Malachi 3 - Ohiatonhseratokénti

Tsi Nontahawenonhátie Ne Rarihwakarénieʼs

¹ Satkáhtho, ienhiiaténniehte ne rakerihwakarenièn꞉nis nahakkhahahserónnien nakhén꞉ton, tánon ne Roiá꞉ner ne tsi sewahrhá꞉re thentiawènhstsi ènrawe ne raononhsatokenhtiʼkowáhne. Ne ne rarihwakarénieʼs naterihwahseronniáhtshera raonhá꞉ke nón꞉we niiontionʼwesáhtha—orihwiioʼón꞉we, tsi tá꞉re, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

² Ók ónhka aiekwé꞉ni naiontahkátstate ne tsi nentewenhniserá꞉teke tsi nontahawenonhátie, tánon ónhka aiekwé꞉ni naiontahkátstate nó꞉nen enhoké꞉tohte? Aseʼkénh tho nihaiaʼtó꞉ten tsi ní꞉ioht ne raristanawènhtha raó꞉tsire tánon ne rahkwenióhares raonoharé꞉tha;

³ kwáh ʼeh enhátien tsi ní꞉ioht ne raristanawènhtha tánon tesastarát꞉theta kahwistarà꞉ken, tánon ensehshakaonhnahkanón꞉ni ne tsi ratihwatsiratátie ne Levi tánon ensehshakaonhnhahserón꞉ni tsi ní꞉ioht ne kahwistarà꞉ken tánon nohwistanó꞉ron, tsi niió꞉re ienhonwá꞉tatshe nenthón꞉ion raonhá꞉ke ne Roiá꞉ner tho raorihwakwarihshionhtsherá꞉kon.

⁴ Eʼthó꞉ne tsi nithatiiéhsthaʼs ne Judahró꞉nonʼs ó꞉ni ne Jerusalemró꞉nons kwáh kiʼ enhawerienʼtí꞉iohsteʼ ne Roiá꞉ner tsi kiʼ nitiohtón꞉ne ne tsi nitewenhniseraténionhskwe ne wahón꞉nise tkén꞉ne tánon ne tiotohserohetstánionʼs.

⁵ Eʼthó꞉ne kiʼ kwáh sewaiaʼtákta én꞉kehte nakwarí꞉wenhte; kwáh entiaʼtahstó꞉reke tsi enkerihwahní꞉rate tsi nonwá ne rontenʼèn꞉naras, tsi nonkwá ne rontenahkwaiesáhtha, tsi nonkwá ne ratirihwahní꞉rats nonó꞉wenʼs, tsi nonkwá ne shakotironhiakèn꞉tha ne ratihnhá꞉tsheraʼs tsi nihonatkariá꞉kse, ne ionatehré꞉ʼons tánon ne tehontonhnhakárhias, tsi niiá꞉kon ne é꞉ren iehonwatí꞉reks ne thihonnonhontsá꞉te, tánon ne iáh teiontatkweniènhstha, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

⁶ Aseʼkénh Í꞉i ne Watiá꞉ner ne iáh thaʼtekatténieʼs; eʼthó katíʼ í꞉se, ne tshisewaioʼokón꞉ʼahs ne Jacob, iáh tehonwanahtón꞉ton.

⁷ Tsi nithonatenhniseraténionhskwe ne ietshihsothoʼkonʼkénhen sewatahróntionʼs tsi nonkwá natianerènhseraʼs tánon iáh tesewatienawáhston. Akonhá꞉ke naʼtontáhsewe, tánon tsonhá꞉ke nienhénhske, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs, Ók ní꞉se sewá꞉ton, “Oh ní꞉ioht tsi tho niaonsaiá꞉kwe?”

Tóhsa Tshisewanènhsko Ne Rawenni꞉io

⁸ Ónhka kenh ahonwanènhsko ne Rawenni꞉io? Eʼthó sá꞉ne í꞉se takwanenhskwenhá꞉tons! Ók sewatón꞉nions, “Oh ní꞉ioht tsi kwanenhskwenhá꞉tons?” Tsi nitisewaiéhstha nohwísta tánon tsi nisewaró꞉roks natatawíhtsheraʼs!

