Judges 2 - Ohiatonhseratokénti

Ne Rahoronhiakerónon Ne Roiá꞉ner Bochim Niaháre

¹ Ne rahoronhiakerónon ne Roiá꞉ner Gilgal nónhwe tahaténhti tánon Bochim niaháre tánon washakawénhase Israerʼró꞉nons, “Thohʼthakwahiatínekenhwe ne Egypt tánon thohʼnónhwe takwahiaténhawe ne tsi ionhontsáien ne kheʼhiarahratsʼténhni ne ietsisotʼthonkonhkénʼen. Wakíron, ‘Iáh nonhwénhton thaʼtátiake nakaterihwasehronhniátshera tsi nòkwah ní꞉se.

² Kwáh tó꞉sa thènen sewatsianerenhserónhni kí꞉ken ronhnónhkwe né kénʼen ionhontsáien ratinákere. Ónenk tsi entsisewarísi ne rahonáwenk ietsienharákwahs.’ Ók iáh kíʼ éhtho tesewaiéren tsi nikwahró꞉ri. Khék ó꞉ia nesewáiere!

³ Ók ónenk enkwahró꞉ri tsi iáh thaʼhonshakhehiatínekenhwe kíʼ onhkweshón꞉as tsi nienhénseʼwe. Roʼnónha kíʼ ne tesewatátʼtsons enhkénhake, tánon kwáh né ensewahiató꞉tarehne tsi kíʼ konhwasénhnaiens ne raoʼtiní꞉ios.”

⁴ Nó꞉nen ne raronhiakeró꞉non né kí꞉ken sahénron, ratikwékon nonhkweshón꞉as Nisraerró꞉nonke tahonthásawen wathonhsénhtho,

⁵ tánon kíʼ né ahoríhwa nètho watenáthaien né konwáiats Bochim. Thóh nónhwe nahonwátatʼtse ne karihwihiosehokónhas ne Roiá꞉ner.

Tsi Warénheie Ne Joshua

⁶ Ne Joshua iashakothénieʼte nonhkweshón꞉as Nisraerró꞉nonke nahonthahíta, tánon kíʼ satihiatátʼtsons ne ronhnónhkwe wahatiʼiéna tsi níkon ne ronónha rahonáwenk nonhóntsas.

⁷ Tsi neʼnikaríhwes rónhnhekwe ne Joshua, nonhkweshón꞉as Nisraerró꞉nonke ronhwahiotenhséhaʼkwe ne Roiá꞉ner, tánon kíʼ ó꞉ni nó꞉nen sihawenhéion iahontashón꞉teren kíʼ né nahatí꞉iere tsi kíʼ nióre ne ohénton iehonhnétons ronónnheʼkwe nahontkátho ne iatehatihiátis né iorihowánens ne Roiá꞉ner tsi nishakotiéraʼse ne Israerró꞉nonke.

⁸ Ne Roiá꞉ner rahonhátshera Joshua shaʼrénheie enskatewenhniáwe tánon oiéri satehahoserihiákon né ronikénhen né꞉ne Nun ronhwáiatsʼkwe.

⁹ Rahónha rahontsáke nónhwe nihonwahiatháten né꞉ne Timnath Serah ne tsi iononhtharónhnions kanakeraseráien ne Ephraim né nothoréke nokwáhti ne tsi Ionónhte ne Gaash.

¹⁰ Nó꞉nenh nètho kawatsirathátse shahonhníheie, ó꞉ia kawátsire sahonhnákerate iáh né othènen tehonwaientéri ne Roiá꞉ner ó꞉ni tsi nishakotiéraʼse Israerʼró꞉nons.

Nisraerró꞉nonke Wahóntkaʼwe Tsi Ronhwasénhnaiens Ne Roiá꞉ner

¹¹ Ethòne kíʼ nonhkweshón꞉as Nisraerró꞉nonhke wahatiriwánerake tsi nòkwah ne Roiá꞉ner tánon tahontháshaʼwenh nakonwahiótenhse ne Baals.

¹² Wahóntkaʼwe tsi ronhwasénhnaiens ne Roiá꞉ner, né Sakoní꞉io ne sakotisotʼthonkonhkénʼen, né꞉ne Rawenni꞉io né tetheshakohiatinekénʼen ne Egypt, tánon tahontháshawenh thikaniʼioserátes wakonhwatisénhnaien, né꞉ne niiohokónhas kakérons rathihiatakʼthóntie. Wakʼkonwatentʼtsiótase tánon né wahonakónhniathe ne Roiá꞉ner.

