Lamentations 4 - Ohiatonhseratokénti

Jerusalem Nó꞉nen Shitioʼiaténhen,

¹ Tsi natehiostarátʼthekwe nonkwáhwenk nowistanóron iáh ó꞉nen tatetsiostarát:te; Ne tekaneniaserónnionʼkwe nononsatokentíke kanatakónsons tehiotáron.

² Ne Zion ahonkwetaʼsónhas ne ken nithotihiónsas thóh nikanóronkwe nonkwariwáke tsi ní꞉ioht nowistanóron, Nok kiʼnónwa thóh nhithonwáthite tsi ní꞉ioht ne thikénha onawastakarí꞉ios kátshes.

³ Iekaríhare ne okwáho tenhiakoriwásnieʼse nakoienokónha, Nók kih nakonkwetaʼsónha neh thesʼsóntieres ne skawirowaneʼkówa, iakokenrónni nakoienokónha.

⁴ Ne rothiriótha nathonkariákon tánon tsi rothiniatátʼtens; Ratitsʼsahokónha thoʼnatʼtsárite ne khákwa nók iáh ónka tetʼthonwanáwis.

⁵ Ieʼiohterásthon nonkwesónha tsi nikáien né kwáh khakʼkwiʼióson khók rónnekskwe ó꞉nen kanatakéson ronnihéions. Tsi niháti ne kwáh iotkwénies tsi ronwahnehiáron ó꞉nen thóhʼnon naʼtehonatʼthokwáton tsi non né kwáh tetióʼtsion tsi rathikwísaks.

⁶ Nakonkwetaʼsónha sénha ne ronwathirewáton tsi ní꞉ioht ne Sodom non nihathinákere, neh kéntons kwáh tentsawénstsi ne Rawenni:io tsi tensakotásente.

⁷ Nontionkwéta ne iesennowánen iáh tehiontatʼtet kenton tánon kwáh shékon aóskon naheiathóten tsi ní꞉ioht nó꞉niete, hiakothonnhatakaríte tánon iesáste, ó꞉ni teiakoswátʼte nathakaritétsera.

⁸ Ónen nónwa kanatakónson tehathiʼiatotáron iáh ónka tesonwathiʼientéri rathikonsakésons neh iohontsíston ne kenhéion; Ne rahothihnéʼon, iostatʼtén:en tsi ní꞉ioht nóiente, iotʼthokerí꞉on ne rahotistsiéntakes.

⁹ Tsi niháti ne tsi waterí꞉io non nihonenhéion sénha ne tioʼiánere tsi ní꞉ioht ne tsi nikáien nonakènke ronenhéion, ronónha ne ronathonkariákon tánon kwáh skenénha tsi wahonnihéion, kwáh iáh thènen tehothikhwaiéntakwe nahonathonʼnhéston.

¹⁰ Ne kariwaieshátsera rothiʼienáhon nakonkwetaʼsónha ne takáhawe ne kanikonrakséntsera; Ne ionatanitenrátskons ne kanisténseras watkonthinekóntieʼte tsi ronnónnhes nakothiʼienhokónha kákhwa wakontathonniáten.

¹¹ Ne Roiá꞉ner kwáh thokén:en tsi kasastenserakwékon tahátkaʼwe ne rahonhakwátsera; Wahatsiróten ne Zion nónwe kwáh ohontsiáke wahónni.

¹² Akwáh iáh ónka neh akʼthéson nontathikorhásons ó꞉ni tkanakeraserakérons, tethonethákwen nónka ahsakonénrente nahakwéni iahatáweiate tsi iotenhenrentónʼnions ne Jerusalem.

¹³ Nok thoniʼiawén:en, iehonataweiáthon neh tsi rothiriwáneren nahonkwetaʼsónhas ne iehathiriwákens tánon nahotsihénstatsis rothinhíkon Neh tsi ronnónha rothirihónni iakawenhéion nónkwe ne iathénen tehothinhíkons.

¹⁴ Nohénthon iehonʼnéthons nahonkwetaʼsónhas éhtho ní꞉ioht tsi ronʼnehnónties ne kanatakónsons tsi sí꞉ken ní꞉ioht ne tahathironwékon, thóh nióre tsi rothinekwesarónnion iáh ónka tewátons ne iahonwathiʼiéna.

¹⁵ “Satèko!” wahtsakohénrete nonkwesónha. “Thesahiatátion! Tóhsa hiatatiéna!” Tsík nonwéson tkanakeraserakéron niahón:ne nók iáh ónka tatethonwanaróton.

¹⁶ Ne Roiá꞉ner kwáh iáh ó꞉nen thènen tesesakotsterístaʼkwe; kwáh rahónha wahtesakoréniaʼte. Kwáh iáh ohthènen tesesakokweniénston nonkwatsihénstatsis tánon neh ionkhihéntense.

¹⁷ Ne kaienawashétsera iáh nonwénton tèhio, wahakhihiathisháke tsi nióre ne iáh tsietionkwakwénion. Kwáh tió꞉konte tsi hiakhirárekwe ne thóhnon nahotahonénon tsi nónwe tkanakeraserá꞉ien né kwáh iáh thènen tehotí꞉ien nahontahatíʼieste.

¹⁸ Ne hionkhíswens hionkhinikonrahrakwe; akwékon iáh tesewáthonskwe ne kanatakesons niahiakwe. Nonkwennísera iohteweiennentáʼon; ne tsi ónhwe ne tsi iehiótokʼte.

¹⁹ Sénha ne rathiʼiatastóre tsi ní꞉ioht ne áhkweks neh thènen ahkaskóhko ne tsitiotsikeráre non nahontáwe, wahonkhiseréson. Wahonkhihiatóraʼte ne tsi ionnontarónnion; kwáh wahonkhinenrénten ne kahentakeʼkówa.

²⁰ Wahtsionkhíkwen tsi nihiakwastasónha tsi iatiónnhe, neh:ne Ronnontiʼio ne Roiá꞉ner rohrákwen, Tsi nikáien sakwaniahésenʼne nahontasónkwaʼne ne kwáh tsík ónka akénhake nahionkinenrénten.

²¹ Sewahiéson, tiónkwe ne Edom ó꞉ni Uz; sewahtsennonníhat tsi nikaríwes sewakwénion. Sewaienásere non ní꞉se ne kahkaronniátsera; í꞉se ó꞉ni tensewahiaténthonkwe tsi nisewathéhens tsi sewanotstóskon.

²² Ne Zion tetioriwaserákwen tsi nihioriwáneren; Ne Roiá꞉ner iáh shékon tahonsahsonkwanakerákwaʼte. Nók ne Edom, ne Roiá꞉ner enhiaréwaʼte; enréneste tsi nisaníkon tsi nisatieránion.