Numbers 14 - Ohiatonhseratokénti

Nonkweshón꞉ʼas Waheríhwako

¹ Ashontakwékon nonkweshón꞉ʼas tehiakohenrétha tsi nihiakonikonhraronhiáken.

² Ronhwatiriwakwenhnískwe ne Mahís tánon ne Aaron, tánon rónhton, “Sénha ne iohianeréhne ne Egypt nónhwe ahonhtahionhkwehéionhke khès né kénʼen karakonkówa!

³ Onhnonhtiéren ne Roiá꞉ner tsi thóh niashonʼkwahiatenhenhátie ne thóh nónhwe tsionhonhtsáien? Kwáh tsi wateríio enhtsionhkinonhwariákon, tánon ne ionkwaniákhons ó꞉ni ne iethiʼiohʼokónhas enhonwatiʼiéna. Iáh onhtèken tehiohiánere ne Egypt niahonsétewe?”

⁴ Káti wathonthaténhase, “Ánion tsi tewahiataráko nashonkwahéntenhse tánon Egypt nietsítewe!”

⁵ Ethóne ne Mahís tánon ne Aaron ohontsáke watʼhiatʼtshákete rahotihénton nonhkweshón꞉á.

⁶ Tánon ne Joshua né roʼní꞉ha ne Nun tánon ne Caleb né꞉ne roʼní꞉ha ne Jephunneh, né꞉ne tenihiáse ne iaʼterihwató꞉rats, waʼnhirátsion ne rahonatsherónhniat tsi nihotiʼnikonhráksens

⁷ tánon wahonwanénhase nonkweshón꞉ʼas, “Nonhóntsa wathonhontsiatʼkénhse tsi kwáh ionhontsí꞉io í꞉ken.

⁸ Tó꞉ka ne Roiá꞉ner rawerienhtí꞉ios nonhtsionháke, thóh nienshonwahiaténhaʼwe tánon enteshón꞉tsion nètho ióskats tánon ionhontsí꞉io íken.

⁹ Tó꞉sa tsi sewatenó꞉wenht ne Roiá꞉ner tánon tó꞉sa ietsitsánik nonkweshón꞉ʼas nètho nónhwe thatinákere. Kwáh watiesenhónhwe tsi enietʼtshisénhni. Ne Roiá꞉ner tewakwékonhse tánon shaʼkosénhnion ne niʼiohokónhas ne thonwatíneskwe; káti tó꞉sa sewáteron.”

¹⁰ Kanakeraserakwékon iontesenhnanónwakʼskwe nahonwatiʼnenhióhiake tsi thaʼníheie, ók thontaiawénhstsi nonhkweshón꞉ʼa wahontkátho ne tehiohaseraswát꞉the né꞉ne tsi nónhwe nihénteron ne Roiá꞉ner thóh é꞉neken tsi watóhserote onhtotáhsi.

Ne Mahís Washaʼkoterenhnaiénhase Nonhkweshón꞉a

¹¹ Ne Roiá꞉ner wahawénhase ne Mahís, “Thóh shé꞉kon nikaríhwes kí꞉ken onhkweshón꞉ʼas enhiontkenronhníhake? Tóh nikaríhwes enhonterahiátaʼkwe nahiontahionhkétakwe, iawerohátsien tsi nihiawetowánen ne iorihwanerakwahténions tsi niwatieránion tsi natehóntere!

¹² Kwáh kíʼ kannratarihnhétshera entkaténiete tánon enhonátonhte, ók kíʼ í꞉se kanísera enkonhiónhni ne kentiókwa né꞉ne sénha roʼnatiokowánen tánon sénha ratshátste tsi ní꞉ioht ne roʼnónha!”

¹³ Ók ne Mahís wahawénhase ne Roiá꞉ner, “Í꞉se thetesehiatinekénhen kí꞉ken onhkweshón꞉ʼas ne Egypt né shashatsténsera sáston. Nó꞉nen ne Egyptró꞉nons enhatiʼrihwáronhke tsi nisehieràse ne shonkwetasónhas,

¹⁴ enshaʼkotiroriánion nonhkweshón꞉ʼas ne ienákere ne kénʼen ionhóntsaien. Kí꞉ken onhkweshón꞉ʼas ónenk roʼtirihwarónhken ní꞉se, Saiá꞉ner, tsi tewakwékon, kwáh tshiewéne tsi waheshá꞉ken nó꞉nen né shaʼtsíkera èhneken watʼkátane tsi nónhwe nihiákweskwe, tánon tsi í꞉se ohénton nienhénse tsi iotsikero꞉te notsíkera ne tsi niwenhnísehres ó꞉ni tsi niʼiotsiro꞉te nótsire nokarasnéha nikaháwi.

