Nehemiah 13 - Ohiatonhseratokénti

Tehonwatitkhásion ne Tihononhontsá꞉te

¹ Ne thóh nenhniserá꞉tekwe, ne wahatiwenhnanhó꞉ten akohénton nonkweʼokón꞉ʼs tsi nikahiá꞉ton ne Mahís raohiatonserá꞉kon. Tánon thóh nón꞉we nahathitsénhri né꞉tho Ammonró꞉non tánon ne Moabró꞉non né tó꞉sa nonhwén꞉ton ahonwatirí꞉hon nashakonatsathárahse tsi rotitióhkwaien ne Ní꞉io.

² Ne ki aorí꞉wa tsi iáh tesakotinhataranónhten iáh ó꞉ni tesakotinekanónten ne ratitsataó꞉kons Nisraeró꞉nonʼs, ók ne wahonwanhane Balaam sashakoronhiákente; ók ne Ní꞉io né꞉ne tonsahakaraténiate ne karonhiakénhsera ne kaiathateríhtshera.

³ Nó꞉nen sahonatónhtene ne kaianerénhsera, washakonatsiatonhthákwahse tsi nihiá꞉kon ne tehiakotenekwensaiestháhon tsi nitsiakokwatsirí꞉non Nisraeró꞉nonʼs.

Nehemiah Sahariwakwahtáko

⁴ Nohén꞉ton kí꞉ken, Eliashib né꞉ne ratsihénstatsi raónha ronhwarihón꞉te ne tsi ionát꞉taièn ne raonónskon ne Ní꞉io; rahónha teonaterihwashón꞉terahkwe ne Tobiah.

⁵ Tánon raónha rotatkwahthakwénhni ne ionatowá꞉nen né꞉tho tiotierénhton ronstáhkwe tsi nón꞉we nihontakweniaiéns꞉kwe nathatawí꞉tsheras, né꞉ne kanhetanó꞉rons tánon nakerahshón꞉as tánon tsi nitsiakoiéston noná꞉tsas tánon nonenharákeris tánon ne ronhnateienhnón꞉ni, né꞉ne tsi nihonwatinhá꞉hon nahontasakó꞉non ne Levites tánon ne tehatirihwákwas tánon ne tehontenhenranónhna tsi nihonwatikárhiakse ne ratiʼtsihénstatsis.

⁶ Tsi náhe kí꞉ken thóh nihiothonhátiene, iáh Jerusalem tiékeskwe; asè꞉ken ne áhsen niwáhsen-tékeni sihioserathátse né꞉tho Artaxerxes shihononhtí꞉iokwe ne Babylon, eh ionshá꞉ke ronhnontí꞉ioke tánon kwáh é꞉tho tsi nikarí꞉weskwe wahirihwanóntonhse nahakerí꞉hon niahonsahakaténiete.

⁷ Tánon iahá꞉ke Jerusalem tánon onkeʼnikonraién꞉tahne tsi nikarihwahétken né꞉tho Eliashib tsi nihotié꞉ren tsi nihonát꞉tawi ne Tobiah ne tsi ionák꞉taien thóh raonónskon ne Ní꞉io.

⁸ Ne kí꞉ken ne kowá꞉nen tsi onkeʼnikonrát꞉sate, káti kwáh akwé꞉kon átste ionshonkatieséhron ne Tobiah raowenhshón꞉as ne tsi ionthakweniahientáhkwa.

⁹ Ethò꞉ne wakheién꞉hase sashewanoharénion ne tsi ionaktaién꞉tons tánon thontatkhásehron ne kaʼtséshóns ne tsi ronónshote ne Ní꞉io, nathatawí꞉tsheras tánon ne kanhetanó꞉rons.

¹⁰ Tánon watakerièn꞉tare né꞉tho tsi nihonáwenk ne Levites tsi iáh thethonhwaná꞉wi, asè꞉ken Levites tánon tehatirihwákwas ronónha rotiioʼtén꞉en, ne tsi nishonatékwen ne satiiatatʼtionʼs thóh nieshoné꞉non raotihentákes.

¹¹ Ethò꞉ne ní꞉i watiakwarihwakénha ne ronaterihón꞉tons tánon waʼkí꞉ron, “Onhniiotié꞉ren ne tsi ronónshote ne Ní꞉io tsi watewenhtéton?” Tánon kíʼwakheiataró꞉roke skátne tánon thóh wakhéteron nahotiiò꞉ten.

