Malachi 2 - Ohiatonhseratokénti

¹ Tánon nón꞉wa, kí sewatsihènhstatsiʼs, kí꞉ken karihwatáhtshera í꞉se sewarihwá꞉ke.

² Tókaʼ iáh tesewatahonhsatáthe, Tókaʼ iáh tshiaesewá꞉ien ne sewerià꞉ne naesewaiaʼtanehrákwahte nakhsèn꞉na, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs, eʼthó꞉ne kiʼ ienkaténniehte ne kakaronniáhtsheraʼs ne tsonhá꞉ke tánon enkhétkenhte ne saiaʼtaterihtsheraʼs; kwáh í꞉ken tsi ó꞉nenk wakhetkénhton, tiorí꞉wa tsi iáh sewerià꞉ne tshiesewá꞉ien.

³ Kwáh enkheiaʼtó꞉rarake ne tsi wahswatsiratátie, tánon enkiʼtáhrho ne sewakonhsà꞉keʼs, ne óʼta ne tisewaiéhstha, kwáh kiʼ é꞉ren enkwaiaʼtenhá꞉wihte nakhén꞉ton.

⁴ Sewaterièn꞉tarak, ká꞉ti, tsi iewakatenniéhton kí꞉ken karihwatáhtshera ne tsonhá꞉ke, nétho akaterihwahseronniáhtshera skát꞉ne ne Levi tsi aká꞉take, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

⁵ Nakaterihwahseronniáhtshera tsi nonkwá ne ráonha ne ne aterihwahseronniáhtshera naiakónhnheke tánon skén꞉non, tsi nithiiá꞉wi; ne kí꞉ken konwanaʼtonhkhwa kakwenienhstáhtshera, tánon wahaketshá꞉niʼke tánon waʼthá꞉taʼne tsi nahakwénienhste nakhsèn꞉na.

⁶ Norihwí꞉io karihonnienníhtshera rahshà꞉kon wá꞉tahkwe, tánon iáh oh thé꞉nen naterienʼtawenriéhtshera tekatshénrion ne rariʼtsà꞉ke. Skátne tsi waʼtiatiatekháhahkwe ne ne skén꞉non í꞉ken tánon ne tkarihwaié꞉ri, tánon iakentiohkowá꞉nen tonsahshakokahrhaté꞉ni naiónhtkaʼwe ne karihwané꞉ren.

⁷ Aseʼkénh tsi ratihshaká꞉ronte ne ratitsihènhstatsiʼs aó꞉wenk naionteweièn꞉tonke nattokháhtshera, tánon nonkwehshón꞉ʼahs aó꞉wenk naiakéhsake ne karihonnienníhtshera ne tsi rahshaká꞉ronte, aseʼkénh ráonha rorihwakarenién꞉nis ne Sakoiá꞉ner ne ronterí꞉ios ratironhiaʼkehró꞉nonʼs.

⁸ Ók wesewatiaʼtontá꞉ko ne tsi niiohahó꞉ten ne tkarihwaié꞉ri í꞉ken; í꞉se wesewarihón꞉ni iakentiohkowá꞉nen wahontiaʼtáhton ne ne sewarihonnienníhtshera takarihónniaʼte; waʼtisewá꞉iaʼke ne raonaterihwahseronniáhtshera ne Levi, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs,

⁹ tánon Ká꞉tiʼ Í꞉ʼi enkoniónnien naiesakèn꞉ron tánon ehtà꞉ke aiesón꞉ni raotihén꞉ton nonkweʼtakwé꞉kon, waʼtehshiehstáhshion tsi ní꞉ioht tsi iáh tesateweièn꞉ton nakeweièn꞉naʼs ók wahsé꞉neʼste tsi nitisarihwahréhkwen tsi nihsherihonnién꞉nis.

¹⁰ Iáh kenh tewakwé꞉kon shaià꞉ta khok ne tshitewaʼníha í꞉ken? Iáh kenh shaià꞉ta khok ne Rawenni꞉io ne shonkwaiaʼtíson? Oh katí nontié꞉ren tsi iáh teionkwarihwató꞉ken ne tshieiorihwakwé꞉kon tsi nokwá ne tewatateʼkoʼokón꞉ʼahs, ionkwenʼtaksatonhátie ne raonaterihwahseronniáhtshera ne iethihsothokonʼkénhen?