¹⁵ Nónwa tó꞉ka ratikwékon ensehnonhwariakhónhnion ne shonkwetaʼshónhas, nonhkweshón꞉ʼas ne iakorónhken tsi niʼtshenhnowánen enhiaiéron

¹⁶ tsi wasehnonhwariakónhnion ne shonkwetaʼshónhas ne karakonhkówa né wakarihónhni né tsi iáh tesaʼkwénion nia sehiaténhake ne tsi tsionhontsáien ne sehiararatsʼténhni nahontasehiáwike.

¹⁷ Káti ónen, Saiá꞉ner, Wakaterénhnaien, thaʼkwahnatónhas ne sashatsténshera tánon thóh nátiere tsi nahó꞉ten saraʼrátston nó꞉nen shaʼshíron,

¹⁸ ‘Í꞉i, ne Watiá꞉ner, iáh tewatiésenh nahonkenákwen, tánon kenéstha kowánen kanoronhkwátshera ó꞉ni tokenhskeʼónwe tánon nahonshakeʼnikónhrenhse ne karihwáneren tánon ne taienenhrá꞉rihte. Ók kíʼ ó꞉ni iáh thaʼhonkerihwanóron naʼkeréwathe ne ratiksahokónhas ó꞉ni ne sakonaterehokónhas tsi nióre nasénhaton ó꞉ni kaieríhaton niaʼtehioteresehráne né rahotiʼrihwanereháktsheras ne ronhwatiʼiohʼokónhas rahotirihwaneraháktsheras ahonthakarihónhni.’

¹⁹ Tánon nónhwa, Saiá꞉ner, tsi nitewétha ne kowánen iáh thaʼtewathatáwis kanoronhkwáhtshera, shaʼsehnikónhrens, Wakaterénhnaien, ne rahotiʼrihwaneraháktsheras kí꞉ken onhkweshón꞉ʼas, kwáh kíʼ tsi nisehsenikonhrénhse tsi náhe èhren tenonhtenónhte ne Egypt.”

²⁰ Ne Roiá꞉ner waʼtharihwaseráko, “Ensehkhenikónhrenhse kíʼ, tsi nasehrihwanónhton.

²¹ Ók kíʼ wakaráhratsʼte tsi nihiorihwiʼiohónwe tsi kónnhe tánon tsi nihiorihwiʼiohónwe ne tsi hiohontsáte né kananónkʼtha ne Roiá꞉ner rahoiatanerakwáhtshera,

²² iáh ne saiáta kíken onhkweshón꞉ʼa thaʼonnónhnheke ne iahonhtáwehiate nètho nónhwe tsionhontsáien. Ronatkáthon natiaʼtanerakwáhtshera tánon ne iorihwanerakwahténions tsi niwakatierá꞉nion ne Egypt tánon ne karakhonkówa, ók shé꞉kon kíʼ tánon shé꞉kon wahonkateniénhten tsi wahatiʼrahiáthakwe nahionhkewénhnarakwe.

²³ Kwáh iáh nonhwénhton tshiahontáweiaʼte nètho nónhwe tsionhontsáien tsi nikhehiararatsténhni ne sakotiʼsotʼthonkonhkénʼen. Iáh ónhka nonhwénhton tsi niháti tshiahontáwehiate né ionhtkenhronhníhon.

²⁴ Ók né kíʼ aoríhwa nakenhátshera Caleb tsi óia nènhne nironhnó꞉ten tánon iehokonhtáhkwen rorihwató꞉ken tsi nòkwah Ní꞉i, thóh kíʼ nienhihiaténhawe ne tsi tsionhontsáien ne iehotonhontsatkénhse, tánon tsi nienhatwatsiríhne enhonahtienawastónhake nonhóntsa

²⁵ né꞉ne Amalekró꞉nons tánon ne Canaanites rahonáwenk nahonráhkwahkons né thóh nónhwe nónhwa nihatinákere. Onàken shaʼsaténhtsiat ne thetènhre tánon karakhonkówa nionsáse tsi nieiawénon tsitʼkanétʼtsker ne Aqaba.”

Ne Roiá꞉ner Washaʼkoréwathe Nonhkweshón꞉ʼas Ne Tsi Nihotirihwakaténhen

²⁶ Ne Roiá꞉ner washaʼkawénhase ne Mahís tánon ne Aaron,

²⁷ “Thóh shé꞉kon nikaríhwes kí꞉ken roʼtirihwanerahátskons onhkweshón꞉ʼas tsi enhotirihwakaténhʼen tsi nó꞉kwah ní꞉i? Ónen thóh iatekaiéri tsi níkon onkaʼthóntene kí꞉ken karihwakaténhtsheras!

²⁸ Ónen kíʼ taséhion kí꞉ken tekarihwasehrákwen: ‘Kerihwanírats tsi nihiorihwiʼiohónwe tsi nikónhnhe, Kwáh ètho nènhtiere tsi kíʼ nisehrihwanónhtons. Í꞉i, ne Watiá꞉ner, waʼkatáti.

