Micah 3 - Ohiatonhseratokénti

¹ Tánon waʼkí꞉ron: Sewatahónsatat, í꞉se nonón꞉tsi í꞉ken tsi nokwáh ne Jacob tánon sewaʼkó꞉ras ne tsi ronón꞉shote ne Israel! Iáh ken tehiówenk naisewaterienhtárake ne kaiá꞉neren?—

² Í꞉se ne sewáhsons ne ioiánere tánon ne sewanón꞉wes ne karihwahétken, ietsiwarahratiónkwas nakonhkweʼtashón꞉as, tánon sehwawarahrónkwas ne tsi rotistiénhtare;

³ ietsiwáhrats nakonkweʼtashón꞉as, ietsiiénhserons, teieʼtsitientsá꞉kons; tánon enieʼtsihiátsowe kwáh tsi ní꞉ioht noʼwá꞉ron kwáh tsi ní꞉ioht nontakʼne kawaʼrá꞉re.

⁴ Ethò꞉ne iathenhonsénhtho raonhà꞉ke ne Roiá꞉ner, ók iáh kíʼ tathasakorihwaʼserá꞉kwahse; enshakoʼkonsaséhthen né nenhkahá꞉wike, tiorì꞉wa tsi nihatiweienaksénhskwa.

⁵ Káti ráton ne Roiá꞉ner tsi nokwáh ne rotitokénhse ronónha waʼsakonathahará꞉kwahte nakonkweʼtashón꞉as; ne nó꞉nen thé꞉nen rotí꞉ien nahónhneke ronónha tehotihenré꞉tha ne “skén꞉nonk”; nó꞉nen ne iáh othé꞉non teotí꞉ien nahónhneke, ethò꞉ne enhonterí꞉io ne raónha.

⁶ Ne káti aorì꞉wa ne sarihwà꞉ke thóh nienhiotónhake tsi nahtetiò꞉karas ne tsi niwasónhtes, iáh othé꞉nen thatahonshesatierónhnionse, tánon thentsokaráseke ne sarihwà꞉ke, iáh othé꞉nen tahonsaiesarihotháshien; Ienkará꞉kwenhne rononhà꞉ke ne rotitokénhse, tánon ne tsi niwenhní꞉seres thentsiokaráseke ne raotirihwà꞉ke.

⁷ Ne rotitokénhse kwáh enhonwanatehá꞉te, né ronthiatonserátkenhse kwáh enhonwanateháte; kwáh ratikwé꞉kon rontsá꞉nakes enhónste tsi enhatiró꞉roke ne tsi ratisaká꞉ronhte, tsiórih tsi iáh tehatiié꞉nas ne tekarihwasehrá꞉ken ne Ní꞉ione nahontá꞉we.

⁸ Ók kíʼ ní꞉i, kwáh tiataná꞉non naoshatsténhsera né꞉ne raoshatsténhsera Roiá꞉ner, tánon skátne ne kaiáneren ó꞉ni ne kaʼshatstenhserowá꞉nen, né nahiró꞉ri ne Jacob ne raoriwaneraháktshera ó꞉ni ne Israel aorihwaneraháktshera.

⁹ Sewatónhtet kí꞉ken, í꞉se ne sewaʼkóras tsi ronónshote ne Jacob tánon ne sewaterihón꞉tons ne raotinóns꞉kons ne Israerʼró꞉nons, tsi ratí꞉sons ne kaiáneren tehatiwátases nahò꞉ten ne ioterihwakwaríhshion í꞉ken,

¹⁰ onekwénhsa nahò꞉ten ronatenathonhniáton ne Zion tánon karihwahetkénhsera ne wahónste tsi wahontenatón꞉ni ne Jerusalem!

¹¹ Ne rahonhnonkweʼtashón꞉as ne ratirihwénhtha oʼwísta ronhwatikárhiakse ne nahatinikónhrate, ne ratitsihénstatsis ratikaráiens tsi sakotirihonhnién꞉nis, ne rotitokénhse tsi nishakotirihothashién꞉nis oʼwísta rotí꞉rare nahontahonhwénhnon; nek kíʼ sá꞉ka raonhà꞉ke ne Roiá꞉ner iehatihiatarákare tánon rón꞉ton, “Orihwiiohón꞉we ne Roiá꞉ner tsi tewakwé꞉kon! Iáh othé꞉nen ne karihwahetkénhsera tahionkwárane.”

¹² É꞉tho káti í꞉se sarì꞉wa ne Zion kwáh tsi ní꞉ioht ne kahentà꞉ke tsi enhathitarakarát꞉tho; né Jerusalem né꞉ne ienhwá꞉ton enhiontohiótane ononhwénhsera, tánon Nononsatokentikó꞉wane karakonʼkó꞉wa enwá꞉ton.