Leviticus 27 - Ohiatonhseratokénti

Tsi Nikaianerenseró꞉tens Ne Thènen Ahónhion Ne Roiá꞉ner

¹ Ne Roiá꞉ner tahá꞉wen ne Mahís

² ne tehioterihwasónhteres kaianerénhseras né꞉ne nonhkweshón꞉as Israerʼró꞉nonhke akorihwáke. Nó꞉nen nónhkak tsi nítsion né thènen ietsiríhonte rahohénton ne Roiá꞉ner né nakaná꞉nonhke ne katokénston wararáts꞉ton, enwáton nètho ónhkwe nahonshahionhthatewenhní꞉ioʼne né nowísta akakariáktonhke,

^3-7 né entsioianénhawe né tkarihwaiéri iotenientensthákwa: – ne rotehiáron roskenhrakéte, ne tewáhsen tsi nióre ne iá-iak niwáhsen tehahosehrihiákon: 50 niwáhsen nikawísthake kawistarákens – ne iotehiá꞉ronh iónhkwe: 30 niwáhsen nikawísthakes kawistarákens – ne nithohiónha roskenrakéte, né꞉ne wísk-tsi nióre ne tewáhsen natehonoserihiákon: 20 nikawístakes kawistarákens – ne nitsohiónha iónhkwe: 10 nikawístakes kawistarákens – ieksáha: 3 nikawístakes kawistarákens – roskenhrakéte raksáha né tháke ne wísk natehahoserihiákon: 5 nikawístake kawistaráken – roskenrakéte né rothawenhráton ne iá-iak niwáhsen natahahoserihiákon: 15 iawénhre nikawístakes kawistaráken – ne iónhkwe iotawenhráton ne iá-iak niwásen natahiahoserihiákon: 10 nikawístakes kawistaráken

⁸ Tó꞉ka nónhka tsi nítsion ensewaráratsʼte tánon sóh꞉tsi sewènhten nahisewakárhiake tsi nitkathá꞉ton ne kakarhiáktshera, nètho ónhkwe ratsihenstatsíne nienietʼtsihiaténhawe, tánon ne ratsihénstatsi ehtáke tsi nenhshaʼkarhiaktserónhni, né entewanónhton tsi nishakwénion naskáriaʼke.

⁹ Tó꞉ka ne shararátston katshénen iensátʼkaʼwe né nahónton nakonhwaiéna niahonkʼkáwenhke rahonháke ne Roiá꞉ner, ethòne káti kwáh tsi ní꞉konh ne iewát꞉kawen rahonháke ne Roiá꞉ner tsi iotokénti íken,

¹⁰ tánon iáh thahónton nó꞉ia katshénen iahonshasátkaʼwe nahonakʼthàke. Tó꞉ka thoʼnénhshiere, ne tekanáskwahke Roiá꞉ner kíʼ rahowenkʼkónhwe enwáton.

¹¹ Ók kíʼ tó꞉kaʼ ne shaʼrarátston ne kéntons ne iáh tehiotkwéniens katshénen, né nènhne ne iáh thakonhwaiéna niahonkhá꞉wenhke rahonháke ne Roiá꞉ner, nètho katshénen ónenk tsi ratsihenstatsíne nienhtsiaténhaʼwe.

¹² Ne ratsihénstatsi rahónʼa enhakarhiatʼtserónhni, ne entewanón꞉ton tó꞉ka kén rothakaríhte khés ne iáh, tánon ne kakarhiátshera né꞉ne iehiotkonhthákwen.

¹³ Tó꞉ka saská꞉neks né꞉ne ahonshá꞉senaskwahninon, ó꞉nenk tsi thóh nenská꞉rhiaʼke tsi nikanó꞉ron tánon iehiokétoʼte tewáhsen iosénhtsheroʼte.

¹⁴ Nónen ne rónhkwe Roiá꞉ner wahonónhson ne tsi ronónhsoʼte, ne ratsihénstatsi enhakharhiatsherónhni né entewanónhton tsi nikanonhsóh꞉ten, tánon né kakarhiákʼtshera ienwatkónhthakweʼkiʼ.

¹⁵ Ne ranonhsakwení꞉iokwe tó꞉ka ensaská꞉neke nahonsahanínon ne rahononhsakénʼen, ónenk kíʼ tsi enskarhiá꞉ke tsi nikanonhsanó꞉ron tánon ne iehiokétoʼte tewáhsen iosénhtsheroʼte.

¹⁶ Ók tó꞉ka ne rónhkwe kénk nahònskwe ne rahohóntsa né꞉ne Roiá꞉ner ahahohiathakwení꞉iosʼte, tsi enkakarhiakʼtseronhníhake né entewanónhton thóh niekanonhtáras naieiéntʼtho, né kakarhiatʼtseráhere né꞉ne oiéri níkons ne kawistarákens ne skawinó꞉tshera tehiotikonstónhres.

¹⁷ Tó꞉ka kwáh óksaʼok ienhát꞉kaʼwe nonhóntsa ne tsiósera iotohétston tsi sewathonhontsaserónhni, kwáh kíʼ kakarhiaktseranánonh enkénhake.

