Leviticus 9 - Ohiatonhseratokénti

Ne Aaron Tánon Ne Sakohiohokónhas Tahontháshawen Wahothiʼhióten Ne Raotiʼioténsera

¹ Tsi óia sahiórenhne ónenh sihioteweienhnentáhon tsi nikaianerenseró꞉ten nahionthaterihwaníratʼtse, Ne Mahís iashakónonhke ne Aaron tánon ne sakohiohokónhas ó꞉ni ne ronaterihóntons ne Israerʼró꞉nonhke.

² Wahawénhase ne Aaron, “Iatsiaténhaf ne tsionónskwahron rátsinn tánon ne teiotinakaronhtónʼa rátsinn né꞉ne kwáh iahothènen tehothiʼtsihióthare tánon thá꞉tion ne Roiá꞉ner, ne tsionónskwahron rátsinn né꞉ne kariwanerenhákʼtshera aorihwáke tánon ne teiotinakarontónʼa né nenʼné꞉e nahonwateskónhten aorihwáke.

³ Ethóhʼne sheʼróhri nonhkweshón꞉as Nisraerʼró꞉nonhke kaiatákeras rátsinn iehonwahiaténhaf né꞉ne karihwanerahák꞉tshera aorihwáke, né꞉ne énska tehahoserihiákon, tánon énska tehahosehrihiákon teiotinakaronhtónʼa né꞉ne kwáh iáh othènen tehotsihióthare né nahonwanaʼteskónhten,

⁴ tánon tehonakares rátsinn tánon teiotinakaronhtónʼa rátsinn né nènhne ne skaríhwah íken tsi iahontkáwenhke. Né꞉ne Roiá꞉ner ahonwateskóntʼthaʼse skátke noná꞉tsias aorihwáke né꞉ne teweienaʼiéston. Ónenk kíʼ tsi thóh nenhatí꞉iere tsioríhwa ne Roiá꞉ner tsi ónhwa wenhniseráte enshakothotháshiaʼse.”

⁵ Kwáh oriwakwékon ohénton tsi watóhsehroʼthe niahatíhaʼwe tsi kíʼ nihorihwíson ne Mahís, tánon kwáh kanakeraserakwékon thóh nónhwe nahontsataróroʼke nahonwasénhnaien ne Roiá꞉ner.

⁶ Ne Mahís wahénron, “Ne Roiá꞉ner kwáh tsi sewarihwishehén꞉ni akwékon kí꞉ken thóh naisewáiere, né káti nahónton ne rahohiathanerakwáhtshera nahisewatoʼtháshiaʼse.”

⁷ Ethóhʼne ónen Aaron nónhwa sahawénhaʼse, “Wáhs tsi ietsienharákwahke niáhaʼse tánon né saterihwaténtʼtsiat ne karihwáneren aoriwáke asatʼtsiaháthaʼkwe tánon ne watéskonhte aorihwáke né nènhne éhren ahonsakaháwiʼte ne sarihwanerahákʼtsheras ó꞉ni nonhkweshón꞉as akorihwanerahák꞉tsheras. Saterihwaténtʼtsiat kí꞉ken nikarihó꞉tens né nahéren ahonsakaháwiʼte nonhkweshón꞉as akorihwanerahák꞉tsheras, kwáh kíʼ tsi nihorihwíson ne Roiá꞉ner.”

⁸ Ne Aaron thóh kíʼ niaháre ákta ne tsi ietsienharáhkwahke tánon teró꞉owíra wahononhwarhiákon né꞉ne rahónʼa rahorihwanerahák꞉tshera aorihwáke.

⁹ Sakohiohokónʼa tahonwanekwenhsahawíten, tánon thóh iaʼthanisnónhsoʼwe, tánon ostónha thóh tsi iosónhtons ne tsi tekahiosakérons ne ietsienharákwahke wahanekwenhsaró꞉sehron, tánon ne wahotenekwenhsatháteʼre tsikʼkárate ne ietsienharákwa iahanekwenhsáweron.

¹⁰ Tánon thóh ne tsi ietsienharákwahke wahatʼtsahathánion ne iorèsens, ostséseris, tánon ne kwáh tewentwenhsí꞉io, kwáh kíʼ tsi nihoríhonte ne Roiá꞉ner ne Mahís.

