Leviticus 19 - Ohiatonhseratokénti

Kaianerénseras Ne Iotokéntis Tánon Ne Kariwakwahrihsónhtshera

¹ Ne Roiá꞉ner wahoróri ne Mahís

² nashakawénhase nonhkweshón꞉as ne kanakeraserákon ne Israerʼró꞉nonhke, “Sewahiathatokentíhak, tsioríhwa, Í꞉i, ne Watiá꞉ner Sewaní꞉io, watiatatokénti íken.

³ Tsi sewahiatátʼtions ónenk tsi enhietʼtsikweniénsthake ne ietsinisténhas ó꞉ni ne ietsinihó꞉kons, tánon ensewenhtanorónsthaʼke ne iawenhthatokentíke, tsi kíʼ niwakerihwíson. Í꞉i ne Watiá꞉ner Sewaní꞉io íken.

⁴ “Tó꞉sa thaʼkwahtewénhtet tánon né ahisewasénhnaien ne kahiatonhnisónhas; tó꞉sa karísthatsis tsiónhniat ne ní꞉io akénhake tánon né aietʼtsisénhnaien. Í꞉i ne Watiá꞉ner Sewaní꞉io íken.

⁵ “Nónenh ensewanonhwariákon ne katshénen né꞉ne skaríhwa aorihwáke íken, sewateweiénton ne kaianerénseras ne tkwáhwi, tánon káti entiéna ne iesewatkháwas.

⁶ Nowáron ónenk tsi né sahenhnísera enkawará꞉konhke tó꞉ka ó꞉ni ne nóia ensewenhniseráteʼke. Né thènen nowáron ne iothaténron nasénhaton niwenhniserakéhaton ónenk tsi enwatsahathónhake,

⁷ tsioríhwa tsi kwáh iáh tetsiotkwéniens, tánon tó꞉ka ónhkak aiewárake, kwáh kíʼ iáh thatiéna ne iesewatkáwen.

⁸ Nónhka aiewá꞉rahke kwáh kíʼ enhiakónike tsi thóh nahéiere ne thikawenhní꞉iot tsi nahóten ne konhwatonhnará꞉ni nakerihwáke, tánon kíʼ iáh shé꞉kon ne tahonsahiakotenáthonkwe Í꞉i akonhkwéta íken.

⁹ “Nó꞉nen ensewaienthóko ne sewahenthákes, tó꞉sa sewanatsí꞉iak ne tsi ieiotʼthénthate, tánon tó꞉sa thóh nionhsháse ne shékon tahonthonsewaróhroʼke noná꞉tsias ne iothaténrons.

¹⁰ Tó꞉sa thóh nionhshá꞉se ne tsi sanenharaiéntʼthon nahonshaʼsenenharaʼrórohke tsi níkon ne tehiakahowískwahton tsi iakohnenhará꞉kwen tánon ne ionaharénhseron; né nènhne seiénhras ne iakóten tánon ne thihononhontsátes. Í꞉i ne Watiá꞉ner Sewaní꞉io íken.

¹¹ “Tó꞉sa sheʼnénhsko tó꞉ka ó꞉ni nasehnikónhrate tó꞉ka ó꞉ni nashaʼnówenhthe.

¹² Tó꞉sa othènen shaʼráratst ne Í꞉i aksénhnakon tó꞉ka iáh éhtho thesanikonhró꞉ten naserihwaiérihte; né ní꞉ioht ne tkáhas natehénsera naksénhnakon. Í꞉i ne Watiá꞉ner Sewaní꞉io íken.

¹³ “Tó꞉sa sehnénhsko tó꞉ka ó꞉ni nónhkak asekarénhratʼtse. Tó꞉sa sehiatkarakshá꞉ten nónhkak sehnáhon, iekaníhare iáh ne tsiokarátshera akénhake.

¹⁴ Kwáh tó꞉sa ietsinikonhrakaréwat ne tehionhonthakwékon tó꞉ka ó꞉ni ne thènen ahisewáien rahotihénton ne iáh tehatíken né꞉ne tahotiniotháko. Thaʼkwahwénhnarak; Í꞉i ne Watiá꞉ner Sewaní꞉io íken.

¹⁵ “Sewarihwatokénhak tánon sewarihwakwahrihshonhat nónen tenhsewahiató꞉rethe ne tsi teiehiatorethákwa; tó꞉sa teietʼtsihiaróton ne iakóten tó꞉ka ó꞉ni aietʼtshitshániʼke ne iakokwáhtshe.

¹⁶ Tó꞉sa tesewaterihó꞉kwah noʼnówens ne tsík ónhka akénhake, tánon nónen nónhkak tehonwahiatorétha ne tsi rónhnhe, sewathátiat ne sewarihwanhiʼrátshera tó꞉ka ahoiénawaʼse. Í꞉i ne Watiá꞉ner.

¹⁷ “Tó꞉sa sehiatkonhsanósten nakorénson, ók sewarihwasehrónhni tsi naʼtesewátere, né káti ne tó꞉sa ahiʼsewarihwánerake ne ronónha ahatiʼrihónhni.

¹⁸ Tó꞉sa kíʼ thontasewaná꞉kwen tsi nòkwah nakorénhson tó꞉sa ó꞉ni iaʼsewakónhtak naʼietʼtsiʼshónhsehke, ók ietsinerónhkwat ne tesewanonhsanéken tsi kíʼ níse nishaʼthatenorónhkwah. Í꞉i ne Watiá꞉ner.

¹⁹ “Sewatewénhnarak nakerihwatatʼtiéras. Tó꞉sa iaʼtesheʼnón꞉naiest ne senás꞉kwahiens konhtiʼtshénens. Tó꞉sa né thiʼkanénhate ashiéntʼtho né꞉ne sakahéttatʼke. Tó꞉sa né satʼtsherónhniat né thaʼtekeʼníthe tsi ní꞉ioht tsi ká꞉son ne ionhkwenonhniaʼthákwah.

