Lamentations 3 - Ohiatonhseratokénti

Karonhiakénsera, Nahonsahiontatréwaʼte, Tanon Ne Ahskanéktsera

¹ Í:ih ne wakateriéntare tsi ní꞉ioht nó꞉nen neh Rawenni:io ensakoréwathe.

² Kwáh tokénhen neh tetiokaraskówa non niahatiaténhawe

³ Tánon watananehtárion tsi wahakwáheke iáh kanèka ne kenténron.

⁴ Waʼtawarakwátʼtho tsi kónnhe óni wahtakʼsentiákon.

⁵ Tsi tiontatenonthónkwa iahakenóthon tsi nónwe ne tionikonráksat óni kakenronniakénsera.

⁶ Wahakónnien ne thonónwe nakihteróntake tsi nónwe nikáien ne kenhéion.

⁷ Oronkwása wahátnerekte; kenóthon iáh othénen tewakarahratseráien nahonsakeniakenke.

⁸ Tewatkenrétha nahiontsenawase, nók ne Rawenni:io iáh tehat:thontats nahatahonsatáte;

⁹ Tewatiaténtons tsi í꞉ke; tewakashonthónkwas kwáh tsi nienkatiérate.

¹⁰ Thóh ní꞉ioht tsi rakeráre tsi ní꞉ioht nokwári; tontahakanitiónkwaʼkwe tsi ní꞉ioht ne kénreks.

¹¹ Wahakhatʼthaharákwaʼte, wahatiatharatiónko, tánon tot thonsahakátʼkaʼwe.

¹² Ne wahathatonniáten nahathesennáweiesʼte ne rahoiénkwires akonhà꞉ke.

¹³ Kwáh í꞉ken tsi wahtióserenʼne tsi ní꞉ioht tsi wahtewákʼkwate tsi nahakoʼiahákʼkon ne rahoiénkwires ne tiatáke.

¹⁴ Kwáh kontatsésons tsi ionsterísta nonkwesónha; Í:ih ne ahiéron roʼnhatatonniaténni.

¹⁵ Kanikonrakʼséntsera karoniakénsera khók thakáwi nákehke ó꞉ni nakʼnekíra.

¹⁶ Owentsiáke wahakʼkonsakénrie tánon wahtakenawíriaʼke ne nostenrákes.

¹⁷ Wahkenikonrén:en nahóten nen:ne ne ahthakarithétsera ó꞉ni neh skénnen tánon nahtsennónʼnia.

¹⁸ Iáh teskaríwes nahonsakónnheke; iáh ohthénen tesewakérahre rahonháke ne Roiá꞉ner.

¹⁹ Nen keiáraʼne nakeronhiakénsera, iáh kanèka tesewakenákʼthaien, kwáh ionikonráksat tsi nikanonkwatseráksen.

²⁰ Tiotkonhónwe né kanonthonniónkwas, tánon nakatónnhets tionikonrénhen.

²¹ Tánon kíʼ nakaskanéktsera thetewétha nó꞉nen enskeiára:ne kih ken tioríhwa:

²² Ne Roiá꞉ner tsi iáh tseiotók:te ne rahononronkwátsera óni ne rahotaniténron sékon watátie,

²³ Ehniwáse tsi ní꞉ioht noronkéne, ehnihioriwí꞉io tsi ní꞉ioht tsi tkarakwínekens.

²⁴ Thokʼkhók níkon wátsien ne:ne Roiá꞉ner, ne káti aoríhwa rahonháke non nikeniahésen.

²⁵ Ne Roiá꞉ner kwáh í꞉ken tsi entesakoriwaiéritʼtse tsi nihʼiákon ne ronwaniahésen.

²⁶ Ne káti iohiánere nonkwariwáke nahionkwanikonkátsteke—ne rahónha ahtsitewateráhrate nashonkwaniákente.

²⁷ Tánon ne kíʼ iohiánere nahitewaweientétaʼne nahitewatakásthate nó꞉nen nitionkwahiónha.

²⁸ Nó꞉nen entewaroniáken, kwáh ontionhá꞉a khók akénhake ó꞉ni sakʼthakénhake tsi ahitewatakátsʼtate;

²⁹ Taihtewatʼtshákete tsi ahitewatewénnarakwe, thóh kasenónwa sékon káien naskanéktsera.

³⁰ Iáh wehrohátsien tsi ionkhíwahe ó꞉ni ionkhinikonraksáton, kwáh kíʼ oriwakwékon tsi iahitewaiénna.

³¹ Ne Roiá꞉ner kwáh í꞉ken tsi ronitenrátskon iáh ó꞉ni tió꞉konte tsi ahshonkwakenronníhake.

³² Thokanónwa kanikonrakséntshera enteshóntion, nók kíʼ ne raononronkwáhtshera kwáh nen:ne ioriwí꞉io ó꞉ni kasáste.

³³ Kwáh iáh tehawerientí꞉ios tsi sonkwanikonraksátha ó꞉ni shonkwaronhiakéntha.

