Judges 7 - Ohiatonhseratokénti

Né Gideon Waʼshakosénhni Ne Midiaterró꞉nons

¹ Énska wenhniseráthekwe ne Gideon tánon ratikwékon ne rahonkwetaʼshón꞉ʼas oronhkétsʼtsi wahontkétsko tánon thóh iahonthatosehró꞉ten ákta ne Harod Tsonáwerohte. Ne Midiarró꞉nons othoréke nòkwah nahonráhkwahkon ne Moreh Tsononhtáhere thonathatosehróthe.

² Ne Roiá꞉ner wahawénhase ne Gideon, “Ne tsi níkon sonhkwátaien shó꞉tsi ronatsokowánenh nakerihwáke nahontatʼkhéhion natesenhniénhtshera nahonwatisénhni ne Midiarró꞉nons. Nonhtiérenk né enhonnonhthónhnionwe roʼnonhatsíwa wahontkwéni, tánon iáh othènen tahontiatáhesthe.

³ Sehrihowanáthen nonhkweshón꞉ʼa, ‘Ónhka ne iakoterónhni tsonhténhtiʼkiʼ, ók ní꞉i kénʼen tsi ionónhte ne Gilead entewenhterónhtake.’” Káti tewásenh-tékeni tehonhnienwahetserásenh niháti sahonthénhti, ók oiéri tewenhniawehetsherásen niháti iatonathátere.

⁴ Ethòne ne Roiá꞉ner wahawénhase ne Gideon, “Shé꞉kon sóhtsi wéso shonkwétaien. Atsatákʼta niasehiaténhaf, tánon thóh nónhwe Í꞉i tenhkonhnenrahkháshiaʼse. Tó꞉ka enkonhró꞉ri né rónhkwe nahí꞉sehne, enhsehnéki. Ók tó꞉ka ne rónhkwe enhiró꞉ri ne tó꞉sa ahí꞉sehne iáh kíʼ tahí꞉sehne.”

⁵ Ne Gideon iashakohiaténhawe ne ronhnónhkwe natsatákʼta, tánon ne Roiá꞉ner wahoró꞉ri, “Theshekháshion tsi nikáien nenhatinekotsíreke ne ronhná꞉sake énhonsthe tsi ní꞉ioht né é꞉rhar, né tsi niháti ne thenhonthentʼtsóten nahatinekíra.”

⁶ Né꞉ne áhsen tewenhniáwe niháti ne wahatinekhótsete ne ronhtsaná꞉ke wáhonste tánon wahatinekhotsíreke; ók ratikwékon ne ronátsakes wathonthentʼtsóten tsi wahatinekíra.

⁷ Ne Roiá꞉ner wahawénhase ne Gideon, “Kwáh enskonhniákente tánon entʼkónhion natesenhniétsera nashensénhni ne Midianró꞉nons né꞉ne áhsenh tewenhniáwe niháti ne wahatinekhotsíreke. Ók ratikwékon sheróri ne ronátsakes sonhténhti.”

⁸ Káti ne Gideon ratikwékon shasakotékwahthe Israerʼró꞉nons nahonsahonthénhti, ne khók ne ásenh tewenhniáwe niháti, wahontiénawasthe tsi nihionsthasónhas ó꞉ni ne iehonrawátstha. Né Midianró꞉nons thóh khók ohnonhthákon nahonrákwahkon thóh nathatosehrótons.

⁹ Né shitsokaráhon ne Roiá꞉ner wahorihónten ne Gideon, “Nahatkétsko tánon ieshakotsatónhti ne tsi thonanáhthaien; Tkonhiáwis natesenhniétshera nasatʼkwéniethe.

¹⁰ Ók kíʼ tó꞉ka sheʼtsánik niasehiatsiatónhti, thóh iahá꞉se tsi thóh nahnáthaien tsateró꞉senh ne sanhátsera Purah.

¹¹ Ensatʼthóntene tsi nahó꞉ten ronhtónhnions, tánon ki ethòne ensanikonhraníra niasehiatsathónhti.” Káti ne Gideon tánon ne rahonhátsera Purah thóh niahá꞉ne ákta ne tsi nónhwe iáh ónhka tehatíteron tsi ronanáhthaien.

¹² Ne Midianró꞉nons, ne Amalekró꞉nons, tánon ne iahonwenhtsiátʼtenhke ratitsiókwahien tsiatehonarénion nahonráhkwahkon tsi ní꞉ioht ne tsistárare iotihonwenhrenháwi, tánon thóh níkon rotinaskwahiéntons ne iotiniakwáhere tsi kíʼ níkonh tekatsinetaró꞉tarons nonesarónhkwas natsatʼthontse.

¹³ Nónen ne Gideon shiahárawe, wahothóntene rónhkwe rorohriáʼnions ne ronaténhro tsi nahotétʼtsen. Rathónhnionskwe, “Onhkatétʼtsen skanathára tehiotikonstónhres thontkarathéniate tsi hionkwahnáthaien tánon atohsehráke watsahónhko. Natósehra wakarieniénhne tánon thóh onhontsáke wakaiénhthane.”

