Leviticus 3 - Ohiatonhseratokénti

Ne Karihwiʼiosehokónhas Ne Sakaríhwa Í꞉ken

¹ Ne nónen ónhkak tsi nítsion ieietʼtsihiátkaʼwe ne sewatsenenhó꞉kons né sakaríhwa í꞉ken tsi iaʼisewátkaʼwe, ónenk né꞉ne rátsinn tsionónskwahron enkénhake tó꞉ka ó꞉ni tsionónskwahron né꞉ne iáh othènen tehiotsihiótare.

² Ranónh꞉tsine tentsiaʼnisnonhsharen ne katʼtsenhnen tánon thóh ne tsi iehionhtawehiathakwa ne raotó꞉sehrakon ne Roiá꞉ner tsi nónhwe nihenteron entienón꞉wariakon. Ne Aaronite ratsihénsthatsi ienhonekwenhsónti ne skatíson ne kaiéri naʼtekahiósaiens ne ientsienharáhkwah

³ tánon iasehwátkaf ne oiásons nahoténsons ne katshénens né꞉ne kákhwas íken niahonwátatʼtse ne Roiá꞉ner: akwékon ne iorèsenhs né rahiathakónhsons,

⁴ ne otstiéhseris né iorèsens nètho iorahnenhtátkons, tánon ne kwáh tsioiáneres ne otwénhson.

⁵ Ne ratsihénsthatsi akwékon kí꞉ken enhátʼtsahaʼte ne ietsienharáhkwahke skátke ne watéskonhtes. Né tewenhserateníhons ne ká꞉khwas ne iewatkáwen né rawerientiʼióstha ne Roiá꞉ner.

⁶ Tó꞉ka teiotinakaronhtónʼa tó꞉ka ó꞉ni kahiatákeras wátston né tsi iewátʼkawen ne sakaríhwa í꞉ken, ahónton ne rátsinn tó꞉ka ó꞉ni onétsien akénhake, ók ónenk kíʼ tsi kwáh iáh othènen tahotitsiʼióhake.

⁷ Tó꞉ka teiotinakaronhtónha ientsiátkaʼwe,

⁸ ónenk tsi ranonhtsíne tentsianisnonhsáren ohénton ne tsi watohsehró꞉the. Ne ratsihénsthatsi tenhanekwenhsénhtonhwe akwékon ne skatísons ne kaiéri naʼtekahiósaiens ne ietsenharáhkwahke

⁹ tánon iensátkaʼwe ne oiásons nahoténsons ne katshénens ahoierónhtha né꞉ne ká꞉khwa iotenathónkwen tsi ronhwatáti ne Roiá꞉ner: ne iorénsens, akwékon ne iothasaʼrésen tsi ronhwenhthaʼshiákon ákta ne onàken ieostsiénthare ne tsi iehonitháshaʼthe, akwékon ne iororóston ne rahiathakónhsons,

¹⁰ ne ostséseris tánon ne iorésens ne thóh iorenhnenhtátʼkons, tánon ne kwáh tsioiáneres ne otwénhson.

¹¹ Ne roteriwatsteríston ne ratsihénsthaʼtsi akwékon kíʼ enhátʼtsahathe ne ietsienharákwahke né꞉ne ká꞉khwa iotenathónkwenh tsi ronhwatáti ne Roiá꞉ner.

¹² Tó꞉ka kahiatákeras entéshiesʼthe,

¹³ ónenk tsi ranonhtsíne tentsianisnonhsáren tánon entsenonhwariákon ohénton ne tsi iehionthawehiatákwa tsi watohsehró꞉te. Ne ratsihénsthatsi tenhanekwenhsénhtonhwe akwékon ne kaiéri níkonh ne skatísons ne ietsienharáhkwahke

¹⁴ tánon iensátkaʼwe ne kenhiotsétons né꞉ne ká꞉khwa íken tsi ronhwatáti ne Roiá꞉ner: akwékon ne iorèsenhs ne rahiathakónsons,

¹⁵ ne otʼtséseris tánon ne iorèsenhs ne thóh iorahnenhtátkons, tánon ne kwáh tsioiánere notwénhson.

¹⁶ Ne ratsihénsthatsi kwáh akwékon enhátʼtsahate kí꞉ken ne ietsienharáhkwahke né꞉ne ká꞉khwa íken tsi ronhwatáti né꞉ne kwáh rahwerienhtiʼióstha ne Roiá꞉ner. Akwékon ne iorèsenhs Roiá꞉ner rahó꞉wenk.

¹⁷ Iáh ónhka Nisraerʼró꞉nonhs thaʼhónton nahónhneke ne thènen iorèsenhs iáh ó꞉ni nonekwénhsa; né kí꞉ken ne kaianerénsera tsi nénhwe tsi enká꞉thake né꞉ne roʼnonháke Nisraerʼró꞉nonhs kwáh tsi nónhwe nahatinákereʼke.