¹⁸ Ók tó꞉ka onakènhke katʼtsinenhkahá꞉wike thóne ienhát꞉kaʼwe, ne ratsihénstatsi kwáh enhakarhiatʼtserónhni nowísta satákenasʼke ne entewanón꞉ton toʼnihioseráke shé꞉kon iothaténron tsi nióre ienskáhewe nóia tsioseráte nahonsahionhontsasehrónhnike, tánon enthaserónhnenhte tsi nikanó꞉ron.

¹⁹ Tó꞉ka enshaskáneke nahonsasnínon ne rahonhontsakénʼen, ónenk kíʼ tsi enshatkárhiakse tsi nikanó꞉ron tánon ne iehiokétoʼte 20 sénh iosenhseró꞉te.

²⁰ Tó꞉ka ónhkak akóren iahonshahotenhníhnonse nonhóntsa ne iáh arèkok tesetsnínon ne Roiá꞉ner, wesátiʼkiʼ nahishaʼianerenhseraiéntake nahonsasnínon.

²¹ Nóia ienskáhewe ne tsioseráte tsi nisewaterihwaʼkwahthákwas nonhóntsa Roiá꞉ner kíʼ rahowenhkónhwe enwáton ne kaienthátshera; kwáh kíʼ ratitsihénsthatsis enhonawenhkónhweʼke.

²² Tó꞉ka énhtion ne Roiá꞉ner nonhóntsa né shanínon,

²³ ne ratsihénstatsi kwáh kíʼ enhakariakʼtsherónhni tsi satèkena né entewanónhton thóh shé꞉kon nihioseráke iothaténhron tsi nióre ienskáhewe nahonsahionhontsaʼsehrónhnike, tánon kíʼ ónenk tsi kwáh thóh nenskárhiakʼ꞉ke tsi nihionhontsanó꞉ron né kwáh thóh wenhniseráte; nowísta Roiá꞉ner kíʼ né rahowísta íken.

²⁴ Ne ioseráte tsi niʼsewaterihwaʼkwathákwas ne kahenthákes thóh niénsewe ne thóh wenhkénʼen khés ne rahowatsiráke.

²⁵ Akwékon ne kakarhiákʼtsheras enkakwatákwenhke nahiorihwató꞉kenke ne sathahontahiótʼtheʼke.

²⁶ Nenhthatié꞉renhte enrenhnákeraʼte ne katshénen ónenk nènhne Roiá꞉ner rahotshénenh íken, né káti ne iáh ónhka tahónton né꞉ne ahonwanáskon tsi kwáh thóh nahiakonikonhroʼténhake tsi ahónhion. Ne tsionónskwahron owíra, teiotinakaronhtón꞉a owíra, khés ne kaiatákeras owíra Roiá꞉ner nènhne rahotshenenhókons,

²⁷ ók nenhtewatsérenhte enrenhnákeraʼte ne iáh tehotʼkwéniens katshénen enwáton nahonsaieʼníhnon tsi nikakarhiaktseraʼtó꞉ken tsi kakwahthákwen tánon ne iehiokétoʼte ne 20 iosénhtseronhte. Tó꞉ka iáh tahonsakanínonhke, ahónton kíʼ nónhkak khók akóren aienínonh né꞉ne tsi nikakwahthákwen tsi nakanóronhke.

²⁸ Iáh ónhka thaʼhónton ne thènen ahiontenhnínon khés nahonsaienínon tsi nahó꞉ten ne kwáh iáh othènen tatekeníneren tsi ronhwahiathakweniʼióston ne Roiá꞉ner, tó꞉ka kén ónhkwe akénhake, khés ne katshénen, khés nohóntsa. Kwáh kíʼ iehiotkonhthákwenk Roiá꞉ner rahowenkónhwe enkénhake.

²⁹ Iekaníhare ne ónhkwe né kwáh iáh othènen tatekeníneren tsi iehionthatatʼkáwen iáh kíʼ thaʼhónton nahonsahionthaʼtsiatanínon; ónenk kíʼ tsi enhionthaʼtenonhwariákon.

³⁰ Énska ne oieríhaton tsi níkon kaientwákwen nohontsáke, né꞉ne onátsia khés ne káhik, Roiá꞉ner kíʼ rahó꞉wenk íken.

³¹ Tó꞉ka enshasʼkáneke ne thènen ahonshasnínon, ónenk kíʼ tsi thóh nenskáriaʼke tsi nikanó꞉ron tánon ne iehiokétoʼte ne 20 iosénhseronhte.

³² Skahiáta ne oiéri niháti ne ienáskwahiens Roiá꞉ner kíʼ rahotshénens. Nó꞉nen enhonwanásehte ne katshénens, tiókonhte noieríhaton ié꞉ken Roiá꞉ner kíʼ rahotshénen íken.

³³ Iáh thaʼhónton ne ashatenaskwahteniónko ne konhtitshénens né꞉ne iáh tehionarésenhs asehiataráko, tánon iáh thaʼhónton nashaʼtenaskwahteniónhko. Tó꞉ka shahiáta enshatenaskwahténi, ethòne kíʼ tenitsiáronh Roiá꞉ner rahotshénen enhiáton tánon iáh thaʼhónton nónhka ahonshaʼienínon.

³⁴ Ne kí꞉ken ne atsiawenhráseras nètho Roiá꞉ner thó꞉wi ne Mahís ne tsi tsonónhte ne Sinai né꞉ne onhkweshón꞉as Nisraerʼró꞉nonhke akorihwáke.