Leviticus 11 - Ohiatonhseratokénti

Tsi Nikhontiʼhiathótens Nahónton Aiewá꞉raʼke

¹ Ne Roiá꞉ner thaʼshakáwen ne Mahís tánon ne Aaron ne tehioterihwasonhterónhnions kaianerénseras

² né꞉ne onhkweshón꞉as Nisraerʼró꞉nonke akorihwáke. Enwáton naʼisewawá꞉rake ne kwáh tsikʼniaʼtekanaskótens ne ohontsáke nónhwe nikonhnón꞉nhe

³ né꞉ne tehiotiʼtsinarenhthókens tánon ó꞉ni ne konhtiné꞉taks,

^4-6 ók tó꞉sa sewawá꞉rak ne ioniakwá꞉her, tsiʼkenekerehʼetshoʼtáhrho, khés ne tehonhonthaʼnékens. Né kí꞉ken ne ronhwatinaʼtónkwah iáh tehonatʼkwéniens; ratinhetats, ók iáh kíʼ thatehotiʼtsinarenhtó꞉kens.

⁷ Tó꞉sa sewawá꞉rak ne kwéskwes. Né꞉ne ronhwatiʼnahtónkwa iáh tehonatkwéniens; tehotiʼtsinarenhtókens, ók iáh kíʼ tehatinhétats.

⁸ Tó꞉sa ísehwak ne rahotiwárons kí꞉ken katshénens iekaníhare tó꞉sa iasehwaiéna ne rahotiʼierónhtas nónen ronenhéion; iáh tehonatkwéniens.

⁹ Enwáton ne kwák tsík nikentsótens aísewaʼke né tehatiʼwehión꞉tons ó꞉ni rotitstarónhnions,

¹⁰ ók tsi nikáiens nawenkésons nónhwe nikonhnonʼnhénions né iáh thaʼtekonhtiwehiónhtons iáh ó꞉ni tehotitstharónhnions iáh tehiówenk naʼkonhwatiwá꞉rake.

¹¹ Né kí꞉ken nikonhtirhiotótens ne konhwatiʼnatónhkwa iáh tehionatkwéniens. Iáh tehiówenk nahisewaʼwá꞉raʼke iekaníhare tó꞉sa iaʼsewaiéna ne iawenhéion rahotiʼierónhtas.

¹² Iáh tehiówenk nahísewake né thènen nawénhkes nónhwe nikonhnón꞉nhe tánon iáh thaʼtekonhtiwehiónhtons iáh ó꞉ni tehiotitstharón꞉hnions.

^13-19 Iáh tehiówenk naʼietʼtsiwárake ne kén hiotiétons notsitenhokónhas: né꞉ne akweskówa, kwararó꞉ha, akwesʼshokónhas, tsioká꞉wes; skawirowaneʼkówas; tsowatsʼtakàʼwes, kawirakarénies, ohhakwá꞉rons, tsokawekó꞉wah, tsiʼkerawístiks.

²⁰ Kontikwékon ne otsinonwashónhas ne tekonhtiʼnerahontʼtiónhtons iáh tehionatkwéniens,

²¹ nèkʼkhok tsi niká꞉ien ne ionanitionkwaténion.

²² Enwá꞉ton nahí꞉sewaʼke ne tsistará꞉raks, tarák꞉tarak,

²³ Ók konhtikwékon ne kén nikatsinonhwásas ne tekonhtinerahonktiónhtons né konhwatinatónkwah iáh tehionatkwéniens.

^24-28 Tó꞉ka ienshiéna nahotiʼhieronthasónhas ne ionenhéions khontitshénens, kwáh tensahiathationtónʼhake tsi nióre ienhiókaraʼwe: kohntiʼkwékons né꞉ne tekontitsinaʼrenhtóntons, nékʼkhok tó꞉ka kén tehiotiʼtsinarentatʼkháshion tánon konhtiné꞉tats, tánon konhtikwékons ne kaiéri níkons tsi tenonhtitsinarenhthóntons. Tó꞉ka ensehianitionhkwakéthaʼte, ónenk tsi ensehsenó꞉hare ne satierónh꞉niat, ók shé꞉kon kíʼ tenshaʼhiathatiónhake tsi nióre ienhiókaraʼwe.

^29-30 Iothontistaʼrónhnion, otsinó꞉wens, otsinó꞉wen owíras, tánon ne tó꞉tis né kíʼ ne konhwatinatónkwa iáh tehionatʼkwéniens.

³¹ Ónhka kí꞉iok iakonwatiʼiéna tó꞉ka ó꞉ni ne iawehéion rahotiʼierónhtas kwáh kíʼ tehiakohiathationtónhake tsi nióre ienhiókaraʼkwe.

