Nehemiah 5 - Ohiatonhseratokénti

Ronwanateniakatsténhni ne Rotiten

¹ Tánon tsi nonktsitóko nonkweshón꞉as ó꞉ni ne raononhkweʼtashón꞉as konhnónkwe wahonwanatkónten ne ronthatekenʼokon꞉as ne Shíʼtaehró꞉nons.

² Asèken ótiaʼkes wahonhní꞉ron, “Skátne ne onkwanekenterontserashón꞉as ó꞉ni ne iakhiioʼokón꞉as tsionatthonwí꞉sens ionkwatioʼkowá꞉nen. Thóh káti ienhiakwáhawe nonátsas tánon enhiákwake tánon enhiatiónnheke.”

³ Tánon ótiaʼkes wahèn꞉ron, “Tionkwaiéston nonkwahentà꞉kes tánon tsi ionkwanenharenhiotónserons tánon tsi ionkwanonshó꞉tons, ne káti nahionkwanatsaién꞉take tsi ná꞉he enhiontonkarhià꞉kon.”

⁴ Tánon ótiaʼkes wahè꞉ron, “Ionkhiwistaní꞉hen ne nasakwakaríkase ronhnontí꞉io sonkwakarotháni nonkwahentà꞉kes tánon ne tsi ionkwanenharaientóhserons.

⁵ Ó꞉nen ne tsi ionkwawará꞉re thóh ní꞉ioht tsi nihotiwá꞉rare ne iakwahtatekenʼokón꞉as, ne iakhiioʼokón꞉as kwáh thóh ní꞉ioht tsi ní꞉ioht ne ronwatiioʼokón꞉as; ne kí ó꞉ni entiakhiiaʼténhawe ne iakhiioʼokón꞉as nahonwatinaskónhni, tánon ótiaʼkhes ne iakhiioʼokón꞉as tionaʼthonwí꞉sens titkonwananontónhni; tanon iáh othé꞉non tehionkwashatstenhserá꞉ien tánon nonkwahentashón꞉as ó꞉ni tsi ionkwanenharathosétons akó꞉ren raoná꞉wenk.”

⁶ Tánon kwáh í꞉ken tsi onkená꞉kwen kí꞉ken iotsithókwen tánon ki꞉ken owennaʼshón꞉as.

⁷ Eʼthò꞉ne ó꞉nen sakathatenikonrí꞉sake, tánon wakhehiatónhseron ne ratishenhnowá꞉nens tánon ne ratikoráhshons tánon wakheién꞉hase, “Tsi ietsiwistaní꞉has watehiá꞉rons ne sewathatekenʼokón꞉as.” Tánon kowá꞉nen wakatkenhnisahatierónhni ne rononhà꞉ke.

⁸ Tánon wakheién꞉hase, “Nontiónhake, tsi nióre tsi enhionkwakwénionk, thentithihiaʼténhawe ne Sitaeró꞉nons tewathatekénʼahs ronónha ne ronwanathenhnínonkwe ne tiʼotinakareserá꞉te; tánon káti ó꞉nen enhietsihiathenhní꞉non ne sewathatekén꞉as ne raónha ne entionkhihiathenhní꞉nonse?” Tánon sak thahonthatón꞉ni iáh teotikwé꞉nion ne thé꞉non ahonénhke.

⁹ Iakatahshón꞉teren katónhnions “Iáh teioiánere né꞉tho tsi nisatié꞉ra. Iáh ken teió꞉wenk thóh nón꞉we nasaténhti atietsaníseke ne onkwaní꞉io tiorì꞉wa tsi ionkhisenhnát꞉satha ne ionkhí꞉sons?

¹⁰ Í꞉i tánon ne iatiatatekénʼha kwáh ó꞉ni iakhiwistanihásere tánon nonátsas. Áhion tewatewénhtet ki꞉ken tsi nahó꞉ten tewarihwanón꞉tons.

¹¹ Thontaietsí꞉ion nón꞉wa wenhniserá꞉te ne rahotihéntas, tsi ratinenharaién꞉thotas, ne tsi ronateronthó꞉tons ne iakeniewá꞉thas tánon ne raotinonshashón꞉as, tánon akwé꞉kons ne raotiwístas, thóh kárak ne watehiá꞉rons, tánon ne onátsas tánon nonenhará꞉keris tánon ne ronatenhienón꞉ni, né꞉tho tsi ietsí꞉kwen!”

