Leviticus 7 - Ohiatonhseratokénti

Nenskakarhiákʼthonhke Tsi Tkaiesthánion

¹ Né tekariwasonhterónhnion kaianerénseras ne nahonsakakarhiákthonhke tsi karó꞉rons, né꞉ne kwáh íken tsi iotó꞉kentis

² Né kíʼ katshénen né tkaiéston tsi enkonhwanonhwarhiákon né꞉ne othoréke nokwáhti tsi ientseharáhkwa, tsi nónhwe nikonhwanawéntʼthos ne katʼtshénens nenkonhwanateskónhten, tánon nonekwénhsa ienwatsiónh꞉ke ne kaiéri níkon skatísons nòkwahtis ne ietsienharahkwáhke.

³ Akwékon ne ioré꞉senhs tsi enkathakwénhke ne konhtihiátakons ne katshénens tánon ietsienharahkwáhke enkaráhke: ne iothashaʼrésen, ne iorèsenhs ne iorahnentátkons kahiathakónsons,

⁴ ne aiostiésehris tánon ne iorèsenhs iorahnentátkons, tánon ne kwáh tsioianere otwenhson.

⁵ Ne ratsihénsthatsi akwékon enhátʼtsahathe ne iorèsenhs ne ietsienharáhkwahke né꞉ne ká꞉khwa tsi ienwatkáwenhke rahonháke ne Roiá꞉ner. Né꞉ne enskakarhiákon tsi iewatkáwen.

⁶ Kwáh tsikʼónhka ne rónhkwe ne ratsihénsthatsi rahowátsire enwáton nahónhneke, ók ónenk kíʼ tsi thóh nónhwe nenhónneke tsi nónhwe nihiotokénti íken, tsioríhwa tsi nihiotokénti.

⁷ Énskak ne kaianerénhsera ká꞉ien né꞉ne tetsáron né꞉ne karihwáneren tánon ne ahonsakakarhiákonʼke tsi iewatkáwen: nowáron ratsihénsthatsi né rahówenk né tsi rahónha raʼteskóntʼtha.

⁸ Ne rahonéhonk ne katshénen ne iewatkáwen nahontsahatónhake ratsihénsthatsi ne rahó꞉wenk ne tsi rahónʼa wahaterihwatsʼterísten tsi wahateskónhten.

⁹ Akwékon nonátsias né watenatháronhte tó꞉ka ó꞉ni akerát꞉ne tsi kaweienentá꞉hon tó꞉ka ó꞉ni otsienhá꞉ke tsi nikaríhton ratsihénsthatsi kíʼ rahówenk ne tsi rahónʼa iehotkáwen rahonháke ne Roiá꞉ner né nakóren akorihwáke.

¹⁰ Ók akwékon ne iáh tekanatsaríhtons ne iewatkáwen, tó꞉ka takaiéstonhke ne kénhie tó꞉ka ó꞉ni iostátʼthen íken, ronónha kíʼ rahonáwenk ne ratitsihénsthatsis ne tekaristoienton tánon kwáh satenhiotónhake tsi tenhonthatsiakhónhaʼse.

Sakarí꞉wa Í꞉ken Tsi Khaieston

¹¹ Ne ionónhteratse né꞉ne kaianerénseras né sakaríhwa íken tsi ahontaié꞉iesʼthe tsi entʼthónhnion ne Roiá꞉ner.

¹² Tó꞉ka tsi entéshiesʼthe kí꞉ken né꞉ne tahionteʼnonweráthonʼkwe nahonwátatʼtse ne Rawenni꞉io, ónenk tsi í꞉se ienshát꞉kaʼwe, skátke ne katshénen nahonteskónhthake, né tkaiéston kanátaro tsi iónhni iáh thaʼtekaiéston ne watʼthenkwáhta: tsitnikáien naʼkanatharaʼténʼsonhke né꞉ne ionhniáton ne nothésera ne teweienaʼiéston ne iaʼkeniewáhtha tó꞉ka ó꞉ni ne kaʼkaretserátens né ká꞉ronh ne iaʼkeniewáhtha kénhie tó꞉ka ó꞉ni ne kàret ne ionhniáton ne othésera teweienaiéston ne iakeniewáhtha.

