Leviticus 14 - Ohiatonhseratokénti

Tsi Nentionhtonhnakanón꞉hni Nónen Tiaʼkoiewentháhon Ne Kannhratharihnétshera Ne Ienehónt꞉ke

¹ Ne Roiá꞉ner tahá꞉wen ne Mahís

² ne tehioterihwasonhterónhnion tsi nikaianerenseró꞉tens tsi nòkwah ne orihwakáhion tionhtonhnakanonhnítha tsi nítsion ne tsi sewahiehwentháhon ne iotennhrát꞉teron kané꞉hont kannhratharihnétshera. Nenthenhwenhniseráte nenhiensaró꞉ri tsi satkwéniens, ratsihenstaʼtsíne nenhieshahiaténhaʼwe,

³ ne ratsihénsthatsi ástste nienhiaiaténhaʼwe ne tsi watená꞉thaien tánon enhiatkensénion. Tó꞉ka ne kannhratharihné꞉tshera tiaʼkoiewenhtáhon,

⁴ ne ratsihénsthatsi enhathénnahʼne né꞉ne kwáh ionatkwéniens otsiténha ahonhthakonhwatiʼhiaténhaʼwe, skát꞉ke ne onentakwénhte óiente, onekwénhtara niwasherihiethóten, tánon skahónta Hyssop.

⁵ Ethóhʼne ne ratsihénstatsi enhaténhnaʼne skatsiʼténhsera enhkonwanonhwariákon é꞉neken ne ionawasthakaríhio kátshe né꞉ne ioné꞉kano iohnawerotehónhwe kanékare.

⁶ Ienhahiaténhawe nóhia otsiténha tánon thóh ienhahiáthoʼwe, skát꞉ke ne onenthakwénhte óienhte, ne onekwénhtara aseríhie, tánon ne skahónta Hyssop, nahonekwenhsáke notsiténha konhwanonwariákon.

⁷ Ónenk tsi tsáta nihiorihwáke tenshakotstaró꞉kwahte nonekwénhsa tsi ní꞉tsion ne tsi sewaiewenhtáhon ne kanéhonk kannhratharihné꞉tshera, tánon ethóhʼne enʼtsisewaró꞉ri kwáh kíʼ tsi sewatkwéniens. Tánon iensát꞉kaʼwe ne otsiténha kahenthakéson niaʼhonshakátie

⁸ Ónenk tsi enshesenóhare ne satsherónhniat, akwékon enshathateʼnónhkare, tánon enshá꞉thawen; ethóhʼne káti kwáh tsi shiʼhiorihwakáhion tsi satkwénienskwe. Ethóhʼne enwáton niaʼhonshaʼsenatáraʼne, ók ónenk tsi tsáta nónhta ástste ne tsi shaʼthatósehrothe enshé꞉sehke.

⁹ Né tsathákhaton niwenhniserakéhaton kwáh shé꞉kon enseshathateʼnónhkaron, ensatkonsthónhriaʼke, tsi teshanawásare ó꞉ni, tánon akwékon tsi nonhwéson shanónhwerote ne tiathákes; ónenk tsi ensehsenóhare ne satʼtsherónhnias tánon enshá꞉thawen, tánon ethóhʼne kíʼ kwáh entsisatkweʼniensthónhake.

¹⁰ Né shatekónhaton niwenhniserakéhaton ónenk tsi tenihiáse enteshehiaténhaʼwe ne teiotinakaronhtónha tenítsinn owíra tánon skaiáta teiotinakaronhtónha ohné꞉tsien owíra ne nénska tehonoserihiákon né꞉ne kwáh iáh othènen tehotitsihiótare, wísk niʼkakonhtseráke othésehra né꞉ne iakeniewátha kénhie tekaiéston, tánon satekatshetíhen ne iakeniewátha kénhie.

¹¹ Ne ratsihénstatsi ienhiaiaténhaʼwe skát꞉ke kí꞉ken athatawítseras ne tsi iehionhthawehiathákwa natohserákon tsi nónhwe nihénteron ne Roiá꞉ner.

¹² Ethóhʼne ne ratsihénstatsi tenhohiáthakwe saiáta ne teiotinakaronhtónʼa owíra rátsinn skát꞉ke ne satekatʼtsetíhen kénhie tánon né ienhát꞉kaʼwe nahonshakakariákʼthonke ne athatawítsera. Ónenk tsi né꞉ne katokénston athatawítshera tsi ienhát꞉kaʼwe rahohénton ne Roiá꞉ner né꞉ne ratsihénsthatsi rahorihwáke.