²⁰ “Tó꞉ka ne kanáskwah iónhkwe thóh ní꞉ioht tsi konhwaientéri tsi né rohiótenhse ne rónhkwe tánon iáh kíʼ thaʼhakáriakʼse iáh ó꞉ni tetsiothaʼtewenhnihióhon, ethòne óia rónhkwe skát꞉ke wahiárate nahónha, kwáh kíʼ enhonwatiréwathe, ók iáh kíʼ tahonwatinonhwariákon, tsioríhwa tsi kanáskwah íken.

²¹ Ne rónhkwe ónenk tsi teiotinakaronhtónha owíra enthohiaténhaʼwe ne tsi iehionhthawehiathákwa natohsehrákon né꞉ne tsi nónhwe nikíteron né nènhne enshakárhiakthe tsi ienhát꞉kaʼwe.

²² Tánon né entsiaténhroʼke ne ratsihénstatsi tsi enhaterihwaténhtsate norihwakáion tionhtonhnakanonnithákwa né nahéren akahawíthonke ne rónhkwe rahorihwanerahákʼtshera, tánon ne Rawenni꞉io enshonikónhrenhse.

²³ “Nónen iensewá꞉we tsi tsiohontsáien ne Canaan tánon tsík niwahióten ensewakwiraiéntʼtho, thóh ní꞉ioht tsi tesewahiató꞉ret nètho káhik tsi shihiorihwakáion tsi iáh tehiotkwéniensʼkwe né náhsen nihioseráke nenhkarihwésonhke. Né thóh nikaríhwes tó꞉sa othènen ensewáhiake nètho káhik.

²⁴ Ne kaieríhaton nihioserakehá꞉tsie akwékon ne kahiksónhas ónenk tsi enwaterenhnaʼiénhni tsi ienhontkáʼwe naʼiénesthe tsi tehiontenonhwerátons nakonháke, ne Watiá꞉ner.

²⁵ Ók ne wískʼkhaton nihioserakehátsie enhwáton nahonsehsewáhiake. Tó꞉ka kí꞉ken oriwakwékon thóh nenhsewáiere, ne sewaronhtasónhas sénha wéso enwahianihiónten. Í꞉i ne Watiá꞉ner Sewaní꞉io íken.

²⁶ “Tó꞉sa othènen sewawá꞉rak ne shé꞉kon iotenekwénhsa. Tó꞉sa othènen sewatéweienst ne iótkons.

²⁷ Tó꞉sa sewathatenonhkhar ne sewanonhtsistatʼthónhtie tó꞉ka ó꞉ni nahisewatʼkonhsthónhrhiaʼke

²⁸ tó꞉ka ó꞉ni ne thènen ahisewarasthánion ne sewahiathakésons tó꞉ka ó꞉ni nahisewatʼtatrenánion nahietʼtsihiatʼtsiónhnionhse ne iakawenhéion. Í꞉i ne Watiá꞉ner.

²⁹ “To꞉sa sehiatéhat ne sheʼiénha né꞉ne asehiónhniaʼte nahionhtsiátaren ne ononhsatokenhtíke ahionhterihónten naʼierihwahiatháton; tó꞉ka thóh nénhshiere, thóh niénhse tsi nòkwah noʼóhia niʼiohokónhas tánon nohóntsa tetkará꞉ke ne karihwanerahák꞉tsheras.

³⁰ Sewenhthatokéntist ne tsatákhaton niwenhniserakéhaton, tánon sewakwénienst tsi nónhwe nihionksenhnaienthákwa. Í꞉i ne Watiá꞉ner.

³¹ “Tó꞉sa thóh niénhsewe naʼietsihiatenikonhrihsáhkha nonhkweshón꞉as né꞉ne ronhwatinikonhríhsaks ne ronenhéion. Tó꞉ka thóh nénhshiere, kwáh kíʼ shihiorihwakáion tsi teshahiathátion. Í꞉i ne Watiá꞉ner Sewaní꞉io.

³² “Sekweniénstak ne tiaʼkahonkwetáhion tánon tesherénhsaron. Kaʼkweniensthenhtserákon tsi takwawénhnarak; Í꞉i ne Watiá꞉ner

³³ “Tó꞉sa sehiateweienhnaksháten ne tihononhontsátes ne tionhontsáke ratinákere.

³⁴ Thóh ní꞉ioht tsi tesherihwásnies tsi ní꞉ioht Nisraerʼró꞉nons, tánon shenóronk tsi níse nishewathatenorónhkwa. Sewehiárak i꞉se ó꞉ni iehioterástʼton thiʼtionhontsáte kénhne ne tsi tsionhontsáien ne Egypt. Í꞉i ne Watiá꞉ner Sewaní꞉io íken.

³⁵ “Tó꞉sa ónhka ieʼtsinikonhráten né꞉ne ahisewátsʼte ne iáh tekaientéri níhions hionhtenientensthákwa, tsi nahiótsʼteke, ó꞉ni tsi nakonháke.

³⁶ Ne ísewats ne kaienhtéri iekonhtserihará꞉kwah, ne tkaiéri tsi nahiótsʼteke, tánon ne tkarihwaiéri hiontenientenstákwa. Í꞉i ne Watiá꞉ner Sewaní꞉io íken, tánon Í꞉i tetkwahiatinekénhen ne Egypt.

³⁷ Sewatewénhnarak akwékon naʼtianerénhseras tánon naʼkerihwatátʼtsheras. Í꞉i ne Watiá꞉ner.”