Matthew 5 - Ohiatonhseratokénti

Ȣisk-haton nateioteriȣasonterakȣen.

¹ Ȣahattoke ne Iesos tsi kontiokoȣanen ronȣanonteratie, onontoharake niiahare: nok eh iahatien, oksaok ȣathonȣatiataton ne raotiokȣa.

² Nok kenh nahaiere tsi ȣasakorihonnien.

³ Iakotaskat nʼiakonikonrenton: aseken akoȣenk ne karonhiake.

⁴ Iakotaskat ne teionsenthos: aseken entsiontatenikonraieȣenthote.

⁵ Iakotaskat nʼok tiiakaȣeron iaȣeronhatie; aseken akoȣenk enȣaton nonȣentsia.

⁶ Iakotaskat ne tkariȣaieri iontonkariakta oni iakoniatathata: aseken enhiontatatahten.

⁷ Iakotaskat niakotaʼnitenraskon, aseken entsiontatitenre.

⁸ Iakotaskat nʼiakaȣeriasiio: aseken onhonȣaken ne Niio.

⁹ Iakotaskat nʼiakoianerenseriio: aseken Niio sakoienhokonha enhiontatenatonkȣake.

¹⁰ Iakotaskat ne kariȣiioston iontatkenronseronniatha: aseken akoȣenk ne karonhiake.

¹¹ Enseȣataskat ne katke kiok, niatekon enhietsiienhase, enhietsirenhiakente oni, nok oni nii akeriȣake niatekon enhietsiiennoȣenta-nionhase.

¹² Seȣatsennonni oni seȣatonnharen, aseken koȣanen enseȣatsennonniate ne karonhiake: aseken etho nihonȣatiierase ne thonatierenton Thotitokensehakȣe.

¹³ Ise ahoiotsis tsi ionȣentsiate; nok tanontokat enȣatasoko ne teioiotsis, ohnahoten tentsie-iotsistarhote? neok ȣahi skasta nʼaste iaiakoti nok taionskȣaseronkȣate.

¹⁴ Ise ahosȣathesera tsi ionȣentsiate: iahȣahi taonton aiotaseton nʼonontoharake kanatahere.

¹⁵ Iah oni ȣahi okȣirokon tiieiehaserotha nahehaseroten; iehaserotakȣake ȣahi enhienioten; nok akȣekon tenhiakosȣatheten ne kanonskon ieteron.

¹⁶ Eh kati oni nise naseȣaier teietsisȣatheten ne seȣasȣathesera nonkȣeokon etho naontaȣe ahonȣanenton ne Etsiseȣaniha Karonhiake tenteron.

¹⁷ Tosa seȣerhek skianerenserarisionhe kenh; iah: neh tanon nakierite tsinihotiiaton ne Rotitokensehakȣe.

¹⁸ Aseken kȣarori, ohenton naonsontonȣentsiarisi, iahtekonte tsi ienkaierite tsinikaiaton akȣa ok oni eh niiaȣensere.

¹⁹ Onka kiok, enskat oni ahariȣaiesate tsinikon ȣakȣarori, ethoʼkʼ oni nahaiere tsi asakorihonnien nonkȣeokon, neh raonhaa nenthosennaska nʼonen ienraȣe ne karonhiake; nok tanon nenthoriȣaieriton tsi ensakorionnienni enhasennanoronne ne karonhiake.

²⁰ Aseken ȣakȣarori, iah karonhiake teseȣetane ne iah senha tentiseȣariȣaierike tsi niiot ne ratiiatons oni ne Pharisien.

²¹ Seȣariȣaronkas tsi ronȣatiroriskȣe ne seȣahsotsera: Tosa sherio nonkȣe; nok enhonȣariȣente nonkakiok enhataȣentho.

²² Nok nii, katon, enhostonte nonka kiok ok tenhorihose enhonakȣase ne teiatennontere; nok tokat enhaȣenhase: iah tesanikonra, enhonȣariȣente tsi katsienhaien; nok nenhaȣenhase; tesanonȣaraȣenrie, roreȣatatseraien nʼonesson ahonȣaiatonti.

²³ Tokat oni onen iahaseȣe tsinonȣe nitseȣenniiostane ne Niio, eh aonsaseiarane tsi ronikonraksens ne tsiatatekenha ise sariȣake.

²⁴ Ok eh sati tsinahoten ahsaȣi, niare saseniriȣaseronni ne tsiatatekenha ethone tentese ienseriȣaierite oni.