¹⁴ Né ronaténro watharihwasehráko, “Né thíken ne rahonasarekówa Israerʼró꞉nons, Gideon né roʼníha né꞉ne Joash! Iáh nóia thènen tekéntons! Ne Rawenni꞉io tahá꞉wen natesehniétshera nashakosénhni ne Midianró꞉nons tánon tewakwékon nonhkwenhtsókwah só꞉tar!”

¹⁵ Nó꞉nen ne Gideon sahothóntene ne rónhkwe rahotetsénhsera tánon tsi nahó꞉ten kéntons, wathatentʼtsóten tánon wahosenhnaoien ne Roiá꞉ner. Ethòne tsi thóh nathatohserótons nʼIsraerʼró꞉nons nionhsáre tánon wahénron, “Sehwatkétsko! Ne Roiá꞉ner thetsisehwáwis natesenhniétsera naietsisénhni ne Midiarró꞉nons só꞉tar!”

¹⁶ Wateshakokháshion ne áhsenh tewenhniáwe niháti áhsen nikenhtsókwahke wasakotiokónhnien tánon satihiatátʼtsons tasakáwenh ne iehonrawatsthákwah tánon skatʼtshéta ne watheienatekháʼtha thóh í꞉wa.

¹⁷ Washakoróri, “Nó꞉nen iénkewe ne ákta tsi ronatenátaien, takwahtenhnikonhráren, tánon thóh nasehwáier tsi nénhtsere.

¹⁸ Nó꞉nen nakenénrah tánon ní꞉i enhiakwahonráwate, ethòne nonhní꞉se sewahonrawat tesehwakwáhtase ne tsi watenátaien tánon tesehwahénret, ‘Né Roiá꞉ner rahorihwáke tánon ne Gideon!’”

¹⁹ Ne Gideon tánon ne enskatewenhniáwe niháti rahonkwetaʼshón꞉as iahónhnewe ákta tsi ronatenátaien ákta nasónt꞉then, né nónhwak ne ratinikónhrare shaʼteshonanitsokwahténion. Ethòne ónen wahatihonrahwate tánon wathatitsetharihthánion né rathiháwakwe,

²⁰ tánon nóia tehotitsókwahkes thóh nònhne nahatí꞉iere. Rathikwékon rathihawánion né sathinekwáhti nahontsanátis ne wateienatsahátha, ne iehonrawatsʼthákwah shatiweienhthethákwen nènhne nokwáhti rathihawánionhkwe, tánon tehotihenrenhta, “Né nasarekówa ne Roiá꞉ner rahorihwáke tánon ne Gideon!”

²¹ Kwáh tsi niháti thóh nónhwe nathatítane tsi natehiokwahtáse ne tsi ronatenáthaien, tánon ratikwékon ne tehontátʼtsons ratisó꞉tar wahontèko tehotihenré꞉thane

²² Tsi nikaríhwes ne Gideon rahonkwetaʼshón꞉as rotihonrawáton, ne Roiá꞉ner washakahónhnien ne tehontátʼtsons rahotitsiókwah ronónhak khók thonsahontatʼkári rahonasareʼkówa wáhonste. Zarethan nòkwah niahatítatʼke kwáh tsi nióre ne Beth Shittah, ó꞉ni kwáh tsi nióre ne tsi tkanátaien ne Abel Meholah ákta ne Tabbath.

²³ Ethòne ne ronhnónhkwe ne tsi ratitsiókwahien ne Naphtali, Asher, tánon tetsáron ne tsi iokwénhrare ne Manasseh, iahonwatínonhke, tánon ronónha wahonwatísere ne Midiarró꞉nons.

²⁴ Ne Gideon ratirihwakariénies iasakotheniethánion ne tsi ionhniarónhnions kanakeraserakérons ne Ephraim nónhwe nahonhníron, “Tasehwanonhtátsnenk tánon sehwaterí꞉io ne Midianró꞉nons. Sehwaiéna ne Jordan Kaniataratátse tánon ne kahionhatáses tsi nióre ne Bethbarah, né꞉ne tó꞉sa ne Midianró꞉nons tahatihiáiake.” Ne ronhnónhkwe ne Ephraim skát꞉ke tsi iahonwatínonhke, tánon wahatiʼiéna ne Jordan Kaniataratátse ó꞉ni ne tsi kahionhatátse kwáh tsi nióre ne Bethbarah.

²⁵ Wahonwatiʼiéna ne tenihiáse ne Midianró꞉nons ohénton ienethe, né꞉ne Oreb tánon ne Zeeb; wahonwanonhwariákon ne Oreb thóh Oreb Rock nónhwe, tánon ne Zeeb tsi tsienekonhniátha ne onenharatasehontserákeri ne Zeeb nónhwe iahonwanonhwariákon. Iahonthasónhterenh kíʼ tsi wahonwatísehre ne Midianró꞉nons tánon thonthahatíhawe ne rahotinónhtsis ne Oreb tánon ne Zeeb né nahonwanatónhase Gideon, ne rahónha nákonh nòkwah ne Jordan ónenh iéres.