Judges 3 - Ohiatonhseratokénti

Nonhkweshón꞉as Thóh Ratíteron Tsi Ionhontsáien

¹ Káti ethòne, ne Roiá꞉ner ótsiakes thóh tsi ionhontsáien washakóteron nahonwanátʼkenhse nʼIsraerʼró꞉nons ónhka ne iáh tehonateriʼioseronhnónhne ne Canaan nónhwe.

² Nék kíʼ aoríhwa thóh nahá꞉iere né nashakorihónhnien ne niaʼteiewatsirákes ne Israerró꞉nonhke tsi nòkwah nateriʼiosʼseráke, sénha tsi niháti ne iáh arèko nonhweton tehonateriʼiosehronhnónhne.

³ Tsi niká꞉ien ne iatehonathaténhrons ne tsi ionhwenhtsáien né꞉ne wísk nihotinátakes ne Philistiaró꞉nons, ratikwékon ne Canaanró꞉nons, ne Sidonró꞉nons, tánon ne Hivró꞉nons né꞉ne tsi iononhténions ne Lebanon nónhwe nihatinákeres thóh tsotásaʼwe ne tsi ionónhte ne Baal Hermon tsi nióre ne Hamath Pass.

⁴ Kí꞉ken onhkweshónas ne nahonwanátʼkense nʼIsraerʼró꞉nons, nahatirihwát꞉tseri tó꞉ka kén khés ne iáh ne Israerʼró꞉nons ahontewénhnarakwe ne rahorihwatátʼtsheras nètho Roiá꞉ner teshakówi ne sakotisotʼthonkonhkénʼen rahonháke ne Mahís.

⁵ Tánon kíʼ nonhkweshón꞉as Nisraerró꞉nonke thóh wahontenáthaien tsi ratinákere ne Canaanró꞉nons, ne Hitró꞉nons, ne Amorʼró꞉nons, ne Perizró꞉nons, ne Hivró꞉nons, tánon ne Jebusró꞉nons.

⁶ Wathonthateniátʼthenháton ne ronónha tánon wakonwatisénhnaien ne rahotiniiohokónhas.

Othniel

⁷ Nonhkweshón꞉as Nisraerró꞉nonhke wahonwahiathanikónhren ne Roiá꞉ner Rahotiní꞉io; wahatirihwánerake tsi nòkwah ne rahónha tánon wakonhwatisénhnaien nahohiatonhnisónhas ne Baal ó꞉ni ne Asherah.

⁸ Káti ne Roiá꞉ner kwáh í꞉ken tsi wahanákwahse Nisraerró꞉nonke tánon wahoríhon ne Ronhnonhtí꞉io ne Cushan Rishathaim ne Mesopotamia nasakosénhni. Rahónʼha washakonaskónhni né꞉ne shatékon nihioseráke nikaríhwes.

⁹ Ethòne ónen nʼIsraerʼró꞉nons iathonsénhto rahonháke ne Roiá꞉ner, tánon ónhkak tahoténiethe nahonshasakohiathotharísi. Né kí꞉ken ne Othniel, né roʼníha né꞉ne Caleb kén nieráha roʼkénha Kenaz.

¹⁰ Ne Rahonikónhra ne Roiá꞉ner wahohiatórenhne, tánon rahónha ne Israerró꞉nonhke washakonhéntenhse. Ne Othniel wahaterihioserakétsko, tánon ne Roiá꞉ner taháwenh naʼteshenniétshera nahosénhni ne Ronhnonhtí꞉io ne Mesopotamia.

¹¹ Skénnenk thikènhne ne tsi wathonhontsáien né꞉ne kaiéri niwáh꞉senh nihiosehráke nikarihwésonhne, tánon ethòne ne Othniel warénheie.

Ehud

¹² Nonhkweshón꞉as Nisraerró꞉nonke shé꞉kon á꞉re sahatirihwánerake. Né kíʼ wakarihónhni ne Roiá꞉ner wahahón꞉nien ne Ronhnonhtí꞉io Eglon ne Moab nónhwe né sénha ahashástsʼtenhne tsi ní꞉ioht ne Israel.

¹³ Ne Eglon ne washakotsiátarase ne Ammonró꞉nons tánon ne Amalekró꞉nons; wakonhwasénhni ne Israel tánon wahontsénawasʼthe ne Jericho, né꞉ne tsi kanatowanénhke ne ioneratésons karonhtó꞉tons.

¹⁴ Ne Israerʼró꞉nons Eglon wahonwahiótenhse né꞉ne shaʼtékon iawénhre nihiosehráke nikaríhwes.

¹⁵ Ethòne ónenh nʼIsraerʼró꞉nons hiathonsénhto rahonháke ne Roiá꞉ner, tánon ónhkak tahonténiethe nasakohiathotaríhsi. Né꞉ne kén í꞉ken ne Ehud, né꞉ne sanekwáhti rátstha nenhahiáton, né roʼníha né꞉ne Gera, né꞉ne tsi ratitsiókwahien ne Benjamin nónhwe nihahiátare. Nonhkweshón꞉as Nisraerró꞉nonhke Ehud iahonwaténieʼthe ne tsi ténhteron ne Ronhnonhtí꞉io Eglon ne Moab nónhwe skátke nathatawítshera nahonthaháwen.

