Leviticus 25 - Ohiatonhseratokénti

Ne Tsathákhaton Nihioserakehátsie

¹ Ne Roiá꞉ner watnithára ne Mahís tsi ionónhte ne Sinai tánon wahorihónten

² nahonthashakáwenh ne tehioterihwasónhteres kaianerénhseras nonhkweshón꞉as Nisraerʼró꞉nonhke. Nónen ientionhontsórenhne nètho Roiá꞉ner tetsisewáwi, ónenk tsi entsisewakwéniensʼthe ne Roiá꞉ner né tsi iáh thahiontonhontsasehrónhni tsiókonhte ne tsáta nihiosehrakehátsie.

³ Ónenk tsi ensewaiéntʼtho ne sewahenthákes, sewatkwirasehrónhni ne sewanenharasónhas, tánon sewarohróksek ne sewaientʼthótsheras né꞉ne iá-iak nihioseráke nikaríhwes.

⁴ Ók kíʼ ne tsathákhaton nihioserakehátsie né nènhne ne kwáh ahonshahiorihsénhthaʼne nohóntsa, tiósera nikaríhwes ensonhwathonhnahéraʼse ne Roiá꞉ner. Tó꞉sa othènen sewaiéntʼtho ne sewahénthakes khés nahisewatkwiraserónhni ne sewanenharaientʼthóseronhs.

⁵ Akwékon tó꞉sa sewaientwáko ne sewanatsaiéntʼton né꞉ne kwáh ahonhatsíwa tsi tkánios, tánon tó꞉sa sewahiáko ne sewanenharasónhas tsi iáh tesewatkwirasehrónhni ne sewanenharaiéntʼtons; né iosheráte ne kwáh ahonsahiorihsénhthaʼne nonhóntsa.

⁶ Ethosáne nonhóntsa iáh kíʼ othènen tehiohontsasehrónhni nètho iosehráteʼkwe, kwáh enshaiéritʼtse ne ká꞉khwa, ne shanátsheras, né shé꞉nas ronónhkwe, ne tihononhontsátes ne skát꞉ke sewaná꞉kere,

⁷ né senás꞉kwaiens, tánon ne konhtírios rónhnes sahenthákes. Akwékon tsi nahoténsons entkáhaʼwe enwáton náieʼke.

Né Iosehráte Entsiohiánerenhne

⁸ Sáset tsáta nihiorihwáke tsáta, norihwakwékon né꞉ne kaiéri-niwáhsen-tióton niʼiosehráke.

⁹ Ethòne, noieríhaton niwenhniserakéhaton né tsatákhaton niwenhnithakéhaton, ne wenhniseráte nahonshahionthatenikónhrenhse nakorihwanerahák꞉tsheras, ónhkak iaʼsehiató꞉ri nahiehónrawaʼte né tsi hiohontsáien.

¹⁰ Thóh kíʼ ní꞉ioht ónenk tsi thenkaʼkháshionhke ne wísk-kháton niwáhsen nihioserakehaton tánon enkarihowanáthonhke onhkwetaʼkwékon ne ienákere entionhthatewenhní꞉ioʼne ne tsi ionhontsáien. Né tsi nihióseres akwékon ne watenathanínons tsi enskarihwasehrónhniʼke tsi nòkwah ne thonahwenhkénʼen khés ne tsi wahatiwatsiratátie, tánon nónhka ne ronhwanatenhnínon nahonwatenaskónhniaʼte ónenk tsi rahothiwatsiráke nienshónhne.

¹¹ Iáh tehiówenk nahisewaiéntʼtho ne sewahenthákes khés ne ahisewanatsaʼientwáko né ahonhatsíwa tsi tsió꞉nioh khés nahisewanenharáko ne iáh tesehwatʼkwirasehrónhni ne sewanenharaientʼthósehrons.

¹² Kwáh kíʼ osehrakwékon tsi enhiotokentíke ne sarihwá꞉ke; ne khók énsewake tsi nahó꞉ten ne sewahenthákes nahonhatsíwa tsionió꞉hon.

¹³ Né kénʼen ioseráte akwékon ne ionhontsakérons ne watenhninón꞉nions ónenk tsi enshatiʼiéna ne thonawenhkénhʼen.

¹⁴ Káti nó꞉nen entsiatonhontsanínonhse Nisraerʼró꞉non khés nationhontsanínon, tsi enshaterihwaserónhni tkariwaʼiérik.

