Nahum 1 - Ohiatonhseratokénti

¹ Nateriwanhothátshera ne aorihwà꞉ke ne Nineveh. Kí꞉ken kahiatónhsera ne tsi nihotʼkáton ne Nahum né Elkosh nón꞉we.

Ne Iakowénthos Raoteriatikhóntshera Ne Ní꞉io

² Rotekéf꞉fen tánon shakorehwátha Ní꞉io ne ne Roiá꞉ner, ne Roiá꞉ner sakorewátha tánon rotenakwawenhráti; ne Roiá꞉ner sakorewátha ne ronwáhsons sakonákwahse ne ronwáhsons.

³ Ne Roiá꞉ner roiaʼtakenhé꞉ion nahonáhkwen ók roshatstenhserowá꞉nen, tánon ne Roiá꞉ner kwáh iáh ne thakarihón꞉ni nasakoiatothároh iakoní꞉kon. Tsi nihaweienó꞉ten thóh nón꞉we niká꞉ien tsi niwatsiskaionhniá꞉tha tánon tsi natekawé꞉ratases, tánon tsi nihiotsatarónhnions ne ne tsi niioienkwárote ne rashí꞉take.

⁴ Wahathárahse ne kaniatarakeʼkówa tánon wahrón꞉nien nahonstát꞉ten, tánon wahastát꞉thaʼte akwé꞉kon tsi kaniatareʼéhnions; Bashan ó꞉ni Carmel onstát꞉ten, tánon tsi nihiotsitiónhnis ne Lebanon onhtashó꞉ko.

⁵ Watsionontishonkwánion ne raohénton, tánon ne tsi ionhniarónhnions wakawistanawénhseron; watsiahontsíshonkwe ne raohén꞉ton, ne tsi ionwenhtsá꞉te ó꞉ni ratikwé꞉kon ne thóh nón꞉we niiená꞉kere.

⁶ Ónhka aiekwé꞉ni taietá꞉ne ohén꞉ton ne ranakwáhtshersa? Ónhka aiekwé꞉ni naionthá꞉katstate ne ioʼtarí꞉hen raonakwá꞉tshera? Ne raoterhiatitkhóntshera tewawéron tsi ní꞉iot ne ótsire, tánon raónha nosténras teorí꞉tons kenk ní꞉was.

⁷ Ne Roiá꞉ner tsi thoriwaié꞉ri, kwáh roiataní꞉ron tsi nitesakones ne wenhniserontákwen ne tekanikòn꞉rare; teshá꞉kones tsi niiá꞉kon ne raonhà꞉ke ienhiontekwáhsen,

⁸ iekaní꞉hare ne ionekasáste iawenhó꞉ton. Raónha kwáh ne enrón꞉niate enkananonhà꞉ke tsi ensakó꞉iatse ne ronwáhsóns, tánon kwáh ienhakóntakwe ne ronwáhshons tsi tetiò꞉karas nienhón꞉ne.

⁹ Nontié꞉ren tsi thóh nisaierenhá꞉tie natsiateristáien ne Roiá꞉ner? Ne Raónha kwáh ne enrón꞉niate niahontókten iáh ne ronwáhshons ne kwáh tahontahontkétsko ne teiorihwà꞉ke iahonterátste.

¹⁰ Kwáh tsi ní꞉iot nhonionwá꞉ras ne rotiiatotaréston, Kwáh tsi ní꞉iot ne ratinekakástha rotinekatárions; ronatsiatakʼtions tsi ní꞉iot ne kawá꞉he.

¹¹ Í꞉seke tioientákwen tieiá꞉ta ieiakoiakénen akaónha iakoterístaien ne kariwahetkénhsera nahonwaʼtkónten ne Roiá꞉ner, akaónha sakotitsenhaién꞉nis ne iakoriwanéren.

Roiá꞉ner ensakoniakente Judah

¹² Tsi nihá꞉wen ne Roiá꞉ner, “Iawerohátien tsi kwáh ratishatstenhseranánon tánon ronatiohkowá꞉nen, kwáh kíʼ enhonwatiiatʼse tánon enhonhní꞉heie. Iawerohátien tsi khonnràro, Ní꞉i kwáh kíʼ iáh shé꞉kon tahonsakhonhráro,

¹³ Tánon ó꞉nen kwáh tentsiá꞉ke ne raotsientaniátstha nakonráhkwahse tánon tentsiá꞉khon ne senhnenhrénhston.”

¹⁴ Ne Roiá꞉ner kwáh wahaianerenhserí꞉sa ní꞉se sarihwà꞉ke: “Ne sashén꞉na iáh nonhwén꞉ton tahonsakathá꞉tse; thóh tsi rotinonshó꞉tons ne saní꞉ios kwáh entsiá꞉kons ne wakaratakwahniónkwens kaiatonhnishón꞉ahs ó꞉ni ne kontiiatarónhnions. Ní꞉i kwáh enkonhiatʼtsiatonhkónhnien, asè꞉ken ní꞉se iáh ohté꞉nen teseriwástha.”

¹⁵ Satkátho! Thóh tsi ionnontáhronhnions ne ne ratsitákes tsi niká꞉ien ne raónha thá꞉has ne karí꞉wiios, raónha ratró꞉ris ne skén꞉nen í꞉ken! Sateʼnikonhró꞉ri tsi nisakhwáhere, O Judah, iatesót꞉ten tsi nisararátston, asè꞉ken iáh shé꞉kon ne kwáh rotiriwanéren nahonsaiesanénhrenhte; ne ronónha kwáh ne í꞉ken tsi ronwatiiátʼse.