Leviticus 18 - Ohiatonhseratokénti

Karihwáston Ne Kentehtserákon Ahionterihwaténhtiaʼte

¹ Ne Roiá꞉ner wahoró꞉ri ne Mahís

² nashakoróri nonhkweshón꞉as Nisraerʼró꞉nonhke, “Í꞉i ne Watiá꞉ner Sewaní꞉io.

³ Tó꞉sa ahatísere tsi nihontseránions nonhkweshón꞉as ne Egypt, tsi nónhwe iehioteráston tisewaná꞉kerekwe, tó꞉ka ó꞉ni nonhkweshón꞉a ne tsi watonhwenhtsáien ne Canaan, tsi nónhwe nónhwa wakwahiatenháwi.

⁴ Sewatewénhnarak natianerénhseras tánon thóh nasehwáier tsi nenhkíron. Í꞉i ne Watiá꞉ner Sewaní꞉io.

⁵ Sehwásier ne sewatéweienst ó꞉ni ne kaianerénhseras nètho entkwáhhion; kwáh kíʼ ensewanónsthate tsi tiónhnhe tsi etʼnenhsewáiere. Í꞉i ne Watiá꞉ner.”

⁶ Ne Roiá꞉ner tahát꞉kaʼwe ne kén iotsétons kaianerénseras. Tó꞉sa ne sewániat ne sewathátenons.

⁷ Tó꞉sa tsiatéhat ne ianíha tsi skát꞉ke entiárate ne sanisténha. Iáh tehiówenk nasehiatéhaʼte ne kwáh í꞉se sanisténha.

⁸ Tó꞉sa tsiatéhat ne ianíha né skát꞉ke ahisewáraʼte ne óia roniátkons.

⁹ Tó꞉sa skát꞉ke sewárat ne shehionháf꞉fa, iawerohatiénhak tó꞉ka kén tsí tsiakotehiáron ne sakanónhskatʼke tiatehiáron.

¹⁰ Tó꞉sa skát꞉ke iehiotók꞉te ne sehiateréha; kwáh í꞉ken tsi iotéha ne sarihwáke.

¹¹ Tó꞉sa skát꞉ke tsiárat ne asénhnon niʼtiatenosénha, ahʼónha, ó꞉ni, tiatenosénha íken.

^12-13 Tó꞉sa ónhka ne saʼmaténht akénhake ne skát꞉ke ahisewáraʼte, iawerohátsien tsi ianíha iatenosénha íken tó꞉ka ó꞉ni sanisténha tsiathatekénh꞉ʼa.

¹⁴ Tó꞉sa skát꞉ke sewárat ne ianonwáha ró꞉ne; ahónha, ó꞉ni, saʼmaténht íken.

¹⁵ Tó꞉sa skát꞉ke tiárat ne sheʼienónhsa

¹⁶ tó꞉ka ó꞉ni ne tiaʼtatekénha ró꞉ne.

¹⁷ Tó꞉sa skát꞉ke tiárat ne sheʼiénha tó꞉ka ó꞉ni nakoteréha ne hiónkwe ne skát꞉ke tiará꞉thonhne; nonhtiérenk tó꞉ka tiaʼtátenonhkwe, tánon né nènhne ne aterihwatewaʼthóntshera íken.

¹⁸ Tó꞉sa ne teseníteron tsiaʼtatekénha thóh nasehiéraʼse tsi shí꞉ken ní꞉ioht né꞉ne tseksténha akénhake, tsi nióre ne shé꞉kon iakónhnhe ne teseníteron.

¹⁹ Tó꞉sa skát꞉ke tiárat ne iónhkwe ne shé꞉kon iotenhnitaráni, tsioríhwa tsi kwáh iáh tehiotkwéniens.

²⁰ Tó꞉sa ónhka ne rónhkwe ró꞉ne skát꞉ke tiárat; né nènhne enshón꞉nien ne kwáh iáh tahisatkweʼniensthónhake.

²¹ Tó꞉sa ienseiát꞉kaʼwe ne seʼienhokónhas nahonwánatsʼte tsi akonhwasénhnaien ne Molech ní꞉io, tsioríhwa tsi ne entkáhaʼwe nahonwasenhnák꞉saʼte ne Rawenni꞉io, ne Roiá꞉ner.

²² Iáh ónhka ne thehnónhkwe tehiówenk ne kentèsera ahiaterihwathénhtiaʼte; ne Rawenni꞉io rarihwásons ne thóh ní꞉ioht.

²³ Iáh ónhka ne rónhkwe khés ne iakónhkwe kentèsera tsi ahonterihwathénhtiaʼte tsi nòkwah ne konhtitshénen; nètho kanikonhrahetkénton ne sonhniénhnis ne kwáh iáh tesatkwéniens.

²⁴ Tó꞉sa thènen teshaʼtatsiatátionst ne kíʼ thóh nashieránion, asèken thóh ní꞉ioht ne ioʼkwetáksens tsi tehonthatsiatatiónstha, nètho onhkweshón꞉as né ratinákerekwe ne tsi ionhontsáte nohénton níse tánon tsi nikáien ne Roiá꞉ner shakohiatinekénhseʼre né nahónton níse thóh niahí꞉seʼwe.

²⁵ Tsi nihatiʼweienhnótens waʼthonnonhontsátsionsʼte, tánon káti ne Roiá꞉ner rarewáthaʼne nonhóntsa tánon ne enrónhniaʼte nahontahiakoiatínekenhwe nonhkweshón꞉as né thóh nónhwe nihatinákere.

^26-27 Akwékon kí꞉ken ioterihwatéhas thóh nahatiʼierá꞉nion tánon wathatihontsátionsʼte, ók iáh kíʼ tehiówenk níse né násheʼre. Sewakwékon, ne Israerʼró꞉nons tó꞉ka ó꞉ni tehononhontsátes akénhake ne skát꞉ke sewanákere, ónenk tsi ensewateweiénton ne Roiá꞉ner rahoianerénseras ó꞉ni ne rahorihwatátʼtsheras,

²⁸ tánon ethòne kíʼ ne ohóntsa iáh thahisewahetkénten, tsi kíʼ nihiakohetkenhténhni ne ronhnonhkwethahétkens né thóh ratinákerekwe nohénton níse.

²⁹ Sewateriénthare nónhka ne thóh nahiéiere kí꞉ken ioteriwatéhas tsi iáh kíʼ ne tahonsahonatenáthonkwe Rawenni꞉io rahonkwéta akénhake.

³⁰ Tánon ne Roiá꞉ner wahénron, “Sewatewénhnarak ne karihwatátʼtsheras ne tkwáhwi tánon tó꞉sa thóh sewáser tsi nihatiweienhnótens nonhkweshón꞉as ne thóh tsi ionhwenhtsáte ratinákerekwe nohénton níse, tánon tó꞉sa tesewathatsiatátions tsi éhtho nahisewáiere kíʼ nahorihoténhsons. Í꞉i ne Watiá꞉ner Sewaní꞉io íken.”