⁹ Sewanoronhstén꞉nis ne ne kahrewahtáhtshera takáhawe, aseʼkénh takwanenskwenhá꞉tons—kwáh sewentiokwakwé꞉kon!

¹⁰ Tasewáhahf niakahwistaié꞉rike kanónhskon nononhsatokenhtiʼkowáhne, ne ká꞉ti nakakhwaièn꞉take nakenónhskon, tánon kwáh kiʼ takatenniéhten, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs; satkáhtho tókaʼ kenh iáh thakenenhstonkwahnhotonkwenhá꞉ton ne karonhiá꞉ke ní꞉se sewarihwá꞉ke tánon naontakoniawerón꞉hahse aontawenhrátsheke ne kaiaʼtateríhtshera.

¹¹ Kwáh kiʼ enkhéhnheʼse ne tsistá꞉rare ní꞉se sewarihwá꞉ke, ne katí tóhsa ahatihethéntho tsi nitkáhahs ne kaienthóhshera ne tionhontsà꞉ke; tánon ne sewanenharaienthóhseronʼs ne kahentà꞉keʼs iáh kiʼ ohentóhskon thakénhake, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

¹² Eʼthó꞉ne kiʼ ne iakaontsaʼkehró꞉nonʼs eniesanaʼtónhkhwake satáhskats, aseʼkénh ní꞉se ne sonhontsà꞉ke kwáh enwatenatí꞉ioke neʼthó nón꞉we naienákereke, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

¹³ Tsi satatí꞉ʼon wahskatewennatshaníhten, rá꞉ton ne Roiá꞉ner. Eʼthó sá꞉ne sá꞉ton, “Oh ní꞉ioht tsi kwahthará꞉ni?”

¹⁴ Ísewen, “Iáh oh thé꞉non tekaiaʼtakehnhaʼtsherénhawe nahonwaióʼtenhse ne Rawenni꞉io. Nahó꞉ten tetewatèn꞉tshaʼahs tsi ionkwatienawáhston ne raorihonnienníhtshera khehs tho ní꞉ioht tsi ionkwathahitáhkhe tsi ní꞉ioht naionkwatshón꞉nion raohén꞉ton ne Sakoiá꞉ner ne ronterí꞉ios ratoronhiaʼkehró꞉nonʼs?

¹⁵ Ó꞉nen nón꞉wa tho iethiʼianontónnionf ne rontatkowanáhtha tsi nihonateraʼswí꞉io; ne karihwahetkénhtshera tsi nihontiéhrha iáh nek khok tsi rotiianerahstén꞉nis, ók nó꞉nen Rawenni꞉io enhonwatenniéhthaʼse iáh oh thé꞉non teiotiiá꞉tawenhs.”

Ne Raotiiaʼtateríhtsheraʼs Ne Rotirihwató꞉ken

¹⁶ Eʼthó꞉ne ne ronwakweniénhstha ne Roiá꞉ner waʼthatihtharónnion. Ne Roiá꞉ner kwáh ákta tsi wahatenʼnikón꞉raren tánon wahatahónhsatate, tánon iaʼthahiatónhserahkwe ne iehsennarónnionʼs ne raohén꞉ton tsi niiá꞉kon ne ronwarihwakweniènhstha ne Roiá꞉ner tánon ronwahsennakará꞉tats.

¹⁷ Kwáh Í꞉ʼi akonkwé꞉taʼs enkénhake, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs, ronnónha ne wakatonkweʼtanorónhston ne tewenhniserá꞉te ne wakenhniserarákwen, tánon enkhenonhstate tsi ní꞉ioht ne iakowí꞉raien tehonwanahrhó꞉ton ne rontewennaráhkhwa.

¹⁸ Eʼthó꞉ne shé꞉kon énska iensewáteratsteʼ kwáh ensewatkáhtho tsi naʼtetiattíhen ne iakoiánere tánon ne iakonkweʼtahétken, tsi naʼtetiattíhen nónhka ronwaioʼténhse ne Rawenni꞉io tánon ne iáh tehonwaioʼténhse.