Leviticus 6 - Ohiatonhseratokénti

¹ Ne Roiá꞉ner taháwen ne Mahís ne kén hiotsétons tekarihwasónhteres kaianerénseras.

² Ónenk tsi enhionhníhake niahontkáwen tó꞉ka ónhkak tsi nítsion wesewarihwánerahke tsi nòkwah ne Roiá꞉ner né tsi wesewaterahiáthaʼkwe niahontsisewáhaʼke tsi nahó꞉ten ne óia Israerʼró꞉non thóh rothakweniáien tó꞉ka ó꞉ni knahó꞉tenk waʼtsisewanénsko tó꞉ka ó꞉ni watsisewanikonhráhten

³ tó꞉ka ó꞉ni ahionhnó꞉wenhte ne knahó꞉tenk ne iotónhonʼne tánon waherihwanírahthe tsi iáh tetsiakotsirénhrion.

^4-5 Né nó꞉nen enserihwánerahke ne kakʼnikáien tsi níkons kí꞉kens, ónenk tsi enshé꞉shen tsi nahó꞉ten saienáhon ne kanikonhráton iorihonhníʼon. Nenhwenhnisehráteke nenhiesaiatatʼtsénri saníkon, ónenk tsi kwáh enkanánonhke tsi akwékon entieská꞉riatse ne rahowenhkénʼen, tánon enhiowénhteke tewáhsen iosénhtseroʼthe.

⁶ Entetiawíten ne ratsihénstatsi ne nahonsaskárhiakthe nastatʼtse ne Roiá꞉ner né꞉ne rátsinn teiotinakaronhtónha tó꞉ka ó꞉ni kaiatákeras né꞉ne iáh othènen tehotitsihióha. Tsi satanaske ne entewanónhton tsi entsiohianénhaʼwe ne tkarihwaiéri iekontseriharáhkwah.

⁷ Ne ratsihénsthatsi ienháthaʼte ne kariwihiosehokónha né꞉ne rónhkwe rahorihwáke, tánon kíʼ enshonwanikónhrenhse.

Né Kahiathakwékon Watéskonhte

⁸ Ne Roiá꞉ner wahorihónten ne Mahís

⁹ nahonthaháwen ne Aaron ó꞉ni ne rahonekenterashón꞉as ne tehioterihwasonhterónhnions kaianerénsehras né nakonwanateskónhten. Né konwanatéskonhte ietsienharáhkwahke enkará꞉ken asonhthakwékon, tánon ne iotékʼkha iahiokonhthakwénhake ahiotékʼkhake.

¹⁰ Ethóhʼne ne ratsihénsthatsi, né róston ne kwáh rokweʼní꞉io né꞉ne waniatarará꞉ken wakóhses tánon ne waniatarará꞉ken nàkon tháiens, ónenk tsi enhará꞉ko ne tehiahowenienʼnhokónhton okènrah ne thók iekáhere ne ietsienharáhkwahke tánon ákta ne tsi ietsienharáhkwah enhá꞉ien.

¹¹ Ethóhʼne ónenk tsi tenshathataʼkwénion tánon ienháhaʼwe ne wakenronhthákwen ástste nòkwah tsi nónhwe nihonanáthaien thóh nienháhaʼwe tsi nónhwe ne sahoiéren iotkwéniens.

¹² Ne tsi iotékʼkha ne ietsienharahkwáhke ónenk tsi tiókonhte enhiotékʼkhake tánon tó꞉sa nonhwénhton nahonswá꞉thonhke. Iaʼtehioronhketsheráke ne ratsihénsthatsi enshaienthóntʼtho, enhakwahtáko naʼkonhwanateskónhten, tánon enhátʼtsahathe ne iorèsen ne skaríhwa íken tsi iewatká꞉wen.

¹³ Né iotèkʼkha ónenk tsi tiókonhte enhiotékʼkhake ne ietsienharáhkwahke tánon tó꞉sa nonhwénhtonke nahonswá꞉thohke.

Nonátsias Tsiakoiesthánions

¹⁴ Né tehioterihwasonhterónhnions ne kaianerénsehras né꞉ne onátsias ahorihwáke tsi tsiakoiesthánion. Né Aaronite ratsihénsthatsi ónenk tsi ienháthate nonátsias né tkaiéstons rahohénton ne Roiá꞉nerʼ né꞉ne ohénton ne ieʼtsienharáhkwahke.

¹⁵ Ethòne sehwatsána enharáhko nothésehra ó꞉ni ne kénhie, tánon ne ionhtsienkwaronhniathákwah tekaiéston, tánon ietsienharáhkwahke enhátʼtsahathe né enwenésthakwe tsi orihwakwékon Roiá꞉ner ronhwáwi. Ne tewenhseraʼtenóhons kí꞉ken iewatkháwen né rawerientiʼióstha ne Roiá꞉ner.

^16-17 Tánon ne iothaténron nonátsias Aaron tánon ne rahoneʼkenteronhtsheraʼsónhas né enhónʼneke. Enkanatharonhniá꞉tonke né꞉ne iáh othènen thaʼtakaiéstonhke ne watʼtenkwáhtha tánon thóh nónhwe nenhónne꞉ke tsi nónhwe niʼiotokénti íken, né꞉ne atenhénrakon né tsi watóhsehrothe tsi nónhwe nihénteron ne Roiá꞉ner. Ráton ne Roiá꞉ner ratiʼtsihénsthatsis tetkheʼhiáwi né꞉ne áhonsthe nahionkʼtátʼtse né tsi iotékʼkha. Kwáh íken tsi iotokénti, tsi kíʼ ní꞉ioht ne karihwáneren tsi iehiontkháwas ó꞉ni ne nahonshaʼkakarhiákonʼke aorihwá꞉ke.

