Leviticus 23 - Ohiatonhseratokénti

Tsi Nihontenikonhró꞉ris Ne Tsi Ronatenhniseraténions Nisraerʼró꞉nons

¹ Ne Roiá꞉ner taháwen ne Mahís

² ne tehioteriwaʼsonhterónhnions kaianerénhseras né꞉ne tsi nihiekhwahéra ne wenhtanó꞉rons, nónen nonhkweshón꞉as Nisraerrononhke enhontsiatharóhroʼke nahonterénhnaien.

³ Iá-iak nónhta senhniseráien nahisahióten ne shahioténhsera, ók sehiá꞉rak nètho tsatákhaton niwenhniserakéhaton, ne Iawenhthatokénton, né nahonthashaʼterakáren. Nètho wenhniseráte tó꞉sa enshahióten, ók né sewatiataróhrok nahisewaterénhnaien. Ne Iawenhthatokentíke Roiá꞉ner nènhne rawenhnísera, iáh tewatsterístha kanónhwe nashenákereke.

⁴ Sewénest ne kén hiotsétons ne tahionhtenonhweráton tsi nienkáhewe.

Ne É꞉neken Watohetstáhkwa Tánon Ne Iáh Tewatʼthenkwáhton Kanátaro

⁵ Ne É꞉neken Watohetstáhkwa thoentewatáhsawen tsi nienskarakewénhne né꞉ne kaié꞉ri iawénhre senskárake nentewenhnitastsérente. Ne wenhniseráte sewatenikonhró꞉ri natsisewakwéniensʼthe ne Roiá꞉ner.

⁶ Né wísk-iawénhre nenhwenhniserakéhaton ne kakhwáhere ne iáh-tewatʼthenkwáhton kanátaro entewatásawen, tánon né꞉ne tsáta niwenhniseráke tó꞉sa othènen ensewanatárake ne watʼthenkwátha tekaiéston.

⁷ Nentewatenhniseratsiérenhte ensewatsiataróhroʼke nahisewaterénhnaien tánon tó꞉sa ne sewahióten tsi nisewahioténhseroʼte ne niaʼtewenhniseráke.

⁸ Iasewáhaf ne sewákhwa natsítion ne Roiá꞉ner né꞉ne tsáta nónhta nikaríwes. Ne tsatákhaton nenhwenhniserakéhaton shé꞉kon entsisewatsiataróhroʼke nahonsheʼsewaterénhnaien, ók tó꞉sa kíʼ thènen sewahióten tsi nisewahiotenhseró꞉ten ne niaʼtewenhniseráke.

^9-10 Nónen iésewaʼwe tsi tsohontsáien nètho Roiá꞉ner tsi sewawire tánon nenhsewaientwáko ne sewanátias, ratsihenstaʼtsíne iasewáhaf ne tsiotsierénhton kensthokónhni.

¹¹ Ónenk tsi ne ienháthaʼte ne katokénston iewatkáwen rahonháke ne Roiá꞉ner, né káti nahónton nahiaiéna. Ne ratsihénstatsi thóh ne khók ienhát꞉kaʼwe né nó꞉nen iotenhniserohétston ne tsathákhaton nónta kènʼne.

¹² Nenwenhniseráteke iensát꞉kaʼwe nonátsia, tánon káti ó꞉ni tsiathesʼkónten ne nénska tahahoserihiákon teiotinakaronhtónha rátsinn né꞉ne iáh othènen tehotsihióthaʼre.

¹³ Enkenikwekonhátsie kaiéri nikakonhtseráke othèsera iakeniewátha kénhie tenkaiéstonhke né꞉ne ká꞉khwa tsi ienwatkáwenhke. Ne tewenhserateníhons ne iewatkáwen ne rawerentiʼióstha ne Roiá꞉ner. Tánon ó꞉ni ónenk tsi skatʼtshéta onenharatasehontserákeri enkenikwekonhátsie ne ienskát꞉kaʼwe.

¹⁴ Tó꞉sa othènen sená꞉tsiak nonátsiaʼse, khés nokàhte akénhake, khés né꞉ne ahiakotenatharonhniátonhke tánon ahiakotenatharónhthake, tsi nióre arèkok tethetsawiténhni ne Rawenni꞉io. Kí꞉ken kaianerénhseras ónenk tsi enhathikweniénsthaʼke ratikwékon tsi niensatwatsírine né꞉ne tsi nénhwe thóh nenhiothónhake.

Ne Kaientʼthó꞉tshera Tehionhtenonweraʼthóntha

¹⁵ Shá꞉shet tsáta nihiaiakseráke tsi náhe tsotohétston ne iawenhthatokentíke kíʼ thó꞉ne enthéshaʼwe senstó꞉kwa onátsia nàtshion ne Roiá꞉ner.

¹⁶ Né wísk kháton niwenhniserakéhaton, né꞉ne iotenhtohétston ne tsathákhaton iawenhthatokentíke, enthétion ne Roiá꞉ner ne óia áse iesesátkaʼwe nonátsia.