¹² Eʼthò꞉ne wahonhní꞉ron, “Kwáh ki thentsiakhíhion tánon iáh othé꞉nen thahiakhirihwanón꞉tonhse; kwáh ki thóh nenhiakwáhiere tsi nisá꞉ton.” Eʼthò꞉ne iakhenón꞉ke ne ratiʼtsihénstatsis tánon wakhehiónhnien nahatirihwaní꞉rate thóh nihatí꞉iere ne tiohianénhaf kí꞉kens owenhnaʼshón꞉as.

¹³ Kwáh ó꞉ni wakawá꞉ke nakatierónhnia tánon waʼkí꞉ron, “Káti aiá꞉wens ne Rawenni꞉io hasakowá꞉ke kwáh tsi nihá꞉tis ne ronhnónkwe ahontahohiaʼtí꞉nekenhwe ne raonónskon tánon éhren ahohiathenhá꞉wite ne raohiothenserá꞉ke, nónhka ne iáh thóh thahá꞉iere tsi niwá꞉ton kí꞉ken owenhnaʼshón꞉a. Kwáh ki ronwahná꞉wak tánon raotihiatóskonk tiskénhak.” Tánon onkweʼtakwé꞉kon ne iakotʼkenhní꞉son wahè꞉ron, “É꞉tho niiá꞉wen” tánon wathonwanonwerá꞉ton ne Roiá꞉ner. Tánon nonkweshón꞉as thóh ki nahéiere ne tahioianénhawe nowenhnaʼshón꞉a.

Nehemiah Iáh tehoskénase

¹⁴ Kwáh ó꞉ni, thóh wenhniserá꞉te thontáhsawen ní꞉i wahontsiá꞉tarako ne raotikó꞉ra akénhake ne tsi watonhontsá꞉ien ne Judah, thóh thontáhsawen ne tewáhsen shiioseraʼtekwe tsi niió꞉re ne tekeníhaton shiioserátekwe ne Artaxerxes shionontí꞉iokwe, né꞉ne tékeni iawénhre niʼioseráke, Í꞉i tánon ne iatiathatekénha iáh tehionkené꞉kon ne raonatáro ne rakó꞉ra.

¹⁵ Ne thatikó꞉rakwe nohén꞉ton ní꞉i thóh rotí꞉ien ne iorieniátste rononhà꞉ke nonkweshón꞉as, tánon washakotinatarákwa ó꞉ni nonenharákeri, tséskate ne kaié꞉ri niwáhsen nikakontserá꞉kes kawistará꞉kens; ne raonhatserashón꞉as kwáh ó꞉ni rotishatstenhseraién꞉takwe tsi nokwáh nonkweʼshón꞉as, ók iáh ní꞉i thóh tewatié꞉ren tiorì꞉wa tsi ritsá꞉nis ne Rawenni꞉io.

¹⁶ Kwáh ó꞉ni iakatashón꞉teren ne kahioʼténhsera ki kén꞉en asón꞉ta, ók iáh ki tehionkwahrihwanón꞉ton ne kahénta; tánon ratikwé꞉kons nakenhatserashón꞉as wahonteró꞉roke thóh nón꞉we tsi kahiotenhserá꞉ien.

¹⁷ Tánon nakatekhwaratserát꞉tontse énska tewenhniá꞉we tánon wísks-niwáhsen nihá꞉ti Shiʼtaéhró꞉nons tánon ratikorashón꞉as, tséskate tsi nihá꞉ti ne wahonkhiiatórenhne ne iakwahiatatʼtonhtie thóh nithoné꞉non nonkweshón꞉as ne tewahiatatʼtónhtses.

¹⁸ Iatewenhniserá꞉ke saiá꞉ta tionhnónskwaron rátsinn, iáh-iak nihá꞉ti ne tehonwatihiataiestháshions teotinakaronhtón꞉as tánon notsithenʼokón꞉as ronwatikwahthákwen nakerihwá꞉ke tánon tió꞉konte noié꞉ri nón꞉ta né꞉ne kwáh wé꞉so nonenharákeris. Nek kik sá꞉ka iáh nonhwén꞉ton tewakeshá꞉kon ne raonà꞉taro ne rakó꞉ra tiorì꞉wa tsi nihiorieniátste rotiké꞉te kí꞉ken onkweshón꞉a.

¹⁹ Taʼkweʼhiárat tánon tatiatatérist, akeʼNí꞉io, asè꞉ken akwé꞉kon ne ioiánere tsi nikhehiatiérase kí꞉ken onkweshón꞉a.