¹¹ Ók nowárons ó꞉ni ne kanèhonk ástsʼte tsi nónhwe nihonatená꞉thaien wahát꞉tsahaʼte.

¹² Wahononhwarhiákon ne katʼtshénen né꞉ne kwáh rahónʼa enhoteskónten. Sakohiohokónhas tahonwahawíten nonekwénhsa, tánon thóh iahotiésehrons akwékon ne kaiéri níkons ne skatísons nokwáhtis ne ietsienharáhkwahke.

¹³ Tahónhion nonónhtsi tánon noiá꞉sons nahoténsons ne katshénen tsi rónhnheʼkwe, tánon ietsienharákwahke wahatʼtsahathánion.

¹⁴ Ethóhʼne wahanoharénion ne rahiathakónsons ne katshénen tsi nihioteriwatséren tánon wahát꞉tsahaʼte ne ietsienharákwahke é꞉neken taharónhnion ne tsi wateskónthaʼkwe.

¹⁵ Ehʼthóhʼne ónen, ne wahaterihwatsʼtérisʼte nonhkweshón꞉as tsiakoiesthánions. Iahohiaténhaʼwe ne kahiatákeras tsi tkaiéston né꞉ne nonhkweshón꞉a akorihwanerahák꞉tsheras aorihwáke, wahononhwarhiákon, tánon iahát꞉kaʼwe, tsi kíʼ nihoiéren tsi iehotkáwen ne rahónʼa rahorihwanerahák꞉tshera aorihwáke.

¹⁶ Iahohiaténhaʼwe ó꞉ni ne katshénen ne nahoteskónhten aorihwáke tánon taháiesʼthe tahioianénhaʼwe tsi kíʼ nikaianerenseró꞉tens.

¹⁷ Iahát꞉kaʼwe ne onátsia aorihwáke tánon wahatsanó꞉tsienʼthe nothèsera tánon wahát꞉tsahaʼte tsi ietsienharákwahke. (Né kí꞉ken nisiʼnónhwe nihiówenhte ne niaʼtewenhniseráke tsi hionteskónhtʼtha.)

¹⁸ Wahononhwarhiákon ne teró ó꞉ni ne tehiotinakaronhtónhʼa rátsinn né ꞉ne skaríhwa akorihwáke íken nonhkweshón꞉a. Sakohiohokónhas tahonwanekwenhsenhawíten, tánon thóh iahotsésehron ne kaiéri níkons ne skatísons nokwahtísons ne ietsienharáhkwahke.

¹⁹ Ne Aaron ne teró rahoresénhtsheras raierónhthake ne teiotinakaronhtónʼa waharónhnion

²⁰ é꞉neken ne ronhnenhskweʼnákes ne katʼtshénens tánon iahahá꞉sehron akwékon tsi ietsienharáhkwahke. Thóh ietsienharákwahke wahatʼtsahathánion ne iorèsenhs

²¹ tánon iahatkawásehron noskwènas ó꞉ni nonàkens osínas né꞉ne katokénstons athatawítsheras né꞉ne Roiá꞉ner rahorihwáke tsi thonwanáwi ne ratiʼtsihénsthatsis, tsi kíʼ nihorihwíson ne Mahís.

²² Ne nónen ne Aaron akwékon waharihwaiériʼte ne watéskontes wahanentʼtsakétsko rahotihénton nonhkweshón꞉as tánon washakohiathaʼtéristhe, tánon ethòne thontaháts꞉nenhte ne ietsienharákwahke.

²³ Ne Mahís tánon ne Aaron atohsehrákon niaháne tsi nónhwe nihénteron ne Roiá꞉ner, tánon nónen shaʼthontanihiákenhne, washakotiʼhiathatérisʼthe nonhkweshón꞉as, tánon ne rahohiathanerakwáhtsheras ne Roiá꞉ner kanenhrakwékon tsi wahakothoʼtháshiaʼse.

²⁴ Thonthaiaʼwénhstsi ne Roiá꞉ner ótsire tahathénieʼte, tánon onhthónhte ne watéskonte tánon ne iorèsenhs nahoténsons ne ietsienharákwahke. Nó꞉nen nonhkweshón꞉a sahontkátho, ratikwékon watotihénreʼthe tánon wathontʼtsákeʼte tsiahatiʼkonhsaiénthaʼne nonhontsáke.