¹⁷ Skawatsirát꞉tions entiéhaʼwe tekanatháraʼke tánon enthónhion ne Roiá꞉ner né꞉ne katokénston athatawítshera. Ne skanatarátʼtshons ónenk tsi kaiéri nikakonhtseráke othèsera tenkaiéstonhke ne watʼthenkwátha tsi enwatenatharónhthake tánon ónenk tsi Roiá꞉ner entʼthónhion né ienwatkáwenhke tsi né thontsiérenhte kaientwákwen nonátsia.

¹⁸ Skát꞉ke ne kanátaro ne ienákere tsáta niháti nénska tehonoserihiákons teiotinakarontónʼas, sahiáta tèro, tánon tenihiáse teiotinakarontónʼas tenítsinn, iáh ne sahiáta ne thènen ahotitsihióhake. Ónenk tsi ne ienhonwanát꞉kaʼwe nahonwateskóntʼthaʼse ne Roiá꞉ner, skát꞉ke nonátsia tánon ne onenharatasehontserákeri ienwatkáwenhke. Ne tenwenhserateníhon kí꞉ken iewatkáwen né rawerienhtiʼióstha ne Roiá꞉ner.

¹⁹ Tánon ó꞉ni sahiáta kaiatákeras rátsinn né nènhne ne kariwáneren aoriwáke tsi ienwatkáwenhke tánon tenihiáse nénska tehonoserihiákon teiotinakaronhtónʼa tenítsinn né nènhne ne sakaríhwa íken tsi ienwatkáwenhke.

²⁰ Ne ratsihénstatsi rahónʼa ienhát꞉kaʼwe ne kanátaro skátke ne tenihiáse teiotinakaronhtónha owíras né꞉ne katokénston athatawítshera rahohénton ne Roiá꞉ner né꞉ne ratitsihénstatsis rahothirihwáke. Kí꞉ken ienwatkáʼwen iotokénti íken.

²¹ Né thóh enwenhniseráteke tó꞉sa othènen saterihwaténtsiat tsi niʼsahiotenhseró꞉ten ne niaʼtewenhniseráke, ók sewatsiataróhrok nahisewaterénhnaien. Tsi niensewatwatsírine thóh kí꞉ken nienkaianerenhseroténhake né꞉ne tsi nénhwe enkénhake, iáh tewasterístha kaʼnónhwe nahathinákereʼke.

²² Nónen ensewaientwá꞉ko ne sewahentákes, tó꞉sa sewanatsí꞉iak ne tsi iehiotʼténhthaʼte, tánon tó꞉sa thóh nionhsáse naʼsehnatsiorónhko ne iothaténrons; né seiénhras ne iakóten tánon ne thihononhontsátes. Ne Roiá꞉ner né Sewaní꞉io íken.

Nosehráse Ionhtenikonhró꞉ris

^23-24 Nenhtewenhniseraʼtsiérenhte ne tsatákhaton niwenhnítaʼke ne shaʼtenhniserónhniat nahontashaterakáren, tánon tásehwe nahisewaterénhnaien nó꞉nen enhwatewenhnó꞉ten ne iehonrawátstha.

²⁵ Ká꞉khwa iasewáhaf rahohénton ne Roiá꞉ner tánon tó꞉sa othènen sehwahióten né wenhniseráte tsi nisehwahiotenhseró꞉tens ne niaʼtewenhniseráke.

Ne Wenhniseroʼwánen Tsi Entionhthatenikónhrenhse Ne Kariwánerens

^26-27 Noieríhaton nenhwenhniserakéhaton ne tsatákhaton niwenhnítakehaton né wenhniseronhthákwen ne tsi nihiorenhnáhon niaʼtehioseráke ahionhterihwathénhtsiaʼte néhren ahonsakahawíthonʼke nakorihwanerahák꞉tsheras nonhkweshón꞉as. Né enhwenhniseráteke kwáh tó꞉sa othènen énsewaʼke; skát꞉ke sewáton nahisewaterénhnaien, tánon iasewát꞉kaf ká꞉khwa rahohénton ne Roiá꞉ner.

²⁸ Tó꞉sa othènen ensehwahióten né wenhniseráte, tsioríhwa tsi né wenhniseronhthákwen né꞉ne ahionhterihwathéntsiaʼte norihwakáhion néhren ahonsakahaʼwíthonke ne karihwánerens.

²⁹ Nónhka ne thènenh áieʼke nètho wenhniseráte iáh kíʼ shé꞉kon ne tahonsahiakotenaʼthónkwen Í꞉i akonkwéta íken.

³⁰ Tánon tó꞉ka ónhka thènen ahiakohióten nètho wenhniseráte, ne Roiá꞉ner rahonhatsíwa kíʼ enshaʼkononhwariákon.

³¹ Kí꞉ken kaianerénhsera enhiakóraʼne ratikwékon ne tsi nienhsatwatsírihne, iáh tewastherístha kaʼnónhwe nahatinákereʼke.