¹³ Wahóntkaʼwe tsi ronhwasénhnaiens ne Roiá꞉ner tánon né sakonwahiótenhse ne Baals ó꞉ni ne Astartes.

¹⁴ Tánon káti ne Roiá꞉ner wahotenakwawenhrátʼtie tsi nòkwah ne Israerró꞉nonke tánon washakoríhon ne ratinenhrénhtha niahonwanatiatónhti tánon nahonwatinenskwenháton. Washakoríhon ne tehontátʼtsons ne aktatsesónhas nahonwatiʼshastsʼtenserakénhni, tánon nʼIsraerʼró꞉nons iáh ónenh thahatikwéni ne tahonthahonthátene.

¹⁵ Kwáh tsi niʼiorihwáke nenhonteriʼiósera, ne Roiá꞉ner tsi enshakotʼkhónten, kwáh kíʼ tsi niháwenh tsi thóh nenháiere. Kwáh kíʼ iorihowánenh tsi ní꞉ioht tsi rotironhiáken.

¹⁶ Ethòne ne Roiá꞉ner wasakahonkwéton nʼIsraerʼró꞉nons nahonwathihéntenhse né꞉ne tsi nikáien ne sonhwathihiathanónsthaʼtons tsi nòkwah ne rathinenhrénhtha.

¹⁷ Ók kíʼ nʼIsraerʼró꞉nons kwáh iahothènen karíhwa tehonwenhnónhni ne ronhwathihéntenhse. NʼIsraerʼró꞉nons kwáh iáh tehotirihwató꞉ken tsi nòkwah ne Roiá꞉ner tánon ne wakhonwatisénhnaien ne thikaniʼioserathénions. Né shakotiʼnihokhonkénʼens ronhthewenhnarákwahkwe ne Roiá꞉ner rahorihwatátʼtseras, ók kí꞉ken otsiókwahse wahónt꞉kaʼwe né nahatí꞉iere.

¹⁸ Kát꞉ke ne Roiá꞉ner nashakahonkwéton nʼIsraerʼró꞉nons nahonwatihéntenhse, ne Roiá꞉ner enhosniénon nètho shakohéntenhse tánon enshakonónsthate nonhkweshón꞉as tsi nòkwah ne tehontátʼtsons kwáh kíʼ tsi nikaríhwes enhrónhnheke nètho shakohéntenhse. Né Roiá꞉ner kwáh ensakoténhre tsioríhwa tsi nihononhsèhna ne rahothironhiakensehrákon ó꞉ni tsi nihotiwísens.

¹⁹ Ók nó꞉nen enhrénheie ne sakohéntenhse, nonhkweshón꞉as né enshonterihwathénhtsaʼte norihwakáions tánon sénha wahétken tsi nenhsatiʼieránion tsi ní꞉ioht ne thatiwatsiráthakwe. Né enkonhwatiʼiótenhse ó꞉ni enkonhwatisénhnaien nóia niʼiohokónhas, tánon ronatenonhtsistaniráton iehothikonhthákwen ne rahotirihwahetkenhserákons.

²⁰ Ethòne kíʼ ne Roiá꞉ner enhotenakwahwénhratʼtse tsi nòkwah ne Israerʼró꞉nons tánon enhénron, “Kí꞉ken kawatsírathe tehothiʼiákon naterihwasenhronhniátsera né kherihwatháti ne shakotisotʼthonkonhkénʼen nahatísehre. Né entkarihón꞉ni tsi iáh tehionkewenhnarákwen,

²¹ iáh kíʼ ónenh tahonshakhehiatínekenhwe nonhkweshón꞉as ne shé꞉kon thóh ratinakerénion ne tsi hiohontsáien ne sharénheie ne Joshua.

²² Ronónha enkheniáhese nahatirihwísake tó꞉ka kén kí꞉ken Israerʼró꞉nons enhionhkewénhnarakwe khés ne iáh, tsi né niʼhionkewenhnarákwahkwe ne shakotisotʼthonkonhkénʼen.”

²³ Káti ne Roiá꞉ner wahatʼthónhtate kí꞉ken onhkweshón꞉as ne thóh ahatiterónhthake ne tsi ionhontsáien; iáh tehorihwáwi ne Joshua nashakosénhni, khés ne óksak ashakohiatinekénʼen sarénheie ne Joshua.