¹⁶ Ne Ehud wahathatasharónhnien ne tetsarónhkwen nokwáhti tsi iohiothí꞉ie né꞉ne káknonh ne sewashí꞉ta tsatesewasénhnon niwasáres. Rahiatákʼtha wahathasharanihiónhten nàkon ne rahotserónhnia wahá꞉shete.

¹⁷ Ethòne ónen iahahá꞉sehron nathatawítseras nahontaháwen ne Eglon, né nènhne ne kwáh íken tsi rorésenhne.

¹⁸ Nó꞉nen ne Ehud tahá꞉wen nathatawítsheras, wahoró꞉ri ne rónhkwe tsi nikáien ne tahahá꞉sehron nahonsahaténhti.

¹⁹ Ók ne Ehud shiaʼháraʼwe ne tsi tkahiathonhnisehrótons nonénhia ákta ne Gilgal, sahá꞉khete tsi thénteron ne Eglon nionshá꞉re, tánon wahénron, “Sanontí꞉io, Kerihwenháwi ne sarihwáke.” Káti ne ronnonhtí꞉io washakoróri ne rahonhatsheraókons, “onhkenonhwáhak khók enkénhake!” Kíʼ rathikwékon iahatihiákenʼne.

²⁰ Ethòne, ne rononhtí꞉io thóh renhterónhthakwe ne tsi ratsathanosthákwah ionáktaien ne karonhkwenàke, ne Ehud ákta niaháre tánon wahé꞉ron, “Kerihwenháwi ne sarihwáke Rawenní꞉ioke nonhtáwe.” Ne ronnonhtí꞉io waʼthátaʼne.

²¹ Né꞉ne sanekwáhti nahanentʼtsáti ne Ehud wahró꞉tsi nashareʼkówa ne saweienthethákwen nokwáhti tánon wathonekwenhtáwehesthe ne ronnonhtí꞉io.

²² Kwáh tsi niwashá꞉res tsi watohiatháwehesthe, tsewakwékon ne hióshionte, tánon tsi róresen né wakaró꞉rokste. Ne Ehud iáh teshosaróhtson ne ronnontí꞉io ranekwenhtáke, tánon rashón꞉ne tsosarakétoʼthe, tsi natehasinátere.

²³ Ethòne ne Ehud hionsahahiákenʼne, thontahanó꞉ton, wahaientʼtharó꞉ke,

²⁴ tánon sahaténhti. Né rathinhátshera thonthahónʼne tánon wahontkátho tsi kaienkʼthá꞉ron, ók nék kíʼ né wahónhnere ne ronnonhtí꞉io kanónskon kíʼ thénhteron, koʼráhne thénteron.

²⁵ Thot kit nikaríhwes wahonteráhrate tsi nióre wahónhnere tehiotonhontsóhon, ók tsi shé꞉kon iáh thaʼthethononhthónkwen, kanonthónkwah iahatiko tánon wahathiʼienktharáko. Tánon thóh rénhteron ne ronhwakowánen, oskwenhkaráke rahiatsónhni rawenhéion.

²⁶ Ne Ehud sahathèko tsi nikaríhwes ronathenhniskwáhtonʼne. Hionhsahatóhetsthe ne tsitkahiatonhnisehró꞉tons noiénhia tánon Seirah nónhwe iahathekwáhsen.

²⁷ Nónen thóh nónhwe iahá꞉raʼwe ne tsi tsionhniarónhnions kanakerasehráien ne Ephraim, wahahonráwate hiasakonónhkʼkon nonhkweshón꞉as Nisraerró꞉nonke nahonteriʼiósehra; ethòne shasakohéntenhse sahonhnontátsnenhte.

²⁸ Washakoró꞉ri, “Thaʼkwáhser! Ne Roiá꞉ner thetsisewá꞉wi natesenhniétshera naietʼtsisénhni ne tesewatátʼtsons, né Moabró꞉nons.” Káti wahonwásehre ne Ehud tánon wahatí꞉iene ne tsi iokwénhrare tsi nónhwe ne Moabró꞉nons natenhatihiáiake ne Jordan; iáh ónhka nakóren teshakotirihwáhwi ne taiehiáiake.

²⁹ Né wenhnisehráthekwe kákʼnon ne oiéri tewenhniawehetsherásen niháti washakonawénhkto né kwáh thonʼnonhkweʼtí꞉iosʼkwe ne ronhtirí꞉iosʼkwe ne Moabró꞉nons ahonkwetaʼsónhas; kwáh iahónka tetsotiniakénʼen.

³⁰ Né wenhnisehráthekwe nʼIsraerʼró꞉nons wasakotisénhni ne Moabró꞉nons, tánon kwáh skénnenk tikènʼne ne tsi ionhwenhtsáien né꞉ne shaʼtékon nihiosehráke nikarihwésonhne.

Shamgar

³¹ Nó꞉ia ohénton iathonsahá꞉thaʼne né꞉ne Shamgar ronhwáiasts né roʼníha né꞉ne Anath. Rahónʼa ó꞉ni shaʼniakénton ne Israel, etʼnihoiéren iá꞉iak tewenhniáwe niháti washaʼkononhwariákon ne Philistiaró꞉nons né rósthon ne tehiotinákares konwanathorethákwah.