokénhake ne kaianerénhseras né nonhkweshón꞉ʼas NÍsraerʼró꞉nonhke nahatirihwanó꞉ronhkwe tsi ionhóntsaien né teshakówireh.

¹⁹ Nónen ne thènen ká꞉khwa né nónhwe niwatónhnis nenhónhneke, ostónha ákte nenhat꞉ien né꞉ne katokénston tsi entʼthónhion ne Roiá꞉ner.

²⁰ Nó꞉nen ensewanatarónhni, nenhtewatiérenhte waʼtenataronhtákwen né nonátiaʼse ionhniáton tsi enkatokénstonhke tsi entʼthónhion ne Roiá꞉ner. Tsi entkaiéston kwáh kíʼ ne sáka tsi ní꞉ioht tsi katokenstónʼne tisewaieston tsi nitsiónhni níse sewathéton.

²¹ Asèken tsi nénhwe, kí꞉ken katokénston athatawítshera tsi entʼthónhion ne Roiá꞉ner né꞉ne í꞉se sewanatarónhni.

²² Ók tó꞉ka shí꞉ken ónhkak iáh tehiakonikonhrónhni wahakorihwanó꞉ron nahiakotewehiénhtonke kí꞉ken kaianerenhserasónhas tsi nikáien ne Roiá꞉ner thó꞉wi ne Mahís.

²³ Tánon tó꞉ka shí꞉ken tsi niahaweʼnonhátie ne ienákere wahakorihwanóron orihwakwékon thóh naiéiehre tsi nahó꞉ten ne Roiá꞉ner roríhonhte ne Mahís.

²⁴ Ók tó꞉ka tewaterientawenhriéhon tsioríhwa ne iená꞉kere tsi iáh teierihwaientérihkwe, ónenk kíʼ tsi teró ienhonwát꞉kawe nahonwateskónhten, né ahónsehra né rawehrientiʼióstha ne Roiá꞉ner, né꞉ne tkarihwaiéri nonátsia iewatkáwen ó꞉ni nonenharatasehontsherákeri iewatʼkáwen. Né꞉ne iehiowénhte íken, ónenk tsi kaiatákeras rátsinn ienhonwát꞉kawe né꞉ne karihwáneren aorihwáke.

²⁵ Né ratsihénstatsi ónenk tsi né enhaterihwaténtiate norihwakáhion tsionhthonnakanonhnitáhkwa ne ienákere akorihwáke, tsioríhwa ne tewaterientawenhréhon tsi iáh tewanikonhrónhni tánon tahatihásehron ne ká꞉khwas ne rahothirihwaneraháktsheras aorihwáke né tsi ká꞉khwa iahóntkawe tsi wahonwátaʼtshe ne Roiá꞉ner.

²⁶ Kwáh kíʼ kanakerasehrakwékon ne ienákere NÍsraerʼró꞉nonke tánon ne tehononhontsátes ne skát꞉ke ratinákere tsi enshonwatinikónhrenhse, tsioríhwa tsi ratikwékon ronatiátare tsi tewaterienhtawenriéhon.

²⁷ Tó꞉ka ónhka tsi nítsion iáh tesehwanikonhrónhni tsi wesewarihwánerake, ónenk kíʼ tsi né nénska teiahosehrihiákon kaiatákeras ienhsewát꞉kaʼwe né꞉ne kariwáneren aorihwáke.

²⁸ Tsi ietsienharakwáhke ne ratsihénstatsi enhaterihwaténhtiate norihwakáhion tionhthonnakanonhnitákwa né nahonsehsewatenikonhrasehrónhni tsi nókwah ne sewarihwaneraháktshera, tánon kíʼ entsitsinikónhrenhse.

²⁹ Kwáh né sakaianerénhsera tiakoró꞉ron ratikwékon ne iáh tehonanikonhrónhni tsi wahatirihwánerake, né꞉ne tó꞉ka kén ehsihatinakerehónwe ne Israerʼró꞉nons khès ne tihononhontsátes ne skát꞉ke ratinákere.

³⁰ Ók nónhka ne kwáh iakonikonhrónhni tsi aierihwánerake, né꞉ne tó꞉ka kén ienakerehónhwe khès ne tihiakahontsátes, rotiníkon tsi nihonwaiérase ne Roiá꞉ner tsi ronhwakenrónhni, tánon kíʼ ónenk kíʼ tsi enhonwatinonhwariákon,

³¹ tsioríhwa tsi wahatirihwáson tsi nahó꞉ten ráwen ne Roiá꞉ner tánon kwáh thahónhnete tsi wathatíhiake ne rahotsaʼwenhrátseras. Kwáh kíʼ roʼnónha iahontátkwahse tsi enhonhníheie.

Ne Rónhkwe Ne Wathá꞉hiake Nawenhthatokentíke

³² Iahónteratsthe, tsi nikaríhwes NʼIsraerʼró꞉nons shé꞉kon karakhonkówa shihatíteron, rónhkwe wahonwahiatatʼtsénhri raienhtonrónhkwaʼskwe ne iawenhthatokentíke.

³³ Mahís, tánon Aaron, tsítʼnes niahonwahiaténhawe tánon ó꞉ni ne kanakerasehrakwékon,

³⁴ tánon né꞉ne ratinónhne wahonwatenhnikónhraren, tsioríhwa tsi iáh tehiorihwíhiokwe onhnenhonwaiérase.

³⁵ Ethòne ne Roiá꞉ner wahoró꞉ri ne Mahís, “Ne rónhkwe ónenk tsi enhonwanonhwariákon; kanakerasehrakwékon tsi enhonwanenhióhiaʼke tsi enrénheie náhtste tsi nónhwe nihonatenátaien.”

³⁶ Sók káti kanakerasehrakwékon iahonwahiaténhawe náhtste tsi nónhwe nihonatená꞉taien nahonwanenhióhiake tsi enrénheie, tsi kíʼ nihotenhnáhon ne Roiá꞉ner.

Tsi Nihiorihó꞉tens Ne Tehiosehrihietónhtons

³⁷ Ne Roiá꞉ner wahorihónten ne Mahís

³⁸ nashakawénhase nonkweshón꞉ʼas NÍsraerʼró꞉nonhke: “Tsionhniánion ne tahiosehriʼietóntonke ne tsi iehiotʼtónhnions ne sewaʼtiátawis tánon orónhia niwasehriʼietó꞉tens tehiosehriʼietóntak ne sewasehriʼiétas. Thóh kí꞉ken nenhsehwaiérake né꞉ne tsi nénhwe.

³⁹ Nasehrí꞉ies né nahonsehsewehiaʼrakwenhníheke, tánon kwáh tsi níkonh né ensewatʼkátho né ensewehiarákwen akwékon nakatiawenhrátsheras tánon sewatewénhnarak; ethòne káti iáh thahonsaskwatʼkaraténi tánon né ahisehwásehre ne iatesewahiátis tsi nisewaskáneks ó꞉ni tsi nahontesewanónhweʼheke.

⁴⁰ Ne tehiosehriʼietóntons né entsiʼsewehiarakwenhní꞉heke nakerihwatáʼtsheras, tánon kíʼ kwáh Í꞉i akonkwétas enkénhake.

⁴¹ Í꞉i, ne Watiá꞉ner Sewaní꞉io íken; Í꞉i tetkwahiatinekénhen ne Egypt né꞉ne Sewaní꞉io akénhake. Í꞉i ne Watiá꞉ner.”