¹¹ Ne Judah ne onterihwahténtiaʼte ne ioterihwátteronʼs, tánon tsi naʼkaieránion ne ne iáh tetkarihwaié꞉riʼs í꞉ken ne Israeronónke ó꞉ni ne Jerusalem nón꞉we; aseʼkénh ne Judah ioʼtaksá꞉ton ne raononhsatokenhtiʼkó꞉wa ne Roiá꞉ner, ne ne ranorónhkhwah, tánon ne rotateniáktén꞉ni nakoién꞉ʼa ne thihhaontsá꞉te ní꞉io.

¹² Aiá꞉wenʼs ne Roiá꞉ner ahóhtonʼte ne rón꞉kwe ne kí꞉ken tho nenhá꞉iere ne raoʼtohserá꞉kon ne Jacob—iawerohátien tsi nahohawíhten natatawíhtshera ne Sakoiá꞉ner né ratironhiaʼkehró꞉nonʼs.

¹³ Tánon ne kí꞉ken ní꞉se ne kwáh tho nihshiéhrha: Sakáhseri skoharohsonniá꞉tha tsi ratsenhahráhkhwa ne Roiá꞉ner, tehsahsènthohs tánon sonhséhnha tiorí꞉wa tsi iáh ó꞉nen teshaié꞉nas tsi nahó꞉ten etstá꞉tis nahawerienʼtí꞉iohste tsi nitewéhtha ne sahtsaʼnà꞉ke.

¹⁴ Seriʼwanóntons, “Nontié꞉ren tsi iáh ó꞉nen teshaié꞉nas?” Ne tiorí꞉wa ne Roiá꞉ner tsi rorihwahnirá꞉ton tsi naʼtetsátere ní꞉se tánon ne satateniáktén꞉ni né sitisaión꞉ha, ne nahonhá꞉ke iáh tesarihwatokén꞉ne, eʼthó sá꞉ne tsi áonha ne titsatenróhon tánon ne tesení꞉teron í꞉ken aterihwahtseronniahtsherá꞉kon í꞉ken.

¹⁵ Iáh kenh shaià꞉taʼk khok ne Rawenni꞉io tehaiaʼtíson? Tetsá꞉ron noʼwá꞉ron tánon natónhnhets tsi ráonha raó꞉wenk í꞉ken. Tánon nahó꞉ten ne shaià꞉taʼ khok ne Rawenni꞉io rahská꞉neks? Ne ne Rawenni꞉io shakoioʼokón꞉ʼa akénhake. Katíʼ sewatatkaʼén꞉ion, tánon tóhsa ónhka ne tsi nítson naesewaʼnikonhráten ne ión꞉kwe ne sewatateniaktén꞉ni ne kenʼsitisaión꞉ha.

¹⁶ Aseʼkenh Íttshionʼs ne taonsaiontekháhshion, rá꞉ton ne Sakoiá꞉ner, ne Sako Ní꞉io í꞉ken NʼIsraelronón꞉ke, tánon ne iakorí꞉ware nakotieronnià꞉ke ne karihwahétken í꞉ken, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs. Katíʼ sewatatenʼnikón꞉raren ne iaʼtesewaiá꞉tiʼs tánon tóhsa ne iáh thaisewariwatokenhake.

¹⁷ Waʼtehtshisewahwihshenhí꞉iaʼte ne Roiá꞉ner tsi ní꞉ioht tsi sewáhthare. Eʼthó sá꞉ne sewá꞉ton, “Oh ní꞉ioht tsi waʼtehshakwahwihshenhé꞉iaʼte?” Ne tsi nisewanonhtónnions, “Ratikwé꞉kon ne ne rotiióʼtenhs ne karihwahétkenʼs tsi niioiánere raohén꞉ton ne Roiá꞉ner, tánon ronnonhá꞉ke nonkwehshón꞉ʼahs nón꞉we nihaonhwesá꞉tha.” Khehs tsi sewariʼwíhsaks, “Kaʼnón꞉we ní꞉reʼs ne Rawenni꞉io akénhake ne roiánere í꞉ken?”