Nehemiah 2 - Ohiatonhseratokénti

Ne Nehemiah Jerusalem Niaháre

¹ Ne tsi niwenhnitarákwe ne Nisan, ne tewáhsen shioserátekwe ne ne Artaxerxes ne ronnontí꞉io í꞉ken, onenharákeri iahinekenhawí꞉ten; tánon ne wahí꞉tatshe nonenharákeri ne ronnontí꞉io. Nón꞉wa iáh nonwén꞉ton tewakeʼnikonratsénhon raohénton ne ronnontí꞉io ne tiotierénhton.

² Tánon ne ronnontí꞉io wahakénhase, “Nontié꞉ren ne skón꞉sake tsi nitionikonrénhen tsit sénhak ní꞉se iáh tesanonwát꞉tani? Iáh ki thá꞉othen tsiahónton nek khók tokáken nahisariahsanonwát꞉seke.” Tánon kwáh í꞉ken tsi waʼtéronskwe.

³ Tánon wahiièn꞉hase ne ronnontí꞉io, “Aiá꞉wens ne ronnontí꞉io karí꞉wes arón꞉nheke! Ohnontié꞉ren ne konksáke ne tó꞉sa ahontahionikonrénhen, Nónh ne kanatowanénhke tsi nón꞉we ne rakeʼní꞉ha ní꞉ken ne raotsatónhkwa, kwáh iáh othé꞉non tèken tánon nahʼtenhenrashón꞉as ótsire ne ioʼtsaháton?”

⁴ Tánon ne ronnontí꞉io wahakénhase, “Onhnahó꞉ten shé꞉saks?” Tánon iakaterén꞉naien rahonhà꞉ke ne Rawenni꞉io ne karonhiá꞉ke.

⁵ Ethò꞉ne wahiièn꞉hase ne ronnontí꞉io, “Tó꞉ka rawerientiióstha ne ronnontí꞉io, tánon tó꞉ka ni꞉i ne sanhátshera wahonikonrí꞉ioste ne ronnontí꞉io, ethò꞉ne kí iathakaténiet ne Judah nón꞉we, né꞉ne kanatowanénhke ne tsi thahiátha ne rakeʼní꞉ha ne nahón꞉ton nahonsa꞉kenatonhni.”

⁶ Tánon ne ronhnontí꞉io wahakénhase, tánon ne ionontí꞉io rahiatatʼtha kénskote, “Toh nenkarihwésonke tsi tensha꞉tháhakwe tánon kát꞉ke ténhtese?” Káti tahoʼnikonraié꞉rite ne ronnontí꞉io tánon wahiienhniserahrá꞉kwase ne raónha.

⁷ Kwáh ó꞉ni wahiiènhase ne ronhnontí꞉io, “Tó꞉ka rawerientí꞉iostha ne ronnontí꞉io, áhion kahiatónhsera thakon ne ahontahiion ne rakó꞉ra nhí꞉seh nakaniatará꞉ti ne Euphrates, ní꞉i akerihwà꞉ke, ne káti nahionkerí꞉hon iáke ne Judah tsitkanakerahserá꞉ien.

⁸ Tánon ó꞉ni óia kahiatónhsera ne Asaph raoriwaʼke, né꞉ne tahateʼrahnón꞉ne ne ronnontí꞉io rahorahshón꞉ʼahs, né꞉tho nahónton nahonthahá꞉kon ne tewaterontahrenwá꞉kwas, ne nahionhnihake nahiotenhenrentonhake tanon natenhenrashonhas ákta nononsatokentikó꞉wane ne kanatowanénhke tanahnatanakʼton tánon tsi nón꞉we nenkátsien.” Kaʼti ne ronnontí꞉io tahakát꞉kawen tsi nahoʼténhsons wakerihwanónton, ne aorihwà꞉ke tsi niiohiánereh ne Akení꞉io ratsánake tsi tehakatsanahere.

⁹ Nó꞉nen shiá꞉hakewe tsit thón꞉nes ne ratikoráhsons nhí꞉seh nakaniatará꞉ti, takhéhion ne ronhnontí꞉io rahohiatónhsera. Tánon ne ronnontí꞉io tesakoteniéton nohénton iehonhné꞉tons ne ronterí꞉ios ó꞉ni ne koshá꞉tens rotisáhtens tsi ronterí꞉ios ne iakwakwehonhátie.

¹⁰ Nó꞉nen ne Sanballat né꞉ne Horonró꞉non ó꞉ni Tobiah né꞉ne Ammonró꞉non raotinhátsheras sahatirihwáronhke tsi ónhkak tsakawé꞉non nahonhnésake nahonwatiiénawase ne ratitsaiokón꞉ʼahs Nisraeró꞉nonke, kwáh í꞉ken tsi kowá꞉nen iáh tehonatʼtsennonní꞉hon.