¹⁵ Tsi nihionhontsanó꞉ron né entsiohianénhaʼwe tóh niʼioseráke nonhóntsa enkakwéni nahonthaʼkáhawe ne kaientʼthótsheras tsi nióre ienskáheʼwe nó꞉ia tsioseráte nahonshahionhontsiaʼserónhnike.

¹⁶ Tó꞉ka só꞉tsi wéso ioseráke iothaténhron, ne kakharhiáktshera sénha kíʼ enwatʼtharátaʼte, ók tó꞉ka tohʼkàra khók nihioseráke tsiothaténhron, ne kaʼkharhiáktshera entsioseronhnénhton kíʼ, tsioríhwa tsi nahó꞉ten nenhwatenhnínonhke né꞉ne tsi nihiorihwáke nonhóntsia entkáhaʼwe ne kaientʼthótsheras.

¹⁷ Tó꞉sa entienikonhrá꞉ten Nisraerʼró꞉non, ók tiewénhnarak ne Roiá꞉ner Saní꞉io.

Tsi Niwaterihwenhtó꞉re Ne Tsathákhaton Niʼioserakehátsie

¹⁸ Shaʼtewénhnarak orihwaʼkwékon ne Roiá꞉ner raoʼianerénhseras tánon rahorihwatátʼtsheras, ne káti nahónton ne skenenhkówak akénhake tsi ashiterónhtake tsi ionhontsáte.

¹⁹ Nonhóntsa entkáhaʼwe ne kaientʼthó꞉tsheras, tánon kwáh tsík nahoténsons enshaiénthake násehke tánon skénhnenk tsi enshiterónhthake.

²⁰ Ók tó꞉ka nónhwa ónhkak aierihwanónhton onhnahó꞉ten kwáh ahí꞉tewake ne tsathá꞉khaton niʼioserakehátsie, nónen ne kahentákes iáh teskaiéntʼthon tánon iáh thahóten tekaróhron.

²¹ Ne Roiá꞉ner kwáhʼseʼ enhahiaʼthatérisʼte nohóntsa né ia-iák kháton niʼioserakehátsie né káti nahónton ne kwáh iatekaiéri tsi nakakhwaiénthake ne tehioseráke nikaríhwes.

²² Né nó꞉nen enshiéntʼtho ne sahenthákes ne shaʼtékonʼháton niʼioserakéhaton, shé꞉kon kíʼ né ensheʼshékʼseke tsi nahó꞉tens saientwá꞉kwen ne iá-iak kháton shiʼhioserátekwe, tánon kíʼ iatensaiérihse tsi nahó꞉ten ásheʼke tsi nióre enshientwáko ne saientʼthó꞉tsheras né waʼkénhnate.

Né Iesewatkáwen Kaienthá꞉tsheras Ne Watenhnínonʼkwe

²³ Ne shonhóntsa iáh tehiówenk né tiókonhte ahishaʼthenhninónhtie, tsioríhwa tsi iáh teshiaʼthakwení꞉io; Rawenni꞉io rahohóntsa íken, tánon thóh ní꞉ioht tsi shí꞉ken ní꞉ioht ne thahisonhontsáteʼke nashiathoténhake né iesharihwáwi náshatste.

²⁴ Nó꞉nen nonhóntsa watenhnínon, rohianerenhseráien ne thóh wenhkénʼen nahonshaʼhaní꞉non.

²⁵ Tó꞉ka ónhka tsi nítsion Nisraerʼró꞉nons nahisewenhténhthaʼne tánon enhietʼtsihiónhnien nahisewathenhní꞉non ne tsionhóntsa, né kwáh ákta sewatátenonʼkwe ne ensronhontsanínon.

²⁶ Tó꞉ka iáh ónhka nákta teshatátenon nahonsharonhontsanínon, onakènke weshaʼhianerásten tánon tsiaʼtekaiéri tsi nishawísthaien nahonshaʼshonhontsanínon.

²⁷ Né thóh nenhiáwenhne ónenk kíʼ tsi né enseskárhiakʼse tsi nikáien ne rokarhiákon niaʼtakaiérihke ne tsi niʼioseráke iothaténhron tsi nióre ienskáheʼwe entionhontsiaʼserónhnike, né nó꞉nen enwáton nahonshashié꞉na ne sonhóntsa.