²⁹ Kwáh ensíheie tánon ne saierónhta tenhwareniátonke ne karakonhkówa. Tsioríhwa tsi waskerihwakátaʼtshe, iáh ónhka ne tsi nítsionh ne tewáhsenh natehonosehrihiákon iáh nonhwénhton tsahisewatáwehiate nètho nónhwe tsionhontsáien.

³⁰ Waʼkarahrátston tsi enhkwahríhon né thóh nónhwe iahisewanákerehke, ók iáh nónhka ne tsi nítsion thóh tahiáwenhne, nék khók ne Caleb tánon ne Joshua.

³¹ Waʼshíron ne sehiohʼokónhas kwáh enhonwatiʼiéna, ók thóh kíʼ nónhwe nienkhehiaténhaʼwe tsi nónhwe ne wesewarihwáhiaʼke, tánon kwáh kíʼ ètho nónhwe nenhatiterónhthaʼke.

³² Kwáh kénʼen nónhwe karakhonkówa ensehwénheie.

³³ Né ietshiʼienhokónhas enhotiʼnatenhawíson ne karakhonkówa né꞉ne kaiéri-nihioserásen nikaríhwes, rotironhiáken ne tsi iáh teshewarihwató꞉ken, tsi nióre ne saiáta iatenhshothaténronke nenrénheʼie.

³⁴ Kwáh kíʼ ensewaronhiáken tsi nienhiawénhne ne sewarihwaneraháktsheras enkarihónhni né꞉ne kaiéri-nihioserásen nikaríhwes, né꞉ne tsiósera ne sewenhnísera nikarihwesónhne tsi iahisewatonhontsiátʼkenhse. Kwáh kíʼ ensewateriénhtarane tsi nikéntons ní꞉i nenhkwatkónten!

³⁵ Kerihwanírats tsi kwáh kíʼ kén èhtho nenhkwahiérase níse sewarihwanerahátskons tsiónkwe tsi nítsion wesewatsiataróhroke naskwatkónhten. Kénʼen nón꞉we ne karakhonkówa kwáh tsi sewahiatáʼtshons ensewénheie. Í꞉i, ne Watiá꞉ner, wakatáti.’”

^36-37 Né ronhnónhkwe ne Mahís ieshaʼkotenietónʼne niahonthonhontsiátʼkense ohnó꞉wen tsi ní꞉ioht tsi sahontró꞉ri né wakarihónhni nonhkweshón꞉ʼas wahatirihwakátate tsi nó꞉kwah ne Roiá꞉ner. Tánon káti ne Roiá꞉ner né washakóienthe ne kannratarihnétsheras, tánon wahonhníheie

³⁸ Né tekeniʼiawénhre nihatíne ne ronhterihwatóratskwe nek khók ne Joshua tánon Caleb iathonsahonatáhtere.

Né Thontiérenhte Wahonteniénhten Niaʼhatinénhrenhte Ne Tsionhontsáien

³⁹ Nónen ne Mahís shaʼsakoró꞉ri NʼIsraerʼró꞉nons tsi nahó꞉ten wahénron ne Roiá꞉ner, otsitówann tsi ní꞉ioht tsi wahotinikonhráksen.

⁴⁰ Oronhkétsʼtsi nó꞉ia sahiórenhne wahonténhti nahatiʼnenhrenhtáhna ne tsi iononhtarónhnion kanakerasehráiens, ronhtónhne, “Ónen hionhkwahtateweienhnenhtáʼon thóh niahiákwe tsi nónhwe ne Roiá꞉ner shonkwahróri niahiákwe. Iakwahriwanírats tsi hionhkwahrihwáneren.”

⁴¹ Ók ne Mahís wahénron, “Onhkáti nihiotiéren tsi tsisewawenhnónhties ne Roiá꞉ner nónhwa? Iáhʼse tshiatahitsiótkaʼwe!

⁴² Tó꞉sa iahásewe. Ne Roiá꞉ner iáhʼse tesewakwékon, tánon ne tesewatáʼtshons entietshiʼsénhni.

⁴³ Nó꞉non ne Amalekró꞉nons tánon ne Canaanites iatenhietshinenhrónhko, kwáh ensewénheie tsi waterí꞉io; ne Roiá꞉ner iáh tahisewakwekónhake, tsioríhwa tsi iáh tesewathontáton natsisewásehron.”

⁴⁴ Ók shé꞉kon kíʼ ronhtesenhnanónhwaks niahatinonhtárane ne tsi ionhnonhtharónhnions kanakeraseráiens, iawerohátsien ne Roiá꞉ner Rahonerókwah Naterihwaseronhniátshera tánon ne Mahís tsi iáh èhren tehonéton tsi watenátaien.

⁴⁵ Ethòne ne Amalekró꞉nons tánon ne Cannanites né nónhwe nihatinákere iahonwanatsiatónhti tánon wahonwatisénhni, tánon sahonwatísehre kwáh tsi nióre ne Hormah.