³² Tánon ne iawehéion rahotiʼierónhtas kakʼnónhwe iakaiénthaʼne, kwáh kíʼ tenhiotiónhtaʼne. Thóh kíʼ íkare ne kwáh tsitʼnakaientótens akénhake, oniatharáha, óhna, tó꞉ka ó꞉ni ne hiontsieʼronhniathákwa oniataráha, iáh tewatsʼterístha nahó꞉ten ahionsthákwahke. Ónenk tsi onekanóske ienhiákoʼwe, ók ónenk kíʼ tsi iáh thaʼhonsahiotkweniensthónhake tsi nióre ienhiókaraʼwe.

³³ Tánon tó꞉ka ne rahotiʼierónhta onhtákʼne ienwásenhne né꞉ne ionawasthaʼkarí꞉io nakanatsióten, kwáh kíʼ tsi nahó꞉ten né thóh í꞉wa tsi iáh thaʼhonsahiotkweʼniensthónhake, tánon ónenk tsi tensehnaʼtsárihthe.

³⁴ Tsikʼnakatʼkhóten niaʼiéksehke, onk nétho onékanos tsi thoʼnónhwe iewawéron nónhtak, kwáh kíʼ iáh thahonsahiotkweʼniensthónhake, tánon tsík nahó꞉ten ne ienekirá꞉thas né꞉ne sakanatsótens tsi iáh kíʼ tahonsahiotkweʼniensthónhake.

³⁵ Kwáh tsík nahoténsonhs tsi nónh꞉we noierónhtas ienhkaiénthaʼne tsi iáh kíʼ tahonsahiotkweʼniensthónhake; né ionawasthakaʼrí꞉io hionhtekathákwah karísthatsis tó꞉ka ó꞉ni ne iontenatharonthákwa ónenk tsi tenkaríhthonhke,

³⁶ ók ne ionawerothehónwe tó꞉ka ó꞉ni ne ienekaʼrákwa ienhionhkonhthaʼkwénhake nènhne tsi enhiotkweʼniensthónhake, iawerohátsien né thènen noiásons nahothénsons né iawenhéions rahothiʼhierónhtas iahioienáhon tsi iáh tehiotkwéniens.

³⁷ Tó꞉ka nénska ne rahotiʼierónhta iaká꞉raʼne ne onenhá꞉ke né naʼieiéntʼthoʼte, ne kanénha ienhiokonhthákwenh nenhné꞉e tsi iotkwéniens íken.

³⁸ Ók tó꞉ka ne ká꞉nen awènhke iokèra tánon énska ne rahotiʼierónhta thóh iaʼahóne, ne ká꞉nen iáh kíʼ tetsiotkwéniens.

³⁹ Tó꞉ka kaʼtsinikónhti ne katshénen né hiontewaronhniáthaʼne waʼkénheie, nónhka ienieiéna noierónhtha tehiakohiathationhne tsi nióre ienhiókaraʼwe.

⁴⁰ Tánon tó꞉ka ónhkak tsi nítsion né thènen ahisewaʼwá꞉rake nètho katshénen, ónenk tsi entsisehwanoharénion ne sewatʼtsherónhnias, ók shé꞉kon kíʼ tesewahiathátionhke tsi nióre ienhiókaraʼwe; ónhka tsi nítsion niahisewáhaʼwe ne iawenhéion oierónhtha ónenk tsi entsisewanoharénion ne sewatʼtserónhnias, ók shé꞉kon kíʼ tesewahiathátionhke tsi nióre ienhiókaraʼwe.

⁴¹ Iáh tehiówenk ne thènen ahisewawá꞉rake ne kén nikonhnásas katshénens nonhontsáke tekonhtawénhries,

⁴² Tó꞉ka nakonhteserésehkes, tó꞉ka ó꞉ni ne thaʼkonhtekhahá꞉kwahke tsi kaiéri naʼtekonhtisiʼnónhtes, tó꞉ka ó꞉ni ne wéso thaʼkonhtishiʼnónhthakes.

⁴³ Tó꞉sa teshaʼtatsiathátions né thènen kí꞉ken asehwáraʼke.

⁴⁴ Í꞉i ne Watiá꞉ner ne Saní꞉io, tánon ónenk tsi enshaʼthatiathanónsthaʼte nahisaiathatokentíhake.

⁴⁵ Í꞉i ne Watiá꞉ner ne tetkwahiatinekénʼen ne Egypt né káti nahónton ní꞉i Sewaní꞉io akénhake. Ónenk tsi ensewahiathatokéntike, tsioríhwa tsi Watsiathatokénti íken.

⁴⁶ Né kí꞉ken, káti, ne kaianerénseras íken tsi nòkwah ne katshénens ó꞉ni notsitenhokónhas, ó꞉ni konhtikwékon nawenhkésons nónhwe nikonhnónhnhe, tánon konhtikwékon nonhontsákes tekonhtawénhrie.

⁴⁷ Ónenk tsi enshaʼtenhnikonhráren tsi tensetkháshion tsi naʼtetsiatʼthíhen ne sahoiéren iotkwéniens tánon ne iáh tehiotkwéniens íken, tsi natekonhtʼtíhens ne iewárats tánon ne iáh teiewárats íken.