¹³ Enhononhwariákon ne teiotinakaronhtónʼa owíra ne tsi iotokénti nónhwe tsi nónhwe nikonhwatirhiostakwa ne konhtitshénens nenhkonhwanateskónhten ne karihwanerahák꞉tshera ahorihwáke. Ónenk kíʼ tsi thóh nenháiere tsioríhwa tsi né꞉ne enskakariákʼthonke ahorihwáke, tsi kíʼ ní꞉ioht ne kariwanerahák꞉tshera iewatkáwen ahorihwáke, né꞉ne ratsihénsthatsi rahó꞉wenk tánon kwáh íken tsi iotokénti.

¹⁴ Ne ratsihénsthatsi ostónha ne teiotinakaronhtónʼa owíra rahonekwénhsa etháke ne tsi iehiakothahónthaʼte ne tsi ieweientheʼthákwen nónhwe nenhanekwenhsàro, tánon ó꞉ni ne iehionhkaráke ne tsi ieweientheʼthákwen, tánon ne hionhiakwirowaʼnénhken ne tsi ieweientheʼthákwen nahonshítate tsi nikáien nahiontatró꞉rih tsi kwáh tiakoiewenhtáhon.

¹⁵ Ne ratsihénstatsi ostónha ne iakenhiewátha kénhie shanekwáhti ratianá꞉kon enhá꞉weron,

¹⁶ iaʼtenhanisnónh꞉sohwe ne saweienhtheʼthákwen nahatshánati, tánon tenhatsʼtarókwahthe né꞉ne tsáta nihiorihwáke tsi nónhwe nihénteron ne Roiá꞉ner.

¹⁷ Ostónha ne kénhie ne ratianákon í꞉kare tánon ostónha ne teiotinakaronhtónha owíra rahonekwénhsa enhá꞉ro ne etháke ne shaʼweienteʼthákwen tsi iehothahonthate tsi nikáien nenshonwarónhkwahse, ne shaʼnekwáhti nahawehionhkaráti, tánon ne rahiakwirowaʼnénhke ne shaʼweientheʼthákwen nahasitháti tsi nikáien ónhkak ahionhtatró꞉ri tsi kwáh tiakokʼkwéniens.

¹⁸ Ónenk tsi níkon iothaténhron ne kénhie ne ratshanáke sewanonhtsíne enhá꞉ro. Thóh kíʼ ní꞉ioht tsi enhaterihwathéntiaʼthe ne orihwaká꞉hion ne tionhthathonaʼkanonhniaʼthákwah.

¹⁹ Ethóhʼne ne ratsihénstatsi ienhát꞉kaʼwe ne karihwáneren aorihwáke tsi enhaterihwathénhtiaʼte ne horihwakahionhnéha tionhtonhnakanonhniathákwah. Nenhwatóhetsthe nètho, ónenk tsi enhanonhwariákon ne katshénen né nakonhwateskónhten aorihwáke

²⁰ tánon ne ienhát꞉kaʼwe enhkenikwekonhátie nonátsia aorihwáke né ientsienhará꞉kwahke. Thóh kíʼ ní꞉ioht ne ratsihénstatsi tsi enhaterihwathéntiaʼthe ne orihwakahionhnéha tionhtonhnakanonhniathákwah, tánon kwáh kíʼ entsiʼsatkweniensthónhake.

²¹ Tó꞉ka teshathonhnaká꞉rias tánon iáh sénha taskarakwéhni, ónenk tsi enhthetsiaténhaʼwe saiáta ne teiotinakaronhtónʼa rátsinn tsi né enskariákʼthe tsi iensátʼkaʼwe, né꞉ne katokénston athatawítshera rahohénton ne Roiá꞉ner né꞉ne ratsihénstatsi rahorihwáke. Tekakonhtseráke khók othésera enhtéshaʼwe né꞉ne iaʼkeniewátha kénhie teweienhnaʼiéston né꞉ne onátsia aorihwáke tsi ienwatʼkáwenhke tánon satekhatsetíhen ne iakenhiewátha kénhie.

²² Tánon onenhk tsi tek atsitenhseráke khés ne tekenihiáse oríhte enhteshehiaténhawe, nénska né꞉ne karihwáneren aorihwáke tánon nóia né nènhne ne watéskonhte aorihwáke.

²³ Ne shatekonháton niwenhniserakéhaton ne tsi tsishatonhnakanonhníhon ónenk tsi entetshawíthaʼse ne ratsihénstatsi ne tsi iehonthawehiathákwa natohsehrákon.

