Judges 4 - Ohiatonhseratokénti

Deborah Tánon Barak

¹ Sharénheie ne Ehud, nonhkweshón꞉as Nisraerró꞉nonke shé꞉kon á꞉re sahatirihwánerake tsi nòkwah ne Roiá꞉ner.

² Káti ne Roiá꞉ner wahatʼthóntate ne Jabin asakosénhni, né꞉ne Canaanró꞉non ronhnonhtí꞉io né rotʼkorásthonte ne tsi kanatowánenhne ne Hazor. Ne rahonkwéta ne raʼterihiosehrakweʼní꞉iokwe né꞉ne Sisera ronhwáiastsʼkwe, thóh né nonwe nihanákerekwe ne Harosheth-Né꞉ne-Iáh-Tehatiʼshíʼtaeró꞉nons.

³ Né Jabin tióhton tewenhniáwe nikasehré꞉thakes roserethaiénthakwe otsón꞉kwa né꞉ne karísthatsi kasehrethonhniáton, tánon kwáh íken tsi kaniakatstensehrákon tánon wateshakothonhnakárhiaʼthe tsi washakotkórasthe Israerʼró꞉nons né꞉ne tewáhsen niʼiosehráke nikarihwésonsʼne. Ethòne nonhkweshón꞉as Nisraerró꞉nonke rahonháke ne Roiá꞉ner iathonsénhtho.

⁴ Né Deborah, né꞉ne ró꞉ne ne Lappidoth, rotokenséhakwe, tánon ne ahón꞉ʼa karihwénhthaʼkwe nènhne nakahiató꞉tenhne tsi nòkwah ne Israerʼró꞉nons né shiʼkaháwiskwe.

⁵ Karonthatóken tsi nónhwe niwatsienthá꞉kwahkwe ne ionerátes karonhtó꞉kon né꞉ne tsi naʼtetsátereʼkwe ne Ramah tánon ne Bethel né꞉ne tsi ionhniáhere kanakerasehráien ne Ephraim, tánon nonhkweshón꞉as Nisraerró꞉nonhke thóh iehonhné꞉thakwe né tahiakohiatoréthaʼse.

⁶ Énska wenhniseráteʼkwe iahoterihwaniéhthase ne Barak né roiénha ne Abinoam né꞉ne tsi kanatowánenke ne Kedesh né Naphtali nónhwe nihaná꞉kereʼkwe tánon wahawénhase, “Né Roiá꞉ner, ne Sakoní꞉io Nisraerró꞉nonhke, thiá꞉wi kí꞉ken karihwatátʼtshera: ‘Hiasehiaténhaf oiéri tewenhniawehetserásen niháti ne tsi rathitsiókwahien ne Naphtali tánon ne Zebulun tánon hiasehéntens tsi tsionónhte ne Tabor.

⁷ Kwáh enhthihiaténhawe ne Sisera, né rasenhnowánen ne Jabin rahonkwetaʼshón꞉as ronhterí꞉ios, né nahisewaterí꞉io ákta ne tsi kaniatharatátse ne Kishon. Enthaháwithe ne rahosehresónhas Notsón꞉kwas tánon enteshakohiaténhaʼwe ne rahoshó꞉tar, ók entʼkhónhion naʼtesenhniéntshera natsesénhni.’”

⁸ Ethòne ne Barak watharihwasehráko, “Iénhke tó꞉ka éntehne, ók tó꞉ka iáh tshiáse iáh kíʼ nonhnítiaʼke.”

⁹ Watkarihwasehráko, “Áhki wá꞉hi, énhtene, ók iáh kíʼ thaʼhóthen tahiʼsathaséhthase naʼtesehniétshera, tsioríhwa ne Roiá꞉ner ne Sisera tsi ienhotsakwahríhsi ahonháke ne iónhkwe.” Káti ne Deborah wahiateróhsen ne Barak Kedesh niaháne.

¹⁰ Né Barak iashakónonhke ne tsi ratitsiókwahien ne Zebulun tánon ne Naphtali Kedesh niahónhne, tánon oiéri tewenhniawehetsherásen niháti ronhnónhkwe wahonwásehre. Deborah ó꞉ni wahonteró꞉sen.

¹¹ Tsi nikaríhwes kí꞉ken ne Heber né꞉ne Kenró꞉non nahahiathóten wahathatosehróthen ákta ne Kedesh ne ákta tsi iorónhtoʼte ne karíton né꞉ne Zaanannim nónhwe. Shaʼkotsiathonthakwénhni ne ronátsakes ne Kenró꞉nons, né꞉ne Hobab tsi nithotwatsiríhnon, né꞉ne Mahís ronatióha.