²⁸ Ók tó꞉ka iáh tsiatekaiéri tsi nisawísthaien nahonshaʼshonhontsanínon, né kíʼ enhotienawásthonke tsi nikáien ne ronínon tsi nióre ienskáheʼwe nahonsahionhontsasherónhnike. Né thóh enhioseráteke thóh niénsewe ne thowenhkénʼen.

²⁹ Tó꞉ka thohʼnónhwe nenshatenonhsanínon tsi nónhwe ne kanathowanénhke natenhénrakon ne tsi tekanathanákʼthon íken, shahianerenhseráien nahonsasnínon nohénton iahontohserók꞉ten né tsiseráreʼkwe nenhnísehra thishathenhnínon.

³⁰ Ók tó꞉ka iáh thahonsasnínon nohénton iahontohserók꞉ten, iáh kíʼ tetsishaʼhianerenhseráien nahonsasnínon, tánon ne kanón꞉sa né kíʼ ienwatkónhthaʼkwe enhowenhkónhweʼke ne kaientátshera ne ronínon tánon tsi nienhatwatsírihne; iáh thaʼtahontónhkeʼte nenioseráteʼke nensewathenhontsaʼserónhniʼke.

³¹ Ók né tsi kanonhsóhtons tsi nónhwe ne iáh tewatenhenrá꞉iens ne thaʼkanatanákthonhke né kíʼ enhionatenathónkwen kahentákes íken; né thowenhkénʼen rohianerenhseráien kíʼ nahonshahanínon, tánon thóh né kíʼ enshaiéna tsi nenhioseráteʼke nenhsewathonhontsaʼsehrónhniʼke.

³² Ethosáne, ne Levites rotihianerenhseráien nahonsahatinínonh kwáh tsík nikaháwi ne rahotiʼienthátshera ne tsi kanatowanénhke né ronónha thonwanáwi.

³³ Tó꞉ka ne tsi kanónhsohʼte kakʼnikáien tsi níkons kí꞉ken kanatowánens né꞉ne Levites ronatenhnínon tánon iáh tesotinínon, ónenk kíʼ tsi thó꞉ne enshatiʼiéna tsi nenhioseráteʼke nenskarihwakwahthákwenhke, tsioríhwa ne tsi kanonhsó꞉tons tsi nikáien ne Levites rahotinonhsaʼshón꞉as né꞉ne kwáh ronónha ratihiathaʼkwení꞉ios tsi skát꞉ke ratinákeres Israerʼró꞉nons.

³⁴ Ók ne tsi konhwatiʼteronhthákwas ne kahenthákes ne katshénens ne kanatakʼtóntsie ne tsi kanatowanénhkes iáh nènhne nonhwénhton tahontenhninónhake; ronónha né rahothiʼienhtátshera tsi nènhwe

Ronhwatiʼhiathakénas Ne Rotítens

³⁵ Tó꞉ka ne Israerʼró꞉non ákta tsi nónhwe niʼshí꞉teron thóh raná꞉kere wahothénthaʼne tánon iáh thaʼhakwéhni nahathatsiathakéna, ónenk tsi thenhtserihwásnieʼse tsi kíʼ ní꞉ioht ne raná꞉tshera, ne káti nahónton niahakónhthaʼkwe tsatákʼtha ahanákereke.

³⁶ Tó꞉sa sheríhon nahatikárhiaʼke ne watehiárons nenhshewísthani. Ónenk tsi enskwénienste ne Rawenni꞉io ne káti nahónton niahakónhthaʼkwe ne ró꞉ten tsatákʼtha ahanákereke.

³⁷ Tó꞉sa sheríhon nahatikárhiaʼke ne watehiárons nenhshewísthani, tánon tó꞉sa satʼwisthónhniat nenhsehiathekhwaʼhnínonhse.

³⁸ Né kí꞉ken ne Roiá꞉ner Saní꞉io rahorihwatatʼtiéra, tsi nikáien ne tethiaiatinekénhʼen ne Egypt né nahónton nahionhóntion ne Canaan nónhwe tánon rahónʼa Saní꞉io akénhake.

Enshonwathiʼhiatohtarísi Ne Ratináskwa

³⁹ Tó꞉ka nónhkak Nisraerʼró꞉non ákta tsi nónhwe nishí꞉teron kwáh íken tsi wahothénthaʼne tánon wahathatenhnínon shonháke naʼtsiatenaskónhniaʼte, tó꞉sa kíʼ ne shehiothénseron tsi nihothihiotenhseró꞉ten ne ratináskwah.