²⁴ Ne ratsihénstatsi ienhohiaténhaʼwe ne teiotinakaronhtónha owíra tánon ne iakeniewátha kénhie né꞉ne katokénston athatawítshera rahohénton ne Roiá꞉ner né꞉ne ratsihénsthatsi rahorihwáke.

²⁵ Ónenk tsi enhanonhwariákon ne teiotinakaronhtónha owíra tánon ostónha ienháhaʼwe nonekwénhsa tánon thóh enhá꞉ro tsi iehothahóntaʼte ne saweienthethákwen nahahontáti, tánon ne rahiakwirowanénhke ne saweienhthethákwen nahashitáti.

²⁶ Ne ratsihénstatsi ostónha ne kénhie sanekwáhti nahatianáti enhá꞉tha

²⁷ tánon ne rasnonhsáke ne saweienthethákwen nahatianáhti tenhastharó꞉kwahthe ostónha né꞉ne tsáta nihiorihwáke rahohénton ne Roiá꞉ner.

²⁸ Ónenk tsi kwáh thóh nónhwe ostónha nenhá꞉ro ne kenhié tsi kíʼ nónhwe nihó꞉ronh nonekwénhsa: né꞉ne tsi ieshathahónthate ne seʼsehweienhtethákwen, ne sewehionhkárahke ne sesehnekwáhti, tánon ne sahiakwirowanénhke ne sesehnekwáhti nashashítati.

²⁹ Né iothaténhron ne kénhie né꞉ne ratshánakon í꞉wa ónenk tsi senonhtsíne enharósheron thóh kíʼ ní꞉ioht tsi enhaterihwaténtiaʼte norihwakáhion ne tionhnonhnakanonhníhtha.

³⁰ Ethòne kíʼ ienhsakótʼkaʼwe snihiatátʼtshons noríhtes

³¹ né꞉ne karihwáneren aorihwáke tánon ne watéskonhtes skátke nonátsias iewatʼkháwen. Thóh kíʼ ní꞉ioht ne ratsihénstatsi tsi enhaterihwaténhtiaʼte ne orihwakáhion tionhtonhnakanonhnitákwah.

³² Né kí꞉ken ne kaianerénhsera tsi nihiákon ne iakótsʼtawis kannratharihnétsheras ók iáh kíʼ thaʼiekarahkwéni tsi nihiorenhnáhon ne iahióntkaʼwe tsi nikarihwanónhtons nahonhsahionhtonhnakanónhni.

Ne Hionhthónhris Kanonskónhsons

³³ Ne Roiá꞉ner tasaká꞉wen ne Mahís tánon ne Aaron

^34-35 ne tehioterihwasonhterónhnions kaianerénhseras tsi nòkwah ne kanonskónhsons né thekanikónhrahre tsi waʼtewaréni ne iohthónhris. (Thóh nék kí꞉ken enhioʼióten né nó꞉nenh nonhkweshón꞉as Nisraerronónhke ienhonthonhontsórenhne ne Canaan, Né꞉ne Roiá꞉ner teshakowíreʼne nahonawenhkhonhweʼke.) Tó꞉ka ónhka tsi nítsion ensehwatʼtsénhri nètho Roiá꞉ner thoteniéton ne iothónris ne sewanonskónhsons, ethòne kíʼ ónenk tsi ratsihenstatsíʼne niénsehwe tánon iaʼtsisehwaró꞉ri nètho aorihwáke.

³⁶ Ne ratsihénstatsi ónenk tsi kwáh enhathénhnaʼne akwékon akahiakénhʼen ne kanónskons nohénton thóh iáre nahatkénsehra ne iothónhris; tó꞉ka iáh akwékon tsi nikáien ne kanónskon tsi enhwatrórike tsi iáh tehiotkwéniens. Ethòne kíʼ ónen kanónskon niénhre.

³⁷ Tánon enhakenhenhiónko ne iothónris. Tó꞉ka thènen tehiotʼthóntonhte tó꞉ka ó꞉ni tehiotenekwénhthaʼronhte iorakwahrónhnions thóh ní꞉ioht tsi wène asonhthákons tehioskahóntie,

³⁸ éren énsrethe tsi kanonshó꞉the tánon enhaʼnienthároʼke né꞉ne tsáta nónhta nikaríhwes.