¹² Nó꞉nen ne Sisera saharihwáronhke nètho Barak tsi tsionónhte ne Tabor niehawénon,

¹³ hiasakónonhke ne tióton tewenhniáwe nikasehréthakes né karísthatsis rahosehresónhas notsónkwas tánon ratikwékon ne rahonkwetaʼshón꞉as, tánon Harosheth-Né꞉ne-Iáh-Tehatiʼshíʼtaeró꞉nons nónhwe tahonténhnti tánon Kishon tsi kaniatáratatse niahónhʼne.

¹⁴ Ethòne ne Deborah wahonwénhase ne Barak, “Wáhs! Roiá꞉ner seh iahenthenhséhase! Ónhwa wenhniseráte tá꞉hion naʼtesehniétshera naʼtiesénhni ne Sisera.” Káti ne Barak tahanonhtátsnenhte ne Tabor rónhne ne oiéri tewenhniawehetsherásen niháti rahonkwetaʼsonhas.

¹⁵ Nónen ne Barak hiashakotiatónhnti skát꞉ke ne rahonkwetaʼshón꞉ʼas ronterí꞉ios, ne Roiá꞉ner kwáh í꞉ken tsi watón꞉nhithonhniaten ne Sisera ó꞉ni ne rahonkwetaʼshón꞉as tánon ne rahosehresónhas Otsón꞉kwas. Ne Sisera wahathitáko ne rahosehréthakon notsón꞉kwa tanon kenktsahá꞉tatʼke.

¹⁶ Ne Barak washakósehre kíʼ notsón꞉kwas tánon ne ronhterí꞉ios tsi nióre ne Harosheth-Né꞉ne-Iáh-Tehatiʼshíʼtaeró꞉nons, tánon ratikwékon kíʼ ne Sisera rahonkwetashón꞉as ronterí꞉ios wahonwatinonhwariákon. Iáh ne tsonkwéta tiatesohthaténron.

¹⁷ Ne Sisera tsi wahatèko tsi tsothatosehróthe ne Jael, niahá꞉tatke, né ró꞉ne né꞉ne Heber né Kenró꞉non nahahiathó꞉ken, tsioríhwa ne Ronhnonhtí꞉io Jabin ne Hazor nónhwe tsi skénnonk thiʼkènʼne tsi nòkwah ne Heber rahowátsire.

¹⁸ Ne Jael iakahiá꞉kenhne watʼhiatátʼken ne Sisera tánon wahawénhase, “Tasatáwehiat, sénshie; nakatosehrákon. Tó꞉sa sateronhníhek.” Káti iahatáwehiate, tánon onàken ne tsi ioharénton wahohiathásehte.

¹⁹ Warénhase, “asatʼthóntate asetʼnekánonhte onékanos, wakeniatátʼthens.” Wakanonhtékʼsi ne tsi kanónhthare ne óhna káhiare, wahonekánonhte, tánon ki sahohiathásehte.

²⁰ Ethòne waharóri, “Tsi kanonhkáronhte ne natósehra téstan, tánon tó꞉ka ónhka ahontháien naiesharihwanónhtonhse ónhka kén kénʼen í꞉hiens, tsíron iáh.”

²¹ Ne Sisera tsi nióre tsi tehowisenhéhionhkwe tiehotaskówa. Ethòne ne Jael hiaʼhatewá꞉kwe ienekonhrékstha tánon ne ató꞉sehra ahó꞉waste, kwáh skenénha ákta niahá꞉he tsi rahiatsónhni, tánon wahononhwarhiákon tsi wathonhnonhtsistó꞉hetste nó꞉waste ne ranonhtsistátʼtha tánon ohontsáke iakanióthane.

²² Nó꞉nen ne Barak shá꞉rawe tsi rohiatishakonhátie ne Sisera, Ne Jael iakahiákenʼne ne tahiatátken tánon wahawénhase, “Kénhʼen nonhtáseh! Enhkonhnatónhase ne rónhkwe shatísats.” Sók kíʼ skát꞉ke tsi hionshahiatháwehiaʼte, tánon thóh ohontsáke rahiatsónhni ne Sisera, rawenhehionkówa, tánon ne atóhsehra watenetsothákwah tehononhtsistohéston.

²³ Né wenhniseráthekwe ne Rawenni꞉io sonhthashakáwen nʼIsraerʼró꞉nons natesenhniétshera tsi nòkwah ne Jabin, né꞉ne Canaanró꞉non ronhnonhtí꞉io.

²⁴ Kwáh íken tsi wahonwanethénhtatʼthe tsi nióre iahonhwasénhni.