Leviticus 24 - Ohiatonhseratokénti

Tsi Nikarihó꞉ten Nahiontʼthaserasehrónhni

¹ Ne Roiá꞉ner wahoró꞉ri ne Mahís

² nahontashakáwen ne tehoterihwasonhterónhnions nonhkweshón꞉as Nisraerrononhke: Tasewáhaf nahóskon íken iakenhewátha kénhie né꞉ne kwáh wenhiení꞉io né wathá꞉serothakwahke natohsehrákon akaiénthake, ne káti ne tsiókonhte tsi tahioswátʼtheke ahiorihwatokénhake tsi ahiotékʼkhaʼke.

³ Iatehiokaraʼtsheráke ne Aaron enhahaserótʼthaʼke tánon ahiorihwatokénhake tsi enhiotékhaʼke tsi nióre ienhhiórenhne, thóh tsi nónhwe nihéntehron ne Roiá꞉ner násthe nòkwah tsi ioharénhton ne nahohénton ne aterihwasehronhniátshera oneró꞉kwa, tsi nónhwe nikáien ne kwáh íken iotokénti. Kí꞉kén kaianerénhsera né꞉ne tsi nénhwe tsi enhierihwatokenhtístake.

⁴ Aaron rahónha enhatenhnikonhráren ne kahá꞉seras ne iehaserotháʼkwahke ióhaʼre né꞉ne kwáh ahóskon owistanó꞉ron íken tánon ónenk tsi enhatenhnikonhráren nahiorihwatokénhake tsi ahiotétkhaʼke tsi nónhwe nihénteron ne Roiá꞉ner.

Ne Kanátaro Iewatkáwen Rahohénton Ne Rawenni꞉io

⁵ Iasehwáhaf tewá꞉sen-kaiéri nikakonhtseráke othé꞉sera tánon tékeni-iawénhre niʼkanataráke sewathenatharónhni.

⁶ Ne kanátaro tehiotinénhrake tsiónhniat, ia-iákʼson niʼkanatarákes ne tsotinénhra, nathekwáhraʼne ahóskon owistanó꞉ron sewaró꞉rok, né tsi thóh nónhwe nihénteron ne Roiá꞉ner.

⁷ Thóh sewáien nahóskon kanetanó꞉ron ne tsotinenhrátʼtion, tsi né tahonthontenaʼkeráston ká꞉khwa iewatkáwen íken rahohénton ne Roiá꞉ner né tahionatʼthákwen ne kanátaro.

⁸ Tsiókonhte nawenhthatokentíke, né꞉ne tsi nénhwe, ne kanátaro ónenk tsi nón꞉we nihenhteron ne Roiá꞉ner nónhwe nenhkaiéntake. Né kí꞉ken tsi nihioterihwaiénhni ne Isarael ne tsi nénhwe

⁹ Ne kanátaro Aaron rahówenk íken tánon tsi nienhatwatsiríhne, tánon thóh nónhwe nenhatinátaraʼke tsi nónhwe ne kwáh tsotokénti íken, tsioríhwa kí꞉ken kwáh íken tsi iotokénti íken tsi nòkwah ne ká꞉khwa iewatʼkáwenk rahohénton ne Roiá꞉ner né꞉ne ratiʼtsihénstatsis rahotirihwáke.

Tetewatenienténston Ne Kaiáneren ó꞉ni Ne Tkarihwaiéri Karewatátshera

^10-11 Saiáta ne rónhkwe ne ronikénhen Egyptró꞉non nahahiathó꞉tenhne tánon ne ronistenkénhen Israerʼró꞉non nènhne nahehiathó꞉tenhne Shelomith iontáʼtsiatsʼkwe, né shakoiénha kènʼne ne Dibri né꞉ne Dan rahotitarákon nónhwe nitsawénon. Thóh tsi ronatenáhthaien kí꞉ken rónhkwe Israerʼró꞉non watnirihwakéna wahokenrenhserónhni ne Roiá꞉ner, sókʼkiʼ Mahís tsítres niaʼhonwahiaténhaʼwe,

¹² tánon wahonwatenhnikonhráren, tánon wahateráhraʼte ne Roiá꞉ner ahoró꞉ri onhnenʼháiere.

¹³ Ne Roiá꞉ner wahawénhaʼse ne Mahís,

¹⁴ “Hiatsaténhaf nètho rónhkwe nástste ne tsi watenáthaien. Tsi nihiákon wahakothónteʼne tsi wahariwaiésaʼte ónenk tsi ranonhtsíne tenhonwanisnonsáren naʼieriwaníraʼte tsi roʼníkon, tánon ethòne kanakeraseraʼkwékon enhonwanenhióhiaʼke tsi tsienhrénheie.

¹⁵ Ethóhʼne seró꞉ri nonhkweshón꞉as Nisraerʼró꞉nonhke né nónhka enhonwakenrenhserónhni ne Rawenni꞉io ónenk tsi enharonhiáken tsi nenhiáwenhne

¹⁶ tánon enhonwanonwariákon. Ónhka Nisraerʼró꞉non tó꞉ka ó꞉ni ne tihononhontsáte ne Israerʼró꞉nonke ratinákere enhonwakenrenhserón꞉ni ne Roiá꞉ner enhonwanenhióhiaʼke tsi enrénheʼie né꞉ne kanakeraseraʼkwékon thóh neniéieʼre.

¹⁷ “Nónhka ahonsahionteriwáʼtewaʼthe ónenk tsi enhonwanonhwariákon,

¹⁸ tánon ónhka niaʼtaiekónhten ne katshénen nakóren akotshénen ónenk tsi óia ensehsakonáskon. Ne tsi kaiatakwení꞉io né natónnhets íken natónnhets.

¹⁹ “Tó꞉ka ónhka tsi nítsion akóren asekaréwaʼte, tsi nahshá꞉tieʼre thóh kíʼ nenhtiesaiéraʼse.

²⁰ Tó꞉ka tensheʼshénstsiaʼke, kakʼtsiníkon ne shástsiens tesewaʼtsiaʼke; tó꞉ka tenhsekaratháko, énska kíʼ ne skarake enskatáhkwenhke; tó꞉ka ensenawiroʼtháko. Énska kíʼ ne tsi ensenó꞉tsioʼte enskanioʼtáhkwen. Kwáh tsi ní꞉ioht tsi ensehkaréwaʼte nakóren thóh kíʼ ní꞉ioht tsi entsishanonhtéraʼne.

²¹ Nónh꞉ka niaʼtahatikónhten ne katshénen ónenk tsi óia ientsióntkaʼwe, ók nónhka nónhkwe enhionthatenonwariákon ónenk tsi enhtsiothatenonwariákon.

²² Kí꞉ken kaianerénsera sewakwékon satesewaríhwaʼke, Nisraerʼró꞉nons tánon ne tihononhontsátes ne skát꞉ke sewanákere, tsioríhwa tsi Í꞉i ne Watiá꞉ner Sewaní꞉io í꞉ken.”

²³ Nó꞉nen ne Mahís ne washakoró꞉ri kí꞉ken nonhkweshón꞉as Nisraerʼró꞉nonhke, iahonwahiaténhawe kíʼ rónhkwe nástste ne tsi ronatená꞉thaien tánon wahonwanenhióhiaʼke tsi warénheʼie. Thóh kíʼ nahatí꞉iere Nisraerʼró꞉nons tsi kíʼ nahó꞉ten ne Roiá꞉ner roríhonte ne Mahís.