Jude 1 - Ohiatonhseratokénti

¹ Jude kih non nitsawénon, Ié꞉sos Kerístos roióhtense, tánon né꞉ne Sák iatatekénʼa— Tsi niʼiá꞉kon ne Rawenni꞉io sakonhaʼon, Rawenni꞉io né Kaʼní꞉sera í꞉ken rahononronhkwatsherá꞉kon non nihonnonnhétie, tánon tsi natesakotiatháton ne Ié꞉sos Kerístos:

² Ne ken ténrat, tánon ne Skén꞉nen, ó꞉ni ne kanoronkwátshera kwáh akananónhake nahisewawénhake.

Rohthitokensetsherátsens

³ Tekanó꞉rons tewatenrosónhas, kwáh iatkatatʼtsáhate tsi iakwahiátonse ne ahoriwà꞉ke ne kahiatakenátsera tsi satehionkwáwenk, ne sakatʼthoke tsi teiothonʼontió꞉on ó꞉nenk iakwahiátonse nakwanikonraní꞉rate iasewathasónteren tsi nih tisewethákwen kwáh tió꞉konte ne kénhak ne tsi nitesakó꞉wi ne Rawenni꞉io rahonkweʼtasónha.

⁴ Otsià꞉ke nonkweshónha ne iáh tehotiniioserá꞉ien tok thón tahón꞉ne nonkwanenrákon, tsi nihá꞉ti ne ronhnowénhtha nateriwanothátsera tsi nokwáh ne Rawenni꞉io rahoténrat ehnaʼontawe nahonthatiathotároh tsi nihathiweienʼnáksens, tánon ronwakenrón꞉ni ne Ié꞉sos Kerístos, kwáh raónha khók nónkwawenk Rahiatakweniio ó꞉ni Sonkwaiá꞉nere. Wahón꞉nise tsináhe tiotʼró꞉ri nohiathonseratokénti tsi nihothiienà꞉on ne karewathátsera.

⁵ Iawerohátien tsi akwé꞉kon saterièntare kí꞉ken, tewakathonwentióni naʼonsakoniehiarákwen tsi ní꞉ioht ne Roiá꞉ner ónen énskat iehioterátston sesakoniakénton ne Israerʼró꞉nons tsi nokwáh ne Egypt, nok sonteweiennéntane wasakowentho tsi nihá꞉ti ne iáh tethonethákwen.

⁶ Saietʼtsiiehiárah thiratironhiakeró꞉nons tsi niháti ne iáh thónon tehonataténron nahonátsthon ne rahothishasʼténshera tsi natehiothonwentioʼon꞉ne, nok kek wahontewénthete tsi non nihatiteróntakwe: tsi nénwe oronkwása rathinerénkston tsi nónwe ne kwáh tetiokaraskó꞉wa nonʼontiokon, tsi nónwe ne Rawenni꞉io iesakotʼkáwen ne thóh nónwe entewenniserateke nónen enʼonwathirewate.

⁷ Seweiáre wáhi ne Sodom tanon ne Gomorrah, tanon náktha kanataienthonkwe, ne rahononkwetasónhas thóh nahathiweienʼnhoten꞉ne tsi niʼioht thí꞉ken ratironhiakerónons ó꞉ni tsiktiahatiʼieránion tsi nokwáh ne kentéhsera ó꞉ni naskanéktsheras; ne wahatiʼiéna ne karewathátshera ne iotekaʼonwe ne kí꞉ken ne kwáh onkweʼtakwé꞉kon tsi iakonronkaténnis.

⁸ Ne nónhne ne kwáh eʼtho ní꞉ioht, ki nónkwe rontehnikonrónnis ne ronnónhak khók rontathonniénnis nahatiriwanérake ne rathiʼiatakesons; Rohnataróntion tsi nokwáh ne Rawenni꞉io raoianerénsera oni sakotinikonratsátha ne rotiʼiatanerákwas ne Karonhiáke.

⁹ Iáh sékon ne raronhiakerononkówa Wiseh ehteohiéren. Tsi natʼnihriwakéna ne ranesonrónon, ónka enhiontienawáste ne Mahís rahoierónta, Ne Wiseh iáh tehawéron nahonikonrat꞉sate nʼótkon ne nahotewennatʼtsaniten, nok “wahoró꞉ri Roiá꞉ner enhiarewáte!”

¹⁰ Nok ki nonkwesónha ienieʼtsiiatiathónti naietʼtsinikonratsáte tsi nahó꞉ten ne iáh tehotinikonraiénthas; tánon tsi nahoʼténsons ne ronaterièn꞉tare nakénhake, tsi ní꞉ioht ne konthírios, kwáh né rothirió꞉tha.

¹¹ Tsi natehonaterientawenréhʼon! Ne wahathisere tsi nihoiéren ne Cain. Owísta wakarihón꞉ni tsi thóh nokwáh niahonʼne tsi natehoterientawenrhéon ne Balaam. Wathatirihoróke tsi ní꞉ioht tsi tehorihóron ne Korah, tánon tsi nioiatawénhen wahonwanáthonte.