⁴⁰ Enhieshatsiénhaʼse tsi ní꞉ioht ne ratinhá꞉tsera tánon enhieshahiótenhse tsi nióre ienskáheʼwe nó꞉ia tsioseráte nenskarihwakwahthákwenhke.

⁴¹ Né nenhkaháwiʼke ronónha tánon ne sakotiʼhiohokónhas entiesatewénhtheʼte tánon rahotiwatsiráke niensónhne tánon ne tsi thothiʼienthatseraiénthaʼkwe ne sakotisotʼtó꞉konhkénhen.

⁴² Nonhkweshón꞉as Israerʼró꞉nonhke né꞉ne Roiá꞉ner rahonhatseraʼhó꞉kons, tánon teʼtheshakohiatinekénʼen ne Egypt; iáh kíʼ tehiówenk nahonwanatenhnínon ne nahonwatinhaskónhniaʼte.

⁴³ Tó꞉sa sehiateweienhnakshá꞉ten, ók tsewénhnarak ne Saní꞉io.

⁴⁴ Tó꞉ka ratinhátshera teshathonhontsóni, enwáton kíʼ nasehiatiathanínon tsiatatʼthónties ratinakerénions nonhkweshón꞉as.

⁴⁵ Ahónton nònhne nasehniʼnónhnion ne ratiksaʼokónhas ne tihononhontsátes ne skát꞉ke sewaná꞉keres. Né꞉ne ratiksaokónhas ne tsionhontsákes ronanakerátons í꞉se saienthátsheras enhónton.

⁴⁶ Tánon ne ronónha enwá꞉ton né sehiohokónhas iahonshasehionkwéton né꞉ne kwáh ronónha rahononhkwéta enhónton, tsi ronónha enhonwatihiótenhse kwáh tsi nikaríhwes enhonnónhnheke. Ók tó꞉sa kíʼ ónhka Nisraerʼró꞉nons naʼtsiateweienhʼnaksáten.

⁴⁷ Tó꞉ka shí꞉ken ne tihahontsáte ne skát꞉ke sewaná꞉kere wahokwáhtshene, ók ne Israerʼró꞉non wahothénhtaʼne nènhne tánon wahathatenhnínon nahonwatenaskónhniaʼte nètho tihononhontsáte kawátsires.

⁴⁸ Nónen ronathatenhnínon, shé꞉kon kíʼ rothihianerenseráien niaʼhonsahonwatínonhke. Niaʼthatekénʼa

⁴⁹ khés ne ronhnonwáha khés ne ronaraséha khés ne ónhkak nákta iathatenón꞉kwe enwáton nahonsahonwahiathanínon; khés ne iatehatiʼhiáti iaʼtekaiéri tsi naʼtehonthenhtsáhas, enwá꞉ton kíʼ ne iatehatihiáti nahatinínonh ne rahonathatewenhnihiótshera.

⁵⁰ Ne Israerʼró꞉non ónenk tsi iaʼtensnithára tsi nikáien ne rohiatanínon, tánon ónenk tsi enhiásehte tsi nihioseráke sihonathatenhnínon tánon tsi nióre nó꞉ia tsiosehráte iensehwaterihwakwatháko tánon enhnikarhiatʼtserónhni tsi satékena nahonsahonwanátʼkaʼwe ne entsoianénhawe tsi nihonatkárhiaʼse ne ratinhátsheras.

^51-52 Ne Israerʼró꞉non ónenk tsi ostónha enhakáriake tsi niʼioseráke shé꞉kon iothaténhron tsi nióre tsioseráte nenskarihwakwathákwenhke,

⁵³ tsi shí꞉ken ní꞉ioht ne niatehioseráke ronhwànasʼkwe. Né rohióthenhse iáh tehiówenk nahoteweienhnaksáten.

⁵⁴ Tó꞉ka iáh tahonsahathatewení꞉ione ne tsík nahiotónhake tsi ahateniénten, rahónʼa tánon ne sakohiohokónhas ónenk tsi enshontatewenhní꞉ioʼne nó꞉ia ienskáhewe ne tsioseráte nenskarihwakwatákwenhke.

⁵⁵ Nisraerʼró꞉nons iáh thaʼhónton ne tiókonhte ratináskwah akénhake, tsioríhwa nonhkweshón꞉as Nisraerʼró꞉nonke tsi Roiá꞉ner rahonkwetaʼshón꞉as. Rahónʼa tetheshakohiatinekénʼen ne Egypt; rahónʼa ne Roiá꞉ner Sakoní꞉io.