Leviticus 2 - Ohiatonhseratokénti

Onátsias Tkaʼiéston

¹ Nónen ne ónhkak tsi nítsion iaháthate nonátsias ahontaháiesʼte rahonháke ne Roiá꞉ner, ónenk niáreʼkwe tsi ensétʼtheʼte nasatʼthenserónhni. Ónenk tsi iakenieʼwátha kénhie enteshá꞉weron tánon ne kanetanóron

² tánon iatsiawíten ne Aaronite ratsihénsthaʼtsi. Né roterihwatsʼteríston sehwatshána enharáko nothésehra tánon ne iakeniewátha kénhie tánon akwékon ne iontsienkwahronhniaʼthákwa tánon enhátʼtsahathe thóh ne ietsienharákwahke né꞉ne tahonthontenakeráston nètho tsi akwékon Roiá꞉ner thonwá꞉wi. Ne tewenhserateʼníhons ne ká꞉khwa ne iewatkáwenh tsi rawerientiʼióstha ne Roiá꞉ner.

³ Ne iothaténron nonátsias ne tkaiéston ratsihénsthatsi né rahówenk; kwáh iotokénhti, tsioríhwa tsi thoʼnónhwe nikaráhkwenh né꞉ne Roiá꞉ner thonwáwi.

⁴ Tó꞉ka kaná꞉tharo tkaiéston tánon né꞉ne tsi iontenatharonhtákwa watenatharónhte, ónenk tsi iáh né thaʼtakaiéstonhke ne iontʼthenkwáhtha. Ahónton nakaténhsonhke né nothésehra né꞉ne iakeniewátha kénhie takaiéstonhke tó꞉ka ó꞉ni né norahwístha né꞉ne iakeniewátha kénhie ká꞉ron.

⁵ Tó꞉ka ne tkaʼiéston kanátharo íken tánon otsienháke tsi karíhton, ónenk tsi né enhionhníhake né꞉ne iakeniewátha kénhie tenhkaiésthonke nothenésehra ók tsi iáh né thaʼtakaiéstonhke ne watʼthenkwáhtha.

⁶ Tesenataʼrárit tánon kénhie éhneken thashá꞉weron nónen ne enthé꞉sesʼthe.

⁷ Tó꞉ka ne tkaiéston kanátaro ienatsaráhkwahke tsi karíʼton, né enhionhniátonhke nothésehra tánon iakenhiewátha kénhie tenhkaiésthonke.

⁸ Thasehwáhaf tsi ne atsítsion ne Roiá꞉ner tánon ratsihénsthatsi tatʼtsítsion, rahónha ietsienharáhkwahke nienháhaʼwe.

⁹ Né ratsihénsthatsi enhatsiátaren tsi né enwenésthonke tsi oriwakwékon Roiá꞉ner ronhwáwi, tánon thóh enhátsahaʼthe ietsienharáhkwahke. Tsi tewenhsehratheníhons ne káhkhwa ne rawerientiʼióstha ne Roiá꞉ner.

¹⁰ Né kenhiotsétons ne iewatká꞉wen ratsihénsthatsi né rahó꞉wenk; kwáh íken tsi iotokénti, tsioríhwa tsi thóh nónhwe nitká꞉ha ne ká꞉khwa né tsi Roiá꞉ner ronhwawíhon.

¹¹ Iáh thahó꞉tens ne onátsias iewatʼká꞉wen né tsiáwi ne Roiá꞉ner né꞉ne ahionhniáton ne watʼtenhkwáhtha; tó꞉sa nonhwénhton ne ísatst ne watʼtenhkwáhtha tó꞉ka ó꞉ni ne otsinakonhthakwáhne rahotiʼtsikhétha takaiéstonhke ne ká꞉khwa ná꞉tsion ne Roiá꞉ner.

¹² Ne entèshiesʼthe nenhtewaʼtsiérenthe ensentwáko nonátsa né iaʼtehiosehráke ientsawíten ne Roiá꞉ner, ók iáh kíʼ ientsienharáhkwahke tahontsahatónhake.

¹³ Thaʼshahiotsistónhti akwékon nonátsas entéshiesʼthe, tsioríhwa ne tsiohiótsis ne wenéstha naterihwasehronniátshera tsi naʼtetsiátere níse tánon ne Rawenni꞉io. (Ónenk tsi akwékon teshiotsistáro ne thènen entéshiesʼte.)

¹⁴ Nónenh entetiawíten ne Roiá꞉ner nátsion nentewatsárenhthe enshientwáko nonátsa, ne thátion ne kanatsakeríton tó꞉ka ó꞉ni ne katʼtheserónhni.

¹⁵ Iakeniewátha kénhie tétiest tánon onètha éhneken tashá꞉ti.

¹⁶ Ne ratsiʼhénsthatsi enhátsahathe nètho kákʼkhwa tánon ne kénhie né꞉ne enweʼnésthaʼkwe, tánon akwékon ne onètha, né kákʼkhwa enwatená꞉thonkwe tsi enhónhion ne Roiá꞉ner.