³² Tsi nienkarákwenhne ne tiotónhaton niwenhniseráke né꞉ne tsi nióre ienskarákwenhne oieríhaton niwenhniserakéhaton sewenhtanó꞉ronst kí꞉ken wenhniseráte né꞉ne katokénston awenhnísera nahontahionhterakáren, né nikaríhwes iáh thahóntton ne thènen áieʼke.

Ne Tehiontenonhweratónhkwa Ne Ionhthasehthá꞉kwa

^33-34 Ne tehiohtenonhwerathónkwa ne ionhthasehthá꞉kwa né꞉ne wísk-khaton iawénhre niwenhniserakéhaton entewatásawen né꞉ne tsatákhaton niwenhnithaʼkéhaton tánon né꞉ne tsáta nónhta nikaríhwes.

³⁵ Nenhtenhwenhnisehraʼtsiérenhte kí꞉ken wenhnisehrátes skát꞉ke sewáton nahisewaterénhnaien tánon kwáh tó꞉sa othènen sewahióten tsi nisewahiotenhseró꞉ten ne niaʼtewenhniseráke.

³⁶ Ne niaʼtewenhnisehráke né tsáta nónhta nikaríhwes ónenk tsi ká꞉khwa aorihwáke tsi iensewákʼkaʼwe. Né shaʼtekonháton niwenhniserakéhaton shé꞉kon skát꞉ke shasewáton nahonsehsewaterénhnaien tánon ká꞉khwa aorihwáke tsi iasewát꞉kaf. Né wenhniseronhthá꞉kwen nahionhterénhnaien, tánon tó꞉sa othènen sewahióten. (

³⁷ Ne kí꞉ken ne karihwiʼióston tehiontenonhwerathóntha né tsi atsisewakwéʼniensthe ne Roiá꞉ner tsi skát꞉ke ensewáton nahisewaterénhnaien tánon ká꞉khwa aorihwáke tsi iensewát꞉kaʼwe, tánon ne watéskonhte, nonátsia aorihwáke, karihwihiosehokónhas, tánon ne onenharatasehontserákeri aorihwáke, tsi natenwathonhóntsioʼwe ne niaʼtewenhniseráke.

³⁸ Kí꞉ken kanonhwerathónhtsheras iewawenhtháton ne tsi nihiorenhnáhon ne Iawenhthatokénton, tánon kí꞉ken iewatkáwenhs iewawenhtátons nonhné꞉e tsi nihiorenhnáhon ne sewathatawítsheras, ne iesewatkáwas né kananónhkʼthas ne wararátstons, tánon ne tsi kwáh thóh nisewanikonhró꞉tens nètho tsi tetsisewáwis ne Roiá꞉ner.)

³⁹ Ne nónen sewaientwákwen ne sewenhentákes, sewatenikonhró꞉ri kí꞉ken kaientwákwens né꞉ne tsáta nónhta nikaríwes, thóh entewatásawen ne wísk-iawénhre niwenhniserakéhaton ne tsatákhaton niwenhnitakéhaton. Nenhtewenhniseraʼtsiérenhte né nènhne wenhniseronhthákwen nahontahionteraʼká꞉ren.

⁴⁰ Ne thóh enwenhniseráteke iasewáhaf ne kwáh wahíhios ne sewahiákwen tsi sewatkwiró꞉tons, ionerathésons iasewá꞉haf tánon nonenrasónhas ne iotenerathaká꞉tes karonhtasónhas, tánon tasewatáshawen tahisewatenonhweráton ne naʼtsisewakwéniensʼthe ne Roiá꞉ner Sewaní꞉io.

⁴¹ Sewatenikonhró꞉ri né꞉ne tsáta nónhta nikaríhwes. Kí꞉ken kaianerénhseras né enhontsiénawasʼte tsi niensewatʼwatsiríhne tsi nénhwe enkénhake.

⁴² Onhkwetaʼkwékon Nisraerró꞉konhke ónenk tsi thohʼnónhwe enhatiʼterónhthake ne tsi waskwahrón꞉nions né꞉ne tsáta nónhta nikaríhwes,

⁴³ ne káti ne tsi nienhsewatʼwatsírihne nahonateriéntarahne nètho Roiá꞉ner sakahonhniénhni nonhkweshón꞉as Nisraerʼró꞉nonhke thohʼnónhwe nahatiʼterónhtake tsi nónhwe ne thikènha waskwahká꞉renhre nónen shaʼthontasakohiatínekenhwe ne Egypt. Rahónha ne Roiá꞉ner Sewaní꞉io íken.

⁴⁴ Thóh káti kíʼ ní꞉ioht ne Mahís tsi thaʼshakáwen nonhkweshón꞉as Nisraerʼró꞉nonhke ne kaianerénhseras tsi ahatiʼkweniénsthake ne karihwiʼiostónhtsheras tehiontenonhweraʼthóntha ne nahonwakwéʼniensʼthe ne Roiá꞉ner.