Joshua 9 - Ohiatonhseratokénti

Nonhkweshón꞉s Ne Gibeon Nón꞉we Wahontsanerenhserón꞉ni Nateriwaʼseronhniá꞉tsera Ne Skén꞉non í꞉ken Skátke Ne Joshua Ne Israerʼró꞉nonke Nón꞉we

¹ Ratikwé꞉kon ne ronhtinonhtí꞉ios ne tsi iaʼtewatsénthos nokwáti ronathohetsthákwen ne Jordan wahatiriwà꞉ronhke tsi ní꞉ioht nonkweshón꞉as ne Israerʼró꞉nonke shakotisénhnion ne tehontaʼtsons. Ne ronhtinonhtí꞉ios ne tsi ionontahrón꞉nions ó꞉ni nononhtaʼthónties ne satekanakeraserí꞉hen ne Palestine nón꞉we wahatirihwà꞉ronhke nónhne. Tánon ó꞉ni ne ronhtinonhtí꞉ios ne iowenokwáseron ne tsi watonhwenhtsá꞉ien ne Mediterranean Kaniatarakeʼkó꞉wa wahatiriwà꞉ronhke nónhne. Iekaníhare ne Thontinonhtí꞉ios tsi nió꞉re ne othorè꞉ke nòkwah ronatohetsthákwen ne Lebanon wahatiriwà꞉ronhke tsi nihonatkweniónhkwen ne Israerʼró꞉nons. Kí꞉ken ronhtinonhtí꞉ios ne wahatiriwà꞉ronhke tsi nihonatkweniónkwens ne Israerʼró꞉nons né꞉ne sakotinonhtí꞉ios ne Hitró꞉nons, ne Amorʼró꞉nons, ne Canaanites, ne Perizró꞉nons, ne Hivró꞉nons, ó꞉ni ne Jebusites.

² Ratikwé꞉kon tahón꞉ne skarí꞉wa wahonón꞉ni iathonnhitioʼwaiésthe nahonterí꞉io ne Joshua ó꞉ni Nisraerʼró꞉nons.

³ Ók nonhkweshón꞉as ne Gibeon nón꞉we, Né꞉ne Hivró꞉nons nahatinekwenhsó꞉ten, rotirihwarónhken ne Joshua tsi nishakoierà꞉se ne Jericho ó꞉ni ne Ai,

⁴ tánon iathotirihwaiénthaʼse nahonwaʼnikonhráten. Tewahóntes wakonwatirienónhnien. Iahónhne tánon né꞉ne iohiarakahiónserons thontahatí꞉rathe natenátseras ó꞉ni ne kanéhonk ionatsathawí꞉ton ne onenharataʼsehontsherákeri kà꞉tses.

⁵ Ioterahtiónhkwen natserónhniat wahontserónhniate tánon iothakwakahiónsons ne skasehrón꞉ni. Ne kanà꞉tharo iahatíhawe iostatén꞉en tánon iótkens.

⁶ Ethò꞉ne tsi tonaná꞉taien ne Gilgal niahón꞉ne tánon wahonwénhase ne Joshua ó꞉ni ne Israerʼró꞉nons, “Ahí꞉non nió꞉re tsionhontsá꞉ien nitionhkwè꞉non. Tehionkwatonhwenhtsóni nahitewatsanerenhserón꞉ni.”

⁷ Ók ki ne Israerʼró꞉nons wahonhní꞉ron, “Onhnonhtié꞉ren tsi í꞉se atewatsanerenhserón꞉ni? Tó꞉ka nón꞉wa ákta sewénhteron.”

⁸ Wahonwénhase ne Joshua, “Í꞉i ne sanhátseras í꞉ken.” Ne Joshua washakoriwanónhtonhse, “Ónhka ní꞉se? Kanitisewè꞉non?”

⁹ Ethò꞉ne wahonwakaratónhase: “Kwáh í꞉ken tsi ahí꞉nonh nió꞉re tionhontsá꞉ien nitionhkwè꞉non, Shé꞉shion, tiorì꞉wa tsi washakwasenhnáronhke ne Roiá꞉ner Saní꞉io. Kwáh akwé꞉kon hionkwariwarónhken tsi nihoié꞉ren ne Egypt nón꞉we.

¹⁰ Tánon tsi nishakoieráse ne teninonhtihioʼtserá꞉ke ne Amorʼró꞉nons né꞉ne ná꞉kon nokwá꞉ti ne Jordan: ne ronhnonhtí꞉io Sihon ne Heshbon ó꞉ni ne ronhnontí꞉io Og ne Bashan, ne raónha Ashtaroth nón꞉we nihanákereʼkwe.

¹¹ Ne hionkihéntenhse ó꞉ni ratikwé꞉kon nonhkweshón꞉as ne hontionhontsá꞉ke ratinákere wahonkiró꞉ri nahiakwaweienénhthaʼne ne kákhwa ne thahiakwatáhakwe tánon ne iathakwaterà꞉te. Wahonkiró꞉ri iahiakwathatatkà꞉we ne sanhátsera ahiakwáton tánon nakwariwanónhtonhse nahitewatsanerenhserón꞉ni.

¹² Skenhénhion nonhkwanà꞉taro. Ne shonthahiakwaténhti thahiakwáhawe tahiakwatʼthahíta ne tahitewatátken, shé꞉kon sihionataratharí꞉hen. Ók skenhénhion! Ó꞉nen iostaʼten ó꞉ni iótkens.