¹³ Ne iowenhténions, ónenk tsi kanátaro꞉iensatkawe né꞉ne iáh thatekaiéston ne watʼtenkwáhtha

¹⁴ Ónenk tsi né entesesthánion ne skátʼtsions tsi nikanataró꞉tens né꞉ne katokénston tsi enthétion ne Roiá꞉ner; ratsihénsthatsi ne rahó꞉wenk tsi rahónʼa tenrakwe ne katshénen ahonekwénhsa tsi iohó꞉ti aktónhtse ne ietsienharaʼkwáhke.

¹⁵ Nahowáron ne katshénen ónenk tsi né sahenhnísera enkawará꞉khonʼke ne watéskonhte: kwáh iáh thahó꞉ten tsathahiothaténronhke tsi ienhiórenhne.

¹⁶ Tó꞉ka ensátʼtsahaʼthe ne skaríhwa íken tsi iewatkáwen né nakaná꞉nontʼthe ne warahrát꞉ston tó꞉ka ó꞉ni ne tsi kwáh í꞉se thóh nisanikonhró꞉ten, iáh kíʼ akwékon thaʼkawaráhkonhke né꞉ne shaʼhenhnísera iewatkáwen, ók né thènen enhiotátere enwáton ne óia wenhniseráte ahiewárahke.

¹⁷ Nʼowáron né shé꞉kon iothaténron nasénhaton niwenhniseraʼkéhaton ónenk tsi enwatʼtsahatónhake.

¹⁸ Tó꞉ka thènnen aiewárahke nasénhaton niwenhniserakéhaton, ne Rawenni꞉io iáh thahaiéna ne iesatkáwen. Ne iewatkáwen iáh í꞉se thaʼisathasé꞉thase ók né kíʼ enwatenáthonkwe iáh tehiotkwéniens, tánon ónhka kíʼiok enhiéke kwáh enhieronhiake tsi nieniawenhne.

¹⁹ Tó꞉ka nowáron ne thènen iahiahó꞉sehron ne kwáh iáh tehiotkwéniens, iáh kíʼ tehiówenk naié꞉ke, ók ónenk tsi enwatsahathónhaʼke. Ónhka tsi nítsion ne kwáh sewatkwéniens enwáton kíʼ nahisewawá꞉rake,

²⁰ ók tó꞉ka ónhka tsi nítsion ne iáh tesehwatkwéniens ensehwá꞉ke, iáh kíʼ shé꞉kon ne thahonsesehwaʼtenaʼthónkwen Rawenni꞉io rahonkwetaʼshón꞉a akénhake.

²¹ Káti ó꞉ni, tó꞉ka ensewawá꞉rahke kí꞉ken iewatkáʼwen nó꞉nen ieʼsewaié꞉nen knahó꞉ten ne kwáh iáh tehiotkwéniens, né꞉ne ónhkwe tó꞉ka ó꞉ni katshénen akénhake, iáh kíʼ shé꞉kon né tahonsehsewatenaʼthónkwen Rawenni꞉io rahonkwéta íken.

²² Ne Roiá꞉ner tahá꞉wen ne Mahís ne tehioteriwaʼsonhterónhnions kaianerénseras

²³ né꞉ne onhkweshón꞉as ne Israerʼró꞉nonhke akorihwáke. Né ionarésens tsionónskwahrons, teiotinakaronhtónʼa, tó꞉ka ó꞉ni kaiatákeras tsi iáh tahatiʼwárahke.

²⁴ Ne iorésen katshénen tsi wakénheʼie tó꞉ka ó꞉ni khaʼkariothó꞉ten wahhononhwarhiákon iáh tehiówenk naʼiewáraʼke, ók enwáton nó꞉ia ní꞉ioht tsi ahónstonhke.

²⁵ Nón꞉ka énieʼke ne iorésen ne katshénen né nahiotónhʼon iahonkháwenʼke ne ká꞉khwa ahonthahonwáwiʼke ne Roiá꞉ner kwáh kíʼ iáh ské꞉kon ne tahonsahiakotenathónkwen Rawenni꞉io rahonkwéta akénhake.