¹² Tsi kwáh iáh othé꞉nen tehontéhens tsi rothinikhirenháties kwáh thóh nihatiʼiathóten tsi ní꞉ioht ne kwáh tehiótion aʼiorakwarake tsi skat꞉ne sewatetkwáhere. Kwáh ronnónhak khók rontatéiare. Thóh nihatihiatóten tsi ní꞉ioht ne hiotʼtsatáre tsi iahóte iakáhawe, nok iáh othé꞉nen tekakennoréstha. Thóh nihatihiatóten tsi ní꞉ioht ne iáh othé꞉nen tewahianihiontʼtha ne kehrite, ó꞉ni ne kaneʼnahke꞉ne, né kehrite ne iohtenaharóhtion tá꞉non kwáh iehiokontákwen iawenhéion.

¹³ Né teshontiéren tsi ní꞉ioht ne ionontakwarontáties ne kaniatarakekówa, ne thitʼkahé꞉re natehén꞉sera tsi nihathiweiennótens thóh ní꞉ioht tsi iokethótha tsi ní꞉ioht nhoʼwahsʼtha. Thóh nihatiiatoten tsi ní꞉ioht ne otsísto thiioháwis, tsi nisakonatʼtaráh꞉kwenni ne Rawenni꞉io tsi non né kwáh tehtiokaraskówa.

¹⁴ Raónha ne Enoch, ne tsatákhaton nierate tsi nitotʼwahtsirínon ne Á꞉ton, raʼonha ki iehoriwáken tsi nenhothiʼiatawe: “Ne Roiá꞉ner entesakoʼiaténhawe ne kwáh thó꞉ka niwenʼniawehetsheráhsen ne ronatiokowánen rahoronhiakerónons

¹⁵ nakwé꞉kon tasakotiʼiatorete, rathikwé꞉kon enhonwathirewáte ne tsi iáh Rawenni꞉io tehohioténseras tehothihioténhen tánon akwékon ne kawennatʼsens ne rothirihwanéren ahonwènni!”

¹⁶ Ki nonkwesónhas tió꞉konte rothiriwakaténhen ó꞉ni akorénson tesakotiráwi né rathísere ne kariwáksen tsi nihonskáneks; tehonathaterensáron ó꞉ni sakotinikonrotákwas nakorénsons né꞉ne rononhak khók ahontahonnónthon.

Iontatharonkaténnis ó꞉ni Iontaterihonniénnis

¹⁷ Nok seweiárak, tehwatenrosónhas, tsi nahó꞉ten ietʼtsiró꞉ri né tiotohéston ne ratikwékonne ne Sonkwaiáner Ié꞉sos Kerístos.

¹⁸ Wahetsiróri, “nó꞉nen enʼwahwe noʼnáken tewenniseráh꞉te, enhontotashon nónkwe ne taietʼtsiʼieron, ne nónkwe ne rathísere tsi nihonskáneks nok iáh tehonwaiathi꞉saks ne Rawenni꞉io.”

¹⁹ Kí꞉ken ronnónkwe ne rathísahas ne tahathinenratʼkhason, ne tsakoniarotároh tsi nihiorennáhon ne rahonaskanéktseras, iáh tehatikwé꞉kon ne Rawenni꞉io.

²⁰ Nok ní꞉se, tewatenrosónhas, iasewatasónteren naihsewateiaronháse ne iotokénti tewetákwen. Thónon nasewaterennaiéntak ne rahoshaststensherákon ne Ronikonrí꞉ioston,

²¹ tánon thónon nasewataténronk rahononronkwatsherákon ne Rawenni꞉io, tsi entsisewaterárate ne Sonkwaiáner Ié꞉sos Kerístos ne rahotenrahtserákon nahontáhion ne ionnheónwe atónnhets.

²² Ietʼtsítenr tsi niháti ne tetʼthotinikonrake;

²³ saietʼtsiniákenk nakorénsons tsi entsiehʼtsihiathótion notsirókon; tánon nakorénsons ietʼtsítenr nónhne tsi natehonanithonnién꞉ni tsi nihothì꞉terons, nok sewáson ne rahonatʼtserónniat, tsi ne tehiotiónston ne rahotiriwanerahatʼtsera ne tsi nihthonskanékskwe.

Naterénnaient Ne Tahiontenonweráton

²⁴ Tsi nikáien ne rokwénion nahiaʼiatanónstate tánon iáh othé꞉nen tahianihtséron tánon rahohénton ensathonnárake ne rahoiatanerahkwatsherákon—

²⁵ kwáh saiátak khók ne Rawenni꞉io rahonha ne Sonkwaiatákwas, tsi non nitawénon ne Ié꞉sos Kerístos, Sonkwaiánere, ne kaiataterí꞉tsera, ronnontí꞉io, kaʼshatsténsera, tánon rakórah, tsi nitiothohestánion, tánon nónwa, tanon tsi nienhénwe ó꞉ni tsi nén꞉we! É꞉tho naiá꞉wenhne.