¹³ Ne sahakwahnanónhkon kí꞉ken onenharataʼsehontsherákeri kaʼtsheshón꞉as ne kanéhonk ioteró꞉rons, otsethasesón꞉has kén꞉ne, ók skenhénhion! Ioteratsiónhkwen. Nonhkwaʼtserón꞉niat ó꞉ni ne onhkwátas ioriwenhtháserons ne tsi nihioháhes tsi nonhtahiákwe.”

¹⁴ Ne Israerʼró꞉nons ostónha wahatihienásehrons ne kákhwa tsi tahonwénhnon, ók iáh ki tehonwarihwaién꞉ni ne Roiá꞉ner né꞉tho aorì꞉wake.

¹⁵ Ne Joshua warónhni ne skén꞉non ateriwaʼseronhniá꞉tshera í꞉ken skátke ne Gibeonró꞉nons tánon washakorí꞉hon nahonónhneke. Ne shakotihentènse ne tsi ratinakerahserá꞉ien ne Israerʼró꞉nonhke tahóntkaʼwe ne kariwanirá꞉tshera wahonráratsthe tsi enhathikwéniensthe naterihwaʼseronhniá꞉tshera.

¹⁶ Áhsen-nónhta onakénhke tsi náhe tká꞉son naterihwaʼseronhniá꞉tshera, Nisraerʼró꞉nons wahòn꞉ronke né꞉tho onhkweshón꞉as tsi ákta ratinákere.

¹⁷ Káti nonhkweshón꞉a hiahón꞉ne tánon áhsen-nónhta onakénhke iahónhnewe tsi tkanatowanénhke tsi nón꞉we kí꞉ken onhkweshón꞉as nihathinákere: né꞉ne Gibeon, Chephirah, Beeroth, tánon ne Kiriath Jearim.

¹⁸ Ók Nisraerʼró꞉nons iáh tehiotónhon nahonwathinonhwariaʼkónhnion, tiorì꞉wa ne sakotihenténhse tsi kwáh rotirihwanirá꞉ton tsi ronwanarahratstén꞉ni thóh rahosénhnakon ne Roiá꞉ner, ne Israerʼró꞉nons Ronwaní꞉io. Onhkweʼtakwé꞉kon iahonwatirihwakà꞉tatse ne shakotihenténhse ki aorihwà꞉ke,

¹⁹ ók wathatirihwaʼserá꞉ko, “Kwáh hionkwarihwanirá꞉ton tsi hiakihiarahratstén꞉ni thóh raoshén꞉nakon ne Roiá꞉ner Raní꞉io ne Israerʼró꞉nonke. Ó꞉nenh kiʼ iáh thetionkwahianerenhserá꞉ien nahonsahiakhikaré꞉waʼthe.

²⁰ Ó꞉nenk tsi enhiakhirí꞉hon nahonhnón꞉neke tiorì꞉wa tsi hionkwarahrátston; tó꞉ka enhiakhikaré꞉waʼthe, Rawenni꞉io enshonkwaré꞉waʼthe.

²¹ Iawerohá꞉tien ronónnhek, ók ó꞉nenk tsi tehatiienhtsiáke ó꞉ni enhionkhinekakaréhnien.” Toh ki ní꞉ioht ne sakotihenténhse tsi wahontherientaʼtshén꞉ri.

²² Ne Joshua wahathénhnane ne Gibeonró꞉nons rahohén꞉ton nahontahonwatihiaʼténhawe, tánon washakorihwanónhtonhse, “Onhnonhtié꞉ren tsi waskwaʼnikonhráhten tánon waskwaró꞉ri tsi ahí꞉non nió꞉re nitisewè꞉non, tánon kwáh kénhenk khók ákta sewanákere?

²³ Káti tsi ki thóh neʼsewá꞉iere, Ne Rawenni꞉io watsisewaréwaʼthe. Ne tionhkweʼtashón꞉as kwáh tió꞉konte tsi ensewanáskwa enhkénhake, tensewaientiaksé꞉ke tánon ensewanekakareniè꞉seke né꞉ne Rahononhsatokenhtí꞉ke aorihwà꞉ke nakeʼNí꞉io.”

²⁴ Tsi wathatirihwaʼserá꞉ko, “Thóh nahakwáiere, shén꞉shion, tiorì꞉wa tsi wahakwarihwà꞉ronke tsi kwáh tósken í꞉ken né꞉tho Roiá꞉ner Saní꞉io tsi rohró꞉ri ne raonhátsera Mahís tsi ohontsakwé꞉kon ahontáhion tánon nashakononhwariaʼkónhnion nonhkweshón꞉as tsi nihatinakeré꞉nions tsi nienhénse. Thóh nahakwáiere tiorì꞉wa tsi kwaʼtsá꞉nis; hionkwatéronskwe tsi nihiatsionhnhiénion.

²⁵ Ó꞉nen ki nón꞉wa shashatstenhserá꞉kon nón꞉we nihionkwathaténron; thóh naʼthakwaiéras tsi nisé꞉re tkariwaié꞉ri.”

²⁶ Káti ken nahá꞉iere ne Joshua: thashakóne tánon iáh teshakorihwá꞉wi nonhkweshón꞉as Nisraerʼró꞉nonhke nahonwatinonhwariaʼkón꞉nion.

²⁷ Ók ki neksáke washakotenaskonhnià꞉the, ne tahatihientiákseke tánon nasakotinekakarenié꞉sheke nonhkweshón꞉as Nisraerʼró꞉nonhke ó꞉ni ne tsi ratsienharákwa ne Roiá꞉ner. Shé꞉kon nón꞉wa wenhniserá꞉te iehothikonhthákwen tsi thóh ní꞉ioht tsi rothihiò꞉the tsi nonhwésons ne Roiá꞉ner rorákwen nahonwasenhnaienthá꞉kwake.