²⁶ Iáh tewastherístha kaʼnónhwe nahatiʼterón꞉thaʼke ne Israerʼró꞉nons, kwáh kíʼ iáh nonhwénhton né꞉ne áhonsthe ne otsiténha ahotinekwénhsa tó꞉ka ó꞉ni ne katshénen né ká꞉khwa ahonthathonʼniáten.

²⁷ Ónhka tenhiéhiake kí꞉ken kaianerénhsera iáh kíʼ shé꞉kon ne tahonsahiakoʼtenaʼthónkwen Rawenni꞉io rahonkwéta akénhake.

²⁸ Ne Roiá꞉ner tahá꞉wen ne Mahís ne tehioteriwasonhterónhnions kaianerénseras

²⁹ nonhkweshón꞉as ne Israerronónke. Nónen nónhka tsi nítsion iensewátkaʼwe ne skaríwa íken ónenk tsi ostónha entisehwáhaʼwe nakatokenstónhake atsítsion ne Roiá꞉ner,

³⁰ kwáh í꞉se sewatsianá꞉ke tsi entisewahá꞉we tsi ká꞉khwa akénhake tsi iensewátʼkaʼwe. Ónenk tsi entisewáhaʼwe nahoresénhtsera ne katshénen né꞉ne wenhskwená꞉ke tánon iensewátkaʼwe né kwáh katokénston tsi entsí꞉tsion ne Roiá꞉ner.

³¹ Ne ratsihénsthatsi ietsienharakwáhke enhátʼtsahaʼte, ók ne wenhskweʼnáke ratsihénsthatsi ne rahó꞉wenk.

³² Né skanekwáti noná꞉ken nahosiʼnáti ne katshénen kwáh kíʼ né꞉e kakweniensthaʼtsherákon tsi ienwatkáʼwenke

³³ ne ratsihénsthatsi ne ienhát꞉kaʼwe nonekwénhsa ó꞉ni ne iorénsen tsi skaríhwa íken tsi iewatkáwen.

³⁴ Né wenhskwená꞉ke ne katshénen kwáh kíʼ né꞉e katokénston íken, tánon ne oná꞉ken nahosináti né kíʼ nènhne ne katokénston tsi entʼthónhion ne Roiá꞉ner tsi onhkwéne Israerʼró꞉nonhke nónhwe nitsawénon tánon ratsihénsthatsi thonwáwi. Né kí꞉ken thóh ní꞉ioht nonhkweshón꞉as ne Israerʼró꞉nonhke tsiókonhte enthonwawísehke ne ratsihénsthatsi.

³⁵ Thóh kíʼ ní꞉ioht ne ká꞉khwa ronwatháti ne Roiá꞉ner né꞉ne Aaron thonwáwi tánon ne rahonekenteronhtsherasónhas ne tewenhnisehrátheʼkwe sahonwatiʼrihwaníratʼtse tsi ratiʼtsihénsthatsi íken.

³⁶ Né tewenhniserátheʼkwe ne Roiá꞉ner shaʼsakorihónten nonhkweshón꞉as ne Israerʼró꞉nonhke nónhwe nahonthasakáwen kí꞉ken karó꞉rons. Né꞉ne kaianerénhsera íken nètho Israerʼró꞉nons ónenk tsi enhontewánhnarakwe né꞉ne tsi nénhwe enkénhake.

³⁷ Né káti, kí꞉ken, ne kaianerénseras íken tsi nòkwah ne watʼtsahathánions tkaiesthánions, ne onátsias tkaiéston, ne karihwáneren aorihwáke tsi karó꞉rons, nenskakarhiákonke aorihwáke, nahonwatiʼrihwanirát꞉tse aorihwáke, tánon ne sakaríhwa íken tsi tkaiéston.

³⁸ Thóh nónhwe tsi ionón꞉the ne Sinai né꞉ne iahontsiaʼthénhke íken, ne Roiá꞉ner tahonwíhon ne Mahís né꞉ne siwenhnisehrátheʼkwe shaʼsakoró꞉ri nonhkweshón꞉as ne Israerʼró꞉nonhke nahonthahatiʼiesthánion.