³⁹ Ne tsathákhaton niwenhniseraʼkéhaton thóh iénsre tánon shé꞉kon enshaʼkenhenhiónko. Tó꞉ka ne iothónris tehioré꞉nion,

⁴⁰ enhathénnahne nètho onénhiake tsi nónhwe nikatsénhron ne iothónris é꞉ren akahawíthonke tánon thóh nónhwe iewátiont tsi nónhwe iehiakotsethákwa nástste nakanáthati ne kanató꞉wanenhke.

⁴¹ Ethòne enhathénnahne ne kanónskon asonhthakésons ahkakéthenhke tánon ne kanawastháronhne thóh iahóntionke tsi nónhwe iehiakotsethákwa náste nakanatháti ne kanatowanénhke.

⁴² Tánon óia thiʼkanenhiathénions ensewátsʼtonhke tahonsahionatʼthákwen tsi nikáiens néhren kahawíton, tánon áse enskanawastháronhke nasonhthákes.

⁴³ Tó꞉ka shé꞉kon entionhthonrístaʼne ne kanónskon né nó꞉nen nonenhiasónhas é꞉ren kahawítons tánon ne tsi kanónhshoʼte kaʼkétens tánon skaʼnawastsʼtháron,

⁴⁴ ne ratsihénstatsi thóh iénsre tánon enhakenhenhiónko. Tó꞉ka tehioré꞉nion, ne tsi kanónhshoʼte iáh kíʼ tehiotkwéniens.

⁴⁵ Ónenk kíʼ tsi enkanonhsaríhshionhke, tánon nonenhiasónhas, noskwenkareʼshónhas, tánon akwékon ne kanawastsʼtháronhne ónenk tsi ienkáhaʼke ástste nakanatháti ne kanatowanénhke tsi nónhwe iehiakotsethákwa.

⁴⁶ Nónhka iahionhtháwehiaʼte tsi nikaríhwes kanientʼtháron kwáh kíʼ tehiakohiathationháke tsi nióre ienhiókaraʼwe.

⁴⁷ Nónhka ahionhtiatiónhniʼte tó꞉ka ó꞉ni tahionskáhon ne thóh kanónskon ónenk tsi entienó꞉hare nakotserónhnias.

⁴⁸ Tó꞉ka, nónen ne ratsihénstatsi théntre nahonhsahakenhénhion, ne iothónhris iáh tetsiothotháshion nónen áse skanawastsʼtháron, enharihówanaʼte ne kanónhshoʼte kwáh kíʼ tsotkwéniens, tsioríhwa ne iothónris tsi kwáh kíʼ é꞉ren kahawíthon.

⁴⁹ Tsi ahonsakanonhʼsakwahthákwenhke, tekenihiáse otsiténha iensakohiátenhwe, toʼkàra níkon onenhthakwénhte óienhte, onekwénhtara niwasehrihietó꞉ten, tánon skahóntha ne Hyssop.

⁵⁰ Skahiátha nótsiténha enhanonhwariákon é꞉neken ne otára kátshe né kané꞉kare ne ioné꞉kano ionawerotehónhwe.

⁵¹ Ethóhʼne ténhrakwe ne onenhthakwénhte óienhte, ne hyssop óhonte, nonekwénhtara asehríhie, tánon ne iónhnhe otsiténha tánon thóh ienhrónhnionhwe nonekwenhsáke ne ranonhwariákon otsiténha tánon ne ioné꞉kano. Tánon né tehatstharokwahthánion tsi kanónhshote tsáta nihiorihwáke.

⁵² Thóh kíʼ ní꞉ioht tsi enshanonhshakwahtáko né énsratsʼthe notsiténha ahonekwénhsa, ó꞉ni ne ioné꞉kano, né iónnhe notsiténha, nonenhthakwénhte óienhte, ne hyssop óhonte, tánon ne onekwénhtara asehríhie.

⁵³ Ethóhʼne enshát꞉kawe notsiténha ne iónhnhe né nástste nakanatháti ne kanatowanénhke né kahentháke nónhwe. Thóh kíʼ ní꞉ioht tsi ensshaʼnonhshakwahtáko, tánon kwáh kíʼ entsiotkweniensthónhake.

⁵⁴ Né kí꞉ken ne kaianerénhseras tsi nókwah ne iakotstáwis kannhratharihné꞉tsheras;

^55-56 ionhnonwatʼthénions, iakotkarothakwáhronte, hiothónhnions, tánon tsi nòkwah ne iothónhris natseronhniákwahke ó꞉ni ne kanonskónhsons.

⁵⁷ Kí꞉ken kaianerénhseras né tekaiatorétha nónen ne knahó꞉tenk iáh tehiotkwéniens tánon nó꞉nen iotkwéniens íken.