Jonah 4 - Ohiatonhseratokénti

Raonaʼkhwáhtshera Ne Jonah Tánon Ne Rawenni꞉io Raotanitén꞉rat

¹ Kí꞉ken tonsontá꞉ton ne orihwaʼshón꞉ʼa wahahonnhà꞉ksaʼte ne Jonah, tánon kwáh í꞉ken tsi wahonàkhwen.

² Sók ki Roiá꞉ner iahorihwakà꞉tatshe, “Iáh ken tewá꞉ken ne ohén꞉ton shontakahtén꞉ti tsi kwáh kiʼ eʼtho nénhshiere, Saiá꞉ner, ne waʼkarihón꞉ni Spain nón꞉we iaʼkateʼkwáshen! Wakaterién꞉tarahkwe tsi sá꞉ien ne kanoronhkhwáhtshera ó꞉ni satanitén꞉ron Sewenní꞉io, saiaʼtakenhé꞉ion ne aesanà꞉khwen ó꞉ni kanáhnon ne iáh teiorihwanó꞉ronʼs kanoronhkhwáhtshera. Wakaterién꞉tarahkwe tsi niwatié꞉sen ne taonsahstá꞉ton ne sarihwaʼshón꞉ʼa ne tóhsa ahsheiá꞉tonʼte kí꞉ken onkweʼshón꞉ʼa.

³ Takeríhon ne akíheie, Saiá꞉ner, ne aontakerá꞉ko ne aonkihé꞉ion tsi ní꞉ioht ne akónhnheke.”

⁴ Ne Roiá꞉ner waʼthorihwaʼserákwaʼse, “Tkaié꞉ri ónhte ken ne aesanahkhwén꞉hake kí꞉ken aorihwá꞉ke?”

⁵ Eʼthóʼne ne Jonah tsi tkarahkwí꞉nekenʼs nonkwá꞉ti niahá꞉re iaʼthanatóhtkaʼwe tánon wahatatón꞉nien ne ahaterahkwawehrostáhkwe tánon eʼtho nà꞉kon wahátien ne aʼhatehrhá꞉rate kaʼshí꞉ken ohnenioiá꞉tawen ne Nineveh.

⁶ Eʼ thóʼne ne Roiá꞉ner Rawenni꞉io wahakwatá꞉ko ne kwáh iotenerahtaká꞉te ó꞉kwire eʼtho nón꞉we naʼká꞉nio, tánon kwáh iohstó꞉re tsi waʼtioʼnenhrowáhnha ne é꞉neken tsi rotenontsìs꞉tate ne Jonah, wahorahkwawéhroste. Ohstónha kiʼ waʼkakwé꞉ni sahoiaʼtanónhstate, tánon ne Jonah tsi nahawerienʼtí꞉io tsi eʼtho wakakwirá꞉nio.

⁷ Nok ne Rawenni꞉io kwáh ó꞉ni karontakáhrha eʼtho wahén꞉teron! Ne ó꞉ia saiórhénʼne shontakarahkwí꞉nekenʼne ne karontakáhrha kwáh iatiótkaʼwe noʼténhnhake tsi waʼkakwí꞉rake, tánon kwáh iohstó꞉re tsi waʼkakwirakénheie tánon onhstáthen.

⁸ Ne ó꞉nen shitiorakwinekén꞉en, ne Rawenni꞉io iahatén꞉niehte tsi tkarahkwí꞉nekens naʼontakawerénhawe ne kwáh ioweratarí꞉hen, tánon ó꞉nen ne Jonah skanó꞉rons nahoʼnikonhráhton tsi niiorahkwataríhen tsi teiaó꞉ien ne ranontsì꞉ne. Sók kiʼ wahaská꞉neke narénheie. Wahén꞉ron, “Sénha ne ioiá꞉nere akíheie tsi ní꞉ioht nakónhnheke.”

⁹ Eʼthóʼne ne Rawenni꞉io wahawén꞉hase ne Jonah, “Tkarihwaié꞉ri ónhte ken ne aesanaʼkhwén꞉hake tiorí꞉wa ne tho iokwiróthe tsi waʼkénheie?” Tsi waʼtharihwaʼserá꞉ko ne Jonah, “Tahonà꞉khwen kwáh iaʼtekaié꞉ri tsi niwakenaʼkhwén꞉en ne akíheie!”

¹⁰ Eʼthóʼne ne Roiá꞉ner wahawén꞉hase, “Kiʼ ó꞉kwire sewahsónta khók ontehiá꞉ron nok eʼthok thonsónhton tsi saiór꞉henʼne; iáh thé꞉nen tesatokaʼtá꞉on iáh niʼ ó꞉ni í꞉se tehshehiá꞉ron—nek kiʼ shá꞉ka sehnhá꞉tens!

¹¹ Thó shé꞉kon niiorí꞉wake, akheténhrake ne Nineveh, ne eʼtho kanatowá꞉nen. Eʼtho kí nen né꞉e, í꞉si nón꞉we ne énska tewenʼniá꞉we niwenniaweʼetserá꞉sen niionkwé꞉take ne eʼtho ratinákere ne iáh tehonaterién꞉tare ne tkarihwaié꞉ri tánon ne karihwàksen, ó꞉ni ionatiohkowá꞉nen ne kontitshé꞉nen.”