Leviticus 21 - Ohiatonhseratokénti

Ne Raotihiathatokentítsheras Ne Ratiʼtsihénstatsis

¹ Ne Roiá꞉ner wahorihónten ne Mahís nashakoró꞉ri ne Aaronite ratiʼtsihénstatsis, “Tó꞉sa ónhka ne ratsiʼhénstatsi ne tahathaʼtsiatátionsʼte nahateriwaténhtsiaʼte nashakohiatháta ne ronhthátenonhkwe,

² nék tó꞉ka kén ronisténha, roʼníha, roiénha, shakoiénha, iathatekénha,

³ khés ne iáh tehioniákon iatenosénha ne rahonónhskon kénhteron.

⁴ Iáh tehiówenk ne tahathatsiathátionsʼte nenhiaiéheie tsi nikáien ne kaniátshera nitsawénon tsi iaʼthátenonhkwe iotónhon.

⁵ “Iáh ónhka ne ratsiʼhénstatsi nahathatenónhkare ne ranonhtsíne khés nahatkonsthónriaʼke khés nahatátrene ne rahiatháke narénesʼte tsi rotsiónhnion.

⁶ Ónenk tsi enhohiathatokenhtíhake tánon iáh tehiówenk nahatsenhnátsaʼte. Ne Ká꞉khwa rakthátis, tánon káti ónenk tsi enhohiatatokenhtíke.

⁷ Ne ratsihénstatsi iáh thahónton nahotíniaʼke ne iónhkwe né꞉ne iorihwahiathatónhon nakahiathótenhne tó꞉ka ó꞉ni ne iakónhkwe ónenh ienakwaientéri iakotenathónkwen tó꞉ka ó꞉ni ne tehiotetʼkháshion; né tsi rohiathatokénti íken.

⁸ Nonhkweshón꞉as ónenk tsi thóh ní꞉ioht tsi enhonwananonhthónhnionʼse ne ratitsihénstatsis tsi rotihiathatokénti íken, tsioríhwa tsi rahónha rakʼthátis ne ká꞉khwa. Í꞉i ne Watiá꞉ner; Watiathatokénti tánon Í꞉i kheʼhionhniénhnis naʼkonhkwetaʼshón꞉as nahononhkwetathokenhtíke.

⁹ Tó꞉ka ne ratsihénstatsi shakoiénha waheriwahiatháton wahónton, wahonwatéhaʼte kíʼ ne ronhwaníha; ónenk kíʼ tsi enhionthatsatátʼtsahaʼte tsi enhiaiéheʼie.

¹⁰ “Ne Ratsihenstowánen ne rohiathatokenhtíston tsi kénhie tewá꞉weron ne ranonhtsíne tánon tsi rohiathatokenhtíhon né kíʼ enhatʼtserónhniaʼte ne ratitsihénsthatsis rahonatʼtserónhnias, né káti aoríhwa iáh kíʼ thahónton nahaniskwahráko né iáh thaʼhotkorothíhen khés naharátion ne rahotserónhnia né naréneste tsi ahotsiónhnionʼke.

^11-12 Akonháke nónhwe nihonwathonhnará꞉ni tánon káti iáh thahónton ne tahathatsiathátsionsʼte khés ne thaʼhéntsionsʼte nakatóhsehra tsi éhren árete tánon thóh kanónskon iahatháwehiaʼte tsi nónhwe tewenhehionhtháien, iekaníhare né rahónha roʼníha tó꞉ka ó꞉ni ronisténha akénhake.

¹³ Ónenk tsi né꞉ne iáh teienakwaientéri enhathateniákʼten,

¹⁴ iáh ne ioteréhons tó꞉ka ó꞉ni ne tehiotetkháshion tó꞉ka ó꞉ni ne iónkwe ne iorihwahiathatónhon íken. Ónenk tsi né꞉ne iáh tekanakwaientéri enhathateniákʼten né꞉ne rahónha rahotarákon nónhwe nikaiátare.

¹⁵ Asèken, ne sakohiohokónhas, ahiowenhkénʼen ahotiʼhiathatokenhtíken, kwáh kíʼ tenhotihiathátsionhke. Í꞉i ne Watiá꞉ner tánon Í꞉i ákte nihiteron nahatsihenstowanénhake.”

¹⁶ Ne Roiá꞉ner wahorihónten ne Mahís

¹⁷ nahoró꞉ri ne Aaron, “Iáh ónhka tsi nienhsatwatsiríhne né iáh tieiehiathaiéri thahónton nahiotátʼtshe ne ká꞉khwa. Né kí꞉ken tsi nénhwe thóh nenhiotónhake.

¹⁸ Iáh ónhka ne rónhkwe ne iáh tiehahiataiéri thahónton ne thènen ahiatátʼtshe: iáh ónhka ne teieronhwékon, iáh tieiehiataiéri, shontekʼthí꞉iot tsi iakónhnhe;

¹⁹ iáh ónhka ne hiontshanák꞉sen, khés ne hionhshí꞉takʼsen;

²⁰ iáh ónhka ne tehiakonowihiákon khés ne niʼienenhiésa; iáh ónhka ne iekharáksen tó꞉ka ó꞉ni ne akoné꞉honkne ahiakohráhraʼke; tánon iáh ónka ne rónhkwe ne ronhwakwahthákwen.

²¹ Iáh ónhka ne Aaron tsi nienhatwatsiríne né iáh tiehatiʼhiathaiéri thaʼhónton nahionktátʼtie ne ká꞉khwa.

²² Nètho rónhkwe nonhtiérenk énraʼke ne ká꞉khwa né hionkthátire, tetsáron né꞉ne iotokénti ká꞉khwa tánon ne kwáh iotokénti ká꞉khwa iewatʼkáwen,

²³ ók ne tsioríhwa tsi iáh tiehahiataiéri, iáh kíʼ tehiówenk nát꞉tha árete tsi ioniatharénhton ne iotokénti khés ne tsi ietsienhará꞉kwah. Iáh tehiówenk ne tahéntsionste kí꞉ken orihwatokéntis, tsioríhwa tsi Í꞉i ne Watiá꞉ner tánon Í꞉i kónhnis nahiothitokenhtíke.”

²⁴ Kí꞉ken, éhtho, káti ní꞉ioht ne Mahís tsi wahoró꞉ri ne Aaron, ó꞉ni sakohiohokónhas ne Aaron, tánon onhkwetaʼkwékon ne Israerronónhke.