¹² Tánon ratikwé꞉kon ne Judah nón꞉we tahatí꞉hawe nahontahatí꞉ieste noná꞉tsas tánon nonenharákeris tánon ne ronateienónhni thóh tsi iewistaientáhkwas.

¹³ Tánon wahiiaʼtará꞉ko Shelemiah ne ratsihénstatsi í꞉ken tánon ne sakohiatón꞉ni Zadok tánon ne Pedaiah thóh wahihiathótion né꞉ne Levites raotitióhkwakon ne tahatwistanónhna, tánon nashakosnié꞉non, né꞉ne Hanan, né꞉ne roʼiénha ne Zaccur, né꞉ne roʼiénha ne Mattaniah, asè꞉ken thóh nithonwatí꞉te nahotirihwatokénhake ronónha ne enhonterihonten ne tahonwanarie꞉niaten ne rontatekenʼokón꞉ahs.

¹⁴ Takwehiá꞉rak, o ake Ní꞉io, kí꞉ken tánon tó꞉sa shaserónko tsi nitewakeriwaié꞉riton natiotenhsera né꞉tho tsi niwakatié꞉ren thóh raonónskon náke Ní꞉io tánon ne raoioténhsera.

¹⁵ Éhthoh shiwenhniseraténionskwe ne Judah nón꞉we wahkhé꞉ken otià꞉kes nonhkweshón꞉as rathinekonhníhakwe nonenharataʼsehontsherákeri ne Sabbath wenhniserá꞉te. Tánon otià꞉kes thatí꞉haskwe onátsa tánon né꞉e shakotirienhniaketstátskwe ne rahotitshenenhó꞉kons tewahòn꞉tes, né꞉ne onénhares tánon wisonkó꞉was tánon oiáhsons nahoʼténhsons ne oriena꞉as. Tánon ne kí꞉ken thatiháskwe Jerusalem ne Sabbath wenhniserá꞉te tánon wakhehiaronkáten ne tó꞉sa rontekwakʼké꞉ron né꞉tho wenhniserá꞉te.

¹⁶ Tánon ne Tyreró꞉nons, ne nón꞉we nihatinákeres, kéntsonk tahatiháhseron tánon noiáhsons atkerontáhtsheras tánon wahontenhninónhnion, ne Sabbath weniserá꞉tekwe, rononhà꞉ke ne ratitsakón꞉as ne Judah ó꞉ni Jerusalemke.

¹⁷ Eʼthò꞉ne wakhehiatewenhnaién꞉tonhwe ne ratishenhnowá꞉nens ne Judah tánon wakheién꞉hase, “Onhnahó꞉ten kí꞉ken karihwahetkénhseras tsi nisewatié꞉ra, tesehwenhtiónsthas ne Sabbath wenhniserá꞉te?

¹⁸ Thóh ken nihotiié꞉ren ne ietsinihokonhkén꞉en tánon káti nonkwáh Ní꞉io tahahá꞉we kí꞉ken karihwahetkénhsera nontionhà꞉ke tánon ki kén꞉en kanatowanénhke? Sénha kíʼ í꞉se tesehwahá꞉we ne kanhakwáhtshera aonhà꞉ke Nisraeró꞉nonhke tsi watisehwenhtiónste ne Sabbath wenhniserá꞉te!”

¹⁹ Nó꞉nen ne tsi iotenhenrakarónhtons ne Jerusalem tahiokárawe noʼkarasné꞉ha ohén꞉ton ne Sabbath wenhniserá꞉te, Wahkí꞉ron né꞉tho kanonkarón꞉tons tehiotonhontsó꞉hon nakanhó꞉tonkes tánon waʼkí꞉ron iáh tehió꞉wenk nahonsakanontónhkwenke tsik enwahtó꞉hetste ne Sabbath. Tánon thóh wakhè꞉teron nakenhatsherashón꞉as tsi iotenhenrakarónhtons ne káti ne tó꞉sa ónhka ne rontkérons niahontawé꞉hiate ne Sabbath wenhniserá꞉te.

²⁰ Enskák khéhs ne tehiorihwà꞉ke, ne rontkérons tánon ne rontenhnínons ne iatekonshón꞉as wahontená꞉taien átste ne Jerusalem.

²¹ Tánon wakhehiarónhkaten tánon wakheién꞉hase, “Onhniiohtié꞉ren tsi thóh sewashontí꞉iaks nasontáktha? Tó꞉ka shé꞉kon kí꞉ken thóh nenhtsisewá꞉iere, kwáh ki iatenhkwahtsaná꞉ren.” Thóh tontáhsawen, iáh kíʼ shé꞉kon tatetoné꞉non ne Sabbath wenhniserá꞉tekwe.