³⁴ Ne Roiá꞉ner roteriéntare nó꞉nen nonkwatónnhets tekonwaskwaseronkwáton ne tsi iontatenonthónkwa;

³⁵ Roteriéntare nó꞉nen enhionkiʼiathonníhase ne kaianerénsera tesonkwáwi;

³⁶ Nó꞉nen ne kariwakwarisóntsera kanikonráton ne teiehiatoretákwa, Roteriéntare.

³⁷ Tsi nihononthonniontseróten ne Roiá꞉ner tiotkonʼónwe thóh nienʼiáwen:ne. Kwáh iáh ónkha thaiekwéni neh thènen nahiéʼiere tsít ne Roiá꞉ner éhʼtho nithonikonrhóten.

³⁸ Ahioianeréhake khés nahonhetkéntake thoʼneniáwenʼne tsi nentatháti.

³⁹ Nontiéren neh thènen ahitewariwakátate nó꞉nen hionkhirewáton nonkwariwanerahákʼtsera tsi nikaríwes sékon tiónnhe?

⁴⁰ Áhnion tewakenhénion nonkwaweiénna tánon tetsitewakʼkaraténi Roiá꞉ner nòkwa nietsíʼtewe.

⁴¹ Tewanonthónko nonkwerianésons rahohénton ne Rawenní:io ne karonhiáke ténteron tánon tewaterénnaien,

⁴² “Ionkwariwáneren, ó꞉ni tehionkwarihóron, tánon ní꞉se, O Saiá꞉ner, iáh teseskwanikónrenʼse.

⁴³ “Waskwarontéraʼne tánon waskwário; ne saténrat ne:ne sanakwatserákon non niʼiotaséhton:ne.

⁴⁴ Ne kwáh teiotsikeranónʼiani sóhtsi kátens ne hiataiótkaʼwe non kwaterénnaient.

⁴⁵ Ne wastsiónʼniate ne teióhtions ahontahionkhihiáweron ne tsi ionwentsiáte.

⁴⁶ “Ionkhinikonrakʼshátha ó꞉ni thihionkʼkhiʼiéron neh hionkhíswens.

⁴⁷ Tehionkwatohétston ne kakaronʼniatserákon ó꞉ni ioriwentáhon; kateronʼtserákon non nihiationnhétie ó꞉ni hionkwáterons.

⁴⁸ Neh kharàke thóh ní꞉ioht tsi kontnawíne nokáseri tsi ní꞉ioht nakahionhatátie ne tsi natehonatʼthókwen nakonkwetasónha.

⁴⁹ “Nakʼkáseris tenkontnawénte tsi ní꞉ioht neh kahionhatátie ne iáh tiehiótokʼte.

⁵⁰ Tsi nióre ne Roiá꞉ner Karonhiáke non entatʼkátho tánon ensonkwáken.

⁵¹ Wakeriasanonwáktha nó꞉nen enkhèken tsi nihiothiʼiátawens nehh tsionatʼthonwísen tsi kanatowánens.

⁵² “Éhtho ní꞉ioht tsi hionkateristaientákwen ne iónkswens tsi ní꞉ioht notsiténha ne iáh thènen thehathitsénries nahiónksʼson.

⁵³ Tiekónnhe oshónwakon iahontiathónti tánon onénhia wahathiʼnhothónkwen.

⁵⁴ Nonékanos thontásawen nahonthonkeróhroʼke, tánon né wakanonthónʼnionwe ne kenhéion ó꞉nen áktha íwes.

⁵⁵ “Ne kahnonkwáke nosónwakon, O Saiá꞉ner, hiakonnáthon,

⁵⁶ Tánon neh sakonhianiténten tsi tekasénthos, wesatʼthóntene.

⁵⁷ Wateskeriwaserákwaʼse tánon wasekʼróri ne tóhsa ahketʼtiánihke.

⁵⁸ “Í꞉se saskeʼniákente, Saiá꞉ner, tánon waseniákente tsi kónnhe.

⁵⁹ Tsi tenshatórete taskhéʼnhe, sateriéntare tsi nihionkatʼkontáhon.

⁶⁰ Sateriéntare tsi nióre tsi hiónkswens, neh hiónkswens tánon ó꞉ni tsi natehionkwaskótani.

⁶¹ “Sehiathontéhon tsi nihionkenikonrakʼsáton, O Saiá꞉ner; oriwakwékon sateriéntare tsi naʼtehonskóhthas.

⁶² Kontatiésons Í:i hionkʼtharákwen ó꞉ni tsi nihontenikonrónnis.

⁶³ Tsi nen thothíren:ne tsi nienshoʼnákaraʼwe tsi thiʼhiontiéron.

⁶⁴ “Sherèwat tsi nihothiʼhiéren, O Saiá꞉ner;

⁶⁵ Seréwat tánon kwáh tesheianikonriákten

⁶⁶ Sehiatórat tánon kwáh shehiáthont neh tsi ionwentsiáte!”