¹¹ Nó꞉nen shiahákewe Jerusalem thóh kiʼterónhtakwe áhsen niwenhniserá꞉ke.

¹² Wakatkétsko ne tsi niwasón꞉tes, Í꞉i tánon tó꞉kara ní꞉hati ne ronhnónkwe ne iakwahkwekonhátie. Kwáh iáh ónhka tekheró꞉ri tsi nahó꞉ten nakení꞉io ró꞉ten nakwerhiáne tsi nahó꞉ten ahontió꞉ten ne Jerusalem. Iáh thahó꞉then ne kaʼtshé꞉nen tetʼtsaténha nek khók ne kaʼtshé꞉nen ne watkhonwí꞉serehne.

¹³ Hiatsakénhne ne tsi niwáhsonteskwe, thóh iakatoheste nahonráhkwakon iotenhenrakáronhte iakatóhetste ne iononwaronhtsétha tionékote tánon thók niió꞉re iattianáktane ne tsi tiotenhenrakáronte nótha, wakatkenséhatie nasón꞉tas né꞉tho tsi nateiorí꞉hon ne Jerusalem, ó꞉ni ne tsi iotenhenrakáronhte ne iotéken.

¹⁴ Eʼthó꞉ne thóh niónsake tsi tiotenhenrakáronhte ne tioné꞉kote tánon ne ronnontí꞉io tsi ranekaientáhkwa, ók iáh kíʼtsatekaié꞉ri tsi nahtehioriwenhte nakitshé꞉nen nahontóhetste ne wakʼsenhtenhtie.

¹⁵ Shók kí thóh nón꞉we niahá꞉ke nahonrahkwakon ne tsi niwasón꞉teskwe tánon wakatkenséhatse tsi wathenhenraien. Eʼthó꞉ne sakákete tánon thóh sakatóhetste nahonráhkwakon iotenhenrakáronte tánon sakahténhti.

¹⁶ Ók ne ratikó꞉ras iáh tehonaterienʼtárakwe kaʼnón꞉we niewakénon khéhs tsi nikatieráhkwe, tiorì꞉wa tsi iáh tekheró꞉ri ne shiʼtaʼehró꞉nons khéhs ne ratiʼtsihénstatsis khéhs ne ratisenhnowá꞉nens khéhs ne ronaterihóntons khéhs ne ronatiá꞉kes né꞉ne enhotiiò꞉ten ne kahioʼténhsera.

¹⁷ Eʼthó꞉ne wakheién꞉hase, “Sewatkáto tsi natekanikonrarahtseráhien tsi nón꞉we nitewes! Jerusalem kwáh onatóskon í꞉ken tánon ne ahotenhenrashón꞉ahs iotéken. Káts tánon kwáh entsitewasontonhniánion ne Jerusalem tánon kwáh iáh shé꞉kon tahonsetewatehénseke.”

¹⁸ Wakheró꞉ri tsi nihiotenhnitenrátskon ne ratsánake ne Rawenni꞉io nakonhá꞉ke ó꞉ni tsi nahó꞉ten ratró꞉ri ne ronhnontí꞉io. Tánon wahonhní꞉ron “Ahion titewatáhshá꞉wen tsi tionhnianion.” Tánon takonwatswanónhna ne kaioʼtenhserí꞉io.

¹⁹ Nó꞉nen ne Sanballat né꞉ne Horonró꞉non ó꞉ni ne Tobiah né꞉ne Ammonró꞉non ranhátshera ó꞉ni ne Geshem né꞉ne Arab wahotóntene thahonwatiiéron tánon wahonwatikenron tánon wahonhní꞉ron, “Onahó꞉ten onte kí꞉ken í꞉sewere tsi nisewatiérakwe? Í꞉se ken sewateriwáksaton ne tsi nihorihó꞉tens ne ronnontí꞉io?”

²⁰ Eʼthó꞉ne watekerihwaserá꞉kwase tánon wakeién꞉hase, “Ne Rawenni꞉io ne tsi karonhiá꞉te kwáh enteshón꞉tion nahionkwahianerásten. Ní꞉i ne tsitewaiò꞉tense, Kwáh tentitewáthane tánon entsitewatenatón꞉ni. Ók ní꞉se kwáh iáh thaó꞉then tesewá꞉ien nahisewaianerenhseraiéntake khéhs norihwaka꞉ion ne Jerusalem nón꞉we.”