²² Eʼthò꞉ne wakheién꞉hase ne Levites né꞉tho tehiotonhontsó꞉hon nahonsahontsatóhare tánon thetón꞉ne nahontenhnikónraren tsi iotenhenrakáronhtes ne nahonhniseratokéntiste ne Sabbath wenhniserá꞉te. Kwáh ó꞉ni sehiá꞉rak, á꞉ke Ní꞉io, tánon sanitenratskónhak ne tioianénhaf ne iawetowá꞉nen sanoronkwáhtsheras.

²³ Kwáh ó꞉ni thóh siwenhniseraténionskwe, wakhé꞉ken né꞉tho Shiʼtaheró꞉nons ronatateniakʼthéni ne Ashdodró꞉nons, Ammonró꞉nons, tánon ne Moabró꞉nons konhnón꞉kwe.

²⁴ Satekanenhrí꞉hen ne raotinekenteronhtsheraʼshón꞉as ne rontá꞉tis ne Ashdodró꞉nons khés nakorénhshons raonaronhkhá꞉tsheras, ók iáh kíʼ ónhka tehioterièn꞉tare nahontá꞉ti ne Judah aronkhátshera.

²⁵ Káti watsiakwarihwakena tánon wakhekenrenhserón꞉ni; wakhenontsistá꞉hiahakon ótiaʼkes ne ronhnón꞉kwe tánon watekhenonkhísaron. Tánon wakhehiónhnien nahonwarihwaní꞉ratse ne Ní꞉io nahontón꞉heke, “ní꞉se iáh tsiasehiatʼkawe ne sheiohokón꞉as tionattonhwí꞉sens rononhà꞉ke ne raotinekenteronhtsherashón꞉as, khehs niahitsí꞉nonke ne sakotihiohokónhas tsionaʼthonwí꞉sens ne sewanekenterontsherashón꞉as raotirihwà꞉ke, khéhs ní꞉se sewarihwà꞉ke.”

²⁶ Iáh ken ne Solomon, ne ronhnontí꞉iokwe Nisraeró꞉nonke, ne waharihwanerahátste ne kí꞉kens nahorihoténhsons? Ethó kisane tsi niienakerénion nonkweʼshón꞉as iáh ki ónhka ne ronnontí꞉io ne tahonsahiatsérenhke, né꞉ne raoʼNí꞉io ronorónkwahkwe, tánon ne Ní꞉io raónha wahonontí꞉ioste akwé꞉kon tsi niwatenáskwah ne Israerró꞉nonhke. Ók Iekaní꞉hare ki ne wahosárihne ne karihwaneraháktsheras ne thiiahontsá꞉te iónkwe.

²⁷ Kwáh káti ken í꞉se akwahtahónsathate tánon thóh náshere kí꞉ken kowá꞉nen karihwahetkénhsera niatsatiatónhti nonkwáh Ní꞉io tsi ne asathateniát꞉ten ne thiiononhontsá꞉tes konhnónkwe?

²⁸ Tánon saiá꞉ta ne raonekenterónhtshera ne Joiada, né꞉ne roʼiénha ne Eliashib né꞉ne ratsihenstowá꞉nen í꞉ken, ne rawenonshekén꞉en ne Sanballat né꞉ne Horonró꞉non tánon wahihiatekwáhte tsi nón꞉we ní꞉keskwe.

²⁹ Sheiehiá꞉rak, á꞉ke Ní꞉io, tiorì꞉wa tsi wathatitiónste tsi ratitsihénstatsi nahatiiaʼtó꞉ten tánon ne raonaterihwasheronhniá꞉tsheras ne ratiʼtsihénstatsis ó꞉ni ne Levites.

³⁰ Tánon sakhehiathonhnakanónhniste tsi nokwáh ne thihononhontsá꞉tes tánon wakhè꞉teron nahontahonwatiniarotárohke ne ratiʼtsihénstatsis ó꞉ni ne Levites; kwáh tsi niatehionkwè꞉takes wahohiò꞉ten ne raotihioténhseras.

³¹ Tánon noién꞉te tsi nithatiiéstha tsi nienkáhewe, tánon nenhtewatiérenhte enwahiárih. Takhehiá꞉rak tanon tatiataté꞉rist, a꞉keʼNí꞉io.