¹⁸ Né꞉ne tsi nienhwenhniserathénionʼke nónhka tsi nienhatwatsiríhne ne Aaron enwáton nahónhneke tsi nienhatikónhthaʼkwe nénhonste ne kákhwa nenhonwátatʼtse ne Roiá꞉ner. Nónhka akóren ne iáh Aaron rahoneʼkentheraʼsónhas akénhake niaʼhatiʼiéna ne ká꞉khwa ne iewakʼkáwen enhatitʼtsénri naʼteraswatsénhtshera né tsi nihioshastsʼtenserowánen ne iotokénti.

¹⁹ Ne Roiá꞉ner tahá꞉wen ne Mahís ne tekarihwasónhterens kaianerénsehras

²⁰ nahonwarihwaníratʼtse ne Aaronite ratsiʼhénstatsi. Né wenhniseronhthákwen nenhonwarihwaníratʼtse, ienhát꞉kaʼwe nahontháhaʼwe ne Roiá꞉nerʼ tekakonhtseráke othèsera (kwáh ne satenhiotónhake tsi ní꞉ioht tsi tieiéstha nonátsias niaʼtewenhnisehráke), asénhnon noronhkéne tánon asénhnon nokarasné꞉ha.

²¹ Ónenk tsi kénhie tenkaiéstonhke tánon otsienháke enkaríhtonhke tánon ethòne tenhkanatharaʼríhtonhke tánon ienhiéthaʼte tsi ní꞉ioht nonátsia akénhake tsi entiéiesthe, né tenwenhseratheníhon rawerientiʼióstha ne Roiá꞉ner.

²² Né꞉ne tsi nienhénwe kí꞉ken tsiakokʼkawá꞉nion ronónhak khók ne Aaron sakohiohokónhas kén nienhatiʼiérahke né tsi ronónha ratiʼtsihenstowánens íken. Ónenk tsi kwáh toʼkénʼen tsi enwatʼtsaháthonʼke tsi nenhonwateskóhtʼthaʼse ne Roiá꞉ner.

²³ Iáh othènen ne onátsias ne iewatkáwen nètho ratsihénsthatsi kén nienháiere nónhka aiéke; kwáh kíʼ akwékon tsi enwatʼtsahathónhaʼke.

Ne Karihwáneren Ienié꞉thaʼte

²⁴ Ne Roiá꞉ner wahorihónten ne Mahís

²⁵ nahonthashakáwen ne Aaron tánon ne sakohiohokónhas ne tekarihwasonhteriónhnion kaianerénseras né꞉ne karihwáneren aorihwáke tsi iaiéthaʼte. Né katshénen tsi enkonhwanonhwarhiákon né karihwáneren ahorihwáke tsi ienkonhwátkaʼwe ónenk tsi othoréke nokwáhti ne ietsienharákwahke nónhwe nenhkonhwanonhwarhiákon, tsi nónhwe nikonhwatiʼnonhwarhiákons nenhkonhwanaʼteskónten. Né kí꞉ken ne kwáh íken tsi iotokénti tsi iewatkáwen.

²⁶ Ne ratsihénsthatsi tsi rahónʼa roteskónhten ne katshénen ónenk tsi thóh nónhwe nenhráke tsi nónhwe nihiotokénti, né꞉ne atenhénrakon tsi nónhwe niwatóhsehroʼthe né꞉ne tsi nónhwe nihénteron ne Roiá꞉ner.

²⁷ Nónhka akénhake tó꞉ka ó꞉ni ne thènen iakaiéna ne katshénen ahowáron kwáh íken tsi enhokaronhniáʼthe né tsi nihioshastsʼtenseroʼwánen tsi nihiotokénti. Tó꞉ka thènen akénhake natʼtserónhniat ne thahiotstharó꞉kwahon ne katshénen ahoné꞉kwahsa, ónenk tsi thóh nónhwe nenskanó꞉hareʼke tsi nónhwe nihiotokénti íken.

²⁸ Kwáh tsitʼnikáien ne ionawasthakarí꞉io ónhtak íken tsi né tehionekonhtséton nowáron kwáh kíʼ tenkanatsaríhthonʼke, tánon tó꞉ka karísthatsi ónhtak wátston, ónenk kíʼ tsi enhierá꞉nie tánon onékanos entienonwakénsthaʼkwe.

²⁹ Tsík ónhka ne rónhkwe ne ratsihénstatsi rahowátsire enwáton nahatiwá꞉rake kí꞉ken iewatkáwen; kwáh íken tsi iotokénti íken.

³⁰ Ók tó꞉ka thènen nonekwénhsa ienhiéhionte natohsehrákon tánon né áhionsthe ne karihwiiosehokónha nahéren ahonsakahawíthonʼke ne karihwáneren, ne katshénen iáh kíʼ tahónton naiewáraʼke; ónenk tsi enwatʼtsahatónhake.