²⁵ Tosa sanisko naonsaseriȣaseronni tsionnhe nasenikonraksaton, aseken iotteron ne kariton iahonȣarihon, nok tehaiatoretha ia honsahorihon, nok iaiesannhoton.

²⁶ Oriȣiio tsi konrori tsi ok enskarokten nonaken katakȣen ne kȣenis tentesiakenne neh nonȣe.

²⁷ Seȣaterientare tsini honȣatiriȣatati ne iestsisothokonkenha: Tosa satenakȣaiesat.

²⁸ Katon kati nii, ok satekariȣaneren neneok oni takonȣakanerake ne tsiothonȣisen nakonȣaskanek-sekʼe.

²⁹ Tokat tsi seȣeientetakon naskarati sariȣaiontatenni, stako, ihnon oni iasati: aseken senha ioianere ne skati taonsaskaratake kaȣenniioki tosa tsiatakȣekon Oneson aontetsirat.

³⁰ Tokat tsi seȣeientetakon nasenentsati sariȣaientatenni, itsiak ihnon oni iasati: aseken senha ioianere ne skati tasenentsontake tsiniiot ne tsiatakȣekon asatetsirate.

³¹ Sekon are oiah sonȣatirori: Tokat onkakiok enshateȣentete ne rone, raiatonseronkih ne tetsiontekhasiata.

³² Katon kati nii: Onkakiok enshateȣentetane ne rone niah kentehsera tenhiostonthe, iatehaiati ki enhakaronni, nok onkakiok enshotiniake netho ionkȣe oriȣiio tsi enhonnhike.

³³ Seȣariȣaronken oni tsi ronȣennenni ne seȣatsotserakenha: Tosa tsesat Niio Raosenna; ensatateȣennaierite tanon tsini sarharastston.

³⁴ Katon kati nii: Tosat seriȣanirat tsiokoni naontahiotieraton: iah oni tsi karonhiate, aseken Niio rahonistskȣara.

³⁵ Iah oni nonȣentsia; aseken ne konrasitokeȣata ne rahosita; Tosa oni Jerusalem; aseken Onontiiokoȣa raotenata.

³⁶ Tosa oni seriȣanirastst ne Sanontsine aontastako: aseken iah taskȣeni, nenskat oni asennratonni ok neʼsʼenʼsʼ ne kanonkȣiseraontsi.

³⁷ Neok tanon kenhak ne saȣenna: enh, enh, iah, iah; aseken nisinonh kariȣaksen.

³⁸ Seȣariȣaronkon oni tsi kaiaton, ȣaton: Okara iatenskene nʼokara, nok nʼonaȣira, onaȣira.

³⁹ Katon kati nii; Tosa seȣahtsent; ok eken tanon nonȣa, tokat tsi seȣeientetakon aiesaranonsaiake senatonhas oni ne skati.

⁴⁰ Tokat oni onka kiok enhiaiatonseron ne sakhare tahakanerake, iahatson kenikȣekonhak natiataȣi.

⁴¹ Onka kiok aiatennekaronkȣen ahetsiatenrosen tsiniiore ne seȣateniententsera, asennon nʼiasohestst.

⁴² Hehtson nʼiariȣanontonni, nok tosa hetsiatarontiens ne ranihas.

⁴³ Seȣaterientare oni sekon tsi ronȣatirori: enshenonȣehake akȣekon nonkȣe, nok tanon enshesȣenseke tsiniiakon iesasȣens.

⁴⁴ Katon kati nii: Shenonȣehak ne iesasȣens, nok Teshenonȣeratonsek ne iesakenronni, sheiaterasȣiiosten ne iesakenronni, nok sheiaterennaiennihek ne teiesonnharikhons oni iesakenrenseronnis.

⁴⁵ Aiaȣens iaontoriȣiheȣe ne tokenske etsiseȣaienha aonton ne Etsiseȣaniha Karonhiake tenteron: aseken iah tatehatihas, ok satesakosȣathetenni ne ionkȣetakson tsiniiot ne tionkȣetaieri.

⁴⁶ Nahoten ensatonnrakȣate neneok ashenoronkȣake ne iesanoronkȣa? iah oni kenh naha oh tehatiierha ne ionkȣetaksen okonha?

⁴⁷ Tokat nonȣa neok teseiarhoton ne tesatennontere, ohnahoten iesoheststa tsiniiot notiake? iah oni kenh neneh eh tehatiierha ne ionkȣetaksen.

⁴⁸ Eh tanisa nonteseȣariȣaierik tsinithoriȣaieri ne Etsiseȣaniha Karonhiake tenteron.